Ɛ́zùɖùà 7 - Ɓǎsɔ́ɔ̀ Báɓòɔ̀

Ɛ́zùɖùà nyini Jùɖúsɛ̀ɖɛ̀ìn-hwɔ̀ɖɔ̀ɔ̀ mú

^1-6 Ɖé Àtàzɛ́sì mɔ̀à Pɔ́sìà-kã̀ǎɔ̀ kɛɛ nììn ɓóɖó-wuɖuí-kɔ̃̀-tìɔ̀ múɛɛ, gàa ɖò kɔ̃̀ nyɛ́nɛ́ mɔ̀ Ɛ́zùɖùà kɛɛ sɔ̀ ma ɖé Báɓèɖɔ́ùn-ɓòɖòɔ̀ kɔ̃, ké ɔ dyi ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú. Ɛ́zùɖùà ɓǎ ɓěɛ̀ gbǒ-xwíníínɔ̀ kɛà kɛ̀. Eɖóún mɔ̀ ma kà sáa-zà-nyɔ̀ vɛ̀nɛ̀ɔ̀ kɛɛ wóɖóìn ma Ɛ̀ɖɛ̀ázà, ké Ɛ̀ɖɛ̀ázà wóɖóìn ma Fíníhà, ké Fíníhà wóɖóìn ma Ábìsúà, ké Ábìsúà wóɖóìn ma Búkì, ké Búkì wóɖóìn ma Dyúzì, ké Dyúzì wóɖóìn ma Zɛ̀wáɖáhìà, ké Zɛ̀wáɖáhìà wóɖóìn ma Mɛ̀wáɖádyò, ké Mɛ̀wáɖádyò wóɖóìn ma Ázàwíɖíà, ké Ázàwíɖíà wóɖóìn ma Ámàwíɖíà, ké Ámàwíɖíà wóɖóìn ma Àhítù, ké Àhítù wóɖóìn ma Záɖò, ké Záɖò wóɖóìn ma Sáɖùùn, ké Sáɖùùn wóɖóìn ma Hìòkíà, ké Hìòkíà wóɖóìn ma Ázàwíɖíà, ké Ázàwíɖíà wóɖóìn ma Sɛ̀wáɖádyà, hwɛ̀ ké Sɛ̀wáɖádyà wóɖóìn ma Ɛ́zùɖùà. Ɛ́zùɖùà-gàà nìà kɛ mɔ̀ ma céè-ɖɛ̀ céè-nyɔ̀ ɓɛ́ ɔ dyuò gma ɓɛ́ Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ tòìn zɔ̃̌ɔ̀ kà Mózè múɛɛ ní mìɔ cá kɛ. Ti ɓɛ́ Ɛ́zùɖùà nì ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú muɛń nyɛɛ, Kã́á Àtàzɛ́sì nyí ma ɔ ɖɛ séín ɓɛ́ ɔ zɔ̀ìn ma ɔ kɛɛ ní, sepóɛɖé Bounɓoɔ̀ nì ma ɓó ɔ gbo.

⁷ Ké Éézùɖùɛ̀-nyɔ̀ ɖíɛ́ ɓě ɓɛ́ wa kè Ɛ́zùɖùà dyi ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú ɖé Àtàzɛ́sì nììn ɓóɖó-wuɖuí-kɔ̃̀-zɔ̃̀ɔ̀ mɛ̀nɛ̌ìn-sɔ̃́ nììnɔ̀ xwíníín ɖekèɛɛ hwɔìn kà sáa-zà-nyɔ̀ ɓěɔ̀ ɖíɛ́ ɓě kè Ɖíìváà-nyɔ̀ ɓěɔ̀ ɖíɛ́ ɓě kè ɓeɖe-nyɔ̀ ɓěɔ̀ ɖíɛ́ ɓě kè Gèɖèpɔ́ɔ̀ gbǒɔ̀ dyí-gmɔ̀-nyɔ̀ ɓěɔ̀ ɖíɛ́ ɓě ɔ kè Gèɖèpɔ́ɔ̀ gbǒɔ̀ mú-kũ̀à-nyu-nyɔ̀ ɓěɔ̀ ɖíɛ́ ɓě.

⁸ Ɛ́zùɖùà nyini ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ɖé Àtàzɛ́sì nììn ɓóɖó-wuɖuí-kɔ̃̀-zɔ̃̀ɔ̀ mɛ̀nɛ̌ìn-sɔ̃́ nììnɔ̀ dɛ̀nɛ̀ hm̀m̌ nììnɔ̀ xwíníín.

⁹ Ɔ sɔ̀ ma ɖé Báɓèɖɔ́ùn-ɓòɖòɔ̀ kɔ̃ dyí ɓó dɛ̀nɛ̀ kĩ́ín-kĩ́ínɔ̀ wé kĩ́ín-kĩ́ínɔ̀ ɓaɖa, ké ɔ nyini ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ɓó dɛ̀nɛ̀ hm̀m̌ nììnɔ̀ wé kĩ́ín-kĩ́ínɔ̀ ɓaɖa, sepóɛɖé ɔ Gèɖèpɔ́ɔ̀ nì ma ɓó ɔ gbo jè.

¹⁰ Ɔ nì ma ná, sepóɛɖé Ɛ́zùɖùà hwòɖǒ jìnìɛ̀n ma kɔ̃ kóɖó-kóɖó kà ɓɛ́ ɔ ké Bounɓoɔ̀ gmaɔ̀ jè cɛ̃́, nìí ɓɛ́ ɔ kéɛ dyi kpɔ̃, nìí ɓɛ́ ɔ kéɛ Éézùɖùɛ̀-nyɔ̀ ɓěɔ̀ tɛ̀mɛ̀ìn ɖekèɛ.

Céè-ɖɛ̀ ɓɛ́ Kã́á Àtàzɛ́sì nyí ma Ɛ́zùɖùà kɛ

¹¹ Ɛ́zùɖùà mɔ̀ ma sáa-zà-nyɔ̀ kè céè-ɖɛ̀ céè-nyɔ̀ ɓɛ́ ɔ cɛ̃́ ma Bounɓoɔ̀ gma ɓěɔ̀ nɛ̀ɛ̀-nɛ́ɛ́-kà kɛ. Wa mɔ̀ gma ɓě ɓɛ́ Bounɓoɔ̀ tò zɔ̃̌ɔ̀ ɓó Éézùɖùɛ̀-nyɔ̀ ɓěɔ̀ bììɛ. Céè-ɖɛ̀ ɓɛ́ Kã́á Àtàzɛ́sì nyí ma Ɛ́zùɖùà kɛɛ kɛà kɛ̀. Céè-ɖɛ̀ɔ̀ wuɖu ɖá,

¹² “Mɔ̄ Àtàzɛ́sì mɔ̀à kã́á ɓó kã́á séín kɔ̃in nyɛɛ, ḿ zà mɔ̀ Ɛ́zùɖùà nyíɔún. Mɔ̀ mɔ̀ nyɔ mɔ̀à sáa-zà-nyɔ̀, ké m̀ dyuòà dyɔún Gèɖèpɔ́ɔ̀ gmaɔ̀ nɔ̀mɔ̀ dyíin nyɛ.

¹³ “Ḿ nì wuɖu nìà kɛ tòɛ̌n ɓó kàǔn kà Éézùɖùɛ̀-nyɔ̀ kã̀ìn séín, kɛbì wa mɛ mɔ̀ sáa-zà-nyɔ̀ mɔɔ Ɖíìváà-nyɔ̀ ɓɛ́ wa nì ní kã́á-ɓòɖòɛ̀ dà séín, ké waà hwòɖǒ mɔ́ Jùɖúsɛ̀ɖɛ̀ìn-hwɔ̀ɖɔ̀ɔ̀ mú muɛ dyiɛɛ, m̀ kè wa mɛ muɛ.

¹⁴ Mɔ̄ kã́áɔ̀, ḿ kè ní gɔ̌mànà-nyɔ̀ vɛ̀nɛ̀ mɛ̀nɛ̌ìn-sɔ̃́ ɓěɔ̀ mɔ̀ nyɔ nì m̀ ɖoɓoɛń, ɓɛ́ m̀ ké Júɖà-ɓòɖòɔ̀ kè Jùɖúsɛ̀ɖɛ̀ìn-hwɔ̀ɖɔ̀ɔ̀ jè múin ɖe, ɓɛ́ m̀ kéɛ dyé kɛbì wa nì Gèɖèpɔ́ɔ̀ gma ɓɛ́ ɔ nìà m̀ xwaa dyi kpɔ̃uń ní.

¹⁵ Ké ɓó kɔ̃in ɖeɛɛ, m̀ mɛ kpa séɓàɖà kè góò ɓɛ́ mɔ̄ kã́áɔ̀ kè ní gɔ̌mànà-nyɔ̀ vɛ̀nɛ̀ ɓěɔ̀ ɖǎ Éézùɖùɛ̀ Gèɖèpɔ́ɔ̀ kɔ̃̀ cĩ́-naín nìà ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ nyí hwòɖǒ-wáɖáá-kà kɛ.

¹⁶ Ké m̀ mɛ kpa séɓàɖà kè góò séín ɓě ɓɛ́ nì mu Báɓèɖɔ́ùn-ɓòɖò gànáɔ̀ kɔ̃ dyéìn nyɛ ɔ kè hwòɖǒ-wáɖáá-nyìǐ-ɖɛ̀ ɓě ɓɛ́ Éézùɖùɛ̀-nyɔ̀ ɓěɔ̀ kè sáa-zà-nyɔ̀ ɓěɔ̀ mu tòùn ɓó waà Gèɖèpɔ́ɔ̀ gbǒ nìà ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ jè kɛ.

¹⁷ “M̀ mɛ nyùìn wíɖíɔ̀ kũ̀à mú nɔ̀mɔ̀ dyíin, ɓɛ́ m̀ ké sáa-zàìn-ɖɛ̀ ɓě dɔ̃. Sáa-zàìn-ɖɛ̀ ɓěɔ̀ hwɔìn kà ɓìɖǐ ɓíɔ́ ɓě kè ɓáɖáá ɓíɔ́ ɓě kè ɓáɖáá-dyù ɓě kè ɖii-ɖɛ̀-sàǎ-zàìn-ɖɛ̀ ɓě ɔ kè náá-ɖɛ̀-sàǎ-zàìn-ɖɛ̀ ɓě. M̀ mɛ zàìn ɖɛ ɓěɔ̀ sáa ɓó ɓěɛ̀ Gèɖèpɔ́ɔ̀ gbǒɔ̀ nììn sáa-kɔ̃-zàìn-gbààɔ̀ kɔ̃, ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú.

¹⁸ Sɔ̀ìn ɓóɛ gboɛɛ, nìí, ɖɛ kã̀ìn séín ɓɛ́ Gèɖèpɔ́ɔ̀ mu ɖé m̀ kè nì mǔè Éézùɖùɛ̀-nyɔ̀ ɓěɔ̀ hwòɖǒ bũ̌ poùn wɛ̃ɛ, ɓě mɛ nyùɛ̀n séɓàɖà kè góò tɔ̀ɔ̀ mu ɓó sèìn nyɛɛ mú.

¹⁹ Ké ɖɛ-fùù ɓě ɓɛ́ ḿ ɖǎà m̀ nyí ɓó kũ̀à ɓě nì ɖé nì Gèɖèpɔ́ɔ̀ gbǒɔ̀ múɛ jèɛɛ, m̀ mɛ kpa wa, ɓɛ́ m̀ ké wa nì Gèɖèpɔ́ɔ̀ nìà ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ nyí.

²⁰ Ɖɛ kã̀ìn séín sè ɓó ɓɛ́ nì mu mɔ́ùn ɖe ɓó nì Gèɖèpɔ́ɔ̀ gbǒɔ̀ jèɛɛ, m̀ mɛ zàà ɖéɛ kã́á wíɖí-dyi-dèìn-naínɔ̀.

²¹ “Ké mɔ̄ Kã́á Àtàzɛ́sì nì wuɖu nìà kɛ tòɛ̌n ɖé wíɖí-dyi-dè-nyɔ̀ séín ɓě nìà ɖé ɓóɖó ɓě nìà ɖé Dyùféɖétì-nìɔ̀ ɖeín nyɛɛ gbo. Ɖɛ kã̀ìn séín ɓɛ́ Ɛ́zùɖùà mɔ̀à sáa-zà-nyɔ̀, ké ɔ mɔ̀à céè-ɖɛ̀ céè-nyɔ̀ ɓɛ́ ɔ dyuòà dyɔún Gèɖèpɔ́ɔ̀ gmaɔ̀ dyí nɔ̀mɔ̀ dyíin nyɛɛ mu ɖé ɓě xwaún mɔ́ùn wɛ̃ɛ, ɓě mɛ tòɛ̀ séín. Ɓěǐn ɖá ɓɛ́ ɓě ké ɖò ɓíɖíi sè.

²² Ɖɛ ɓě ɓɛ́ ɓě mu ɔ nyíìn nyɛɛ ɓɛ́ìn kà séɓàɖà kɔ̃̀ xwa-ku-ku mɔ̀ pṹá-dyèɖè táázĩ̀ìn mɛ̀nɛ̌ìn-sɔ̃́ kè hɔ̃dɛ̀ɖɛ̀ hm̀m̌ wɛ̃ kè hwítì gbǎ-wĩín-wè táázĩ̀ìn sɔ̃́ kè wã́ìn-dɔ̀nɔ̀ùn-wè ɓaɖa-bùè kè cáná-dɔ̀nɔ̀ùn-wè ɓaɖa-bùè ɔ kè tɔ̃́-ɓɔ̀ɔ̌ jĩ̀ kà ɓɛ́ ɔ mɔ́ɛɛ jǔɛ.

²³ Ɖɛ kã̀ìn séín ɓɛ́ dyɔún Gèɖèpɔ́ɔ̀ mɔ́ ɓá ɔ gbǒɔ̀ jè dyíɛɛ, ɓě mɛ nyuɛ náa séín nyɛ̀nɛ̀ɛ̀, ɓɛ́ dyɔún Gèɖèpɔ́ɔ̀ ní kɔ̃̀ ɖà kã́áɔ̀ kè ɔ dyú-gàà ɓěɔ̀ dyoɖoún kpáìn.

²⁴ Ḿ nì ɓě bɔ̃̌ǔn poɛń ɖekè kà ɓɛ́ ɓě mɛ ɓɔ́ sáa-zà-nyɔ̀ ɓěɔ̀ mɔɔ Ɖíìváà-nyɔ̀ ɓěɔ̀ mɔɔ ɓeɖe-nyɔ̀ ɓěɔ̀ mɔɔ Gèɖèpɔ́ɔ̀ gbǒɔ̀ dyí-gmɔ̀-nyɔ̀ ɓěɔ̀ mɔɔ Gèɖèpɔ́ɔ̀ gbǒɔ̀ mú-kũ̀à-nyu-nyɔ̀ ɓěɔ̀ mɔɔ kũ̀à-nyu-nyɔ̀ ɖò ɓá Gèɖèpɔ́ɔ̀ gbǒɔ̀ dyíɛɛ tácì-wìɖì ɖò xwaún kpɔ̃ɔ kɛ.

²⁵ “Ɛ́zùɖùà, ḿ zà m̀ wuɖu kɔ̃, ɓɛ́ m̀ ké nì Gèɖèpɔ́ɔ̀ fɔ̀nɔ̀-hwòɖǒ nìà ɖé m̀ múɛɛ kũ̀à mú nyùìn, ɓɛ́ m̀ ké tɔ̀ɔ̀-ɓìɔ̀ ɓě kè gɔ̌mànà-nyɔ̀ tɔ̀ɔ̀ ɓě gã, ɓɛ́ wa ké nyɔ séín ɓě cĩ́à ɖé ɓóɖó ɓě nìà ɖé Dyùféɖétì-nìɔ̀ ɖeín nyɛ kɔ̃ɛɛ nàìn. Wa mɛ dyuò nì Gèɖèpɔ́ɔ̀ gmaɔ̀, ké nyɔ ɓě ɓɛ́ wa seɛ dyuòɛɛ, wa mɛ tɛ̀mɛ̀ìn wa.

²⁶ Nyɔ mɔ̀ nyɔ ɓɛ́ ɔ se nì Gèɖèpɔ́ɔ̀ gmaɔ̀ kè kã́áɔ̀ nììn gmaɔ̀ dyi kpɔ̃ùn wɛ̃ɛ, m̀ mɛ tò ɔ gǎ kɔ̃ wàɖà, kɛbì ɔ mɛ mɔ̀ nyɔɔ̀ ɖáɓá-ɖáɓá mɔɔ ɔ woɖo gbo cɛ̃-cɛ̃ mɔɔ ɔ kɔ̃̀ɔ̀-ɖɛ̀ ɓě xwai zà-zà mɔɔ ɔ kpɔɖɔ ɖeín po-poɛ.”

Ɛ́zùɖùà ɓàìn Gèɖèpɔ́ɔ̀

²⁷ Ti ɓɛ́ kã́áɔ̀ ɖǎ ma Ɛ́zùɖùà céè-ɖɛ̀ɔ̀ nyíɛɛ, Ɛ́zùɖùà ɓàìn ma Bounɓoɔ̀, ké ɔ ɖá, “Ḿ po Bounɓo mɔ̀à à ɓǎ ɓěɛ̀ Gèɖèpɔ́ɔ̀ kɛɛ zùo, nyɔ mɔ̀ nyɔ poà ɖɛ nì kàà ɖé kã́áɔ̀ hwòɖǒ bũ̌, ɓɛ́ ɔ kéà Bounɓoɔ̀ gbǒ nìà ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ xwa nɔ̀mɔ̀ìn nyɛ.

²⁸ Ɔ mɔ̀ nyɔ tɛ̀mɛ̀ìn kà ɔ ɖɛ̀ɓɛ̀ǐn-ɖɛ̀ɓɛ̀ǐn se-sèìn-naín-kɔ̃̀ɔ̀ ḿ dyí, ɓɛ́ ɔ dyià nyu ɓɛ́ kã́áɔ̀ kè ɔ gɔ̌mànà-nyɔ̀ vɛ̀nɛ̀ ɓěɔ̀ kè ɔ gɔ̌mànà-nyɔ̀ tɔ̀ɔ̀ ɓěɔ̀ hwòɖǒ dyià ḿ múin dèìn nyɛ. Bounɓo mɔ̀à ní Gèɖèpɔ́ɔ̀ kɛɛ nì ma ɓó ḿ gbo, ké ḿ po ma hwòɖǒ ɓo xwíɖíi, ké ḿ poìn ma Éézùɖùɛ̀-nyɔ̀ vɛ̀nɛ̀ ɓě dyí, ɓɛ́ ḿ kè wa ké mu.”