Ɛ́zùɖùà 6 - Ɓǎsɔ́ɔ̀ Báɓòɔ̀

Wa dyé wuɖu ɓɛ́ Sáwàɖà céè ma kɛɛ da

¹ Hwɛ̀ ké Kã́á Dìwáɖádyà tò ma wuɖu, ké wa gmɔìn ma kpáá-ɖɛ̀-sùà-cèè-ɖɛ̀ ɓěɔ̀ múin ɖé Báɓèɖɔ́ùn-ɓòɖòɔ̀ kɔ̃, ɖé céè-ɖɛ̀ ɓěɔ̀ dyi-dèìn-naínɔ̀.

² Púɛɛ, wa dyé ma céè-ɖɛ̀ ɖò ɖé Míì-ɓòɖòɔ̀ dìɓà-hwɔ̀ɖɔ̀ kɔ̃̀ nyɛ́nɛ́ mɔ̀ ma Ɛ̀bátànà kɛɛ mú. Ɖɛ céè ma ɖé céè-ɖɛ̀ɔ̀ múɛɛ kɛà kɛ̀. Ɔ ɖá,

³ “Ɖé Sáwàɖà mɔ̀à kã́áɔ̀ kɛɛ nììn ɓóɖó-wuɖuí-kɔ̃̀-zɔ̃̀ kĩ́ín-kĩ́ínɔ̀ xwíníín nyɛɛ, ɔ tò ma wuɖu nìà kɛ ɓá Gèɖèpɔ́ɔ̀ gbǒ nìà ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ jè dyí. Wuɖuɔ̀ ɖá, ‘Wa mɛ po gbǒɔ̀ ɖe, ɓɛ́ ɔ ké pá kɔ̃̀ mú ɓɛ́ wa nyùìn sáa-zàìn-ɖɛ̀ ɓěɛɛ jǔ. Gbǒɔ̀ dya-tɔ̀mɔ̀-tɔ̀mɔ̀ mɛ mɔ̀ ɓáɖáa ɓaɖa-bùè sè hm̀m̌, ké ɔ xwíɖí-kù mɛ mɔ̀ ɓáɖáa ɓaɖa-bùè sè hm̀m̌.

⁴ Ti wa mu gbǒɔ̀ poɛń nììn nyɛɛ, wa dyi sɔ́ɔ́-dɔ̃̀ǐn tã dè ní, wa mɛ dè ɓó cu-kpóɖó dɔ̃̀ǐn dyúáɖò. Kũ̀à séín ɓá gbǒɔ̀ jè dyíɛɛ wíɖí mɛ sɔ̀ ɖé kã́á wíɖí-dyi-dèìn-naínɔ̀.

⁵ Ké wa mɛ ɖú góò kè séɓàɖà-ɖɛ̀-fùù ɓě ɓɛ́ Nɛ̀ɓùkànɛ́zà zà zɔ̃̌ɔ̀ kà ɖé Gèɖèpɔ́ɔ̀ gbǒɔ̀ mú ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ɓɛ́ ɔ dyiɛ zɔ̃̌ɔ̀ kà Báɓèɖɔ́ùn-hwɔ̀ɖɔ̀ɔ̀ mú dyàa dyí, ɓɛ́ wa kéɛ ɖé Gèɖèpɔ́ɔ̀ gbǒ nìà ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ mú ɖe kpa, ɓɛ́ wa kéɛ ɖò-ɖò séín ɖé ɔ páɔ̀ mú po ɖe ɖé Gèɖèpɔ́ɔ̀ gbǒɔ̀ mú.’ ”

Dìwáɖádyà zà kũ̀àɔ̀ wuɖu kɔ̃ ɓɛ́ ɔ ké dyúa mu

⁶ Sɔ̀ìn ɓóɛ gboɛɛ, Dìwáɖádyà tò ma céè-ɖɛ̀, ké céè-ɖɛ̀ɔ̀ wuɖu ɖá, “Tàténàì, mɔ̀ mɔ̀à ɓóɖó ɓě nìà ɖé Dyùféɖétì-nìɔ̀ ɖeín nyɛɛ wuɖuí-kɔ̃̀-nyɔ̀ɛ kè Séfà-Bózɛ̀nàì kè ɓě mǔè ɓě nìà ɖé ɓě gboɛɛ, ɓě sɔ̀ kũ̀àɔ̀ jè bũ̌.

⁷ Ɓě sɔ̀ Gèɖèpɔ́ɔ̀ gbǒɔ̀ po-kũ̀àɔ̀ jè bũ̌. Ɓě táà Júù-nyɔ̀ ɓěɔ̀ gɔ̌mànàɔ̀ kè waà nyɔ vɛ̀nɛ̀ ɓěɔ̀ dyi, ɓɛ́ wa ké Gèɖèpɔ́ɔ̀ gbǒɔ̀ ɓóɛ gbǒ-kpũ̀ɔ̀ɔ̀ kɔ̃ po ɖe.

⁸ Ké ɓó kɔ̃in ɖeɛɛ, ḿ nì wuɖu ɖò tòɛ̌n ɖe ɓá ɖɛ ɓě ké Júù-nyɔ̀ vɛ̀nɛ̀ ɓěɔ̀ bìì nyu ɓá Gèɖèpɔ́ɔ̀ gbǒɔ̀ po jè dyíɛɛ dyí. Wuɖuɔ̀ mɔ̀, wíɖí séín ɓá Gèɖèpɔ́ɔ̀ gbǒɔ̀ po jè dyíɛɛ, ɓě mɛ zàà ɖéɛ kã́á wíɖí-dyi-dèìn-naínɔ̀. Ɓě ɓɔ́ ti ɖò zĩ̀ɛ̀n ɓóɛ nyu jè. Wíɖíɔ̀ mɛ mɔ̀ tácì-wìɖì sɔ̀à ɖé ɓóɖó ɓě nìà ɖé Dyùféɖétì-nìɔ̀ ɖeín nyɛɛ múɛ.

⁹ Ké ɖɛ kã̀ìn séín ɓɛ́ sáa-zà-nyɔ̀ ɓě nìà ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ mu mɔ́ùn ɓó fɔ̃ɔ-sàǎ-zàìn-ɖɛ̀ jè ɓó dyɔún Gèɖèpɔ́ɔ̀ bììɛɛ, ɓě mɛ tòɛ̀, kɛbì ɔ mɛ mɔ̀ ɓìɖǐ ɓíɔ́ mɔɔ ɓáɖáá-dyù kɛ. Ɓó kɔ̃in ɖeɛɛ, ɓě mɛ nyí wa hwítì kè wã́ìn kè cáná ɔ kè ɖɛ tɔ̀ɔ̀ ɓě ɓɛ́ wa mu mɔ́ùn ɓó sáa zàìn jè ɓó wé kè wé xwíníín nyɛ. Ɓěǐn ɖá ɓɛ́ ɓě ké wé ɖò dyi po,

¹⁰ nìí ɓɛ́ wa ké sáa-zàìn-ɖɛ̀ dè dyɔún Gèɖèpɔ́ɔ̀ hwìɖǐiɛɛ nyu, ɓɛ́ wa ké kã́áɔ̀ kè ɔ dyú-gàà ɓěɔ̀ fɛ̀ɛ̀ jè ɓaà.

¹¹ Ké ɓó kɔ̃in ɖeɛɛ, ḿ nì gma nìà kɛ poɛń kà nyɔ mɔ̀ nyɔ ɓɛ́ ɔ mu wuɖu nìà kɛ dyí zàìn nyɛɛ, wa mɛ zà cu-kpóɖó ɖò ɔ gbǒɔ̀ bũ̌, ɓɛ́ wa kéɛ dyí bǎ té-té, ɓɛ́ wa kéɛ ɔ mú sṹ. Ké wa mɛ wáɖá ɔ gbǒɔ̀ ɖekè.

¹² Gèɖèpɔ́ɔ̀ ɓɛ́ ɔ gãà Jùɖúsɛ̀ɖɛ̀ìn-hwɔ̀ɖɔ̀ɔ̀, ɓɛ́ ɔ kéà pá kɔ̃̀ mú ɓɛ́ nyɔǔn-dyù ké ɔ ɓièìn nyɛ jǔɛɛ mɛ po kã́á séín mɔɔ ɓóɖó-dù séín ɓɛ́ wa se gma nìà kɛ dyi kpɔ̃ɔ́ mu, mɔɔ ké wa mɔ́ Gèɖèpɔ́ɔ̀ gbǒ nìà ɖéɛɛ wáɖáa dyiɛɛ ɓíɖíi dyi. Mɔ̄ Dìwáɖádyà mɔ̀ nyɔ tò wuɖu nìà kɛ, ké nyɔ séín mɛ kpɔ̃ɔ dyi kóɖó-kóɖó.”

Wa zàìn gbǒ ɖìèɔ̀ Gèɖèpɔ́ɔ̀ xwáɖáún

¹³ Ti ɓɛ́ Tàténàì mɔ̀à ɓóɖó ɓě nìà ɖé Dyùféɖétì-nìɔ̀ dyóɖó-dyi-kpáìn-naínɔ̀ kɛɛ wuɖuí-kɔ̃̀-nyɔ̀ɔ̀ kɛ kè Séfà-Bózɛ̀nàì ɔ kè wa mǔè ɓěɔ̀ wɔ̃́ ma wuɖu ɓɛ́ Kã́á Dìwáɖádyà tò ma kà kɛɛ, wa nyu ma ɖɛ séín ɓɛ́ kã́áɔ̀ cɛ̃ ma kà kɛɛ nyɛ̀nɛ̀ɛ̀.

¹⁴ Ké Éézùɖùɛ̀-nyɔ̀ ɓěɔ̀ nyɔ vɛ̀nɛ̀ ɓěɔ̀ po ma Gèɖèpɔ́ɔ̀ gbǒɔ̀ nɔ̀mɔ̀ dyíin, ké ɔ hwɛ̀ ma kà Hágàì kè Zɛ́kɔ̀wáɖádyà mɔ̀à kpáá-ɖɛ̀-cɛ̃-nyɔ̀ ɓěɔ̀ kɛɛ nyu ma kà wa kpéí poɛ kɛ. Zɛ́kɔ̀wáɖádyà mɔ̀ ma Íɖòɛ̀ dyú-gàà. Wa po ma gbǒɔ̀, ké ɔ hwɛ̀ dyììn ɖé Éézùɖùɛ̀ Gèɖèpɔ́ɔ̀ wuɖuɔ̀ mú, ɔ kè dyììn ɖé Sáwàɖà kè Dìwáɖádyà ɔ kè Àtàzɛ́sì ɓɛ́ wa mɔ̀à Pɔ́sìà-ɓòɖòɔ̀ kã́á ɓěɔ̀ kɛɛ wuɖu mú.

¹⁵ Gbǒɔ̀ hwɛ̀ ma ɓó Ádà-dɛ̀nɛ̀ɔ̀ wé tã nììnɔ̀ ɓaɖa, ɖé Dìwáɖádyà nììn ɓóɖó-wuɖuí-kɔ̃̀-zɔ̃̀ɔ̀ mɛ̀nɛ̌ìn-ɖò nììnɔ̀ xwíníín.

¹⁶ Ké Éézùɖùɛ̀-nyɔ̀ ɓěɔ̀, ɔ hwɔìn kà sáa-zà-nyɔ̀ ɓěɔ̀ kè Ɖíìváà-nyɔ̀ ɓěɔ̀ ɔ kè toɛ̀-kpɔ̃-nyɔ̀ tɔ̀ɔ̀ ɓě ɓɛ́ wa dyi ma kà ɖeɛɛ, pa ma Gèɖèpɔ́ɔ̀ gbǒɔ̀ xwáɖáún-zà-hwɔ̀ɔ̀ ɖé múà mú.

¹⁷ Nyúà-ɖɛ̀ ɓě ɓɛ́ wa zàìn ma sáa ɓó Gèɖèpɔ́ɔ̀ gbǒɔ̀ xwáɖáún-zà-hwɔ̀ɔ̀ kɔ̃ɛɛ mɔ̀ ɓìɖǐ ɓíɔ́ hɔ̃dɛ̀ɖɛ̀ dyúáɖò kè ɓáɖáá ɓíɔ́ hɔ̃dɛ̀ɖɛ̀ sɔ̃́ ɔ kè ɓáɖáá-dyù hɔ̃dɛ̀ɖɛ̀ hĩinyɛ. Ké nyúà-ɖɛ̀ ɓɛ́ wa ɖáɓá ma ɓó Éézùɖùɛ̀-nyɔ̀ séín ɓěɔ̀ nàmàǔn-sàǎ-zàìn-ɖɛ̀ jèɛɛ mɔ̀ vã́á ɓaɖa-bùè sè sɔ̃́ kà Éézùɖùɛ̀ɛ̀ xwéɖé-dù ɓěɔ̀ nyuà jĩ̀ɛ̀ kɛ.

¹⁸ Ké wa po ma sáa-zà-nyɔ̀ ɓěɔ̀ kè Ɖíìváà-nyɔ̀ ɓěɔ̀ ɖò-ɖò séín páún ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ɓó Gèɖèpɔ́ɔ̀ gbǒɔ̀ mú kũ̀à nyu jè. Wa nyuɛ ma kà ɔ jè nyu ma kà céèɛ̀ ɖé Mózèɛ̀ céè-ɖɛ̀ɔ̀ múɛ.

Zĩ̀ìn-Kɔ̃in-hwɔ̀ɔ̀ jè

¹⁹ Sɔ̀ìn ɓóɛ gboɛɛ, nyɔ ɓě sɔ̀ ma kà to-xwàɖàǔn wɛ̃ɛ pa ma Zĩ̀ìn-Kɔ̃in-hwɔ̀ɔ̀ ɓó zɔ̃ɔ̀ nyɔ kɔ ma ɓó dyíɛɛ dɛ̀nɛ̀ kĩ́ín-kĩ́ínɔ̀ wé ɓaɖa-bùè sè hĩinyɛ nììnɔ̀ ɓaɖa.

²⁰ Ɓó tia ɓaɖaa, sáa-zà-nyɔ̀ ɓěɔ̀ kè Ɖíìváà-nyɔ̀ ɓěɔ̀ ɖǎ ma wa mìɔùn mú hwɔ. Wa poìn dyí séínɔ̀ ɖǎ ma mú hwɛ̀. Ɔ jèɛɛ, wa ɖáɓá ma ɓáɖáá-dyù dyàà nyɔ kɔ̃in zĩ̀ìn jè hwìɖǐiɛɛ ɓó Éézùɖùɛ̀-nyɔ̀ séín ɓě sɔ̀ ma kà to-xwàɖàǔn wɛ̃ ɔ kè ɓó wa mǔè sáa-zà-nyɔ̀ tɔ̀ɔ̀ ɓěɔ̀ bìì, dè wa mìɔùn kɔ̃.

²¹ Ké Éézùɖùɛ̀-nyɔ̀ ɓě sɔ̀ ma kà to-xwàɖàǔn wɛ̃ kè nyɔǔn séín ɓě ɓɛ́ wa táà ma ɓóɖóɔ̀ nyɔ ɓěɔ̀ nììn xwai-nyu-ɖɛ̀ gbà ɓěɔ̀ dyi, ɓɛ́ wa dyi ma Éézùɖùɛ̀-nyɔ̀ ɓěɔ̀ hwìɛ̀ kpáa ɖiɛ ma. Nyɔ ɓěɔ̀ kpá ma Éézùɖùɛ̀-nyɔ̀ ɓěɔ̀ hwìɛ̀, ɓɛ́ wa ké Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ ɓiè.

²² Ké wa pa ma Bɛɖɛɛ̀-Se-Dyáìn-Ɖɛ̀-Gbo-Nì-hwɔ̀ɔ̀ ɓó wé mɛ̀nɛ̌ìn-sɔ̃́ xwíníín. Wa kpá ma múàǔn mìɔ, sepóɛɖé Bounɓoɔ̀ dyíìn ma wa múà múin, ké ɔ nyuɛ ké Àsíwíɖíà-kã̀ǎɔ̀ ɓéɖé ma waà hwòɖǒǔn-hwòɖò, ké ɔ kpá ma wa gbo ɓó Éézùɖùɛ̀ Gèɖèpɔ́ɔ̀ gbǒɔ̀ po jè.