Ɛ́zùɖùà 5 - Ɓǎsɔ́ɔ̀ Báɓòɔ̀

¹ Ɓó tia ɓaɖaa, Gèɖèpɔ́ɔ̀ kpáá-ɖɛ̀-cɛ̃-nyɔ̀ sɔ̃́ ɓě kɔ̃̀ nyɛ́nɛ́ mɔ̀ Hágàì kè Zɛ́kɔ̀wáɖádyà kɛɛ cɛ̃ ma ɖɛ ɓě ɓɛ́ Éézùɖùɛ̀ Gèɖèpɔ́ɔ̀ mɔ̀ nyɔ kɔ̃̀ ma kà wa wuɖuíɛɛ wùɖùìn ma wa múɛɛ Júù-nyɔ̀ ɓě nì ma kà ɖé Júɖà-ɓòɖòɔ̀ kɔ̃ kè ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ gbo. Zɛ́kɔ̀wáɖádyà mɔ̀ ma Íɖòɛ̀ dyú-gàà.

² Hwɛ̀ ké Zɛ̀wáɖáɓèɓò mɔ̀à Sɛ́àtíèɛ̀ dyú-gààɔ̀ kɛ kè Jésùà mɔ̀à Jòzáɖàà dyú-gààɔ̀ kɛɛ sɔ̀ ma dyí, ké wa ɖú ma Gèɖèpɔ́ɔ̀ gbǒ nì ma kà ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ po kpàǐ ɖe. Ké Gèɖèpɔ́ɔ̀ kpáá-ɖɛ̀-cɛ̃-nyɔ̀ ɓěɔ̀ nì ma ɓó wa gbo, ɓɛ́ wa ké wa gbo kpá.

³ Ɓó ti déínɔ̀ ɓaɖaa, Tàténàì ɓɛ́ ɔ mɔ̀ ma ɓóɖó ɓě nìà ɖé Dyùféɖétì-nìɔ̀ dyóɖó-dyi-kpáìn-naínɔ̀ kɛɛ wuɖuí-kɔ̃̀-nyɔ̀ɛ kè Séfà-Bózɛ̀nàì ɔ kè wa mǔè ɓě dyi ma wa gbo, ké wa ɖá, “Nyɛ́ zà ɓě wuɖu kɔ̃, ɓɛ́ ɓě ké gbǒ nìà kɛ po, ɓɛ́ ɔ ké hwɛ̀ kɛ́?”

⁴ Ké ɓó kɔ̃in ɖeɛɛ, wa diè ma wa dyi ɖe, ké wa ɖá, “Xwɛ̌ gàa ɓě nìà poo-ɖɛ̀ nìà kɛ poɛń nyɛɛ nyɛ́nɛ́ jǔ kɛ́?”

⁵ Kɛɛ Júù-nyɔ̀ ɓěɔ̀ Gèɖèpɔ́ɔ̀ nì ma waà nyɔ vɛ̀nɛ̀ ɓěɔ̀ dyí gmɔ̀ǔn, ké gɔ̌mànà-nyɔ̀ ɓěɔ̀ se ma kũ̀àɔ̀ ɓɔ́í poɛ ɓɛ́ìn, ɓɛ́ wuɖu ké ma ɖé Kã́á Dìwáɖádyà gbo mu, nìí ɓɛ́ ɔ gɔ̃̌-jǔ-wùɖù ɓáa dyíɛɛ ké ma céè-ɖɛ̀ kɔ̃ dyììn hwɛ̀.

⁶ Ké bɔ̃̌ ɓɛ́ Tàténàì mɔ̀à ɓóɖó ɓě nìà ɖé Dyùféɖétì-nìɔ̀ ɖeín nyɛɛ wuɖuí-kɔ̃̀-nyɔ̀ɔ̀ kɛ kè Séfà-Bózɛ̀nàì ɔ kè wa mǔè gɔ̌mànà-nyɔ̀ ɓě ɓɛ́ wa nìà ɖé ɓóɖó ɓě nìà ɖé Dyùféɖétì-nìɔ̀ ɖeín nyɛ kɔ̃ɛɛ tòìn ma céè-ɖɛ̀ kɔ̃ ɖé Dìwáɖádyà mɔ̀à kã́áɔ̀ kɛ gboɛɛ kɛà kɛ̀.

⁷ Wa ɖá, “Kã́á Dìwáɖádyà, à zà m̀ nyíɔún.

⁸ “À mɔ́ ɓɛ́ mɔ̀ mɔ̀à kã́áɔ̀ kɛɛ kéɛ dyí dyuò kà ti ɓɛ́ à mu ma ɖé Júɖà-ɓòɖòɔ̀ kɔ̃, ɖé Gèɖèpɔ́ɔ̀ vɛ̀nɛ̀ɔ̀ gbǒɔ̀ gboɛɛ, à dyɛ̀ìn ma wa gbǒɔ̀ sɔ́ɔ́-kpò vɛ̀nɛ̀-vɛ̀nɛ̀ ɓě dèɛ̀ dyi, ké wa ɖǎ cu-kpóɖó ɓěɔ̀ sɔ́ɔ́-dè-dè ɓěɔ̀ pṹa dyi po. Kũ̀àɔ̀ nì dyúa muɛń nɔ̀mɔ̀ dyíin, ké ɔ nì fṹàǔn.

⁹ “Hwɛ̀ ké à diè ma waà nyɔ vɛ̀nɛ̀ ɓěɔ̀ dyi, ké à ɖá, ‘Nyɛ́ zà ɓě wuɖu kɔ̃, ɓɛ́ ɓě ké gbǒ nìà kɛ po, ɓɛ́ ɔ ké hwɛ̀ kɛ́?’

¹⁰ Ké à diè ma waà nyɛ́nɛ́ jè dyi ɖekè, nìí ɓɛ́ à ké waà nyɔ vɛ̀nɛ̀ ɓěɔ̀ nyɛ́nɛ́ ɓíɖíi céè, ɓɛ́ à kéɛ m̀ gbo tò.

¹¹ Ké ɖɛ ɓɛ́ wa jǔìn ma à gɔ̃̌ɛɛ kɛà kɛ̀. Wa ɖá, ‘À mɔ̀ Gèɖèpɔ́ɔ̀ kɔ̃̀à dyɔɔ̀ kè ɓóɖó-kpàà wuɖuíɛɛ gbo-nì-nyɔ̀ ɓě. Ké à nì gbǒ ɓɛ́ wa poó zɔ̃̌ɔ̀ kĩ́ín nyɛɛ poɛń ɖe. Ɔ mɔ̀ gbǒ ɓɛ́ Éézùɖùɛ̀-kã̀ǎ vɛ̀nɛ̀ ɖò poó zɔ̃̌ɔ̀, ɓɛ́ ɔ hwɔ dyíɛ.

¹² Kɛɛ à ɓǎ ɓěɔ̀ nyuu-ɖɛ̀ po zɔ̃̌ɔ̀ dyɔún Gèɖèpɔ́ɔ̀ dyoɖoún jèɛɛ, ɔ po zɔ̃̌ɔ̀ wa Nɛ̀ɓùkànɛ́zà mɔ̀à Báɓèɖɔ́ùn-kã̀ǎɔ̀ kɛɛ xwaún dyi. Ɔ mɔ̀ Kàdíà-nyɔ̀ ɓɛ́ ɔ wáɖá zɔ̃̌ɔ̀ kà gbǒ nìà kɛ, ké ɔ kpa zɔ̃̌ɔ̀ kà nyɔ ɓěɔ̀ ɖé Báɓèɖɔ́ùn-ɓòɖòɔ̀ kɔ̃ɛ̀.

¹³ Kɛɛ ɖé Sáwàɖà mɔ̀à Báɓèɖɔ́ùn-kã̀ǎɔ̀ kɛɛ nììn ɓóɖó-wuɖuí-kɔ̃̀-zɔ̃̀ɔ̀ kĩ́ín-kĩ́ín nììnɔ̀ xwíníín nyɛɛ, kã́áɔ̀ tò ma wuɖu, ɓɛ́ wa ké Gèɖèpɔ́ɔ̀ gbǒ nìà kɛ po ɖe.

¹⁴ Ké góò kè séɓàɖà-ɖɛ̀-fùù ɓě ɓɛ́ Nɛ̀ɓùkànɛ́zà zà zɔ̃̌ɔ̀ kà ɖé Gèɖèpɔ́ɔ̀ gbǒɔ̀ mú, ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ, ɔ kpa zɔ̃̌ɔ̀ wa ɖé ɔ nììn gèɖèpɔ́ɔ̀ gbǒɔ̀ mú, ɖé Báɓèɖɔ́ùn-hwɔ̀ɖɔ̀ɔ̀ mú. Kɛɛ Kã́á Sáwàɖà zà ma ɖé wa dyi, ké ɔ poɛ ma gàa ɖò kɔ̃̀ nyɛ́nɛ́ mɔ̀ Sèɓázà kɛɛ xwaún dyi. Sèɓázà mɔ̀ nyɔ ɔ nyu ma kà Júɖà-ɓòɖòɔ̀ gɔ̌mànà múɛ̀.

¹⁵ Ké ɔ cɛ̃ɛ ma Sèɓázà gbo, ké ɔ ɖá, “Ɖú ɖɛ-fùù ɓěɛ̀ dyí, ɓɛ́ m̀ ké wa ɖé Gèɖèpɔ́ɔ̀ gbǒ muà ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú nììn nyɛɛ mú kpa. Ké m̀ mɛ zà nyɔ ɓěɔ̀ wuɖu kɔ̃, ɓɛ́ wa ké Gèɖèpɔ́ɔ̀ gbǒɔ̀ ɓó gbǒ-kpũ̀ɔ̀ɔ̀ kɔ̃ po ɖe.”

¹⁶ Ké Sèɓázà dyi ma, ké ɔ dè ma hìɖì-kpàɔ̀ ɓó Gèɖèpɔ́ɔ̀ gbǒɔ̀ bìì ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ké sɔ̀ìn ɓóɛ gboɛɛ, wa nì gbǒɔ̀ poɛń, ké ɔ séè hwɛ̀ ke.’

¹⁷ “Ɔ ná nì jèɛɛ, kã́áɔ̀ mɛ wɔ̃́ ɓɛ́ wa ké ɔ kpáá-ɖɛ̀-sùà-cèè-ɖɛ̀ ɓěɔ̀ múin gmɔìn ɖé Báɓèɖɔ́ùn-ɓòɖòɔ̀ kɔ̃, ɓɛ́ wa kéɛ dyé kɛbì Kã́á Sáwàɖà tò zɔ̃̌ɔ̀ wuɖu nì náa ní ɓá Gèɖèpɔ́ɔ̀ gbǒɔ̀ po jè dyí ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ ní. Ɔ ɖǎ ná nìǐn, nìí, kã́áɔ̀ mɛ tò à wuɖu gbo ɓá ɖɛ ɔ hwòɖǒ dèìn múin ɓá ɖɛ nìà kɛ jè dyíɛɛ dyí.”