Ɛ́zùɖùà 4 - Ɓǎsɔ́ɔ̀ Báɓòɔ̀

Wa vɔ̃ Gèɖèpɔ́ɔ̀ gbǒɔ̀ po-kũ̀àɔ̀ gbo

¹ Ɓó tia ɓaɖaa, Júɖà-nyɔ̀ ɓě kè Bɛ̃́címà-nyɔ̀ ɓě mɔ̀à toɛ̀-kpɔ̃-nyɔ̀ ɓě ɓɛ́ wa dyi ma kà wa ɓíɖí ɖeɛɛ mú-nyɛ́-nyɔ̀ ɓěɔ̀ wɔ̃́ɔ ma kà ɓɛ́ wa nì ma gbǒ ɖò poɛń ɓó Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ bììɛ.

² Ké wa mu ma ɖé Zɛ̀wáɖáɓèɓò kè gbǒ-xwíníín-dù ɖò-ɖò wuɖuí-kɔ̃̀-nyɔ̀ ɓěɔ̀ gbo, ké wa ɖá, “Ɓě wɔ̃́ ɓɛ́ à kè ɓě ké gbǒɔ̀ po, sepóɛɖé à kè ɓě ɓiè Gèɖèpɔ́ɔ̀ dyúáɖòɔ̀ ní. À mɔ̀ùn ɖúó ɔ gbo sáa zàǔn dyí sɔ̀ìn ɖé Ésàháɖɔ̀ùn mɔ̀ zɔ̃̌ɔ̀ kà Àsíwíɖíà-ɓòɖòɔ̀ kã́á, ɓɛ́ ɔ dyà zɔ̃̌ɔ̀ kà nɔ̄ à kɛɛ nììn tiín nyɛ.”

³ Kɛɛ Zɛ̀wáɖáɓèɓò kè Jésùà ɔ kè gbǒ-xwíníín-dù ɖò-ɖò wuɖuí-kɔ̃̀-nyɔ̀ ɓě ɓɛ́ wa nì ma ɖé Éézùɖùɛ̀-ɓòɖòɔ̀ kɔ̃ɛɛ jǔ ma wa gɔ̃̌, ké wa ɖá, “Ɓě se à Gèɖèpɔ́ɔ̀ gbǒ ɓɛ́ à nìà poɛń nyɛɛ jè kpé ɖò gbo ɓéɖé. À ɖòùn mɔ̀ nyɔ mu Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ gbǒɔ̀ poùn kà Kã́á Sáwàɖà mɔ̀à Pɔ́sìà-ɓòɖòɔ̀ wuɖuí-kɔ̃̀-nyɔ̀ɛɛ nyuà à wuɖu kɔ̃ zàà kɛ.”

⁴ Ké nyɔ ɓě ɓɛ́ wa cĩ́ ma kà ɖé ɓóɖóɔ̀ kɔ̃ɛɛ hwɔ ma Júɖà-nyɔ̀ ɓěɔ̀ sɔ̃ ɖeín kpéí. Wa po ma wa fã̀àǔn, nìí ɓɛ́ wa ní kɔ̃̀ ɖà poo-ɖɛ̀ɔ̀ kũ̀àɔ̀ dyúa kpa.

⁵ Wa pa ma gɔ̌mànà-nyɔ̀ vɛ̀nɛ̀ ɓě gbo, ɓɛ́ wa ké kũ̀àɔ̀ nyu-nyɔ̀ ɓěɔ̀ hwòɖǒ-dyùà kpéí hwɔ. Wa gã̀à ma náa nyuɛń dyi tee ɖé Sáwàɖà mɔ̀à Pɔ́sìà-kã̀ǎɔ̀ kɛɛ nììn ɓóɖó-wuɖuí-kɔ̃̀-tìɔ̀ mú, ké ɔ dyɛ̀ìn ma Dìwáɖádyà nììn ɓóɖó-wuɖuí-kɔ̃̀-tìɔ̀.

Wa vɔ̃ Jùɖúsɛ̀ɖɛ̀ìn-hwɔ̀ɖɔ̀ɔ̀ po-kũ̀àɔ̀ gbo

⁶ Ɖé Àhàzúwàɖà nììn ɓóɖó-wuɖuí-kɔ̃̀-tìɔ̀ gbɔ-dè-tìǐn nyɛɛ, nyɔ ɓě ɓɛ́ wa cĩ́ ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú kè ɖé Júɖà-ɓòɖòɔ̀ wáká tɔ̀ɔ̀ ɓěɔ̀ kɔ̃ɛɛ mú-nyɛ́-nyɔ̀ ɓěɔ̀ céè ma nyɔ-ɖɛ-dúún-po-cèè-ɖɛ̀ ɖò ɓá wa dyí.

⁷ Ké ɖé Àtàzɛ́sì mɔ̀à Pɔ́sìà-kã̀ǎɔ̀ kɛɛ nììn ɓóɖó-wuɖuí-kɔ̃̀-tìɔ̀ múɛɛ, Bíɖàùn kè Míwɛ̀ɖɛ̀ɖà kè Táɓèò ɔ kè wa mǔè ɓě poìn ma dyí, ké wa céè ma nyɔ-ɖɛ-dúún-po-cèè-ɖɛ̀ ɖò ɖe ɓá Júɖà-nyɔ̀ ɓěɔ̀ dyí ɖé Àtàzɛ́sì gbo. Wa céè ma céè-ɖɛ̀ɔ̀ Áwàɖàùn-wùɖù mú, ké wa zàà ma wuɖuún ɖé ɔ ɓíɖí-wùɖù mú.

⁸ Ké Wɛ́ɖɛ́hù ɓɛ́ ɔ mɔ̀ ma ɓóɖó ɓě nìà ɖé Dyùféɖétì-nìɔ̀ dyóɖó-dyi-kpáìn-naínɔ̀ kɛɛ wuɖuí-kɔ̃̀-nyɔ̀ɛ kè Sĩ́sàì ɓɛ́ ɔ mɔ̀ ma ɓóɖó ɓěɔ̀ céè-ɖɛ̀ céè-nyɔ̀ɛɛ mɔ̀ùn céè ma Kã́á Àtàzɛ́sì gbo ɓá Jùɖúsɛ̀ɖɛ̀ìn-hwɔ̀ɖɔ̀ɔ̀ jè dyí ɖekè. Céè-ɖɛ̀ɔ̀ wuɖu ɖá,

⁹ “Céè-ɖɛ̀ nìà kɛ sɔ̀ Wɛ́ɖɛ́hù mɔ̀à nyɔ ɓěɔ̀ wuɖuí-kɔ̃̀-nyɔ̀ɔ̀ kɛɛ gbo, ɔ kè Sĩ́sàì mɔ̀à céè-ɖɛ̀ céè-nyɔ̀ɔ̀ kɛ kè wa mǔè ɓě mɔ̀ tɔ̀ɔ̀-ɓìɔ̀ ɓěɔ̀ kè gɔ̌mànà-nyɔ̀ tɔ̀ɔ̀ ɓě mɔ̀ nyɔ ɓě sɔ̀à ɖé Ɛ́wɛ̀ɖɛ̀-hwɔ̀ɖɔ̀ɔ̀ múɛ kè ɖé Báɓèɖɔ́ùn-ɓòɖòɔ̀ kɔ̃ɛ kè ɖé Súsà-hwɔ̀ɖɔ̀ nìà ɖé Éɖàùn-ɓòɖòɔ̀ kɔ̃ɛɛ múɛ

¹⁰ ɔ kè ɓóɖó-dù tɔ̀ɔ̀ ɓě sèà ɓó ɖe, ɓɛ́ kã́á kɔ̃̀ nyɛ́nɛ́ mɔ̀à Ànápɔ̀ kɛɛ zà ma kà ɖé wa mìɔùn nììn ɓíɖí-ɓòɖòɔ̀ kɔ̃, ɓɛ́ ɔ dyià wa nɔ̄ Sɛ̀mɛ́ɖìà-ɓòɖòɛ̀ hwɔɖɔ ɓěɔ̀ kè ɓóɖó tɔ̀ɔ̀ ɓě nìà nɔ̄ Dyùféɖétì-nìɔ̀ ɖeín nyɛɛ mú dyàa.”

¹¹ Céè-ɖɛ̀ɔ̀ wuɖu mu dyúa, ké ɔ ɖá, “Kã́á Àtàzɛ́sì, à mɔ̀ gàa ɓě mɔ̀à nì gbo-nì-nyɔ̀ ɓě ɓɛ́ à cĩ́à nɔ̄ nì ɓóɖóɛ̀ wáká nìà nɔ̄ Dyùféɖétì-nìɔ̀ ɖeín nyɛ kɔ̃ɛɛ, à zà m̀ nyíɔún.

¹² “À mɔ́ ɓɛ́ mɔ̀ mɔ̀à kã́áɔ̀ kɛɛ kéɛ dyuò kà Júù-nyɔ̀ ɓě ɓɛ́ wa sɔ̀ ma kà ɖé m̀ gbo, ɓɛ́ wa dyià nɔ̄ à gbo dyiɛɛ ɖǎ ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú mu, ké wa nìǎ hwe-hwɔ̀ɖɔ̀ mɔ̀à nyɔ-gbo-vɔ̃-hwɔ̀ɖɔ̀ɛɛ poɛń ɖeɛ. Wa nì gmɔ ɓěɔ̀ poɛń ɖe, ké wa nì hìɖì-kpà ɓěɔ̀ dèɛ̌n ɖe.

¹³ Ɓɔ̌ɔ̀, à mɔ́ ɓɛ́ m̀ kéɛ dyuò kà ɔ jǔ ké m̀ dyi wa dyi táà, ké wa dyi hwɔɖɔ nìà kɛ po ɖe, ké wa dyiɛ gmɔ ɓěɔ̀ po ɖe ní, nìí, wa se tácì-dù kò-kò ɓěɔ̀ ɖò m̀ dyéɖéín pɛ́ɛ̀ǐn mu ɖeɛ. Ké ɖɛ nìà kɛ muɛ nyuùn ɓɛ́ wíɖí ɓáún-ɓáún ké se ɖé nì wíɖí-dyi-dèìn-naínɔ̀ kpá ɖe.

¹⁴ Kà ɓɛ́ m̀ mɔ̀ kã́áɔ̀, ké à ɖǎ wuɖu ɖi kà à mu m̀ jǎà gbo nyuùn wɛ̃ jèɛɛ, à se ɖɛ nì kàà dyi dyéɛ ɓɛ́ìn pū. À ɓéɖé à ké m̀ bɔ̃̌ǔn po. À se mɔ́ ɓɛ́ à ké kã́áɔ̀ ɓíɖíi dyi kpáa dyé.

¹⁵ M̀ mɛ gmɔìn nì ɓǎ ɓěɛ̀ kpáá-ɖɛ̀-sùà-cèè-ɖɛ̀ ɓěɔ̀ múin, ɓɛ́ m̀ kéɛ dyuò kà hwɔɖɔ nìà kɛ mɔ̀ nyɔ-gbo-vɔ̃-hwɔ̀ɖɔ̀ kɛ. Ɔ mɔ̀ kã́á ɓě kè waà ɓóɖó ɓě bũ̌in-puà-nyɔ̀. Ɔ ɖúó kã́á ɓě gbo vɔ̃uń dyí ɓó ti sùà múɛ. Ɖɛ kɔ̃̀ jè wa wáɖáó zɔ̃̌ɔ̀ kà hwɔɖɔɔ̀ kɛɛ nìàǒ wɛ̀.

¹⁶ À mɔ́ ɓɛ́ mɔ̀ kã́áɔ̀ kéɛ dyuò kà ɔ jǔ ké m̀ dyiɛ dyi táà, ké wa dyi hwɔɖɔ nìà kɛ po ɖe, ké ɔ gmɔ ɓěɔ̀ dyi hwɛ̀ ɖe ní, nìí, m̀ se ɖɛ ɖò kɔ̃̀ɔ̌ mu nɔ̄ Dyùféɖétì-nìɔ̀ ɖeín nyɛ.”

¹⁷ Hwɛ̀ ké kã́áɔ̀ tò ma céè-ɖɛ̀ɔ̀ gɔ̃̌-jǔ-wùɖù, ké ɔ ɖá, “Wɛ́ɖɛ́hù, mɔ̀ mɔ̀à ɓóɖó ɓěɔ̀ wuɖuí-kɔ̃̀-nyɔ̀ɛ kè Sĩ́sàì, mɔ̀ mɔ̀à ɓóɖó ɓěɔ̀ céè-ɖɛ̀ céè-nyɔ̀ɛɛ, dè ɓě mǔè séín ɓěɔ̀ kɔ̃, ɓě mɔ̀ nyɔ ɓě cĩ́à ɖé Sɛ̀mɛ́ɖìà-ɓòɖòɔ̀ kɔ̃ɛ kè ɖé ɓóɖó tɔ̀ɔ̀ ɓě nìà ɖé Dyùféɖétì-nìɔ̀ ɖeín nyɛ kɔ̃ɛɛ, ḿ zà ɓě nyíɔún.

¹⁸ “Céè-ɖɛ̀ ɓɛ́ ɓě tòà kɛɛ, wa ɖǎa wuɖuún zà, ké ḿ wɔ̃́ɔ múin nɔ̀mɔ̀ dyíin.

¹⁹ Ḿ tò ma wuɖu, ké wa gmɔìn ma céè-ɖɛ̀ ɓěɔ̀ múin, ké wa dyéɛ kà ɓó ti sùà múɛɛ, Jùɖúsɛ̀ɖɛ̀ìn-hwɔ̀ɖɔ̀ɔ̀ ɖǎ ma kã́á ɓě gbo vɔ̃ jǎà kɛ, kè kà kɛ́ɛ́-po-nyɔ̀ ɓě kè fũ̀à-fṹá-nyu-nyɔ̀ ɓě dyí ma ɖéɛ múɛ,

²⁰ kè kà kã́á ɓéɖé gana ɓě ɖǎ zɔ̃̌ɔ̀ Jùɖúsɛ̀ɖɛ̀ìn-hwɔ̀ɖɔ̀ɔ̀ wuɖuí kɔ̃̀, ké wa kɔ̃̀ zɔ̃̌ɔ̀ ɓóɖó séín ɓě nìà ɖé Dyùféɖétì-nìɔ̀ ɖeín nyɛɛ wuɖuíɛ, ɔ kè kà nyɔ ɓěɔ̀ pɛ́ɛ̀ìn ma wa tácì-dù kò-kò ɓě dyéɖéín nyɛ.

²¹ Ɔ ná nì jèɛɛ, ɓě mɛ po gma ɖò, ɓɛ́ gàa ɓěa ké ɓɔ́í kpá, ɓɛ́ wa ké se hwɔɖɔɔ̀ po ɖe, ɔ sèìn ɓɛ́ ḿ ké gmaɔ̀ ɖò po ɖe, ɓɛ́ ḿ ké wa wuɖu kɔ̃ zà ɖe hwɛ̀.

²² Ɓě mɛ nyuɛ náa wàɖà. Ɖɛ́ kɔ̃̀ jè kã́áɔ̀ sɔ̃-ɖé-ɖei-po-ɖɛ̀ nì kàà kéà kpá kɛ́?”

²³ Ti ɓɛ́ Kã́á Àtàzɛ́sì nììn céè-ɖɛ̀ɔ̀ dyɛ̀ìn ma Wɛ́ɖɛ́hù kè Sĩ́sàì mɔ̀à céè-ɖɛ̀ céè-nyɔ̀ɔ̀ kɛ ɔ kè wa mǔè ɓěɔ̀, ké wa zàà ma wuɖuún nyɛ̀nɛ̀ɛ̀ kɛɛ, púɛɛ, wa kpa ma peɖeɛ ɖé Júù-nyɔ̀ ɓěɔ̀ gbo, ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ké wa po ma kũ̀àɔ̀ ɓɔ́í dyììn ɖé céè-ɖɛ̀ɔ̀ kpéɔ̀ mú.

Wa ɖú Gèɖèpɔ́ɔ̀ gbǒɔ̀ po kpàǐ ɖe

²⁴ Gèɖèpɔ́ɔ̀ gbǒɔ̀ po-kũ̀àɔ̀ kpá zɔ̃̌ɔ̀ ɓɔ́í ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú. Ké kǎà ɔ nì zɔ̃̌ɔ̀ ná tee, ké ɔ dyɛ̀ìn ma Dìwáɖádyà mɔ̀à Pɔ́sìà-kã̀ǎɔ̀ kɛɛ nììn ɓóɖó-wuɖuí-kɔ̃̀-zɔ̃̀ɔ̀ sɔ̃́ nììnɔ̀.