Ɛ́zùɖùà 3 - Ɓǎsɔ́ɔ̀ Báɓòɔ̀

Éézùɖùɛ̀-nyɔ̀ ɓěɔ̀ ɖú Gèɖèpɔ́ɔ̀ ɓiè kpàǐ ɖe

¹ Ɔ kéá ma zɔ̃ɔ̀ dɛ̀nɛ̀ mɛ̀nɛ̌ìn-sɔ̃́ nììnɔ̀ nyuɛɛ, púɛɛ, Éézùɖùɛ̀-nyɔ̀ ɓěɔ̀ ɖǎ ma dyi kò nɔ̀mɔ̀ dyíin ɖé wa ɓíɖí-hwɔ̀ɖɔ̀ ɓěɔ̀ mú. Ké wa séín poìn ma dyí ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ɓó hwòɖǒ-dyúáɖò-kà.

² Hwɛ̀ ké Jésùà ɓɛ́ ɔ mɔ̀ ma Jòzáɖàà dyú-gàà kɛ kè ɔ mǔè sáa-zà-nyɔ̀ ɓěɔ̀, dè Zɛ̀wáɖáɓèɓò ɓɛ́ ɔ mɔ̀ ma Sɛ́àtíèɛ̀ dyú-gàà kɛ kè ɔ nììn gbǒ-xwíníín-nyɔ̀ ɓěɔ̀ kɔ̃, poìn ma dyí, ké wa po ma Éézùɖùɛ̀ Gèɖèpɔ́ɔ̀ sáa-kɔ̃-zàìn-gbààɔ̀, nìí ɓɛ́ wa ké ɓó sáa-zàìn-ɖɛ̀ fɔ̃̀ìn, kà ɔ jè nyuà ɖé Mózè mɔ̀à Gèɖèpɔ́ɔ̀ gbo-nì-nyɔ̀ɔ̀ kɛɛ gmaɔ̀ mú céèɛ̀ kɛ.

³ Wa fɛ̃̀ìn ma ní ɓó nyɔ ɓě cĩ́ ma kà ɖé ɓóɖóɔ̀ kɔ̃ɛɛ jè dyɛo, kɛɛ wa po ma sáa-kɔ̃-zàìn-gbààɔ̀ ɓó pá déín kɔ̃̀ mú ɔ nìǒ zɔ̃̌ɔ̀ kà kĩ́ín nyɛ. Púɛɛ, wa ɖú ma ɓó sáa-zàìn-ɖɛ̀ fɔ̃̀ìn kpàǐ ɖe ɓó Bounɓoɔ̀ bìì. Wa fɔ̃̀ìn ma ɓó sáa-zàìn-ɖɛ̀ ɓó gànà-kṹún kè hwìo.

⁴ Ké wa ɖú ma Ɓeè-Dyù-hwɔ̀ɔ̀ pa kpàǐ ɖe kà ɔ jè nyu ma kà ɖé gmaɔ̀ mú céèɛ̀ kɛ. Wa nyu ma wé séínɛ̀ fɔ̃ɔ-sàǎ-zàìn-ɖɛ̀ jĩ̀ kà wa ɓéɖé wa ké ma nyu ɓó Ɓeè-Dyù-hwɔ̀ɔ̀ ɓaɖaa.

⁵ Ké sɔ̀ìn ɓóɛ gboɛɛ, wa nyu ma sáa-zàìn-ɖɛ̀ tɔ̀ɔ̀ ɓě wa kɔ̃̀ wa ké ma nyuɛ. Ɔ hwɔìn kà wé séínɛ̀ sáa-zàìn-ɖɛ̀ɔ̀ nyɔ wa kɔ̃̀ wa ké fɔ̃ séín nyɛ kè Dɛ̀nɛ̀-Ɖìè-Hwèɖè-hwɔ̀ɔ̀ nììn sáa-zàìn-ɖɛ̀ kè hwɔ tɔ̀ɔ̀ séín ɓě kɔ̃̀ jè ɓɛ́ Bounɓoɔ̀ ɖǎ dyi dèɛɛ nììn sáa-zàìn-ɖɛ̀ ɔ kè hwòɖǒ-wáɖáá-nyìǐ-ɖɛ̀ séín ɓɛ́ wa dyà Bounɓoɔ̀ gboɛ.

⁶ Wa ɖú ma sáa-zàìn-ɖɛ̀ fɔ̃ kpàǐ ɖe ɖé Bounɓoɔ̀ gbo, sɔ̀ìn ɓó dɛ̀nɛ̀ɔ̀ mɛ̀nɛ̌ìn-sɔ̃́ nììnɔ̀ wé kĩ́ín-kĩ́ínɔ̀ gbo. Kɛɛ wa séè ma Bounɓoɔ̀ gbǒɔ̀ hìɖì-kpà dè ke.

Wa ɖú Gèɖèpɔ́ɔ̀ gbǒɔ̀ po kpàǐ ɖe

⁷ Ti ɓɛ́ nyɔ ɓěɔ̀ ɖǎ ma sáa-zàìn-ɖɛ̀ ɓěɛ̀ tòɛ̀ hwɔɛɛ, wa tò ma wíɖí, ɓɛ́ wa ké Gèɖèpɔ́ɔ̀ gbǒɔ̀ kũ̀à-gbo-nyu-nyɔ̀ ɓěɔ̀ pɛ́ɛ̀. Kũ̀à-nyɔ̀ ɓěɔ̀ hwɔìn kà sɔ́ɔ́-dè-nyɔ̀ ɓěɔ̀ kè ɖɛ-kɔ-nyɔ̀ ɓěɔ̀. Ké wa nyí ma Zíɖɔ̀ùn-nyɔ̀ ɓěɔ̀ kè Táà-nyɔ̀ ɓěɔ̀ ɖii-ɖɛ̀ kè wã́ìn ɔ kè cáná, ɓɛ́ wa ké síɖà-cù cɛ̃ ɖé Ɖɛ́ɓèɖɔ́ùn-ɓòɖòɔ̀ kɔ̃, ɓɛ́ wa kéɛ ɖé dyóóɔ̀ wĩín dyà, nìí ɓɛ́ wa kéɛ ɖéɛ Jɔ́pà-hwɔ̀ɖɔ̀ɔ̀ mú dyà. Wa nyu ma ɖɛ ɓěɛ̀ kà Sáwàɖà mɔ̀à Pɔ́sìà-ɓòɖòɔ̀ kã́áɔ̀ kɛɛ nyuɛ ma kà wa gbo cɛ̃ɛ kɛ.

⁸ Ti ɓɛ́ wa ɖǎ ma kà Gèɖèpɔ́ɔ̀ gbǒɔ̀ páɔ̀ kɔ̃ ɖe dyiɛɛ, ɔ zɔ̃ sɔ̃́ nììnɔ̀ dɛ̀nɛ̀ sɔ̃́ nììnɔ̀ xwíníín nyɛɛ, Zɛ̀wáɖáɓèɓò mɔ̀à Sɛ́àtíèɛ̀ dyú-gààɔ̀ kɛ kè Jésùà mɔ̀à Jòzáɖàà dyú-gààɔ̀ kɛ kè waà ɖíí tɔ̀ɔ̀ ɓě mɔ̀à sáa-zà-nyɔ̀ ɓěɔ̀ kè Ɖíìváà-nyɔ̀ ɓěɔ̀ ɔ kè nyɔ tɔ̀ɔ̀ séín ɓě ɓɛ́ to kpɔ̃ ma kà, ɓɛ́ wa dyi ma kà Jùɖúsɛ̀ɖɛ̀ìn-hwɔ̀ɖɔ̀ɔ̀ mú ɖe dyiɛɛ dè ma kũ̀àɔ̀ gbɔ. Wa gã ma Ɖíìváà-nyɔ̀ ɓě ɓɛ́ wa nyuá zɔ̃ kpáɖá-nyɔ kè zi kɔ̃ɛ, ɓɛ́ wa ké kũ̀à ɓá Bounɓoɔ̀ gbǒɔ̀ dyíɛɛ kɔ̃in-gmɔìn-nyɔ̀ ɓě jǔ.

⁹ Ɖíìváà-nyɔ̀ ɓě ké ma kà Gèɖèpɔ́ɔ̀ gbǒɔ̀ kũ̀àɔ̀ kɔ̃in gmɔìn nyɛɛ kɛà kɛ̀: Jésùà kè ɔ dyú-gàà ɓěɔ̀, dè ɔ gbǒ-xwíníín-nyɔ̀ tɔ̀ɔ̀ ɓěɔ̀ kɔ̃, kè Kàmíè kè ɔ nììn dyú-gàà ɓě mɔ̀à Hòɖàvíàà xwíníín-dyù-gàà ɓěɔ̀ kɛ ɔ kè Hènáɖàà dyú-gàà ɓěɔ̀ kè waà gbǒ-xwíníín-nyɔ̀ ɓěɔ̀.

¹⁰ Ti ɓɛ́ poo-ɖɛ̀ po-nyɔ̀ ɓěɔ̀ dè ma Bounɓoɔ̀ gbǒɔ̀ hìɖì-kpàɔ̀ kɛɛ, sáa-zà-nyɔ̀ ɓěɔ̀ sáa-zà-ɖɔ̀ ɓěɔ̀ gã̀ ma wa múin, ké waà gã̀à ɓěɔ̀ nì ma wa xwaún, ké wa dyi ma. Wa kè Ɖíìváà-nyɔ̀ ɓě mɔ̀à Ásàfì nììn xwíníín-dyù ɓěɔ̀ kɛɛ nyànà ma ɓó dyi, ké bàɖàsǐ-pĩ̀à ɓě ɓɛ́ wa ɓaɖaìn dyíɛɛ nì ma Ɖíìváà-nyɔ̀ ɓěɔ̀ xwa. Wa dyi, ɓɛ́ wa ké ma Bounɓoɔ̀ ɓàìn kà Dèɓé mɔ̀à Éézùɖùɛ̀-kã̀ǎɔ̀ kɛɛ nyuɛ ma kà cɛ̃ɛ kɛ.

¹¹ Ké wa ɓèɖèìn ma Bounɓoɔ̀ ɓàìn-wɛ̀ɖɛ̀ dyi, ké wa nì ma ɔ zùo poɛń. Wɛ́ɖɛ́ɔ̀ wɔ̃́ìn-wùɖùɔ̀ ɖá, “Ɔ kpeɖe nɔ̀mɔ̀ dyíin, ké ɖɛ̀ɓɛ̀ǐn-ɖɛ̀ɓɛ̀ǐn ɓɛ́ ɔ ɓéɖé Éézùɖùɛ̀-nyɔ̀ ɓěɔ̀ bììɛɛ se sèìn-naín ɖò kɔ̃̀.” Ké nyɔ séín ɓěɔ̀ páná ma mú ɖé wuɖu zoo mú, ti ɓɛ́ wa nì ma Bounɓoɔ̀ ɓàǐn nyɛ, sepóɛɖé wa ɖǎ ma Bounɓoɔ̀ gbǒɔ̀ hìɖì-kpàɔ̀ dèɛ̀ hwɔ.

¹² Kɛɛ sáa-zà-nyɔ̀ ɓěɔ̀ kè Ɖíìváà-nyɔ̀ ɓěɔ̀ kè gbǒ-xwíníín-dù ɖò-ɖò wuɖuí-kɔ̃̀-nyɔ̀ ɓěɔ̀ nyɔ sùà ɓě ɓɛ́ wa dyéó zɔ̃̌ɔ̀ gbǒ kĩ́ín-kĩ́ínɔ̀ kɛɛ, ti wa dyé ma hìɖì-kpà ɖìèɔ̀ kɛɛ, wa ɓáún-ɓáún ɖú ma vĩ̌ kpàǐ ɖé wuɖu zoo mú, kɛɛ nyɔ ɖíɛ́ ɓě nì ma múà-kùɖǔ-kuɖu nyuɛń.

¹³ Púɛɛ, nyɔ ɖò se ma múà-kùɖǔ-kuɖuɔ̀ kè vĩ̌-wùɖùɔ̀ zaìn gboi dyuòɛ̀ ɓɛ́ìn, sepóɛɖé mú-páná-wùɖùɔ̀ tɔ̀mɔ̀ dya mìɔ, ké nyɔ ɓě nì ɖé nya vɛ̃in nyɛɛ ɓɛ́ìn ma kuɖu-kuɖuɔ̀ wɔ̃́ɔ.