Ɛ́zùɖùà 10 - Ɓǎsɔ́ɔ̀ Báɓòɔ̀

Ɓóɖó-dù kà kò ɖò ɓěɛ̀ màa ɓěɔ̀ dyi táà jè

¹ Ti ɓɛ́ Ɛ́zùɖùà nì ma ɓaàǔn, ké ɔ nì ma Éézùɖùɛ̀-nyɔ̀ ɓěɔ̀ ɖɛ gbà ɓěɔ̀ mú wɔ̃́ǐn, ké ɔ nì ma vĩ̌ɛń, ké ɔ nì ma ɓíɖíi dyi kpáǐn ɓó Gèɖèpɔ́ɔ̀ gbǒɔ̀ dyúa kɛɛ, púɛɛ, waà nyɔ kúɖúú mɔ̀ gàa kè màa ɔ kè dyú mɛ́nɛ́ɛ́ ɓěɛɛ poìn ma ɓó ɔ gbo dyí. Nyɔ ɓěɔ̀ nì ma vĩ̌ɛń hwòɖǒɛ̀-nɛɛ̀-kà ɖekè.

² Hwɛ̀ ké Sɛ́kàníà ɓɛ́ ɔ mɔ̀ Jɛ̀híò ɓɛ́ ɔ sɔ̀ ɖé Éɖàùn nììn gbǒ-xwíníínɔ̀ múɛɛ dyú-gàà kɛɛ cɛ̃ɛ ma Ɛ́zùɖùà gbo, ké ɔ ɖá, “À ɖǎ à kè à Gèɖèpɔ́ɔ̀ dèè-wùɖùɔ̀ mú jaɖa, ké à ɖǎ ɓóɖóɛ̀ màa ɓě ɓɛ́ wa mɔ̀ ɖíà-màà ɓěɛɛ dyi kpɔ̃. Kɛɛ wɛ̃́ɛ́ kɛɛ, hwòɖǒ-po-naín nì ní ke ɓó kàǔn ɓó Éézùɖùɛ̀-nyɔ̀ ɓěɔ̀ bìì.

³ Kà ɔ nìà náa, à kè à Gèɖèpɔ́ɔ̀ mɛ dè wuɖu ɖìè ɖò ɖe, ɓɛ́ à ké màa séín ɓěɛ̀ kè waà dyú ɓěɔ̀ ɖe tò. À mu ɖɛ ɓɛ́ m̀ kè nyɔ ɓě dyéà à Gèɖèpɔ́ɔ̀ gmaɔ̀ kpéín nyɛɛ mu à gbo cɛ̃ìn nyɛɛ nyuùn. À mu ɖɛ Gèɖèpɔ́ɔ̀ gmaɔ̀ cɛ̃ kɛɛ nyuùn.

⁴ Mɔ̀ mɔ̀ nyɔ kɔ̃̀ ɓɛ́ m̀ ké ɖɛ nìà kɛ nyu. Ɔ jèɛɛ, sɔ̀ dyí, ɓɛ́ m̀ kéɛ nyu. M̀ mɛ ku hwòɖǒ. À mu ɓó m̀ gbo kpɔ̃̀ìn.”

⁵ Hwɛ̀ ké Ɛ́zùɖùà sɔ̀ ma dyí, ké ɔ nyuɛ ɓɛ́ sáa-zà-nyɔ̀ vɛ̀nɛ̀ ɓěɔ̀ kè Ɖíìváà-nyɔ̀ ɓěɔ̀ ɔ kè Éézùɖùɛ̀-nyɔ̀ tɔ̀ɔ̀ séín ɓěɔ̀ ké ma wuɖu ɖi kà wa mu ɖɛ Sɛ́kàníà cɛ̃à kɛɛ nyuùn wɛ̃. Ké wa ɖi ma wuɖu.

⁶ Ké Ɛ́zùɖùà sɔ̀ ma ɓó Gèɖèpɔ́ɔ̀ gbǒɔ̀ dyúa, ké ɔ mu ma ɖé Jɛ́hòhánà ɓɛ́ ɔ mɔ̀ Ɛ̀ɖíàsìɛ̀ dyú-gàà kɛɛ nììn ɓí-dyùɔ̀ mú, ké ɔ pɛ̃́ ma ɖé. Ɔ se ma ɖɛ ɖò ɖi, ké ɔ se ma ní ɖò ná, sepóɛɖé ɔ nì ma wìǐn kpáuń ke kánáá pū ɓó nyɔ ɓě sɔ̀à to-xwàɖàǔn wɛ̃ɛ ɖɛ gbà ɓěɔ̀ jè.

⁷ Ké wa po ma wuɖui ɖé Júɖà-ɓòɖòɔ̀ kè Jùɖúsɛ̀ɖɛ̀ìn-hwɔ̀ɖɔ̀ɔ̀ dà séín ɓó nyɔ séín ɓě ɓɛ́ wa sɔ̀à to-xwàɖàǔn wɛ̃ɛ bìì, ɓɛ́ nyɔ séín ɓěɔ̀ ké dyí poìn ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú.

⁸ Ɔ jǔ ké wé tã dyi zi ké nyɔ mɔ̀ nyɔ ɓɛ́ ɔ se gɔ̌mànà-nyɔ̀ ɓěɔ̀ kè nyɔ vɛ̀nɛ̀ ɓěɔ̀ ɖá-wùɖùɔ̀ gbo dyiɛɛ ní, nìí, wa mu ɔ hwuùn, ké wa mu ɔ woɖo gbo cɛ̃ìn sɔ̀ìn ɖé nyɔ ɓě sɔ̀à to-xwàɖàǔn wɛ̃ɛ hwìɛ̀.

⁹ Ké ɓó wé tãɔ̀ xwíníín nyɛɛ, Júɖà-gàà ɓěɔ̀ kè Bɛ̃́címà-gàà ɓěɔ̀ poìn ma dyí ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú. Ɓó dɛ̀nɛ̀ mɛ̀nɛ̌ìn-hĩinyɛ nììnɔ̀ wé kpáɖá-nyɔ nììnɔ̀ ɓaɖaa, nyɔ séín ɓěɔ̀ hwɔ ma dyí poɛ̀n. Ké nyɔ séín ɓěɔ̀ koìn ma ɓó píéɔ̀ hwòɖǒǔn dyi, ɓó Gèɖèpɔ́ɔ̀ gbǒɔ̀ dyúa, ké wa nì ma tɛɖɛiń ɓó ɖɛ kɔ̃̀ jè wa dyià kɛ kè ɓó ní-kpà vɛ̀nɛ̀ nì ma ɖaɓauń wɛ̃ɛ jè.

¹⁰ Hwɛ̀ ké Ɛ́zùɖùà mɔ̀à sáa-zà-nyɔ̀ɔ̀ kɛɛ sɔ̀ ma dyí, ké ɔ cɛ̃ɛ ma nyɔ ɓěɔ̀ gbo, ké ɔ ɖá, “Ɓě ɖǎ ɓě kè Gèɖèpɔ́ɔ̀ dèè-wùɖùɔ̀ mú jaɖa dyììn ɖé ɖíà-màà ɓě dyi-kpɔ̃-kpɔ̃ mú. Ɖɛ nìà kɛ nyuɛ ké zaa-dúún-wáɖá-wáɖá ɓɛ́ kàà ɖǎ Éézùɖùɛ̀-nyɔ̀ ɓěɔ̀ kɔ̃ dyi.

¹¹ Ɔ ná nì jèɛɛ, ɓó kàǔn wɛ̃ɛ, ɓě wɔ̃́ìn ɓěɛ̀ ɖɛ gbà ɓěɔ̀ mú ɖé Bounɓo mɔ̀à ɓě ɓǎ ɓěɛ̀ Gèɖèpɔ́ɔ̀ kɛɛ gbo, ɓɛ́ ɓě ké ɔ mɔ́ɔ́-ɖɛ̀ nyu. Ɓě po ɓě mìɔùn wáká, ɓɛ́ ɓě ké ɓóɖóɛ̀ nyɔ ɓěɔ̀ kè waà dyú-màà ɓěɔ̀ jè bũ̌ sɔ̀.”

¹² Ké nyɔ séín ɓě poìn ma kà ɓó dyíɛɛ páná ma mú, ké wa jǔ ma ɔ gɔ̃̌, ké wa ɖá, “Kà m̀ nyuà cɛ̃ɛ kɛɛ, kà ɔ nì. À ɓéɖé ɓɛ́ à ké ɖɛ m̀ cɛ̃à kɛɛ nyu.

¹³ Kɛɛ à vò dyí mìɔ, ké níɔ̀ nì ɖaɓauń mìɔ. À se dà píéɛ̀ hwòɖǒǔn dyi nyànàà ɓɛ́ìn, mɔɔ ké à se ɖɛ nìà kɛ nyuɛ hwɔɔ ɓɛ́ìn ɓó wé dyúáɖò, mɔɔ wé sɔ̃́ xwíníín, sepóɛɖé à ɖǎ gma ɖuàǔn zi mìɔ ɓá ɖɛ nìà kɛ dyí.

¹⁴ À gɔ̌mànà-nyɔ̀ ɓěɔ̀ mɛ ɓaɖa nyɔ séín ɓěɔ̀ bìì kɛ́. Nyɔ séín ɓě nìà hwɔɖɔ ɓěɔ̀ mú, ɓɛ́ wa kpɔ̃ ɖíà-màà ɓě dyiɛɛ mɛ dyi ɓó ti wa ɖǎ wa bìì táí poɛɛ mú. Wa kè hwɔɖɔ ɖò-ɖò ɓěɔ̀ nyɔ vɛ̀nɛ̀ ɓě kè tɔ̀ɔ̀-ɓìɔ̀ ɓěɔ̀ mɛ dyi, nìí ɓɛ́ à Gèɖèpɔ́ɔ̀ dyoɖo-hwòɖò ku wɔ̃ ɓá ɖɛ nìà kɛ dyíɛɛ ké wáɖá.”

¹⁵ Nyɔǔn séín wɔ̃́ìn ma ɖɛ nìà kɛ gbo. Kɛɛ Jònétɔ̃̀ ɓɛ́ ɔ mɔ̀ Àsáhèòɛ̀ dyú-gàà kɛ kè Jàzídyà ɓɛ́ ɔ mɔ̀ Tívàà dyú-gàà kɛɛ se ma ɖɛ nìà kɛ gbo wɔ̃́ìn, ké Mɛ̀súɖàùn kè Sáɓétàì ɓɛ́ wa mɔ̀ Ɖíìváà-nyɔ̀ ɓě kɛɛ kpɔ̃̀ìn ma ɓó wa gbo.

¹⁶ Ké nyɔ ɓě sɔ̀ ma kà to-xwàɖàǔn wɛ̃ɛ nyuɛ ma náa. Ɛ́zùɖùà mɔ̀à sáa-zà-nyɔ̀ɔ̀ kɛɛ gã ma gàa ɓě ɓɛ́ wa kɔ̃̀ gbǒ-xwíníín ɖò-ɖò wuɖuí ɖé waà ɓǎ ɓěɛ̀ gbǒ-xwíníín ɓěɔ̀ múɛ. Ɔ síìn ma wa ɖò-ɖòɛ̀ nyɛ́nɛ́ dɛ̀ǐn. Ké ɓó zɔ̃ɔ̀ dɛ̀nɛ̀ ɓaɖa-bùè nììnɔ̀ wé kĩ́ín-kĩ́ínɔ̀ ɓaɖaa, wa kò ma dyi, ɓɛ́ wa ké ma ɖɛ nìà kɛ múin ɖe.

¹⁷ Ké ɔ kéá ma dɛ̀nɛ̀ tã nyuɛɛ, wa ɖǎ zaa séín ɓá gàa ɓě ɓɛ́ wa kpɔ̃ ɖíà-màà ɓě dyiɛɛ jè múin ɖeɛ hwɔ.

Gàa ɓě ɓɛ́ wa kpɔ̃ ɖíà-màà ɓě dyiɛ

¹⁸ Sáa-zà-nyɔ̀ ɓěɔ̀ dyú-gàà ɓě ɓɛ́ wa kpɔ̃ ɖíà-màà ɓě dyiɛɛ mɔ̀ Mààsédyà kè Ɛ̀ɖìɛ́zɛ̀ kè Jáwìɖì ɔ kè Gédàɖádyà. Gàa ɓě nìà kɛ mɔ̀ Jésùà mɔ̀à Jòzáɖàà dyú-gààɔ̀ kɛ kè ɔ ɖíí-gàà ɓěɔ̀ xwíníín-dyù ɓě.

¹⁹ Wa ɖi ma wuɖu kà wa mu ɖíà-màà ɓě nìà wa xwaa ɖe tòùn wɛ̃. Ké wa ɖò-ɖò zàìn ɓáɖáá ɓíɔ́ sáa, ɓɛ́ ɔ ké waà kpa-pɛ́ɛ̀ìn-sàǎ-zàìn-ɖɛ̀ jǔ.

²⁰ Sáa-zà-nyɔ̀ ɖíɛ́ ɓě ɓɛ́ wa kpɔ̃ ma ɖíà-màà ɓě dyiɛɛ, wa kɛà kɛ̀. Ímè nììn xwíníín-dyù ɓěɔ̀ mɔ̀ Hànánì kè Zɛ́ɓàɖíà.

²¹ Háwìɖììn nììn xwíníín-dyù ɓěɔ̀ mɔ̀ Mààsédyà kè Ìɖáájɔ̀ kè Sɛ̀mádyà kè Jɛ̀híò ɔ kè Dyùzíà.

²² Páhù nììn xwíníín-dyù ɓěɔ̀ mɔ̀ Ɛ́dyòénàì kè Mààsédyà kè Ésìméò kè Nɛ̀fánìò kè Jòzáɓà ɔ kè Ɛ̀ɖásà.

²³ Ɖíìváà-nyɔ̀ ɓě ɓɛ́ wa kpɔ̃ ma ɖíà-màà ɓě dyiɛɛ mɔ̀ Jòzáɓà kè Símì kè Kèɖádyà kɔ̃̀ nyɛ́nɛ́ tɔ̀ɔ̀ mɔ̀ Kɛ̀ɖítà kɛ kè Pɛ́fàhíà kè Júɖà ɔ kè Ɛ̀ɖìɛ́zɛ̀.

²⁴ Ɓeɖe-nyɔ̀ ɓɛ́ ɔ kpɔ̃ ma ɖíà-màà dyiɛɛ mɔ̀ Ɛ̀ɖíàsì. Gèɖèpɔ́ɔ̀ gbǒɔ̀ dyí-gmɔ̀-nyɔ̀ ɓě ɓɛ́ wa kpɔ̃ ma ɖíà-màà ɓě dyíɛɛ mɔ̀ Sáɖùùn kè Téɖɛ̀ìn ɔ kè Dyúwìɖì.

²⁵ Éézùɖùɛ̀-nyɔ̀ tɔ̀ɔ̀ ɓě ɓɛ́ zaa kpɔ̃ ma ɖekè ɓá ɖɛ nìà kɛ dyíɛɛ, wa kɛà kɛ̀. Páwòɖò nììn xwíníín-dyù ɓěɔ̀ mɔ̀ Wàɖàmíà kè Ìzíà kè Mààkíjà kè Mìjámì kè Ɛ̀ɖɛ̀ázà kè Mààkíjà ɖò ɖe ɔ kè Bɛ̀nádyà.

²⁶ Éɖàùn nììn xwíníín-dyù ɓěɔ̀ mɔ̀ Màtánìà kè Zɛ́kɔ̀wáɖádyà kè Jɛ̀híò kè Áɖì kè Jɛ̀wéɖémɔ̀ ɔ kè Ìɖáájɔ̀.

²⁷ Zátù nììn xwíníín-dyù ɓěɔ̀ mɔ̀ Ɛ́dyòénàì kè Ɛ̀ɖíàsì kè Màtánìà kè Jɛ̀wéɖémɔ̀ kè Záɓà ɔ kè Àzízà.

²⁸ Béɓàì nììn xwíníín-dyù ɓěɔ̀ mɔ̀ Jɛ́hòhánà kè Hánàníà kè Záɓàì ɔ kè Áɖàì.

²⁹ Bánì nììn xwíníín-dyù ɓěɔ̀ mɔ̀ Mɛ̀súɖàùn kè Máɖù kè Àɖádyà kè Jásù kè Sɛ́à ɔ kè Jɛ̀wéɖémɔ̀.

³⁰ Páhà-Móà nììn xwíníín-dyù ɓěɔ̀ mɔ̀ Áɖánà kè Kɛ́ɖàò kè Bɛ̀nádyà kè Mààsédyà kè Màtánìà kè Bìnúì ɔ kè Mànásì.

³¹ Háwìɖììn nììn xwíníín-dyù ɓěɔ̀ mɔ̀ Ɛ̀ɖìɛ́zɛ̀ kè Ìsíjà kè Mààkíjà kè Sɛ̀mádyà kè Sìmɛ́ɔ̀ùn

³² kè Bɛ̃́címà kè Máɖù ɔ kè Sɛ̀máwíɖídyà.

³³ Hásũ̀ùn nììn xwíníín-dyù ɓěɔ̀ mɔ̀ Mátènáì kè Mátàtà kè Záɓà kè Ɛ̀ɖìfáɖɛ̀ kè Jɛ̀wéɖémàì kè Mànásì ɔ kè Símì.

³⁴ Bánì nììn xwíníín-dyù ɓěɔ̀ mɔ̀ Mááɖàì kè Ámànàùn kè Dyúè

³⁵ kè Bɛ̀nádyà kè Bɛ̀ɖídyà kè Kɛ̀ɖúhì

³⁶ kè Vàníà kè Mɛ̀wéɖémɔ̀ kè Ɛ̀ɖíàsì

³⁷ kè Màtánìà kè Mátènáì ɔ kè Jáásù.

³⁸ Bìnúì nììn xwíníín-dyù ɓěɔ̀ mɔ̀ Símì

³⁹ kè Sɛ́ɖɛ̀míà kè Nétɔ̃̀ kè Àɖádyà

⁴⁰ kè Mànàɖéɓàì kè Sásàì kè Sáwàɖàì

⁴¹ kè Àzáwèɖèò kè Sɛ́ɖɛ̀míà ɖò ɖe kè Sɛ̀máwíɖídyà

⁴² kè Sáɖùùn kè Ámàwíɖíà ɔ kè Jòsé.

⁴³ Néɓò nììn xwíníín-dyù ɓěɔ̀ mɔ̀ Jɛ̀dyíò kè Mátìfíà kè Záɓà kè Zɛ̀ɓínà kè Jáɖàì kè Jóɛ̀ ɔ kè Bɛ̀nádyà.

⁴⁴ Nyɔ séín ɓěa mɔ̀ nyɔ kpɔ̃ ma kà ɖíà-màà ɓě dyiɛ̀. Ké wa tò ma màa ɓěɔ̀ kè waà dyú ɓěɔ̀ ɖe.