Ɛ́séɖɔ̀ 39 - Ɓǎsɔ́ɔ̀ Báɓòɔ̀

Sáa-zà-nyɔ̀ ɓěɔ̀ mú-po-ɖɔ̀ nyu-nyu

¹ Sɔ̀ìn ɓóɛ gboɛɛ, sɛ́ɖɛ́-dyuò-nyɔ̀ ɓěɔ̀ ɖú ma dyèě-ɖúú ɖàɓàìn kpèɛ̀ kɛɛ dú kò-kò ɓě kèɛ̀ dyéɖé zĩ-zã dyí, ké wa ɖaɓaa ma mú-po-ɖɔ̀ ɓě ɓɛ́ sáa-zà-nyɔ̀ ɓěɔ̀ kéà mú po ti wa mu kũ̀à nyuɛń nììn ɖé Pá Hwɛ̀ǐn-hwɛ̀ǐnɔ̀ múɛ ɔ kè Eɖóún mú-po-ɖɔ̀ hwɛ̀ǐn-hwɛ̀ǐn ɓěɔ̀ mú kà Bounɓoɔ̀ nyuɛ ma kà Mózè gbo cɛ̃ɛ kɛ.

Ífɔ̀ɔ̀ nyu-nyu

² Wa ɖú ma ɖénì-ɖɔ̀ nɔ̀mɔ̀ dyíin dyí, ké wa nyuɛ ma ífɔ̀ɔ̀ mú. Ké wa ɖàɓàìn ma góò kè dyèě-ɖúú ɖàɓàìn kpèɛ̀ kɛɛ dú kò-kò ɓě kèɛ̀ dyéɖé zĩ-zã ɓóɛ kɔ̃.

³ Wa ɖú ma jũ̌ dyí, ké wa ɓaɖa ma góòɔ̀, ké ɔ fɛ̃́ìn ma mú, ké wa fáìn ma góòɔ̀ dyi, ké wa ɖàɓàìn ɔ kè dyèě-ɖúú ɖàɓàìn kpèɛ̀ kɛɛ dú kò-kò ɓě kèɛ̀ dyéɖé zĩ-zã ɓóɛ kɔ̃.

⁴ Ké wa nyu ma ɖúú sɔ̃́ ɓó ífɔ̀ɔ̀ bìì, ké wa gmàìn ma wa ífɔ̀ɔ̀ gã sɔ̃́ hwɔà ɓó kɔún dyíɛɛ bũ̌, ɓɛ́ wa kéɛ sã̀ìn-ɖɛ̀ jǔ.

⁵ Ké gbo-jìnììn-ɖɛ̀ ɖaɓa-ɖaɓa nɔ̀mɔ̀ dyíin nì ma ífɔ̀ɔ̀ wɔ̃. Gbo-jìnììn-ɖɛ̀ɔ̀ mɔ̀ ma ɖénì-ɖɔ̀ nɔ̀mɔ̀ dyíin ɓɛ́ wa ɖàɓàìn ma góò kè dyèě-ɖúú ɖàɓàìn kpèɛ̀ kɛɛ dú kò-kò ɓě kèɛ̀ dyéɖé zĩ-zã kɛ. Wa nyu ma ɖɛ séín ɓěɛ̀ kà Bounɓoɔ̀ nyuɛ ma kà Mózè gbo cɛ̃ɛ kɛ.

⁶ Ké wa dèìn ma ɔ́nɛ̀-sɔ̀ɔ̌ ɓěɔ̀ góò-dèìn-ɖɛ̀. Wa céè ma ɖé Éézùɖùɛ̀ɛ̀ dyú-gàà ɓěɔ̀ nyɛ́nɛ́ ɓěɔ̀ kà nyɔ ɓě mɔ̀à ɖɛ-sɔ̃-bɛ̃̀-kɔ̃-pòìn-ɖɛ̀ nyu-nyɔ̀ ɓěɛɛ nyuà kɛ.

⁷ Hwɛ̀ ké wa sã̀ìn ma wa ɓó ífɔ̀ɔ̀ ɖúú ɓě nìà ɓó kɔún wɛ̃ɛ kɔ̃ dyi, ɓɛ́ wa ké Bounɓoɔ̀ ɖɛ-hwìɖǐi-dyàìn-ɖɛ̀ jǔ ɓá Éézùɖùɛ̀-nyɔ̀ ɓěɔ̀ dyí. Wa nyu ma ɖɛ séín ɓěɛ̀ kà Bounɓoɔ̀ nyuɛ ma kà Mózè gbo cɛ̃ɛ kɛ.

Kɛ́í-jìɖǐ-ɖɛ̀ɔ̀ nyu-nyu

⁸ Ɖɛ kɔ ɓó dyíɛɛ mɔ̀ sɛ́ɖɛ́-dyuò-nyɔ̀ ɓěɔ̀ nyu ma kɛ́í-jìɖǐ-ɖɛ̀ɔ̀. Wa nyuɛ ma kà dyúáɖò kà wa nyu ma kà ífɔ̀ɔ̀ nyuɛ kɛ. Wa ɖú ma ɖénì-ɖɔ̀ nɔ̀mɔ̀ dyíin dyí, ké wa nyuɛ ma kɛ́í-jìɖǐ-ɖɛ̀ɔ̀ mú, ké wa ɖàɓàìn ma góò kè dyèě-ɖúú ɖàɓàìn kpèɛ̀ kɛɛ dú kò-kò ɓě kèɛ̀ dyéɖé zĩ-zã ɓóɛ kɔ̃.

⁹ Ɔ wáká hĩinyɛɔ̀ ɓɛ́ìn ma wɔ̃, ké ɔ jaɖaìn ma kɔ̃. Wáká ɖò-ɖòɛ̀ tɔ̀mɔ̀-tɔ̀mɔ̀ mɔ̀ ma jìì-ɓàɖàǎ dyúáɖò.

¹⁰ Ké wa deìn ma sɔ́ɔ́ kpa ɖɛ dɔ̃̀ǐn hĩinyɛ ɖeín dyi ɓóɛ kɔ̃. Sɔ́ɔ́ ɓě nì ma dɔ̃̀ǐn kĩ́ín-kĩ́ínɔ̀ múɛɛ nyɛ́nɛ́ mɔ̀ ma wúɖúɓì kè tópà ɔ kè bɛ́wòɖò.

¹¹ Sɔ́ɔ́ ɓě nì dɔ̃̀ǐn sɔ̃́ nììnɔ̀ múɛɛ mɔ̀ ma tɔ́kɔ̀ì kè sááfɔ̀ ɔ kè dámɔ̀.

¹² Sɔ́ɔ́ ɓě nì dɔ̃̀ǐn tã nììnɔ̀ múɛɛ mɔ̀ ma jásɛ̃̀ kè ágè ɔ kè ámɛ́tèɖè.

¹³ Ké sɔ́ɔ́ ɓě nì dɔ̃̀ǐn hĩinyɛ nììnɔ̀ múɛɛ mɔ̀ ma kɛ́ɖɛ́sòɖàì kè ɔ́nɛ̀ ɔ kè jásàpà. Wa dèìn ma sɔ́ɔ́ ɓěɔ̀ góò.

¹⁴ Sɔ́ɔ́-kpò ɓaɖa-bùè sè sɔ̃́ ɓěɔ̀ ɖò-ɖò ɓéɖé ma Éézùɖùɛ̀ɛ̀ dyú-gàà ɓaɖa-bùè sè sɔ̃́ ɓěɔ̀ ɖò-ɖòɛ̀ nyɛ́nɛ́ kà ɖɛ-sɔ̃-bɛ̃̀-kɔ̃-pòìn-ɖɛ̀ nìà kɛ, ɓɛ́ wa ké ma Éézùɖùɛ̀-xwèɖè-dù ɓaɖa-bùè sè sɔ̃́ ɓěɔ̀ bìì nì.

¹⁵ Ké wa nyu ma góò-hwɛ̀-zɛ̀nɛ̌ǐn-cɛ̃̀ɛ̀ sɔ̃́ ɓɛ́ wa páná ma kà ɖúú nìà kɛɛ ɓó kɛ́í-jìɖǐ-ɖɛ̀ɔ̀ bìì.

¹⁶ Ké wa nyu ma góò-gbǎ sɔ̃́ kè góò-gbɛ̌ɛ̀ sɔ̃́, ké wa ɓá ma góò-gbɛ̌ɛ̀ ɓěɔ̀ ɓó kɛ́í-jìɖǐ-ɖɛ̀ɔ̀ gã sɔ̃́ nìà ɖé kɔ̃in nyɛɛ dyí.

¹⁷ Ké wa ɓá ma góò-cɛ̃̀ɛ̀ sɔ̃́ ɓěɔ̀ ɓó góò-gbɛ̌ɛ̀ ɓě nìà kɛ́í-jìɖǐ-ɖɛ̀ɔ̀ gã ɓěɔ̀ kɔ̃ɛɛ dyí,

¹⁸ ké wa ɓá ma góò-cɛ̃̀ɛ̀ ɓěɔ̀ máná tɔ̀ɔ̀ ɓěɔ̀ góò-gbǎ sɔ̃́ɔ̀ dyí, ké wa ɓá ma góò-gbǎ ɓěɔ̀ ífɔ̀ɔ̀ ɖúú ɓě nìà ɓó kɔún wɛ̃ɛ dyí.

¹⁹ Hwɛ̀ ké wa nyu ma góò-gbɛ̌ɛ̀ sɔ̃́ ɖò ɖe, ké wa ɓá ma wa kɛ́í-jìɖǐ-ɖɛ̀ɔ̀ gã tɔ̀ɔ̀ sɔ̃́ ɓěɔ̀ xwíníín dyi, hwɔ ɓó ífɔ̀ɔ̀ gbo dyí.

²⁰ Ké wa nyu ma góò-gbɛ̌ɛ̀ sɔ̃́ ɖò ɖe, ké wa ɓá ma wa ɓó ífɔ̀ɔ̀ ɖúú ɓě nìà ɓó kɔún wɛ̃ɛ gbɔ-sí-naín ɓěɔ̀ dyí ɓó gbo-jìnììn-ɖɛ̀ ɖaɓa-ɖaɓa nɔ̀mɔ̀ dyíin ɓɛ́ ɔ nìà ífɔ̀ɔ̀ wɔ̃ɛɛ kɔ̃in jɛ́ɛ́.

²¹ Ké wa sã̀ìn ma kɛ́í-jìɖǐ-ɖɛ̀ɔ̀ nììn gbɛ̌ɛ̀ sɔ̃́ hwɔà ɖé ɓíɖíi dyíɛɛ ɓó ífɔ̀ɔ̀ nììn gbɛ̌ɛ̀ sɔ̃́ ɓěɔ̀ bũ̌in. Wa sã̀ìn ma ɖúú ɖàɓàìn kpèɛ̀ ɖò, ké ɔ kè gbo-jìnììn-ɖɛ̀ɔ̀ deìn dyí, ɓɛ́ kɛ́í-jìɖǐ-ɖɛ̀ɔ̀ ní kɔ̃̀ ɖà ífɔ̀ɔ̀ bũ̌ buɛ̀. Wa nyu ma ɖɛ séín ɓěɛ̀ kà Bounɓoɔ̀ nyuɛ ma kà Mózè gbo cɛ̃ɛ kɛ.

Sáa-zà-nyɔ̀ ɓěɔ̀ mú-po-ɖɔ̀ tɔ̀ɔ̀ ɓěɔ̀ nyu-nyu

²² Sɔ̀ìn ɓóɛ gboɛɛ, wa ɖú ma ɖɔ kɔ̃̀ dyéɖé ɖàɓàìn kpèɛ̀ kɛɛ dyí, ké wa ɖaɓaa gã́ùn zɛin ɓɛ́ ɔ nìà ífɔ̀ɔ̀ xwíɖíiɛɛ mú.

²³ Wa cɛ̃ ma ɓí ɖò ɓóɛ hwòɖǒǔn, ɓɛ́ ɓó ké dú-pòìn-naín jǔ ɓóɛ mú-po-tìǐn. Ké wa po ma ɓíɔ̀ wĩin, ɓɛ́ gã́ùnɔ̀ ní kɔ̃̀ ɖà fá.

²⁴ Ké wa ɖaɓa ma cu-ɓò kɔ̃̀ nyɛ́nɛ́ mɔ̀à pɔ́mɛ́gàɖànɛ̀ kɛɛ hwɔìn-ɖɛ̀ ɓě ɓó gã́ùnɔ̀ wĩin. Pɔ́mɛ́gàɖànɛ̀ ɓěɔ̀ mɔ̀ ma ɖénì-ɖɔ̀ nɔ̀mɔ̀ dyíin kɔ̃̀ kɔ̃ wa ɖàɓàìn ma dyèě-ɖúú ɖàɓàìn kpèɛ̀ kɛɛ dú kò-kò ɓě kèɛ̀ dyéɖé zĩ-zã kɛ.

²⁵ Ké wa nyu ma góò hwɛ̀ zɛ̀nɛ̌ǐn kpee ɓě mú, ké wa ɓá ma góò-kpèè ɓěɔ̀ ɓó pɔ́mɛ́gàɖànɛ̀ɔ̀ hwɔìn-ɖɛ̀ ɓěɔ̀ pṹa dyi ɓó gã́ùnɔ̀ wĩin dà séín.

²⁶ Góò-kpèè ɓěɔ̀ kè pɔ́mɛ́gàɖànɛ̀ɔ̀ hwɔìn-ɖɛ̀ ɓěɔ̀ ɓaɖaìn ma múin. Gã́ùn nìà kɛ nì ma ɓɛ́ sáa-zà-nyɔ̀ vɛ̀nɛ̀ɔ̀ kéà mú po ti ɔ mu sáa-zà-kũ̀àɔ̀ nyuɛń nììn nyɛ. Wa nyu ma ɖɛ séín ɓěɛ̀ kà Bounɓoɔ̀ nyuɛ ma kà Mózè gbo cɛ̃ɛ kɛ.

²⁷ Ké wa ɖú ma ɖénì-ɖɔ̀ nɔ̀mɔ̀ dyíin dyí, ké wa ɖaɓaa ma gã́ùn xwã́-xwã́ ɓě mú ɓó Eɖóún kè ɔ dyú-gàà ɓěɔ̀ bìì, ɓɛ́ wa kéɛ mú po ɖé gbɔ.

²⁸ Ké wa ɖú ma ɖénì-ɖɔ̀ nɔ̀mɔ̀ dyíin dyí ɖe, ké wa nyuɛ ma dúi-bĩìn-ɖɔ̀ ɓɛ́ wa páɖá ma kɛ kè dú-jìnììn-ɖɛ̀ ɓěɔ̀ ɔ kè ɓɔ́ún-ɓɔ́ún ɓěɔ̀ mú.

²⁹ Ké wa ɖú ma ɖénì-ɖɔ̀ nɔ̀mɔ̀ dyíin ɖò dyí ɖe, ké wa nyuɛ ma gbo-jìnììn-ɖɛ̀ɔ̀ mú, ké wa ɖàɓàìn ma dyèě-ɖúú ɖàɓàìn kpèɛ̀ kɛɛ dú kò-kò ɓě kèɛ̀ dyéɖé zĩ-zã ɓóɛ kɔ̃. Wa nyu ma ɖɛ séín ɓěɛ̀ kà Bounɓoɔ̀ nyuɛ ma kà Mózè gbo cɛ̃ɛ kɛ.

³⁰ Ké wa nyu ma góò-hwɛ̀-zɛ̀nɛ̌ǐn-pĩ̀àɔ̀, ké wa céè ma ɓóɛ kɔ̃ kà nyɔ kéɔ́ kà ɖɛ-sɔ̃-bɛ̃̀-kɔ̃-pòìn-ɖɛ̀ ɖò nyuɛ. Wuɖu ɓɛ́ wa céè ma kà ɓóɛ kɔ̃ɛɛ ɖá, “Nyɔ nìà kɛ kpá wáká ɓó Bounɓoɔ̀ bìì.”

³¹ Hwɛ̀ ké wa ɓáa ma ɖúú ɖàɓàìn kpèɛ̀ ɖò dyí, ké wa ɓáa ma dúi-bĩìn-ɖɔ̀ ɓɛ́ wa páɖá ma kà kɛɛ dyúa dyi. Wa nyu ma ɖɛ séín ɓěɛ̀ kà Bounɓoɔ̀ nyuɛ ma kà Mózè gbo cɛ̃ɛ kɛ.

Kũ̀àɔ̀ dyí-hwɔ-hwɔ

³² Púɛɛ, kũ̀à séín ɓá jàɖàìn-gbò kɔ̃̀ mú ɓɛ́ Bounɓoɔ̀ kè ɔ nyɔ ɓěɔ̀ kéà dyéìn nyɛ dyíɛɛ hwɛ̀ ma ní. Éézùɖùɛ̀-nyɔ̀ ɓěɔ̀ nyu ma ɖɛ séín ɓěɔ̀ kà Bounɓoɔ̀ nyuɛ ma kà Mózè gbo cɛ̃ɛ kɛ.

³³ Hwɛ̀ ké wa dyà ma jàɖàìn-gbòɔ̀ wáká kò-kò ɓěɔ̀ kè kũ̀à-mú-nyùìn-ɖɛ̀ séín ɓáa dyíɛɛ Mózè gbo. Ɖɛ ɓěɔ̀ mɔ̀ ma jàɖàìn-gbòɔ̀ mìɔùn nììn faà-ɖɔ̀ ɓěɔ̀ kèɛ̀ gbǎ ɓěɔ̀ kèɛ̀ cu-pĩ̀à ɓěɔ̀ kèɛ̀ kɔ̃-cɛ̃̀ìn-cù ɓěɔ̀ kèɛ̀ cúè-ɓò ɓěɔ̀ kè cúè-ɓò ɓěɔ̀ kɔ̃-dè-ɖɛ̀ ɓěɔ̀

³⁴ kè gbǒɔ̀ kɔ̃in-ɓáìn-ɖɛ̀ mɔ̀à ɓáɖáá-ɓíɔ́-kùɖùù ɓɛ́ wa nyu ké ɔ nì zĩ-zã kɛ kè ɔ nììn kɔ̃in-ɓáìn-ɖɛ̀ɔ̀ nyɔ mɔ̀à dyóún-ɓìɖǐɛ̀ kúɖúù kɛ ɔ kè faà-ɖɔ̀ ɓɛ́ ɔ cɛ̃à gbǒɔ̀ xwíníín nyɛ.

³⁵ Ɖɛ ɓěɔ̀ ɖíɛ́ ɓě mɔ̀ ma gma-gbɔ̀ɖɔ̀ɔ̀ kè ɔ ɓéɖéìn-cù ɓěɔ̀ kè Bounɓoɔ̀ nyɔ-wìì-kɔ̃-ɓéɖéìn-naín nìà ɓó gbɔ̀ɖɔ̀ɔ̀ kɔ̃ɛ

³⁶ kè téɓèɖèɔ̀ kè kũ̀à-mú-nyùìn-ɖɛ̀ séín ɓá téɓèɖèɔ̀ dyíɛ ɔ kè bɛɖɛɛ̀ ɓɛ́ wa kéà ɓó téɓèɖèɔ̀ kɔ̃ dè ɓó Bounɓoɔ̀ bììɛ.

³⁷ Ké ɖɛ ɓěɔ̀ ɖíɛ́ ɓě mɔ̀ ma ɖáùnpò-kɔ̃-dè-ɖɛ̀ mɔ̀à góò hwɛ̀ zɛ̀nɛ̌ǐn nyɛ kèɛ̀ ɖáùnpò ɓěɔ̀ kè kũ̀à-mú-nyùìn-ɖɛ̀ séín ɓá ɖáùnpò-kɔ̃-dè-ɖɛ̀ɔ̀ dyíɛ kè cáná nìà ɓó ɖáùnpò ɓěɔ̀ jèɛ

³⁸ kè góò-gbààɔ̀ kè bũ̌-po-cànàɔ̀ kè nyɔ́ún-nɔ̀mɔ̀-ɖɛ̀ ɓɛ́ wa kéà fɔ̃ɛ kè faà-ɖɔ̀ nìà ɓó jàɖàìn-gbòɔ̀ wĩín nyɛ

³⁹ kè bàɖàsǐ-gbààɔ̀ kè ɔ nììn tɔ̀ɔ̌ ɓɛ́ ɔ mɔ̀à bàɖàsǐ kɛ kè ɔ nììn ɓéɖéìn-cù ɓěɔ̀ kè kũ̀à-mú-nyùìn-ɖɛ̀ séín ɓá gbààɔ̀ dyíɛ kè mú-dèɖèìn-ɖɛ̀ɔ̀ kèɛ̀ kɔ̃-dè-ɖɛ̀ɔ̀

⁴⁰ kè faà-ɖɔ̀ ɓɛ́ wa kéà gba-gbaɔ̀ cɛ̃̀ìn nyɛ kè gba-gbaɔ̀ cúè-ɓò ɓěɔ̀ kè wa nììn kɔ̃-dè-ɖɛ̀ ɓěɔ̀ kè faà-ɖɔ̀ nìà ɓó gba-gbaɔ̀ wĩín nyɛ kè ɖúú ɓě kè ɓóɖóún-kɔ-cù ɓě ɓɛ́ wa kéà gba-gbaɔ̀ ɓóɖóún dyi kpɔ̃ɛ ɔ kè kũ̀à-mú-nyùìn-ɖɛ̀ tɔ̀ɔ̀ séín ɓá jàɖàìn-gbòɔ̀ dyíɛ.

⁴¹ Ké ɖɛ ɓěɔ̀ ɖíɛ́ ɓě mɔ̀ ma mú-po-ɖɔ̀ hwɛ̀ǐn-hwɛ̀ǐn ɓě ɓɛ́ wa ɖaɓa ma kà ɓó Eɖóún mɔ̀à sáa-zà-nyɔ̀ vɛ̀nɛ̀ɔ̀ kɛ kè ɔ dyú-gàà ɓěɔ̀ bìì, ɓɛ́ wa kéà mú po ti ɓɛ́ wa mu sáa-zà-kũ̀àɔ̀ nyuɛń nììn ɖé Pá Hwɛ̀ǐn-hwɛ̀ǐnɔ̀ múɛ.

⁴² Éézùɖùɛ̀-nyɔ̀ ɓěɔ̀ nyu ma ɖɛ séín ɓěɔ̀ nyɛ̀nɛ̀ɛ̀ kà Bounɓoɔ̀ nyuɛ ma kà Mózè gbo cɛ̃ɛ kɛ.

⁴³ Ké Mózè té ma ɖɛ séín ɓěɔ̀ kɔ̃in, ké ɔ dyéɛ kà nyɔ ɓěɔ̀ nyu ma ɖɛ séín ɓěɔ̀ kà Bounɓoɔ̀ nyuɛ ma kà cɛ̃ɛ kɛ. Ɔ jèɛɛ, Mózè po ma wa mana kɔ̃.