Ɛ́séɖɔ̀ 37 - Ɓǎsɔ́ɔ̀ Báɓòɔ̀

Gma-gbɔ̀ɖɔ̀ɔ̀ kɔ-kɔ

¹ Sɔ̀ìn ɓóɛ gboɛɛ, Bɛ̀záɖèò ɖú ma àkésìà-cù dyí, ké wa kɔɔ ma gma-gbɔ̀ɖɔ̀ɔ̀ mú. Gbɔ̀ɖɔ̀ɔ̀ tɔ̀mɔ̀-tɔ̀mɔ̀ mɔ̀ ma jìì-ɓàɖàǎ hm̀m̌, ké ɔ xwíɖí-kù mɔ̀ ma jìì-ɓàɖàǎ tã, ké ɔ dya-tɔ̀mɔ̀-tɔ̀mɔ̀ mɔ̀ ma jìì-ɓàɖàǎ tã.

² Ké wa po ma gbɔ̀ɖɔ̀ɔ̀ góò hwɛ̀ zɛ̀nɛ̌ǐn bũ̌in kè ɖéɛ xwíníín dyi, ké wa dèɛ̀ ma góò-kpã̀ wĩin.

³ Ké wa ɖèìn ma góò, ké wa nyuɛ ma gbɛ̌ɛ̀ hĩinyɛ mú ɓó gbɔ̀ɖɔ̀ɔ̀ bìì, ké wa ɓá wa gbɔ̀ɖɔ̀ɔ̀ ɓo ɓěɔ̀ dyí ɓóɛ gã hĩinyɛɔ̀ kɔ̃. Gbɛ̌ɛ̀ sɔ̃́ nì ma wáká ɖò kɔ̃, ké gbɛ̌ɛ̀ sɔ̃́ nì ma wáká tɔ̀ɔ̀ kɔ̃.

⁴ Hwɛ̀ ké wa nyu ma àkésìà-cù-kpóɖó ɓě, ké wa poɛ ma góò bũ̌in.

⁵ Ké wa sṹ ma cu-kpóɖó ɓěɔ̀ ɖé gbɛ̌ɛ̀ ɓě nì ma kà gbɔ̀ɖɔ̀ɔ̀ gã hĩinyɛɔ̀ kɔ̃ɛɛ mú, ɓɛ́ wa kéɛ ɓéɖéìn-ɖɛ̀ jǔ.

⁶ Ké wa nyu ma gbɔ̀ɖɔ̀ɔ̀ kĩ̀ǐn. Wa nyùɛ̀n ma góò hwɛ̀ zɛ̀nɛ̌ǐn. Ɔ tɔ̀mɔ̀-tɔ̀mɔ̀ mɔ̀ ma jìì-ɓàɖàǎ hm̀m̌, ké ɔ xwíɖí-kù mɔ̀ ma jìì-ɓàɖàǎ tã. Gbɔ̀ɖɔ̀ɔ̀ kĩ̀ǐnɔ̀ kɔ̃ mɔ̀ ma Gèɖèpɔ́ɔ̀ nyɔ-wìì-kɔ̃-ɓéɖéìn-naín.

^7-8 Hwɛ̀ ké wa ɖú ma góò dyí, ké wa ɓaɖaa ma cɛ́ɖɔ̀ sɔ̃́ mú. Ɖò nì ma gbɔ̀ɖɔ̀ɔ̀ kĩ̀ǐnɔ̀ máná ɖò gbo, ké ɖò nì ma máná tɔ̀ɔ̀ gbo. Wa nyuɛ ma ɓɛ́ cɛ́ɖɔ̀ ɓěɔ̀ kè gbɔ̀ɖɔ̀ɔ̀ kĩ̀ǐnɔ̀ ké ma dyúáɖò nì.

⁹ Cɛ́ɖɔ̀ ɓěɔ̀ pìɔ̌ ɓěɔ̀ pɛ́ɛ̀ ma kɔ̃in, ké wa tò ma ɓó gbɔ̀ɖɔ̀ɔ̀ kĩ̀ǐnɔ̀ kɔ̃in. Cɛ́ɖɔ̀ ɓěɔ̀ gmɔìn ma dyéɖéín ɓó gbɔ̀ɖɔ̀ɔ̀ kĩ̀ǐnɔ̀ kɔ̃in.

Téɓèɖèɔ̀ kɔ-kɔ

¹⁰ Ɖɛ kɔ ɓó dyíɛɛ mɔ̀ wa ɖú ma àkésìà-cù dyí, ké wa kɔɔ ma téɓèɖè ɖò mú. Téɓèɖèɔ̀ tɔ̀mɔ̀-tɔ̀mɔ̀ mɔ̀ ma jìì-ɓàɖàǎ hĩinyɛ, ké ɔ xwíɖí-kù mɔ̀ ma jìì-ɓàɖàǎ sɔ̃́, ké ɔ dya-tɔ̀mɔ̀-tɔ̀mɔ̀ mɔ̀ ma jìì-ɓàɖàǎ tã.

¹¹ Ké wa poɛ ma góò hwɛ̀ zɛ̀nɛ̌ǐn bũ̌in, ké wa dèɛ̀ ma góò-kpã̀ wĩin.

¹² Hwɛ̀ ké wa dèɛ̀ ma ɓɔ ɓɛ́ ɔ kè xwa-pìɖì ɓɛ́ìn nyɛɛ wĩin, ké wa dè ma ɓɔɔ̀ góò-kpã̀ wĩin ɖekè.

¹³ Ké wa nyu ma góò-gbɛ̌ɛ̀ hĩinyɛ ɓó téɓèɖèɔ̀ jè, ké wa ɓá ma wa téɓèɖèɔ̀ ɓo ɓěɔ̀ dyí ɓóɛ gã hĩinyɛɔ̀ kɔ̃.

^14-15 Gbɛ̌ɛ̀ ɓěɔ̀ xwɛ̃́ìn ma téɓèɖèɔ̀ ɓɔɔ̀ wĩín dyi. Ké wa nyu ma àkésìà-cù-kpóɖó ɓě, ké wa poɛ góò bũ̌in, ké wa sṹ ma wa gbɛ̌ɛ̀ ɓěɔ̀ mú, ɓɛ́ wa ké ma téɓèɖèɔ̀ ɓéɖéìn-ɖɛ̀ jǔ.

¹⁶ Ké wa ɖú ma góò hwɛ̀ zɛ̀nɛ̌ǐn dyí, ké wa nyuɛ ma ɖɛ-fùù ɓě mú ɓó téɓèɖèɔ̀ jè. Ɖɛ-fùù ɓěɔ̀ mɔ̀ ma péɖétè ɓě kè kópò ɓě kè gbòɖòò ɓě kè kɛ̀ɓɛ̀ɛ̀ ɓě ɓó náá-ɖɛ̀-sàǎ-zàìn-ɖɛ̀ ɓě jè.

Ɖáùnpò-kɔ̃-dè-ɖɛ̀ɔ̀ nyu-nyu

¹⁷ Sɔ̀ìn ɓóɛ gboɛɛ, wa ɖú ma góò hwɛ̀ zɛ̀nɛ̌ǐn dyí, ké wa ɓaɖaa ma ɖáùnpò-kɔ̃-dè-ɖɛ̀ ɖò mú. Ɔ ɓéɖé ma ɖɛ hwɔìn cu-bùè ɓě, ɓɛ́ wa kéɛ ma bɛ̃̀ìn-ɖɛ̀ jǔ. Ɔ gbɔɔ̀ kèɛ̀ kpíìɔ̀ kèɛ̀ bùè ɓěɔ̀ wáká kò-kò ɓěɔ̀ mɔ̀ ma góò-pĩ̀à dyúáɖò.

¹⁸ Ɖáùnpò-kɔ̃-dè-ɖɛ̀ɔ̀ ɓéɖé ma ɖɔ́ mɛ̀nɛ̌ìn-ɖò ɓóɛ dyí. Ɖɔ́ tã nì ma wáká ɖò kɔ̃, ké ɖɔ́ tã nì ma wáká tɔ̀ɔ̀ kɔ̃.

¹⁹ Ɖɔ́ mɛ̀nɛ̌ìn-ɖò ɓěɔ̀ ɖò-ɖò ɓéɖé ma ɖɛ hwɔìn ámɔ̀-cù-bùèɛɛ tã,

²⁰ ké ɖɛ hwɔìn ámɔ̀-cù-bùèɛɛ hĩinyɛ nì ma ɖáùnpò-kɔ̃-dè-ɖɛ̀ɔ̀ kpíìɔ̀ dyí.

²¹ Cu-bùè dyúáɖò nì ma ɖɔ́ kĩ́ín-kĩ́ín sɔ̃́ síà ɖáùnpò-kɔ̃-dè-ɖɛ̀ɔ̀ kpíìɔ̀ dyíɛɛ xwíɖíi, ké cu-bùè ɖò nì ma ɓó ɖɔ́ sɔ̃́ kɔ ɓó dyíɛɛ xwíɖíi, ké cu-bùè ɖò nì ma ɓó ɖɔ́ sɔ̃́ kɔ ɓó dyí ɖeɛɛ xwíɖíi.

²² Ɖáùnpò-kɔ̃-dè-ɖɛ̀ɔ̀ cu-bùè ɓěɔ̀ kèɛ̀ ɖɔ́ ɓěɔ̀ kèɛ̀ wáká tɔ̀ɔ̀ ɓěɔ̀ mɔ̀ ma góò-hwɛ̀-zɛ̀nɛ̌ǐn-pĩ̀à dyúáɖò.

²³ Ké wa ɖú ma góò hwɛ̀ zɛ̀nɛ̌ǐn dyí, ké wa nyuɛ ma ɖáùnpò mɛ̀nɛ̌ìn-sɔ̃́ kèɛ̀ ɖáùnpò tĩ́ɔ-dyí-zàìn-ɖɛ̀ ɓě kèɛ̀ tɛ́nɛ́ɛ̀ ɓě mú ɓó ɖáùnpò-kɔ̃-dè-ɖɛ̀ɔ̀ jè.

²⁴ Wa ɖú ma góò hwɛ̀ zɛ̀nɛ̌ǐn ɓɛ́ ɔ xwa-ku-ku ɖu pṹá-dyèɖè kpáɖá-nyɔ tã ɓaɖa-bùè sè hm̀m̌ wɛ̃ɛ dyí, ké wa nyuɛ ma ɖáùnpò-kɔ̃-dè-ɖɛ̀ɔ̀ kè ɖɛ séín ɓáa dyíɛɛ mú.

Gbàà mɔ̀à nyɔ́ún-nɔ̀mɔ̀-ɖɛ̀ fɔ̃̀ìn-naín nyɛɛ nyu-nyu

²⁵ Ɖɛ kɔ ɓó dyíɛɛ mɔ̀ wa nyu ma gbàà ɖò ɓó nyɔ́ún-nɔ̀mɔ̀-ɖɛ̀ kɔ̃ fɔ̃̀ìn jè. Cu wa nyùɛ̀n ma kɛɛ mɔ̀ àkésìà-cù. Gbààɔ̀ wáká hĩinyɛɔ̀ ɓɛ́ìn ma wɔ̃. Wáká ɖò-ɖòɛ̀ tɔ̀mɔ̀-tɔ̀mɔ̀ mɔ̀ ma jìì-ɓàɖàǎ sɔ̃́, ké ɔ dya-tɔ̀mɔ̀-tɔ̀mɔ̀ mɔ̀ ma jìì-ɓàɖàǎ hĩinyɛ. Gbààɔ̀ kè ɖɛ hwɔìn nimii-gmɛ̌ ɓě nìà ɔ gã hĩinyɛɔ̀ kɔ̃ɛɛ mɔ̀ ma ɖɛ dyúáɖò.

²⁶ Ké wa po ma gbààɔ̀ kɔ̃in kèɛ̀ bũ̌in dà séín kèɛ̀ gmɛ̌ ɓěɔ̀ góò hwɛ̀ zɛ̀nɛ̌ǐn bũ̌in, ké wa dèɛ̀ ma góò-kpã̀ wĩin.

²⁷ Ké wa nyu ma góò-gbɛ̌ɛ̀ sɔ̃́ ɓó gbààɔ̀ bìì, ɓó góò-kpã̀ɔ̀ xwíɖíi. Wa nìɛ̀ wáká sɔ̃́ ɓɛɖɛìn dyíɛɛ kɔ̃, ɓɛ́ wa ké wa cu-kpóɖó ɓě wa kéà gbààɔ̀ ɓéɖéìn nyɛɛ mú sṹ.

²⁸ Cu-kpóɖó ɓěɔ̀ mɔ̀ ma àkésìà-cù, ké wa po ma wa góò bũ̌in.

Bũ̌-po-cànàɔ̀ kè nyɔ́ún-nɔ̀mɔ̀-ɖɛ̀ ɓɛ́ wa fɔ̃ɛɛ nyu-nyu

²⁹ Ké wa nyu ma bũ̌-po-cànà hwɛ̀ǐn-hwɛ̀ǐnɔ̀ ɔ kè nyɔ́ún-nɔ̀mɔ̀-ɖɛ̀ hwɛ̀ǐn-hwɛ̀ǐn ɓɛ́ wa kéà fɔ̃ɛ. Wa nyuɛ kà nyɔ́ún-nɔ̀mɔ̀-cànà nyu-nyɔ̀ nyuà kɛ.