Ɛ́séɖɔ̀ 31 - Ɓǎsɔ́ɔ̀ Báɓòɔ̀

Sɛ́ɖɛ́-dyuò-nyɔ̀ ɓě ké Bounɓoɔ̀ jàɖàìn-gbòɔ̀ poɛ

¹ Hwɛ̀ ké Bounɓoɔ̀ cɛ̃ɛ ma Mózè gbo ɖe, ké ɔ ɖá,

² “Ní mɔ́ ɓɛ́ m̀ ké ɖɛ nìà kɛɛ dyuò. Ḿ ɖǎ Bɛ̀záɖèò ɓɛ́ ɔ mɔ̀à Húɔ̀ɛ̀ nyúà-dyú, kɔ̃̀ ɓǎ mɔ̀à Dyúwìɖì, ké ɔ sɔ̀à ɖé Júɖàà xwéɖé-dùɔ̀ múɛɛ gã.

³ Ḿ ɖǎ Bɛ̀záɖèò ní Zùùɔ̀ múin dyíin, ɓɛ́ ɔ ké sɛ́ɖɛ́ ɓá kũ̀à-dù kò-kò ɓě nyu-nyu dyíɛɛ dyuò. Ɔ ɖǎ xwíníín dyi cɛ̃̀,

⁴ ɓɛ́ ɔ ké góò-ɖɛ̀ ɓě kè séɓàɖà-ɖɛ̀ ɓě ɔ kè bàɖàsǐ-ɖɛ̀ ɓě mú-mɛ-ɖɛ̀ ɓě jè ɓíín zà.

⁵ Ké ɔ ɖǎ sɔ́ɔ́ kpa ɖɛ ɓě sɛɛ dyuò, ɓɛ́ wa kéɛ dè, ké ɔ ɖǎ sɛ́ɖɛ́-ɖɛ̀ ɓě ɓá cu-kũ̀à mú nyùìn jè dyíɛɛ dyuò, ké ɔ ɖǎ sɛ́ɖɛ́-kũ̀à-dù tɔ̀ɔ̀ séín dyuò.

⁶ Ɓó kɔ̃in ɖeɛɛ, ḿ ɖǎ Àhòɖíà ɓɛ́ ɔ mɔ̀à Àhìsámàà dyú-gàà, ɓɛ́ ɔ sɔ̀à ɖé Dɛ̃́ìn xwéɖé-dùɔ̀ múɛɛ gã, ɓɛ́ ɔ ké Bɛ̀záɖèò sɔ̃ xwíɖíi dè. Ké ḿ ɖǎ sɛ́ɖɛ́-dyuò-nyɔ̀ tɔ̀ɔ̀ séín ɓěɔ̀ fɔ̀nɔ̀-hwòɖǒ nyí, ɓɛ́ wa ké ɖɛ séín kɔ̃̀ jè ḿ ɖǎà m̀ gbo cɛ̃ɛ nyu.

⁷ Ɖɛ ɓěɔ̀ mɔ̀ jàɖàìn-gbò kɔ̃̀ mú ɓɛ́ ḿ kè ní nyɔ ɓěɔ̀ muà dyéìn nyɛ kè jàɖàìn-gbòɔ̀ mú-dè-ɖɛ̀ séín ɓěɔ̀. Mú-dè-ɖɛ̀ séín ɓěɔ̀ mɔ̀ gma-gbɔ̀ɖɔ̀ɔ̀ ɓɛ́ ɔ ɓéɖéà ní nyɔ-wìì-kɔ̃-ɓéɖéìn-naínɔ̀ ɓóɛ kɔ̃ɛ

⁸ kè téɓèɖèɔ̀ kè kũ̀à-mú-nyùìn-ɖɛ̀ séín ɓá téɓèɖèɔ̀ dyíɛ kè ɖáùnpò-kɔ̃-dè-ɖɛ̀ mɔ̀à góò hwɛ̀ zɛ̀nɛ̌ǐn nyɛ kè kũ̀à-mú-nyùìn-ɖɛ̀ séín ɓá ɖáùnpò-kɔ̃-dè-ɖɛ̀ɔ̀ dyíɛ ɔ kè nyɔ́ún-nɔ̀mɔ̀-ɖɛ̀ kɔ̃-fɔ̃̀ìn-gbààɔ̀.

⁹ Ɖɛ ɓěɔ̀ ɖíɛ́ ɓě mɔ̀ sáa-kɔ̃-zàìn-gbààɔ̀ kè kũ̀à-mú-nyùìn-ɖɛ̀ séín ɓá sáa-kɔ̃-zàìn-gbààɔ̀ dyíɛ kè mú-dèɖèìn-ɖɛ̀ɔ̀ kèɛ̀ kɔ̃-dè-ɖɛ̀ɔ̀

¹⁰ kè mú-po-ɖɔ̀ hwɛ̀ǐn-hwɛ̀ǐn ɓě ɓɛ́ wa ɖaɓa ɓó Eɖóún mɔ̀à sáa-zà-nyɔ̀ vɛ̀nɛ̀ɔ̀ kɛ kè ɔ dyú-gàà ɓěɔ̀ bìì, ɓɛ́ wa kéà mú po ti wa mu sáa-zà-kũ̀àɔ̀ nyuɛń nììn nyɛ

¹¹ kè bũ̌-po-cànàɔ̀ ɔ kè nyɔ́ún-nɔ̀mɔ̀-ɖɛ̀ ɓɛ́ wa fɔ̃à ɓó pá hwɛ̀ǐn-hwɛ̀ǐnɔ̀ múɛ. Wa mɛ nyu ɖɛ ɓě nìà kɛ kà ḿ nyuà m̀ gbo cɛ̃ɛ nyɛ̀nɛ̀ɛ̀ kɛ.”

Bounɓoɔ̀ fɔ̀-wèɔ̀

¹² Ké Bounɓoɔ̀ cɛ̃ɛ ma Mózè gbo ɖe, ké ɔ ɖá,

¹³ “Cɛ̃ɛ Éézùɖùɛ̀-dyù ɓěɔ̀ gbo kà ḿ ɖá wa mɛ kpɔ̃ ní fɔ̀-wèɔ̀ dyiɛ. Ɖɛ nìà kɛ mu ɖɛ-da-zàìn-ɖɛ̀ jǔùn ɓó ḿ kè wa kè waà xwíníín-dyù ɓě mu ɓó wa ɖeín dyí kɔùn wɛ̃ɛ pṹa, ɓɛ́ wa kéɛ dyuò kà ḿ ɖǎ wa ḿ mìɔùn nììn nyɔ ɓě mú nyuɛ.

¹⁴ Wa mɛ kpɔ̃ ní fɔ̀-wèɔ̀ dyi, sepóɛɖé ɔ mɔ̀ wé hwɛ̀ǐn-hwɛ̀ǐn ɓó wa bìì. Nyɔ ɓɛ́ ɔ se wéɔ̀ kpéín dyéɛɛ, wa ɓéɖé ɓɛ́ wa ké ɔ ɖáɓá. Nyɔ mɔ̀ nyɔ ɓɛ́ ɔ mu kũ̀à ɖò nyuùn ɓó wéa ɓaɖaa, wa ɓéɖé ɓɛ́ wa ké ɔ woɖo gbo cɛ̃.

¹⁵ Wé mɛ̀nɛ̌ìn-ɖò mɔ̀ wé ɓě kɔ̃̀ xwíníín ɓɛ́ wa ké waà kũ̀à ɓě nyu, kɛɛ wéɔ̀ mɛ̀nɛ̌ìn-sɔ̃́ nììnɔ̀ mɛ mɔ̀ fɔ̀-wè. Ɔ mɔ̀ ní wé hwɛ̀ǐn-hwɛ̀ǐn. Nyɔ mɔ̀ nyɔ ɓɛ́ ɔ mu kũ̀à ɖò nyuùn ɓó ní fɔ̀-wèɔ̀ ɓaɖaa, wa ɓéɖé ɓɛ́ wa ké ɔ ɖáɓá.

¹⁶ Éézùɖùɛ̀-dyù ɓěɔ̀ kè waà xwíníín-dyù ɓě mu ɓó wa ɖeín dyí kɔùn wɛ̃ɛ mɛ kpɔ̃ ní fɔ̀-wèɔ̀ dyi kánáá pū. Wa mɛ nyuɛ náa, ɓɛ́ ɔ ké sè-ná-sèɛ̀ dèè-wùɖù nìà ɓó ḿ kè wa pṹa kɛɛ dyí-tɛ̀mɛ̀ìn-ɖɛ̀ jǔ.

¹⁷ Ɖɛ nìà kɛ mu dyí-tɛ̀mɛ̀ìn-ɖɛ̀ jǔùn kánáá pū ɓó ḿ kè Éézùɖùɛ̀-dyù ɓěɔ̀ pṹa, sepóɛɖé mɔ̄ mɔ̀à Bounɓoɔ̀ kɛɛ mɛ ma dyɔɔ̀ kè ɓóɖó-kpàɔ̀ ɓó wé mɛ̀nɛ̌ìn-ɖò xwíníín, kɛɛ ḿ se ma kũ̀à ɖò nyu ɓó wéɔ̀ mɛ̀nɛ̌ìn-sɔ̃́ nììnɔ̀ ɓaɖa, ké ḿ fɔ̀ ma.”

¹⁸ Ti ɓɛ́ Bounɓoɔ̀ ɖǎ ma Mózè gbo wùɖùɛ̀ hwɔ ɖé Sányà-tòɖòɔ̀ dyaa, púɛɛ, ɔ nyí ma Mózè sɔ́ɔ́-pĩ̀à sɔ̃́ kɔ̃̀ kɔ̃ ɓɛ́ ɔ mìɔùn céè ma kà gma ɓěɔ̀ kɛ.