Ɛ́séɖɔ̀ 30 - Ɓǎsɔ́ɔ̀ Báɓòɔ̀

Gbàà mɔ̀à nyɔ́ún-nɔ̀mɔ̀-ɖɛ̀ fɔ̃̀ìn-naín nyɛ

¹ Ké Bounɓoɔ̀ cɛ̃ɛ ma Mózè gbo ɖe, ké ɔ ɖá, “Éézùɖùɛ̀-dyù ɓěɔ̀ mɛ nyu gbàà ɖò ɓó nyɔ́ún-nɔ̀mɔ̀-ɖɛ̀ fɔ̃̀ìn-naín jè. Cu wa mɛ nyùɛ̀n nyɛɛ mɛ mɔ̀ àkésìà-cù.

² Gbààɔ̀ wáká hĩinyɛɔ̀ mɛ ɓɛ́ìn wɔ̃. Wáká ɖò-ɖòɛ̀ tɔ̀mɔ̀-tɔ̀mɔ̀ mɛ mɔ̀ jìì-ɓàɖàǎ sɔ̃́, ké ɔ dya-tɔ̀mɔ̀-tɔ̀mɔ̀ mɛ mɔ̀ jìì-ɓàɖàǎ hĩinyɛ. Gbààɔ̀ kè ɖɛ hwɔìn nimii-gmɛ̌ ɓě nìà ɔ gã hĩinyɛɔ̀ kɔ̃ɛɛ mɛ mɔ̀ ɖɛ dyúáɖò.

³ Ɔ ɖǎ ná nìǐn, wa mɛ po gbààɔ̀ kɔ̃in kèɛ̀ bũ̌in dà séín kèɛ̀ gmɛ̌ ɓěɔ̀ góò hwɛ̀ zɛ̀nɛ̌ǐn bũ̌in, ɓɛ́ wa kéɛ góò-kpã̀ wĩin dè.

⁴ Ké wa mɛ nyu góò-gbɛ̌ɛ̀ sɔ̃́ ɓó gbààɔ̀ bìì, ɓó góò-kpã̀ɔ̀ xwíɖíi. Wa mɛ nìɛ̀ wáká sɔ̃́ ɓɛɖɛìn dyíɛɛ kɔ̃, ɓɛ́ wa ké wa cu-kpóɖó ɓě wa ké gbààɔ̀ ɓéɖéìn nyɛɛ mú sṹ.

⁵ Cu-kpóɖó ɓěɔ̀ mɛ mɔ̀ àkésìà-cù, ké wa mɛ po wa góò bũ̌in.

⁶ Ɔ ɖǎ ná nìǐn, wa mɛ dè gbààɔ̀ ɓó faà-ɖɔ̀ zĩ̀àìn gma-gbɔ̀ɖɔ̀ɔ̀ dyíɛɛ dyúa. Ɔ mɔ̀ gma-gbɔ̀ɖɔ̀ɔ̀ kɔ̃̀ kɔ̃ mɔ̀à ní nyɔ-wìì-kɔ̃-ɓéɖéìn-naínɔ̀ kɛ. Ɔ mɔ̀ dà ɓɛ́ ḿ kè mɔ̀ kéà gmɔ̌ìn nyɛ.

⁷ Ɔ ɖǎ ná nìǐn, Eɖóún mɛ fɔ̃̀ìn nyɔ́ún-nɔ̀mɔ̀-ɖɛ̀ ɓó gbààɔ̀ kɔ̃ ɓó gànà-kṹún ti séín ti ɔ mu ɖáùnpò ɓěɔ̀ xwa nɔ̀mɔ̀ǐn dyiìn nyɛ.

⁸ Ké ɔ mɛ fɔ̃̀ìn ɓó nyɔ́ún-nɔ̀mɔ̀-ɖɛ̀ ɖe ɓó hwìo ti séín ɔ mu ɖáùnpò ɓěɔ̀ dyí kpɔ̃̀ǐn muùn wɛ̃. Eɖóún kè ɔ xwíníín-dyù ɓěɔ̀ mɛ nyu ɖɛ ɓěa, ɓɛ́ nyɔ́ún-nɔ̀mɔ̀-ɖɛ̀ ké fɔ̃ ɓó ḿ dyúa kánáá pū.

⁹ Nyɔ ɖò ní ɖá ɔ ké nyɔ́ún-nɔ̀mɔ̀-ɖɛ̀ ɓɛ́ ḿ se mɔ́ɛɛ ɓó gbààɔ̀ kɔ̃ fɔ̃̀ìn. Nyɔ ɖò ní ɖá ɔ ké fɔ̃ɔ-sàǎ-zàìn-ɖɛ̀ ɖò mɔɔ ɖii-ɖɛ̀-sàǎ-zàìn-ɖɛ̀ ɖò ɓóɛ kɔ̃ fɔ̃̀ìn. Ké nyɔ ɖò ní ɖá ɔ ké náá-ɖɛ̀-sàǎ-zàìn-ɖɛ̀ ɖò ɓóɛ kɔ̃ púè.

¹⁰ Eɖóún mɛ ɖú nyúà-ɖɛ̀ mɔ̀ nàmàǔn-sàǎ-zàìn-ɖɛ̀ ɖòɛɛ nyɔmɔɔ̀ ɖò dyí, ɓɛ́ ɔ kéɛ gbààɔ̀ gmɛ̌ ɓěɔ̀ bũ̌ po, ɓɛ́ ɔ ké nàmàǔn ɓá gbààɔ̀ jè dyíɛɛ kɔ̃in-ɓáìn-ɖɛ̀ jǔ, ɓɛ́ gbààɔ̀ ké wáká kpá gàná cá ɓó ḿ bìì. Eɖóún kè ɔ xwíníín-dyù ɓěɔ̀ mɛ nyùìn ɖɛ nìà kɛ kpa dyúáɖò ɓó zɔ̃ xwíníín kánáá pū.”

Tácì-wìɖì ɓá Bounɓoɔ̀ jàɖàìn-gbòɔ̀ jè dyíɛ

¹¹ Hwɛ̀ ké Bounɓoɔ̀ wùɖù ma Mózè gbo ɖe, ké ɔ ɖá,

¹² “Ti wa mu Éézùɖùɛ̀-dyù ɓěɔ̀ zɛɖɛìn nyɛɛ, gàa ɖò-ɖò séín mɛ pɛ́ɛ̀ wíɖí ɖò, ɓɛ́ ɔ ké ɔ fɛ̀ɛ̀ɔ̀ gbǎìn-ɖɛ̀ jǔ. Ɔ dyi ná nìǐn, nyɔ-gǎ-dyéìn-ɖɛ̀ ɖò se nyɔ ɓěɔ̀ kɔ̃ dyiɛ́ mu ti ɓɛ́ wa mu wa zɛɖɛìn nyɛ.

¹³ Gàa kã̀ìn séín ɓɛ́ wa mu zɛɖɛìn nyɛɛ mɛ tò séɓàɖà-cɛ̀kò fáún-fáún dyììn ɖé kà sáa-zà-nyɔ̀ ɓěɔ̀ nììn séɓàɖà-cɛ̀kò nyu nìɛ̀ kɛɛ mú. Géwàɖà-pĩ̀à kpáɖá-nyɔ ɖò sɔ̀ cɛ́kò dyúáɖò mú. Cɛ́kò fáún-fáúnɔ̀ mɔ̀ nyíí-ɖɛ̀ ɓó ḿ bìì.

¹⁴ Ti ɓɛ́ wa mu gàa ɓěɔ̀ zɛɖɛìn nyɛɛ, gàa ɖò-ɖò séín ɓɛ́ ɔ nyuá zɔ̃ kpáɖá-nyɔ mɔɔ zi kɔ̃ɛɛ mɛ nyí ḿ cɛ́kò fáún-fáúnɔ̀.

¹⁵ Bã-nyɔ̀ ɖò nììn nyíí-ɖɛ̀ɔ̀ mɛ ɓɔ́ cɛ́kò fáún-fáún kɔ̃ ziɛ, ké gǎ-dyé-nyɔ̀ ɖò nììn nyíí-ɖɛ̀ɔ̀ ɓéɖé ɔ ké cɛ́kò fáún-fáúnɔ̀ kɔ̃ nyini wɛ̃́ɛ́. Ɔ mɛ nì ná ti ɓɛ́ wa mu ḿ wíɖí nìà kɛ nyíìn, ɓɛ́ ɔ ké waà nàmàǔn ɓěɔ̀ kɔ̃in-ɓáìn-ɖɛ̀ jǔɛ.

¹⁶ Wa mɛ kpɔ̃ nàmàǔn-kɔ̃in-ɓáìn-wìɖìɔ̀ Éézùɖùɛ̀-dyù ɓěɔ̀ xwaún, ɓɛ́ wa kéɛ ní jàɖàìn-gbòɔ̀ kũ̀à nyùìn. Wíɖí nìà kɛ muɛ nyuùn ɓɛ́ Éézùɖùɛ̀-dyù ɓěɔ̀ jè ké ḿ hwìɖǐi dyi, ɓɛ́ ḿ ké wa kɔ̃in zĩ̀ìn.”

Mú-dèɖèìn-ɖɛ̀ ɓɛ́ ɔ mɔ̀ bàɖàsǐ kɛ

¹⁷ Hwɛ̀ ké Bounɓoɔ̀ cɛ̃ɛ ma Mózè gbo ɖe, ké ɔ ɖá,

¹⁸ “Éézùɖùɛ̀-dyù ɓěɔ̀ mɛ ɖú bàɖàsǐ dyí, ɓɛ́ wa kéɛ mú-dèɖèìn-ɖɛ̀ ɖò kèɛ̀ kɔ̃-dè-ɖɛ̀ mú nyu. Ké wa mɛ dèɛ̀ ɓóɛ jàɖàìn-gbò kɔ̃̀ mú ɓɛ́ ḿ kè ní nyɔ ɓěɔ̀ muà dyéìn nyɛ kè sáa-kɔ̃-zàìn-gbààɔ̀ pṹa, ɓɛ́ wa kéɛ ní mú po.

¹⁹ Ɖéɛ̀ Eɖóún kè ɔ dyú-gàà ɓěɔ̀ mɛ dèɖèìn waà ɓo kè sɔ̃ dyi.

²⁰ Wa mɛ nyuɛ náa, hwɛ̀ ɓɛ́ wa ké ɖé jàɖàìn-gbòɔ̀ mú dyá, mɔɔ hwɛ̀ ɓɛ́ wa ké sáa-kɔ̃-zàìn-gbààɔ̀ bũ̌in xwɛ̃́ìn ɓó sáa-zàìn-ɖɛ̀ fɔ̃ jè, wa ní kɔ̃̀ ɖà mɛ́.

²¹ Wa ɓéɖé wa ké waà ɓo kè sɔ̃ ɓěɔ̀ dyi dèɖè, nìí, wa ní kɔ̃̀ ɖà mɛ́. Ɖɛ nìà kɛ mɛ mɔ̀ gma kánáá pū ɓó Eɖóún kè ɔ xwíníín-dyù ɓěɔ̀ bìì.”

Bũ̌-po-cànàɔ̀

²² Ké Bounɓoɔ̀ cɛ̃ɛ ma Mózè gbo ɖe, ké ɔ ɖá,

²³ “Wa mɛ ɖú nyɔ́ún-nɔ̀mɔ̀-ɖɛ̀-dù kò-kò ɓě dyí dyììn ɖé sáa-zà-nyɔ̀ ɓěɔ̀ nììn pṹá-dyèɖè mú. Nyɔ́ún-nɔ̀mɔ̀-ɖɛ̀ ɓěɔ̀ mɛ mɔ̀ mɛ́ɛ̀-nì kɔ̃̀ xwa-ku-ku ɖu pṹá-dyèɖè ɓaɖa-bùè sè sɔ̃́ kɛ kè sínímà kɔ̃̀ xwa-ku-ku ɖu pṹá-dyèɖè mɛ̀nɛ̌ìn-ɖò kɛ kè kĩ́ìn kɔ̃̀ xwa-ku-ku ɖu pṹá-dyèɖè mɛ̀nɛ̌ìn-ɖò kɛ

²⁴ ɔ kè kàsíà kɔ̃̀ xwa-ku-ku ɖu pṹá-dyèɖè ɓaɖa-bùè sè sɔ̃́ kɛ. Wa mɛ caìn ɖɛ ɓěɛ̀ kè ɔ́ɖè-cànà kópò-wè ɓaɖa-bùè sè mɛ̀nɛ̌ìn-ɖò,

²⁵ ɓɛ́ wa kéɛ bũ̌-po-cànà hwɛ̀ǐn-hwɛ̀ǐn mú nyu. Wa mɛ poìn wa dyí kà nyɔ́ún-nɔ̀mɔ̀-cànà nyu-nyɔ̀ nyuà kɛ, ɓɛ́ ɔ ké bũ̌-po-cànà hwɛ̀ǐn-hwɛ̀ǐn jǔ.

²⁶ Ɔ ɖǎ ná nìǐn, m̀ mɛ nyùɛ̀n kũ̀à mú, ɓɛ́ m̀ kéɛ ní jàɖàìn-gbòɔ̀ kè gma-gbɔ̀ɖɔ̀ɔ̀

²⁷ kè téɓèɖèɔ̀ kè kũ̀à-mú-nyùìn-ɖɛ̀ séín ɓá téɓèɖèɔ̀ dyíɛ kè ɖáùnpò-kɔ̃-dè-ɖɛ̀ɔ̀ kè kũ̀à-mú-nyùìn-ɖɛ̀ séín ɓá ɖáùnpò-kɔ̃-dè-ɖɛ̀ɔ̀ dyíɛ kè nyɔ́ún-nɔ̀mɔ̀-ɖɛ̀ kɔ̃-fɔ̃̀ìn-gbààɔ̀

²⁸ kè sáa-kɔ̃-zàìn-gbààɔ̀ kè kũ̀à-mú-nyùìn-ɖɛ̀ séín ɓá sáa-kɔ̃-zàìn-gbààɔ̀ dyíɛ ɔ kè mú-dèɖèìn-ɖɛ̀ɔ̀ kèɛ̀ kɔ̃-dè-ɖɛ̀ɔ̀ bũ̌ po.

²⁹ M̀ mɛ po wa wáká, ɓɛ́ wa ké mú hwɛ̀. Nìí, ɖɛ kã̀ìn séín mu wa dyi tìnììn nyɛɛ, ɖɛ gbà ɖò mu ɔ gbo kpáùn.

³⁰ Ké m̀ mɛ po Eɖóún kè ɔ dyú-gàà ɓěɔ̀ cánáɔ̀ ɖò dúún, ɓɛ́ m̀ ké wa wáká po, ɓɛ́ wa ké ní sáa-zà-nyɔ̀ ɓě jǔ.

³¹ M̀ mɛ cɛ̃ɛ Éézùɖùɛ̀-dyù ɓěɔ̀ gbo kà wa kè waà xwíníín-dyù ɓěɔ̀ mɛ nyùìn bũ̌-po-cànà hwɛ̀ǐn-hwɛ̀ǐn nìà kɛ kũ̀à mú ɖé ní kũ̀à-kpàɔ̀ dyí kánáá pūɛ.

³² Nyɔ ɖò ní ɖá ɓɛ́ ɔ kéɛ nyɔ séín bũ̌ po pū, mɔɔ ké nyɔ ɖò ní ɖá ɓɛ́ ɔ ké cáná tɔ̀ɔ̀ ɓě caìn kà wa nyuà cáná nìà kɛ caìn nyɛ. Ɔ hwɛ̀ mú, ké ɔ mɛ mɔ̀ mú-hwɛ̀-cànà ɖé wa dyéɖéín.

³³ Nyɔ mɔ̀ nyɔ mu kà nyɔ́ún-nɔ̀mɔ̀-cànà ɖò caìn nyuùn wɛ̃ mɔɔ nyɔ mɔ̀ nyɔ ɓɛ́ ɔ muɛ nyɔ ɖò ɓɛ́ ɔ se sáa-zà-nyɔ̀ kɛɛ bũ̌ poùn wɛ̃ɛ, wa ɓéɖé ɓɛ́ wa ké nyɔɔ̀ woɖo gbo cɛ̃.”

Nyɔ́ún-nɔ̀mɔ̀-ɖɛ̀ ɓɛ́ wa fɔ̃ɛ

³⁴ Ké Bounɓoɔ̀ cɛ̃ɛ ma Mózè gbo ɖe, ké ɔ ɖá, “Wa mɛ ɖú nyɔ́ún-nɔ̀mɔ̀-ɖɛ̀ kò-kò ɓě dyí. Wa mɛ mɔ̀ sáɖátè kè ɔ́nécà kè gáɓànɔ̀ ɔ kè fánákésĩ̀ìn ɓɛ́ wa se ɖɛ ɖò caìn nyɛ. Wa ɖò-ɖòɛ̀ xwa-ku-ku mɛ ɓɛ́ìn wɔ̃.

³⁵ Wa mɛ caìn ɖɛ ɓěɛ̀ kà nyɔ́ún-nɔ̀mɔ̀-cànà nyu-nyɔ̀ nyuà kɛ, ɓɛ́ wa ké wa nyɔ́ún-nɔ̀mɔ̀-ɖɛ̀ ɓɛ́ nyɔ fɔ̃ɛɛ mú nyu. Ké wa mɛ po ɖé tɔ̃́, ɓɛ́ tɔ̃́ɔ̀ kéɛ nyu ɓɛ́ ɔ ké mú hwɛ̀, ɓɛ́ ɔ ké ɖɛ kpa.

³⁶ Ɔ ɖǎ ná nìǐn, wa mɛ nyuɛ ɖò pù-ɓóɖó nìɛ̀-nìɛ̀ mú, ɓɛ́ wa kéɛ ɓóɛ gma-gbɔ̀ɖɔ̀ɔ̀ dyúa dyi mɛ́nɛ́ìn ɖé ní jàɖàìn-gbòɔ̀ mú, dɛ̀ ḿ kè wa kéà gmɔ̌ìn nyɛ. Ɔ mɛ mɔ̀ ɖɛ ɓɛ́ ɔ hwɛ̀ mú mìɔ ɖé wa dyéɖéín nyɛ.

³⁷ Nyɔ ɖò ní ɖá ɓɛ́ ɔ ké ná nyɔ́ún-nɔ̀mɔ̀-ɖɛ̀ ɖò caìn nyu ɓó ɔ mìɔùn bìì. Wa mɛ dyé ɖɛ nìà kɛ kpéín kà ɔ kpá wáká ɓó ḿ bììɛ.

³⁸ Nyɔ mu ná ɖɛ nì kàà ɖò nyuùn, ɓɛ́ ɔ ké ɔ fiè-cànà jǔɛɛ, wa ɓéɖé ɓɛ́ wa ké nyɔɔ̀ woɖo gbo cɛ̃.”