Ɛ́séɖɔ̀ 28 - Ɓǎsɔ́ɔ̀ Báɓòɔ̀

Sáa-zà-nyɔ̀ ɓěɔ̀ mú-po-ɖɔ̀

¹ Hwɛ̀ ké Bounɓoɔ̀ cɛ̃ɛ ma Mózè gbo ɖe, ké ɔ ɖá, “Nyuɛ ɓɛ́ wa ké Eɖóún mɔ̀à nì ɖíí-gààɔ̀ kɛ kè ɔ dyú-gàà ɓě mɔ̀à Náɖà kè Àbíhùɛ̀ kè Ɛ̀ɖɛ̀ázà ɔ kè Ìfámà kɛɛ Éézùɖùɛ̀-dyù ɓěɔ̀ hwìɛ̀ zà, ɓɛ́ wa ké wa ɓó m̀ dyúa dyà, ɓɛ́ m̀ ké wa wáká po, ɓɛ́ wa ké mú hwɛ̀, ɓɛ́ wa ké ní sáa-zà-nyɔ̀ ɓě jǔ.

² Nyu mú-po-ɖɔ̀ ɓó m̀ ɖíí-gàà Eɖóún bìì, ɓɛ́ ɔ ké ɖɔ hwɛ̀ǐn-hwɛ̀ǐn jǔ, ɓɛ́ ɔ kéɛ nyu ɓɛ́ Eɖóún ké díɖí kè dya-dè-dè ɓéɖé.

³ Cɛ̃ɛ sɛ́ɖɛ́-dyuò-nyɔ̀ séín ɓɛ́ ḿ ɖǎà fɔ̀nɔ̀-hwòɖǒ nyí ɓá ɖɛ nì kà ɓěɛ̀ nyu jè dyíɛɛ gbo, ɓɛ́ wa ké mú-po-ɖɔ̀ ɓěɔ̀ nyu ɓó Eɖóún bìì, ɓɛ́ ɔ ké wáká kpá, ɓɛ́ ɔ ké sáa-zà-kũ̀àɔ̀ nyu ɓó ḿ bìì.

⁴ Kà mú-po-ɖɔ̀ ɓě wa kéà nyu ɓó ɔ bììɛɛ ké nìɛ̀ nyuɛɛ kɛà kɛ̀. Wa mɛ mɔ̀ kɛ́í-jìɖǐ-ɖɛ̀ kè ífɔ̀ kè gã́ùn zɛin kè gã́ùn xwã́-xwã́ ɓɛ́ wa ɖaɓa kɛ kè dúi-bĩìn-ɖɔ̀ ɓɛ́ wa ké páɖá kɛ ɔ kè gbo-jìnììn-ɖɛ̀. Wa mɛ nyu ɖɔ kpa ɖɛ ɓě nìà kɛ ɓó nì ɖíí-gàà Eɖóún kè ɔ dyú-gàà ɓěɔ̀ bìì, ɓɛ́ wa ké sáa-zà-kũ̀àɔ̀ nyu ɓó ḿ bìì.

⁵ Wa mɛ nyùìn mú-po-ɖɔ̀ ɓěɔ̀ ɖénì-ɖɔ̀ nɔ̀mɔ̀ dyíin ɓɛ́ wa ɖàɓàìn góò kè dyèě-ɖúú ɖàɓàìn kpèɛ̀ kɛɛ dú kò-kò ɓě kèɛ̀ dyéɖé zĩ-zã kɛ.

Ífɔ̀ɔ̀

⁶ “Sɛ́ɖɛ́-dyuò-nyɔ̀ ɓěɔ̀ mɛ ɖú ɖénì-ɖɔ̀ nɔ̀mɔ̀ dyíin dyí, ɓɛ́ wa kéɛ ífɔ̀ɔ̀ mú nyu. Ké wa mɛ ɖàɓàìn góò kè dyèě-ɖúú ɖàɓàìn kpèɛ̀ kɛɛ dú kò-kò ɓě kèɛ̀ dyéɖé zĩ-zã ɓóɛ kɔ̃.

⁷ Ífɔ̀ɔ̀ mɛ ɓéɖé ɖúú sɔ̃́ ɓó kɔún, ɓɛ́ wa kéɛ sã̀ìn-ɖɛ̀ jǔ.

⁸ Ké gbo-jìnììn-ɖɛ̀ ɖaɓa-ɖaɓa nɔ̀mɔ̀ dyíin mɛ nìɛ̀ wɔ̃. Gbo-jìnììn-ɖɛ̀ɔ̀ mɛ mɔ̀ ɖénì-ɖɔ̀ nɔ̀mɔ̀ dyíin ɓɛ́ wa ɖàɓàìn góò kè dyèě-ɖúú ɖàɓàìn kpèɛ̀ kɛɛ dú kò-kò ɓě kèɛ̀ dyéɖé zĩ-zã kɛ.

⁹ Ɔ ɖǎ ná nìǐn, wa mɛ ɖú ɔ́nɛ̀-sɔ̀ɔ̌ sɔ̃́ dyí, ɓɛ́ wa ké ɓó wa kɔ̃ Éézùɖùɛ̀ɛ̀ dyú-gàà ɓaɖa-bùè sè sɔ̃́ ɓěɔ̀ nyɛ́nɛ́ céè.

¹⁰ Kà waà wóɖó-wóɖó nyu ɖeín dyi deɛ̀n nyɛɛ, kǎà wa mɛ nyu waà nyɛ́nɛ́ ɓěɔ̀ ɖeín dyi deɛ̀n. Nyɔ mɛ̀nɛ̌ìn-ɖòɛ̀ nyɛ́nɛ́ mɛ nì sɔ́ɔ́-kpò dyúáɖò kɔ̃, ɓɛ́ nyɔ mɛ̀nɛ̌ìn-ɖò tɔ̀ɔ̀ nììn nyɛ́nɛ́ ké sɔ́ɔ́-kpò tɔ̀ɔ̀ kɔ̃ nì.

¹¹ Wa dyi nyɛ́nɛ́ ɓěɔ̀ céè ní, wa mɛ nyuɛ kà nyɔ ɓě mɔ̀à ɖɛ-sɔ̃-bɛ̃̀-kɔ̃-pòìn-ɖɛ̀ nyu-nyɔ̀ ɓěɛɛ nyuà kɛ. Ɔ ɖǎ ná nìǐn, wa mɛ dèìn sɔ́ɔ́ sɔ̃́ ɓěɔ̀ góò-dèìn-ɖɛ̀.

¹² Ké wa ɖǎa náa nyuɛ hwɔ ní, wa mɛ sã̀ìn wa ɓó ífɔ̀ɔ̀ ɖúú ɓě nìà ɓó kɔún wɛ̃ɛ kɔ̃ dyi, ɓɛ́ wa ké nyɔ-ɖɛ-hwìɖǐi-dyàìn-sɔ̀ɔ̌ ɓě jǔ. Eɖóún mɛ ɓéɖéìn nyɛ́nɛ́ ɓěɔ̀ ɓó ɔ kɔún ɓó ḿ dyúa, ɓɛ́ ɔ ké ḿ ɖɛ-hwìɖǐi-dyàìn-ɖɛ̀ jǔ ɓá Éézùɖùɛ̀-dyù ɓěɔ̀ dyí.

¹³ Ɔ ɖǎ ná nìǐn, wa mɛ nyu góò-gbǎ sɔ̃́

¹⁴ kè góò-hwɛ̀-zɛ̀nɛ̌ǐn-cɛ̃̀ɛ̀ sɔ̃́ ɓɛ́ wa kéɛ páná kà ɖúú nìà kɛ. Góò-gbǎ ɓěɔ̀ mɛ ɓá góò-cɛ̃̀ɛ̀ ɓěɔ̀ dyí, ké góò-cɛ̃̀ɛ̀ ɓěɔ̀ mɛ ɓá ífɔ̀ɔ̀ ɖúú ɓě nìà ɓó kɔún wɛ̃ɛ dyí.

Kɛ́í-jìɖǐ-ɖɛ̀ɔ̀

¹⁵ “Ɔ ɖǎ ná nìǐn, m̀ mɛ nyuɛ ɓɛ́ sɛ́ɖɛ́-dyuò-nyɔ̀ ɓěɔ̀ ké kɛ́í-jìɖǐ-ɖɛ̀ kɔ̃̀ mú ní nyɔ ɓěɔ̀ ké ní mɔ́ɔ́-ɖɛ̀ dyuòɛɛ nyu. Wa mɛ nyùɛ̀n ɖɛ dyúáɖò ɓě wa nyùàìn ífɔ̀ɔ̀ kɛ. Ɖɛ ɓěɔ̀ mɔ̀ ɖénì-ɖɔ̀ nɔ̀mɔ̀ dyíin kè góò kè dyèě-ɖúú ɖàɓàìn kpèɛ̀ kɛɛ dú kò-kò ɓě kèɛ̀ dyéɖé zĩ-zã.

¹⁶ Ɔ wáká hĩinyɛɔ̀ mɛ ɓɛ́ìn wɔ̃, ké ɔ mɛ jaɖaìn kɔ̃. Wáká ɖò-ɖòɛ̀ tɔ̀mɔ̀-tɔ̀mɔ̀ mɛ mɔ̀ jìì-ɓàɖàǎ dyúáɖò.

¹⁷ Ɔ ɖǎ ná nìǐn, wa mɛ deìn sɔ́ɔ́ kpa ɖɛ dɔ̃̀ǐn hĩinyɛ ɖeín dyi ɓó kɛ́í-jìɖǐ-ɖɛ̀ɔ̀ kɔ̃. Sɔ́ɔ́ ɓě mɛ nì dɔ̃̀ǐn kĩ́ín-kĩ́ínɔ̀ múɛɛ mɛ mɔ̀ wúɖúɓì kè tópà ɔ kè bɛ́wòɖò.

¹⁸ Sɔ́ɔ́ ɓě mɛ nì dɔ̃̀ǐn sɔ̃́ nììnɔ̀ múɛɛ mɛ mɔ̀ tɔ́kɔ̀ì kè sááfɔ̀ ɔ kè dámɔ̀.

¹⁹ Sɔ́ɔ́ ɓě mɛ nì dɔ̃̀ǐn tã nììnɔ̀ múɛɛ mɛ mɔ̀ jásɛ̃̀ kè ágè ɔ kè ámɛ́tèɖè.

²⁰ Ké sɔ́ɔ́ ɓě mɛ nì dɔ̃̀ǐn hĩinyɛ nììnɔ̀ múɛɛ mɛ mɔ̀ kɛ́ɖɛ́sòɖàì kè ɔ́nɛ̀ ɔ kè jásàpà. Wa mɛ dèìn wa góò.

²¹ Sɔ́ɔ́-kpò ɓaɖa-bùè sè sɔ̃́ ɓěɔ̀ ɖò-ɖò mɛ ɓéɖé Éézùɖùɛ̀ɛ̀ dyú-gàà ɓaɖa-bùè sè sɔ̃́ ɓěɔ̀ ɖò-ɖòɛ̀ nyɛ́nɛ́ kà ɖɛ-sɔ̃-bɛ̃̀-kɔ̃-pòìn-ɖɛ̀ nìà kɛ, ɓɛ́ wa ké Éézùɖùɛ̀-xwèɖè-dù ɓaɖa-bùè sè sɔ̃́ ɓěɔ̀ bìì nì.

²² Ɔ ɖǎ ná nìǐn, wa mɛ nyu góò-hwɛ̀-zɛ̀nɛ̌ǐn-cɛ̃̀ɛ̀ sɔ̃́ ɓɛ́ wa kéɛ páná kà ɖúú nìà kɛ, ɓó kɛ́í-jìɖǐ-ɖɛ̀ɔ̀ bìì.

²³ Ké wa mɛ nyu góò-gbɛ̌ɛ̀ sɔ̃́, ɓɛ́ wa ké wa ɓó kɛ́í-jìɖǐ-ɖɛ̀ɔ̀ gã sɔ̃́ nìà ɖé kɔ̃in nyɛɛ dyí ɓá.

²⁴ Ɔ ɖǎ ná nìǐn, wa mɛ ɓá góò-cɛ̃̀ɛ̀ sɔ̃́ ɓěɔ̀ ɓó góò-gbɛ̌ɛ̀ ɓě nìà kɛ́í-jìɖǐ-ɖɛ̀ɔ̀ gã ɓěɔ̀ kɔ̃ɛɛ dyí.

²⁵ Ké wa mɛ ɓá góò-cɛ̃̀ɛ̀ ɓěɔ̀ máná tɔ̀ɔ̀ góò-gbǎ ɓě nìà ɓó ífɔ̀ɔ̀ ɖúú ɓě nìà ɓó kɔún wɛ̃ɛ dyí.

²⁶ Ɔ ɖǎ ná nìǐn, wa mɛ nyu góò-gbɛ̌ɛ̀ sɔ̃́ ɖò ɖe, ɓɛ́ wa ké wa kɛ́í-jìɖǐ-ɖɛ̀ɔ̀ gã tɔ̀ɔ̀ sɔ̃́ ɓěɔ̀ xwíníín dyi ɓá, hwɔ ɓó ífɔ̀ɔ̀ gbo dyí.

²⁷ Ɔ ɖǎ ná nìǐn, wa mɛ nyu góò-gbɛ̌ɛ̀ sɔ̃́ ɖò ɖe, ɓɛ́ wa ké wa ɓó ífɔ̀ɔ̀ ɖúú ɓě nìà ɓó kɔún wɛ̃ɛ gbɔ-sí-naín ɓěɔ̀ dyí ɓá ɓó gbo-jìnììn-ɖɛ̀ ɖaɓa-ɖaɓa nɔ̀mɔ̀ dyíin ɓɛ́ ɔ nìà ífɔ̀ɔ̀ wɔ̃ɛɛ kɔ̃in jɛ́ɛ́.

²⁸ Ké wa mɛ sã̀ìn kɛ́í-jìɖǐ-ɖɛ̀ɔ̀ nììn gbɛ̌ɛ̀ sɔ̃́ hwɔà ɖé ɓíɖíi dyíɛɛ ɓó ífɔ̀ɔ̀ nììn gbɛ̌ɛ̀ sɔ̃́ ɓěɔ̀ bũ̌in. Wa mɛ sã̀ìn wa ɖúú ɖàɓàìn kpèɛ̀ ɖò, ɓɛ́ ɔ kè ífɔ̀ɔ̀ gbo-jìnììn-ɖɛ̀ɔ̀ ké dyí deìn, nìí ɓɛ́ kɛ́í-jìɖǐ-ɖɛ̀ɔ̀ ní kɔ̃̀ ɖà ífɔ̀ɔ̀ bũ̌ buɛ̀.

²⁹ “Ti séín ɓɛ́ Eɖóún mu ɖé Pá Hwɛ̀ǐn-hwɛ̀ǐnɔ̀ mú dyáùn wɛ̃ɛ, nìí, Éézùɖùɛ̀-xwèɖè-dù ɓěɔ̀ nyɛ́nɛ́ ɓěɔ̀ mu ɓó ɔ kɛ́ dyéɖéí nììn ɓó kɛ́í-jìɖǐ-ɖɛ̀ kɔ̃̀ mú ní nyɔ ɓěɔ̀ ké ní mɔ́ɔ́-ɖɛ̀ dyuòɛɛ kɔ̃, ɓɛ́ ní nyɔ ɓěɔ̀ jè ké ḿ hwìɖǐi nì kánáá pū.

³⁰ Ké ɓó kɔ̃in ɖeɛɛ, m̀ mɛ po Dyúwìɖììn kè Túmì ɖé kɛ́í-jìɖǐ-ɖɛ̀ɔ̀ mú, ɓɛ́ wa ké ɓó Eɖóún kɛ́ dyéɖéí nì ti séín ɔ mu ɓó ḿ dyúa dyiìn nyɛ. Dyììn ɖéɛ múɛɛ, nìí, Eɖóún mu ɖɛ kɔ̃̀ mú ɓɛ́ ɔ ké ní mɔ́ɔ́-ɖɛ̀ dyuò ɓá Éézùɖùɛ̀-dyù ɓěɔ̀ jè dyíɛɛ ɓó ɔ kɛ́ dyéɖéí ɓéɖéìn kánáá pū ɓó ḿ dyúa.”

Sáa-zà-nyɔ̀ ɓěɔ̀ mú-po-ɖɔ̀ tɔ̀ɔ̀ ɓěɔ̀ jè

³¹ Ké Bounɓoɔ̀ cɛ̃ɛ ma Mózè gbo ɖe, ké ɔ ɖá, “Gã́ùn zɛin ɓɛ́ ɔ nìà ífɔ̀ɔ̀ xwíɖíiɛɛ mɛ mɔ̀ ɖɔ kɔ̃̀ dyéɖé ɖàɓàìn kpèɛ̀ kɛ.

³² Wa mɛ cɛ̃ ɓí ɖò ɓóɛ hwòɖǒǔn, ɓɛ́ ɓó ké dú-pòìn-naín jǔ ɓóɛ mú-po-tìǐn. Ké wa mɛ po ɓíɔ̀ wĩin, ɓɛ́ gã́ùnɔ̀ ní kɔ̃̀ ɖà fá.

³³ Ké wa mɛ ɖaɓa cu-ɓò kɔ̃̀ nyɛ́nɛ́ mɔ̀à pɔ́mɛ́gàɖànɛ̀ kɛɛ hwɔìn-ɖɛ̀ ɓě ɓó gã́ùnɔ̀ wĩin. Pɔ́mɛ́gàɖànɛ̀ ɓěɔ̀ mɛ mɔ̀ dyèě-ɖúú ɖàɓàìn kpèɛ̀ kɛɛ dú kò-kò ɓě kèɛ̀ dyéɖé zĩ-zã. Ké wa mɛ ɓá góò-kpèè ɓě ɓó pɔ́mɛ́gàɖànɛ̀ɔ̀ hwɔìn-ɖɛ̀ ɓěɔ̀ pṹa dyi ɓó gã́ùnɔ̀ wĩin dà séín.

³⁴ Góò-kpèè ɓěɔ̀ kè pɔ́mɛ́gàɖànɛ̀ɔ̀ hwɔìn-ɖɛ̀ ɓěɔ̀ mɛ ɓaɖaìn múin.

³⁵ Eɖóún mɛ po gã́ùn nìà kɛ mú ti ɓɛ́ ɔ mu sáa-zà-kũ̀àɔ̀ nyuɛń nììn nyɛ. Ti ɓɛ́ ɔ mu ɖé Pá Hwɛ̀ǐn-hwɛ̀ǐnɔ̀ mú dyáùn ɓó ḿ dyúa kɛ kè ti ɔ mu síìn nyɛɛ, nìí, wa mu kpeeɔ̀ wuɖu wɔ̃́ùn, ké ɔ se mɛ́ɛ mu.

³⁶ “Ɔ ɖǎ ná nìǐn, wa mɛ nyu góò-hwɛ̀-zɛ̀nɛ̌ǐn-pĩ̀à ɖò. Ké wa mɛ céè ɓóɛ kɔ̃ kà nyɔ kéɔ́ kà ɖɛ-sɔ̃-bɛ̃̀-kɔ̃-pòìn-ɖɛ̀ ɖò nyuɛ. Wuɖu wa kéà ɓó céèɛɛ mɛ ɖá, ‘Nyɔ nìà kɛ kpá wáká ɓó Bounɓoɔ̀ bìì.’

³⁷ Ké wa mɛ ɓáa ɖúú ɖàɓàìn kpèɛ̀ ɖò dyí, ɓɛ́ wa kéɛ dúi-bĩìn-ɖɔ̀ ɓɛ́ wa ɖǎ páɖá kɛɛ dyúa dyi ɓá.

³⁸ Eɖóún mɛ ɓéɖéìn góò-pĩ̀àɔ̀ ɓó ɔ dyúa-kpàɔ̀ kɔ̃, ɓɛ́ mɔ̄ Bounɓoɔ̀ ké sáa-zàìn-ɖɛ̀ séín ɓɛ́ Éézùɖùɛ̀-dyù ɓěɔ̀ mu ḿ gbo dyàùn wɛ̃ɛ dyi kpɔ̃, sepóɛɖé dyììn ɖé góò-pĩ̀àɔ̀ múɛɛ, Eɖóún mu nyɔ ɓěɔ̀ nàmàǔn ɓě ɓá sáa-zàìn-ɖɛ̀ ɓěɔ̀ dyíɛɛ ɓéɖéìn.

³⁹ “Ɔ ɖǎ ná nìǐn, wa mɛ ɖú ɖénì-ɖɔ̀ nɔ̀mɔ̀ dyíin dyí, ɓɛ́ wa kéɛ gã́ùn xwã́-xwã́ ɓɛ́ Eɖóún kéà mú po ɖé gbɔɛ kè dúi-bĩìn-ɖɔ̀ ɓɛ́ wa páɖá kɛɛ mú nyu. Ké wa mɛ ɖaɓa gbo-jìnììn-ɖɛ̀ ɖò ɓó Eɖóún bìì ɖekè.

⁴⁰ “Ɔ ɖǎ ná nìǐn, wa mɛ nyu gã́ùn ɓě kè gbo-jìnììn-ɖɛ̀ ɓě kè dú-jìnììn-ɖɛ̀ ɓě ɓó Eɖóún dyú-gàà ɓěɔ̀ bìì ɖekè, ɓɛ́ wa kéɛ nyu ɓɛ́ Eɖóún dyú-gàà ɓěɔ̀ ké díɖí kè dya-dè-dè ɓéɖé.

⁴¹ Ɔ ɖǎ ná nìǐn, m̀ mɛ po m̀ ɖíí-gàà Eɖóún kè ɔ dyú-gàà ɓěɔ̀ ɖɔ ɓěɔ̀ wa mú, ɓɛ́ m̀ ké wa cáná dúún po, ɓɛ́ m̀ ké wa kũ̀à kɔ̃ún po. M̀ mɛ po wa wáká, ɓɛ́ wa ké ní sáa-zà-nyɔ̀ ɓě jǔ.

⁴² “Hwɛ̀ ɓɛ́ m̀ kéà náa nyuɛɛ, wa mɛ nyu ɖénì-ɓɔ̀ùn-ɓɔ́ún ɓě ɓó Eɖóún kè ɔ dyú-gàà ɓěɔ̀ bìì. Ɓɔ́ún-ɓɔ́ún ɓěɔ̀ mɛ sèìn wa pɔ̃́ gbɔ̀ǔn, ɓɛ́ ɔ ké waà dɛ̃-dà ɓěɔ̀ vǐè.

⁴³ Eɖóún kè ɔ dyú-gàà ɓěɔ̀ mɛ po wa mú ti séín wa mu jàɖàìn-gbò kɔ̃̀ mú ɓɛ́ ḿ kè ní nyɔ ɓěɔ̀ dyéàìn nyɛɛ mú dyáa mɔ́ùn wɛ̃, mɔɔ ti séín wa mu sáa-kɔ̃-zàìn-gbààɔ̀ bũ̌in xwɛ̃́ìn, ɓɛ́ wa ké kũ̀à nyu ɖé Pá Hwɛ̀ǐn-hwɛ̀ǐnɔ̀ múɛɛ, nìí ɓɛ́ zaa ní kɔ̃̀ ɖà wa dúún wáɖá, wa ní kɔ̃̀ ɖà mɛ́. Ɖɛ nìà kɛ mɛ mɔ̀ gma kánáá pū ɓó Eɖóún kè ɔ xwíníín-dyù ɓěɔ̀ bìì.”