Dìtɔ̀wáɖánámɛ̀ 34 - Ɓǎsɔ́ɔ̀ Báɓòɔ̀

Mózèɛ̀ mɛ́ jè

¹ Ti ɓɛ́ Mózè ɖǎ ma Éézùɖùɛ̀-nyɔ̀ ɓěɔ̀ mana kɔ̃ poɛ hwɔɛɛ, ɔ sɔ̀ ma ɖé Móà-ɓòɖòɔ̀ bɔɔ-kpàɔ̀ kɔ̃, ké ɔ dyá ma Néɓò-tòɖò ɓɛ́ ɔ mɔ̀ ma Pígà-tòɖò, ɓɛ́ ɔ hwɔà ɖé Jɛ́ɖèkóò-hwɔ̀ɖɔ̀ɔ̀ dyúa dyíɛɛ dú-hwìɛ̀, ké Bounɓoɔ̀ tɛ̀mɛ̀ìn ma Mózè ɓóɖó gànáɔ̀ dyí. Ɔ tɛ̀mɛ̀ìn ma ɔ ɓóɖóɔ̀ wáká sɔ̀à ɖé Gíɖèà-ɓòɖòɔ̀ kɔ̃, ké ɔ nyinià ɖé Dɛ̃́ìn-hwɔ̀ɖɔ̀ɔ̀ wĩín nyɛɛ dyí.

² Ké ɔ tɛ̀mɛ̀ìn ma ɔ ɓóɖóɔ̀ wáká mɔ̀à Náfátàɖì nììn xwéɖé-dùɔ̀ ɓóɖó gànáɔ̀ kè Ífèɖèìn nììn xwéɖé-dùɔ̀ kè Mànásì nììn xwéɖé-dùɔ̀ ɓóɖóɔ̀ ɔ kè Júɖà nììn xwéɖé-dùɔ̀ ɓóɖó gàná ɓɛ́ ɔ nyinià ɖé Mɛ́ɖɛ̀tɔ̀wéɖénìà-dyòǒɔ̀ wĩín nyɛɛ dyí.

³ Ké ɔ tɛ̀mɛ̀ìn ma ɔ ɓóɖóɔ̀ wáká tɔ̀ɔ̀ mɔ̀à Nɛ́gà-ɓòɖòɔ̀ kè bɔɔ-kpà kɔ̃̀ kɔ̃ Jɛ́ɖèkóò-hwɔ̀ɖɔ̀ ɓɛ́ wa ɖáìn Hwɛ̃-Gbǎ-hwɔ̀ɖɔ̀ kɛɛ nìà kɛ, muà tee ɓɛ́ ɔ kéà Zóà-hwɔ̀ɖɔ̀ɔ̀ dyɛ̀ìn nyɛɛ dyí.

⁴ Hwɛ̀ ké Bounɓoɔ̀ cɛ̃ɛ ma Mózè gbo, ké ɔ ɖá, “Ɓóɖó ɓɛ́ ḿ ɖáìn zɔ̃̌ɔ̀ kà Ééɓòɖòhɛ̃́ɛ̀ kè Áázè ɔ kè Jékɔ̀ nyɛ́nɛ́ín, ɓɛ́ ḿ kéà waà xwíníín-dyù ɓě nyíɛɛ, ɖéɛ̀ m̀ ɖǎà dyéɛ̀. Kɛɛ m̀ se ɖé ɓóɖóɔ̀ kɔ̃ muɛ́ mu.”

⁵ Ɔ jèɛɛ, Mózè mɔ̀à Bounɓoɔ̀ gbo-nì-nyɔ̀ɔ̀ kɛɛ mɛ́ìn ma ɖé Móà-ɓòɖòɔ̀ kɔ̃ kà Bounɓoɔ̀ nyuɛ ma kà cɛ̃ɛ kɛ.

⁶ Ké Bounɓoɔ̀ zà ma ɔ dyóɖóún ɖé Móà-ɓòɖòɔ̀ kɔ̃, ɖé bɔɔ-kpà nìà ɓó Bɛ̀-Píò-hwɔ̀ɖɔ̀ɔ̀ wáún wɛ̃ɛ kɔ̃. Ké dyɛ̀ìn ɓó zɛ̃̌ɛ̀ kɛɛ, nyɔ ɖò se ɔ xwɛ́-gmàà da dyuò.

⁷ Mózè nyu ma zɔ̃ hɔ̃dɛ̀ɖɛ̀ ɖò kè kpáɖá-nyɔ, hwɛ̀ ké ɔ mɛ́ ma, kɛɛ ɔ dyéɖé ɓěɔ̀ nì ma dyúún ke, mɔɔ ké kpé se ma ɔ dyí hwɛ̀.

⁸ Ké Éézùɖùɛ̀-nyɔ̀ ɓěɔ̀ vĩ̌ ma Mózè jè ɖé Móà-ɓòɖòɔ̀ bɔɔ-kpàɔ̀ kɔ̃, ɓó wé kpáɖá-nyɔ ɓaɖa-bùè xwíníín. Wa gã̀ ma vĩ̌ɛń dyi tee ké vĩ̌-wèɔ̀ zi ma dyi.

⁹ Ɔ nì ná kɛɛ, Gèɖèpɔ́ɔ̀ ɖǎ ma Jasúé mɔ̀à Núùnɛ̀ dyú-gààɔ̀ kɛɛ fɔ̀nɔ̀ hwòɖǒ nyí, sepóɛɖé Mózè ɖǎ ma ɔ sɔ̃ dúún dè. Ké Éézùɖùɛ̀-nyɔ̀ ɓěɔ̀ tò ma Jasúé gbo ɖùǔ, ké wa nyu ma ɖɛ Bounɓoɔ̀ cɛ̃ ma kà Mózè gboɛ.

¹⁰ Sɔ̀ìn ɓó ti Mózè ɖǎǒ zɔ̃̌ɔ̀ mɛ́ɛ gboɛɛ, kpáá-ɖɛ̀-cɛ̃-nyɔ̀ ɖò séè ɖé Éézùɖùɛ̀-ɓòɖòɔ̀ kɔ̃ nì ɖe kà Mózè nìǒ kà kɛ. Bounɓoɔ̀ kè Mózè xwɛ̃́ìn ma bũ̌in, ké wa zĩàìn wuɖu wĩín.

¹¹ Kpáá-ɖɛ̀-cɛ̃-nyɔ̀ ɖò séè zɛ̃̀ìn-ɖɛ̀ ɓě kè ɖɛ dĩ́ín-dĩ̀ìn ɓě ɓɛ́ Bounɓoɔ̀ ɖoɓo ma kà Mózè ɓɛ́ ɔ ké ma kà Íjè-kã̀ǎɔ̀ kè ɔ gɔ̌mànà-nyɔ̀ ɓěɔ̀ ɔ kè ɔ ɓóɖó gànáɔ̀ bũ̌ nyuɛɛ nyu ɖò.

¹² Ké kpáá-ɖɛ̀-cɛ̃-nyɔ̀ ɖò séè kpé vɛ̀nɛ̀ mɔɔ nyɔ-fã̀àǔn-po-ɖɛ̀ vɛ̀nɛ̀ ɓě ɓɛ́ Mózè nyuà ɓó Éézùɖùɛ̀-nyɔ̀ séín dyéɖé waíɛɛ nyu ɖò.