Dìtɔ̀wáɖánámɛ̀ 31 - Ɓǎsɔ́ɔ̀ Báɓòɔ̀

Jasúé sè Mózè bɛ̃̌ǐn

¹ Sɔ̀ìn ɓóɛ gboɛɛ, Mózè kpa ma wuɖu dyúa ɖe ɖé Éézùɖùɛ̀-nyɔ̀ séín ɓěɔ̀ gbo,

² ké ɔ ɖá, “Ḿ nyuá zɔ̃ hɔ̃dɛ̀ɖɛ̀ kè kpáɖá-nyɔ ɖò. Ḿ se ɓě nàìn ɓɛ́ìn ɖe, sepóɛɖé Bounɓoɔ̀ ɖǎa ḿ gbo cɛ̃ kà ɓɛ́ ḿ se Jɔ́nì-nìɔ̀ péɖéɛ muɛ.

³ Bounɓo mɔ̀à ɓěɛ̀ Gèɖèpɔ́ɔ̀ kɛɛ mìɔùn mu ɓě dyúa nììn, ɓɛ́ ɓě ké Jɔ́nì-nìɔ̀ péɖé. Ɔ muɛ nyuùn ɓɛ́ ɓě ké ɓóɖó-dù ɓěɔ̀ nyɔ ɓěɔ̀ mú gbɔɔ̀, ɓɛ́ ɓě ké waà ɓóɖóɔ̀ dyí ɖú. Bounɓoɔ̀ ɖǎa cɛ̃ ɖe kà Jasúé mu ɓěɛ̀ nàìn-nyɔ̀ jǔùn, ɓɛ́ ɔ ké ɓě níɔ̀ péɖéìn nyɛ.

⁴ Bounɓoɔ̀ mu ɓóɖóɔ̀ nyɔ ɓěɔ̀ mú gbɔɔ̀ùn kà ɔ gbɔɔ̀ ma kà Síhɔ̃̀ kè Ógì ɓɛ́ wa mɔ̀à Ámɔ̀-nyɔ̀ ɓěɔ̀ kã́á ɓěɔ̀ kɛ kè waà ɓóɖóɔ̀ múɛ.

⁵ Bounɓoɔ̀ mu ɓě nyɔ ɓěɔ̀ xwaún dyi poùn, ké ɓě mɛ nyu ɖɛ séín ḿ cɛ̃à ɓě gboɛɛ wa bũ̌.

⁶ Ɓě mɛ ku dyi, ɓɛ́ ɓě ké hwòɖǒ ku. Ɓě mɛ ɓɔ́ wa dyi fɛ̃̀ìn, sepóɛɖé Bounɓo mɔ̀à ɓěɛ̀ Gèɖèpɔ́ɔ̀ kɛɛ nìǒ ɓě gbo. Ɔ se ɓě dyi táǎ mu, ké ɓě jè se ɔ hwìɖǐi sɔ̀ɔ̌ mu.”

⁷ Ti ɓɛ́ Mózè ɖǎ ma wuɖuɛ hwɔɛɛ, ɔ ɖá ma Jasúé, ké ɔ cɛ̃ɛ ma ɔ gbo ɓó Éézùɖùɛ̀-nyɔ̀ séín ɓěɔ̀ dyúa, ké ɔ ɖá, “M̀ mɛ ku dyi, ɓɛ́ m̀ ké hwòɖǒ ku, sepóɛɖé nì mu nyɔ ɓěɛ̀ nàìn-nyɔ̀ jǔùn, ɓɛ́ m̀ ké wa ɓóɖó ɓɛ́ Bounɓoɔ̀ ɖáìnǒ zɔ̃̌ɔ̀ kà wa ɓǎ nììn ɓǎ ɓěɔ̀ nyɛ́nɛ́ín nyɛɛ kɔ̃ kpa, ɓɛ́ m̀ kéɛ wa múin geìn, ɓɛ́ ɔ ké waà kɔ̃̀ɔ̀-ɖɛ̀ jǔ.

⁸ Bounɓoɔ̀ mu ɓó m̀ gbo nììn, ɓɛ́ ɔ mìɔùn ké m̀ nàìn. Bounɓoɔ̀ se m̀ dyi táǎ mu, ké nì jè se ɔ hwìɖǐi sɔ̀ɔ̌ mu. Ɔ jèɛɛ, m̀ mɛ ɓɔ́ fɛ̃̀ìn, ké nì hwòɖǒ mɛ ɓɔ́ ɖé ɖei kpáa.”

Wa mɛ zà gma-cèè-ɖɛ̀ɔ̀ wuɖuún ɓó zɔ̃ mɛ̀nɛ̌ìn-sɔ̃́ séín xwíníín

⁹ Sɔ̀ìn ɓóɛ gboɛɛ, Mózè céè ma Gèɖèpɔ́ɔ̀ gmaɔ̀ céè-ɖɛ̀ ɖò mú, ké ɔ nyíɛ ma Ɖíìváà-nyɔ̀ ɓě mɔ̀à sáa-zà-nyɔ̀ ɓě ɓɛ́ wa mɔ̀à Bounɓoɔ̀ gma-gbɔ̀ɖɔ̀ɔ̀ ɓéɖé-nyɔ̀ ɓěɔ̀ kɛ kè Éézùɖùɛ̀-nyɔ̀ ɓěɔ̀ nyɔ vɛ̀nɛ̀ séín ɓěɔ̀ xwa.

¹⁰ Hwɛ̀ ké Mózè cɛ̃ɛ ma wa gbo, ké ɔ ɖá, “Zɔ̃ mɛ̀nɛ̌ìn-sɔ̃́ nììn séín mɔ̀ kpa-dyi-táà-zɔ̃̀. Ɖé zɔ̃ mɛ̀nɛ̌ìn-sɔ̃́ séín mánáín-hwɛ̀-tì ɓɛ́ ɔ mɔ̀ Ɓeè-Dyù-hwɔ̀ɔ̀ pa-tì ɖekèɛɛ,

¹¹ ti kɔ̃̀ ɓaɖa ɓɛ́ Éézùɖùɛ̀-nyɔ̀ séín ɓěɔ̀ poìn kà dyí ɓó dɛ̀ Bounɓo mɔ̀à ɓěɛ̀ Gèɖèpɔ́ɔ̀ kɛɛ muà gãùn wɛ̃ɛ, ɓóɛ̀ ɓě mɛ zàìn gmaɔ̀ wuɖuún ɓó wa séín dyúa, ɓɛ́ wa kéɛ wɔ̃́.

¹² Ɓě mɛ poìn gàa ɓě kè màa ɓě kè dyú ɓě ɔ kè ɖíà ɓě cĩ́à ɓěɛ̀ hwɔɖɔ ɓěɔ̀ múɛɛ dyí, ɓɛ́ wa ké gmaɔ̀ wɔ̃́, ɓɛ́ ɔ kéɛ nyu ɓɛ́ wa ké Bounɓo mɔ̀à ɓěɛ̀ Gèɖèpɔ́ɔ̀ kɛɛ dyi fɛ̃̀ìn, ɓɛ́ wa ké wuɖu séín nìà ɖé gmaɔ̀ múɛɛ dyi kpɔ̃ kóɖó-kóɖó.

¹³ Ɓě dyiɛ náa nyuín, nìí, waà xwíníín-dyù ɓě ɓɛ́ wa séè kà gmaɔ̀ wɔ̃́ ɖòɛɛ muɛ wɔ̃́ùn, ké ɔ nyuɛ nyuùn ɓɛ́ wa ké Bounɓo mɔ̀à ɓěɛ̀ Gèɖèpɔ́ɔ̀ kɛɛ dyi fɛ̃̀ìn kà wa mu cĩ́ìn ɖé ɓóɖó kɔ̃̀ jè ɓɛ́ ɓě nìà Jɔ́nì-nìɔ̀ péɖéɛń, ɓɛ́ ɓě kéà dyí ɖú, ɓɛ́ ɔ kéà ɓěɛ̀ kɔ̃̀ɔ̀-ɖɛ̀ jǔɛɛ kɔ̃ɛ.”

Ɖɛ hwɛ̀ìn-gbɔ ɓɛ́ Bounɓoɔ̀ cɛ̃ Mózè gbo ɓɛ́ ɔ ké nyuɛ

¹⁴ Sɔ̀ìn ɓóɛ gboɛɛ, Bounɓoɔ̀ cɛ̃ɛ ma Mózè gbo, ké ɔ ɖá, “Dyéɛ, nì mɛ́-wè ɖǎ dyi xwɛ̃́ìn. Ɔ jèɛɛ ɖá Jasúé, ɓɛ́ ɓě ké ɖé jàɖàìn-gbò kɔ̃̀ mú ɓɛ́ ḿ kè ní nyɔ ɓěɔ̀ dyéàìn nyɛɛ mú mu, ɓɛ́ ḿ ké ɔ kũ̀à kɔ̃ún po.” Ké Mózè kè Jasúé mu ma ɖé jàɖàìn-gbòɔ̀ mú.

¹⁵ Ké Bounɓoɔ̀ nì ma ní-kpò ɖò mú, ké ɔ wóɖóìn ma wa dyí. Ní-kpòɔ̀ nì ma ɓó jàɖàìn-gbòɔ̀ wĩín.

¹⁶ Ké Bounɓoɔ̀ cɛ̃ɛ ma Mózè gbo ɖe, ké ɔ ɖá, “Gmɔ̀ nɔ̄, m̀ nìǎ m̀ ɓǎ ɓěɔ̀ gbo muɛń dyiɛń, ké nyɔ ɓěɛ̀ mu gbàɖàùn poùn dyììn ɖé ɓóɖó wa nìà kɔ̃ muɛń nyɛɛ gèɖèpɔ́ɔ̀ ɓěɔ̀ ɓiè-ɓiè mú. Wa mu ní jè dyi táàùn, ɓɛ́ wa ké dèè-wùɖù nìà ɓó ḿ kè wa pṹa kɛɛ mú jaɖa.

¹⁷ Wé kɔ̃̀ ɓaɖa ɓɛ́ wa muɛ náa nyuùn wɛ̃ɛ, ní mu wa dyoɖoún kpáìn, ké ní mu wa jè dyi táàùn. Ní mu wa dyúa xwáɖáún pòìn, ké wa mu mú gbɔɔ̀ùn. Ɖɛ gbà kè fũ̀à-fṹá-ɖɛ̀ pàɖǎ mu wa kɔ̃ dyiìn. Ké ɓó wéa ɓaɖaa, wa muɛ cɛ̃ìn, ɓɛ́ wa ké níiń, ‘Má, ɖɛ gbà ɓěɛ̀ nì à kɔ̃ dyiɛń, sepóɛɖé à Gèɖèpɔ́ɔ̀ se ɓó à gbo nì ɖe jèe?’

¹⁸ Ɓó wéa ɓaɖaa, ní mu wa dyúa xwáɖáún pòìn ɓó ɖɛ gbà mɔ̀ gèɖèpɔ́ɔ̀ kà kò ɖò ɓě gbo-gmɔ̀ìn-gmɔ̀ìn wa nyuà kɛɛ jè.

¹⁹ “Ɓó kàǔn wɛ̃ɛ, ɓě céè wɛ́ɖɛ́ nìà kɛ, ɓɛ́ ɓě kéɛ Éézùɖùɛ̀-dyù ɓěɔ̀ tɛ̀mɛ̀ìn, ɓɛ́ wa kéɛ ɓeɖe, ɓɛ́ ɔ ké ḿ kè waà zàse jǔ.

²⁰ Ní mu wa ɓóɖó bã-bã ɓɛ́ ḿ ɖáìnǒ zɔ̃̌ɔ̀ kà wa ɓǎ nììn ɓǎ ɓěɔ̀ nyɛ́nɛ́ín nyɛɛ kɔ̃ kpaùn. Ké wa mu ɖé ɖii-ɖɛ̀ séín wa mɔ́ɛɛ ɓéɖéìn, ké wa mu ɖé dúún zaìn. Kɛɛ wa mu gèɖèpɔ́ɔ̀ kà kò ɖò ɓě gbo gmɔ̀ìn, ɓɛ́ wa ké wa ɓiè. Wa mu ní jè dyi táàùn, ɓɛ́ wa ké dèè-wùɖù nìà ɓó ḿ kè wa pṹa kɛɛ mú jaɖa.

²¹ Ké ɖɛ gbà kè fũ̀à-fṹá-ɖɛ̀ pàɖǎ mu wa kɔ̃ dyiìn. Nìí, wɛ́ɖɛ́ nìà kɛ mu ḿ kè waà zàse jǔùn, sepóɛɖé wɛ́ɖɛ́ɔ̀ se wa kè waà xwíníín-dyù ɓě hwìɖǐi sɔ̀ɔ̌ mu. Hwɛ̀ ḿ kéà wa ɓóɖó ḿ ɖáìn ma kà wa nyɛ́nɛ́ín nyɛɛ kɔ̃ kpaa, ḿ dyuò waà hwòɖǒɛ̀-gbɔ-po-ɖɛ̀ ɓěɔ̀ dyí.”

²² Ɓó wé dyúáɖòɔ̀ ɓaɖaa, Mózè céè ma wɛ́ɖɛ́ɔ̀, ké ɔ tɛ̀mɛ̀ìn ma wɛ́ɖɛ́ɔ̀ Éézùɖùɛ̀-nyɔ̀ ɓěɔ̀.

²³ Sɔ̀ìn ɓóɛ gboɛɛ, Bounɓoɔ̀ wùɖù ma Jasúé mɔ̀à Núùnɛ̀ dyú-gààɔ̀ kɛɛ gbo, ké ɔ ɖá, “M̀ mɛ ku dyi, ɓɛ́ m̀ ké hwòɖǒ ku, sepóɛɖé mɔ̀ mu Éézùɖùɛ̀-dyù ɓěɛ̀ ɖé ɓóɖó ɓɛ́ ḿ ɖáìn zɔ̃̌ɔ̀ kà wa nyɛ́nɛ́ín nyɛɛ kɔ̃ kpaùn, ké ní muó m̀ gbo nììn.”

²⁴ Ti ɓɛ́ Mózè ɖǎ ma gma séín ɓěɔ̀ céè ɖé céè-ɖɛ̀-kpò ɖò múɛɛ,

²⁵ ɔ cɛ̃ɛ ma Ɖíìváà-nyɔ̀ ɓě mɔ̀à Bounɓoɔ̀ gma-gbɔ̀ɖɔ̀ɔ̀ ɓéɖé-nyɔ̀ ɓěɔ̀ kɛɛ gbo, ké ɔ ɖá,

²⁶ “Ɓě ɖú gma-cèè-ɖɛ̀ nìà kɛ dyí, ɓɛ́ ɓě kéɛ ɓóɛ Bounɓo mɔ̀à ɓěɛ̀ Gèɖèpɔ́ɔ̀ kɛɛ gma-gbɔ̀ɖɔ̀ɔ̀ wáún dyi pɛ̃́ìn. Ɓóɛ̀ ɔ mɛ nì, ɓɛ́ ɔ ké ɓě zaa kpɔ̃̀ìn.

²⁷ Sepóɛɖé ḿ dyuòɛ̀ kà ɓěɛ̀ dú kùmù, ké ɓě po Bounɓoɔ̀ wuɖuɔ̀ kɛ́ɛ́ dyíɛ. Ɔ jǔ ké ti ḿ nìà cĩ́ɛń nyɛɛ, ɓě dyi Bounɓoɔ̀ wuɖuɔ̀ kɛ́ɛ́ dyí po ní, nìí, ɓě mu ɔ wuɖuɔ̀ kɛ́ɛ́ dyí poùn ɖe mìɔ ti ɓɛ́ ḿ ɖǎ mɛ́ɛ.

²⁸ Ɔ jèɛɛ, ɓě poìn Éézùɖùɛ̀ xwéɖé-dù séín ɓěɔ̀ nyɔ vɛ̀nɛ̀ ɓěɔ̀ kè waà gɔ̌mànà-nyɔ̀ ɓěɔ̀ ɓó ḿ dyúa dyí, ɓɛ́ ḿ ké wa wuɖu ɓěɛ̀ gbo cɛ̃, ké ní mu dyɔɔ̀ kè ɓóɖó-kpàà ɖáùn, ɓɛ́ wa ké ḿ kè waà zàse jǔ.

²⁹ Sepóɛɖé ḿ dyuòɛ̀ dyí kà ti ɓɛ́ ḿ ɖǎ mɛ́ɛ ní, ɓě mu nàmàǔn nyuùn, ké ɓě mu ɖɛ ɓě ḿ ɖǎà ɓě gbo cɛ̃ɛ kɔ̃ín pòìn nyɛ. Ké wé ɖò mu dyiìn, ɓɛ́ ɖɛ gbà ké ɓě kɔ̃ dyi, sepóɛɖé ɓě mu Bounɓoɔ̀ nàmàǔn bũ̌ nyuùn, ɓɛ́ ɓě ké ɔ dyoɖoún po dyììn ɖé ɓěɛ̀ xwai-nyu-ɖɛ̀ ɓě mú.”

Mózèɛ̀ wɛ́ɖɛ́

³⁰ Ti ɓɛ́ Éézùɖùɛ̀-nyɔ̀ séín ɓěɔ̀ ɖǎ ma ɓó Mózè dyúa dyí poìn nyɛɛ, Mózè kpaìn ma wɛ́ɖɛ́ gànáɔ̀ wuɖuɔ̀ kɔ̃in, ké wa tò ma ɔ gbo ɖùǔ. Ɔ ɖá,