Dìtɔ̀wáɖánámɛ̀ 29 - Ɓǎsɔ́ɔ̀ Báɓòɔ̀

Wuɖu ɓɛ́ Bounɓoɔ̀ kè Éézùɖùɛ̀-nyɔ̀ ɓěɔ̀ dè ma ɖé Móà-ɓòɖòɔ̀ kɔ̃ɛ

¹ Wuɖu ɓěɛ̀ mɔ̀ wuɖu ɓɛ́ Bounɓoɔ̀ cɛ̃ ma Mózè gbo, ɓɛ́ ɔ kè Éézùɖùɛ̀-nyɔ̀ ɓěɔ̀ ké ma dè ɖé Móà-ɓòɖòɔ̀ kɔ̃ ɓó wuɖu ɓɛ́ ɔ kè wa po ma kà ɓíín kĩ́ín ɖé Hówèɖè-tòɖòɔ̀ gboɛɛ wáún wɛ̃.

² Ti ɓɛ́ Bounɓoɔ̀ ɖǎ ma wuɖu ɓěɛ̀ Mózè gbo cɛ̃ɛ hwɔɛɛ, Mózè poìn ma Éézùɖùɛ̀-nyɔ̀ séín ɓěɔ̀ dyí, ké ɔ wùɖù ma wa gbo, ké ɔ ɖá, “Ɓě mìɔùn dyé ma ɖɛ séín ɓě ɓɛ́ Bounɓoɔ̀ nyu ma kà Íjè-kã̀ǎɔ̀ kè ɔ gɔ̌mànà-nyɔ̀ séín ɓěɔ̀ kè ɔ ɓóɖó gànáɔ̀ bũ̌ɛɛ ní.

³ Ɓě dyé ma nyɔ-gǎ-dyéìn-ɖɛ̀ ku wɔ̃ ɓě ɓɛ́ Bounɓoɔ̀ dyà ma kà Íjè-nyɔ̀ ɓěɔ̀ kɔ̃ ɓó ɓě dyéɖé waíɛ kè zɛ̃̀ìn-ɖɛ̀ ɓěɔ̀ ɔ kè ɖɛ dĩ́ín-dĩ̀ìn ɓěɔ̀ ní.

⁴ Kɛɛ ɓó zɛ̃̌ɛ̀ kɛɛ, Bounɓoɔ̀ séè ɓě hwòɖǒ ɓɛ́ ɔ wɔ̃́ ɖɛ múin nyɛ, mɔɔ dyéɖé ɓɛ́ ɔ dyé dyiɛ, mɔɔ ɖùǔ ɓɛ́ ɔ wɔ̃́ dyiɛɛ nyí ke.

⁵ Ɓó zɔ̃ kpáɖá-nyɔ sɔ̃́ kɔ̃̀ xwíníín ɓɛ́ ḿ ɖǎà ɓě nàìn nɔ̄ gbǎùn-fúɖúáà kɔ̃ɛɛ, ɓěɛ̀ mú-po-ɖɔ̀ se ma ɓě múin zɔ̃̌, mɔɔ ké ɓěɛ̀ ɓoún-po-bà se ma súá kpá.

⁶ Ɓě se ma ɓɛɖɛɛ̀ ɖò ɖi, mɔɔ ké ɓě se ma wã́ìn mɔɔ kàmàà-ɖɛ̀ ɖò ná, kɛɛ Bounɓoɔ̀ nyí ma ɓě ɖii-ɖɛ̀ ɓɛ́ ɓě kéɛ dyí dyuò kà ɓɛ́ ɔ mɔ̀ ɓěɛ̀ Gèɖèpɔ́ɔ̀ kɛ.

⁷ Ti ɓɛ́ ɓěà nyini ma pá nìà kɛ múɛɛ, Síhɔ̃̀ mɔ̀à Hɛ́ɓɔ̀ùn-hwɔ̀ɖɔ̀ɔ̀ kã́áɔ̀ kɛ kè Ógì mɔ̀à Básàùn-ɓòɖòɔ̀ kã́áɔ̀ kɛɛ dyi, ké wa vɔ̃ ma à gbo, kɛɛ à ɖu ma wa toún.

⁸ Ké à ɖú ma waà ɓóɖóɔ̀ dyí, ké à geɛ̀n ma Wuɖuɓíín nììn xwéɖé-dùɔ̀ kè Gáà nììn xwéɖé-dùɔ̀ ɔ kè Mànásì nììn xwéɖé-dù fáún-fáúnɔ̀ nyɔ ɓěɔ̀ múin, ɓɛ́ ɔ ké ma wa nììn kɔ̃̀ɔ̀-ɖɛ̀ jǔ.

⁹ Ɔ jèɛɛ, ɓě mɛ kpɔ̃ wuɖu ɓě nìà ɖé dèè-wùɖù nìà kɛ múɛɛ dyi kóɖó-kóɖó, ké ɖɛ séín ɓě mu nyuùn wɛ̃ɛ mu mú wóɖóùn.

¹⁰ “Ɓě séín nyànàà zɛ̃̌ɛ̀ dà dyiɛɛ, ɓě nyànà ɓó Bounɓo mɔ̀à ɓěɛ̀ Gèɖèpɔ́ɔ̀ kɛɛ dyúa dyi. Ɓě kè ɓěɛ̀ xwéɖé-dù ɓěɔ̀ nàìn-nyɔ̀ ɓěɔ̀ kè ɓěɛ̀ nyɔ vɛ̀nɛ̀ ɓěɔ̀ kè ɓěɛ̀ gɔ̌mànà-nyɔ̀ ɓěɔ̀ ɔ kè Éézùɖùɛ̀-gàà tɔ̀ɔ̀ ɓěɔ̀

¹¹ kè ɓěɛ̀ dyú ɓěɔ̀ kè ɓěɛ̀ gmàà ɓěɔ̀ ɔ kè ɖíà ɓě cĩ́à ɖé ɓě hwìɛ̀, ɓɛ́ wa cɛ̃à nyɛ, ké wa hwùɖǔà ní ɓó ɓě bììɛɛ poìn dyí.

¹² Ɖɛ kɔ̃̀ jè ɓě poìn zɛ̃̌ɛ̀ kà dà dyíɛɛ mɔ̀ ɓɛ́ ɓě kè Bounɓo mɔ̀à ɓěɛ̀ Gèɖèpɔ́ɔ̀ kɛɛ ké wuɖu dè. Ɔ mɔ̀ dèè-wùɖù ɓɛ́ ɔ ɓéɖé wuɖu-ɖi-ɖiɛ. Ɖéɛ̀ ɓě kè Bounɓo mɔ̀à ɓěɛ̀ Gèɖèpɔ́ɔ̀ kɛɛ nìà dèɛ̌n nyɛ.

¹³ Ɔ nyuɛ náa, ɓɛ́ ɔ ké ɓě dyí ɖú, ɓɛ́ ɓě ké ɔ mìɔùn nììn nyɔ ɓě jǔ, ɓɛ́ ɔ ké ɓěɛ̀ Gèɖèpɔ́ɔ̀ jǔ kà ɔ nyuɛ zɔ̃̌ɔ̀ kà ɓě kè ɓě ɓǎ nììn ɓǎ ɓě mɔ̀à Ééɓòɖòhɛ̃́ɛ̀ kè Áázè ɔ kè Jékɔ̀ kɛɛ nyɛ́nɛ́ín ɖáìn nyɛ.

¹⁴ Ké Bounɓoɔ̀ se wuɖu ɓéɖéà wuɖu-ɖi-ɖiɔ̀ kɛɛ dèɛ̌n nì ɓó ɓě ɖòùn gbo,

¹⁵ kɛɛ ɔ nìɛ̀ dèɛ̌n ɓó à mɔ̀ nyɔ ɓě nyànàà dà dyi ɓó zɛ̃̌ɛ̀ kɛ kè nyɔ ɓě séèà wóɖó keɛɛ gbo.

¹⁶ “Ɓě mìɔùn dyuòɛ̀ dyí jɛ́ɛ́ kà ɓěà nyu zɔ̃̌ɔ̀ ɖé Íjè-ɓòɖòɔ̀ kɔ̃ cĩ́ɛ kɛ kè kà ɓěà nyu ma ɓóɖó-dù ɓěɔ̀ mú zĩ̀ɛ̀n, ɓɛ́ ɓěà dyià nɔ̄ dyiɛ.

¹⁷ Ɓě dyé ma waà cu kè sɔ́ɔ́-kpò kè séɓàɖà ɔ kè góò gèɖèpɔ́ɔ̀ ɓě mɔ̀à Gèɖèpɔ́ɔ̀ dyi-nyàìn-ɖɛ̀ ɓě kɛɛ ní.

¹⁸ Ɓó zɛ̃̌ɛ̀ kɛɛ, ɓěɛ̀ gàa ɖò mɔɔ màa ɖò mɔɔ gbǒ-xwíníín ɖò mɔɔ xwéɖé-dù ɖòɛ̀ hwòɖǒ mɛ ɓɔ́ Bounɓo mɔ̀à à Gèɖèpɔ́ɔ̀ kɛɛ dyi táà, ɓɛ́ ɔ ké ɓóɖó-dù ɓěɔ̀ gèɖèpɔ́ɔ̀ ɓěɔ̀ ɓiè. Nyɔ nì náa ɖò mɛ ɓɔ́ ɓě hwìɛ̀ nìɛ̀, sepóɛɖé ɔ mu nììn kà cu ɓɛ́ ɔ tòɖò ɓo nì cɛ̃́ín ké ɔ nɛɛ̀ kɛɛ nìà kɛ.

¹⁹ Nyɔ ɓɛ́ ɔ hwɔìn kà ɖɛ nì cɛ̃́ínɔ̀ kɛɛ dyi hwòɛ̌-wùɖù ɓě nìà ɖé dèè-wùɖùɔ̀ múɛɛ wɔ̃́ ní, nìí, ɔ hwòɖǒ ɖá mana mu ɔ kɔ̃ nììn. Ɔ jèɛɛ, ɔ ɖá, ‘Ɖɛ séín mu dyí ɓɛɖɛɛ̀ìn ɓó ḿ bìì, kɛbì ḿ mɛ kùmùìn ní dúɔ̀ kɛ.’ Kɛɛ mɛ̀nɛ̌-kèǐn, ɔ nì nyɔ séín mú-gbɔɔ̀-gbɔɔ̀ kɔ̃ dyàǔn.

²⁰ Bounɓoɔ̀ se nyɔɔ̀ kɔ̃in zĩ̀ɛ̌n mu fɔɔ. Ɔ dyoɖo-hwòɖò ku wɔ̃ɔ̀ mu nyɔɔ̀ kɔ̃ nììn tee. Ké hwòɛ̌-wùɖù séín céèà nɔ̄ céè-ɖɛ̀ɛ̀ múɛɛ mu nyɔɔ̀ kɔ̃ dyiìn, ké Bounɓoɔ̀ mu nyɔɔ̀ nyɛ́nɛ́ ɓóɖó-kpàà kɔ̃in sámáùn.

²¹ Bounɓoɔ̀ muɛ nyuùn ɓɛ́ gǎ séín kɔ̃̀ jè céèà ɖé dèè-wùɖùɔ̀ mú, ɓɛ́ ɔ nìà nɔ̄ gma-cèè-ɖɛ̀ɛ̀ múɛɛ ké nyɔɔ̀ ɖòùn kɔ̃ dyi ɖé Éézùɖùɛ̀-nyɔ̀ ɓěɔ̀ xwéɖé-dù séín ɓěɔ̀ hwìɛ̀.

²² “Ɖé dyúa ní, ɓěɛ̀ xwíníín-dyù ɓě muà ɓó ɓě ɖeín dyí kɔ̃ùn wɛ̃ kè ɖíà ɓě nìà ɓóɖó vɛ̃in ɓě kɔ̃ɛɛ mu gǎ kè wɛ́ ɓě ɓɛ́ Bounɓoɔ̀ ɖǎà ɓěɛ̀ ɓóɖóɔ̀ kɔ̃ dyàa dyéìn.

²³ Ɓóɖó gànáɔ̀ mu kɔ̃in dyɛìn, ké sɔ́fà-sɔ̀ɔ̌ kè tɔ̃́ mu ɔ kɔ̃in ɓáìn. Ɓě se ɔ ɖɛ ɖò kɔ̃ ɓáa ɓɛ́ǐn mu, hwɛ̀ ḿ po nìǐn, pìǐ seɛ kɔ̃ mɛɛ́ mu. Ɓěɛ̀ ɓóɖóɔ̀ mu nììn kà hwɔɖɔ ɓě mɔ̀à Sáɖɔ̀ùn kè Gòmɔ́ɖɔ̀ kè Àɖámà ɔ kè Zɛ̀ɓódyììn nìà kɛ. Bounɓoɔ̀ wáɖáó zɔ̃̌ɔ̀ hwɔɖɔ ɓěɛ̀ ɖé ɔ dyoɖo-hwòɖò ku wɔ̃ɔ̀ mú.

²⁴ Ɔ ɖǎ ná nìǐn, ɓóɖó-dù séín ɓěɔ̀ mu ɖɛi dièìn, ɓɛ́ wa ké níiń, ‘Ɖɛ́ kɔ̃̀ jè Bounɓoɔ̀ nyuà kà ɓóɖó nìà kɛ kɛ́? Ɖɛ́ kɔ̃̀ jè Bounɓoɔ̀ kpáa kà dyoɖo nɛɛ̀-nɛɛ̀ nìà kɛ múɛ́?’

²⁵ Ké nyɔ ɖò mu níiń, ‘Ɔ mɔ̀ sepóɛɖé nyɔ ɓě nìà kɛ ɖǎ dèè-wùɖù ɓɛ́ wa kè Bounɓo mɔ̀à wa ɓǎ nììn ɓǎ ɓěɔ̀ Gèɖèpɔ́ɔ̀ kɛɛ dèǒ zɔ̃̌ɔ̀ kà kɛɛ mú jaɖa. Ɔ mɔ̀ wuɖu ɓɛ́ ɔ kè wa dèǒ zɔ̃̌ɔ̀ ti ɔ zàǒ zɔ̃̌ɔ̀ kà wa ɖé Íjè-ɓòɖòɔ̀ kɔ̃ɛ.

²⁶ Wa taɓa dú hwuɖu ɓó gèɖèpɔ́ɔ̀ kà kò ɖò ɓě dyúa, ké wa ɓiè wa. Ɔ mɔ̀ gèɖèpɔ́ɔ̀ ɓě ɓɛ wa séè ɓiè ɖò, ɓɛ́ Bounɓoɔ̀ ɖá wa mɛ ɓɔ́ ɓièɛ̀ kɛ.

²⁷ Ɔ jèɛɛ, Bounɓoɔ̀ dyoɖo nɛɛ̀-nɛɛ̀ɔ̀ nìà ɓóɖóɔ̀ kɔ̃, ké ɔ dyàà hwòɛ̌-wùɖù séín ɓě céè kà nɔ̄ céè-ɖɛ̀ɛ̀ múɛɛ ɔ kɔ̃ɛ̀.

²⁸ Bounɓoɔ̀ kpáìn ma ɓóɖóɔ̀ nyɔ ɓěɔ̀ dyoɖo nɛɛ̀-nɛɛ̀ vɛ̀nɛ̀ mú, ké ɖé ɔ dyoɖo ku wɔ̃ɔ̀ múɛɛ, ɔ ɖǎ wa ɖé wa mìɔùn nììn ɓóɖóɔ̀ kɔ̃ dyi zà, ké ɔ ɖǎ wa ɓóɖó ɖìàǔn tò, ké ɖéɛ̀ wa nì ɓó zɛ̃̌ɛ̀.’ ”

²⁹ “Bounɓo mɔ̀à à Gèɖèpɔ́ɔ̀ kɛɛ kɔ̃̀ sáná-ɖɛ̀ ɓěɔ̀ kpé gbo, kɛɛ wuɖu séín céèà ɖé gmaɔ̀ múɛɛ, Bounɓoɔ̀ ɖǎa nyu ɓɛ́ à kè à xwíníín-dyù ɓěɔ̀ kéɛ dyí dyuò, ɓɛ́ à kéɛ dyi kpɔ̃ kánáá pū.