Dìtɔ̀wáɖánámɛ̀ 27 - Ɓǎsɔ́ɔ̀ Báɓòɔ̀

Wa céè Gèɖèpɔ́ɔ̀ gma ɓěɔ̀ sɔ́ɔ́-kpò ɓě kɔ̃in

¹ Sɔ̀ìn ɓó ɖɛ ɓěɛ̀ gboɛɛ, Mózè kè Éézùɖùɛ̀-nyɔ̀ vɛ̀nɛ̀ ɓěɔ̀ poìn ma nyɔ séín ɓěɔ̀ dyí, ké Mózè cɛ̃ɛ ma nyɔ ɓěɔ̀ gbo, ké ɔ ɖá, “Ɓě mɛ kpɔ̃ gma séín ɓě ɓɛ́ ḿ nìà ɓě gbo cɛ̃iń ɓó zɛ̃̌ɛ̀ kɛɛ dyi.

² Wé kɔ̃̀ ɓaɖa ɓɛ́ ɓě mu Jɔ́nì-nìɔ̀ péɖéìn, ké ɓě mu ɖé ɓóɖó ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ nìà ɓě nyíɛń nyɛɛ kɔ̃ muùn wɛ̃ɛ, ɓě mɛ nyànàìn sɔ́ɔ́-kpò vɛ̀nɛ̀-vɛ̀nɛ̀ ɓě dyi, ɓɛ́ ɓě ké wa dyéɖéín dyi sama.

³ Ɔ jǔ ké ɓě ɖǎ Jɔ́nì-nìɔ̀ péɖé, ké ɓě ɖǎ bãa-ɓòɖò ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ nìà ɓě nyíɛń nyɛɛ kɔ̃ mu kà Bounɓo mɔ̀à ɓě ɓǎ nììn ɓǎ ɓěɔ̀ Gèɖèpɔ́ɔ̀ kɛɛ nyuà ɓě nyɛ́nɛ́ín ɖáìn nyɛɛ ní, nìí, ɓě mɛ céè gma séín ɓěɛ̀ ɓó sɔ́ɔ́-kpò ɓěɔ̀ kɔ̃in.

⁴ Ɔ jǔ ké ɓě ɖǎ Jɔ́nì-nìɔ̀ péɖé ní, nìí, ɓě mɛ nyànàìn sɔ́ɔ́-kpò ɓěɔ̀ ɖé Éɓàò-tòɖòɔ̀ dyai kà ḿ nyuà zɛ̃̌ɛ̀ ɓě gbo cɛ̃ɛ kɛ, ɓɛ́ ɓě ké wa dyéɖéín dyi sama.

⁵ Ɔ ɖǎ ná nìǐn, ɓě mɛ ɖú sɔ́ɔ́-kpò ɓě ɓɛ́ nɛɛ̀-kpà ɖò se dyi tìnììn nyɛɛ dyí, ɓɛ́ ɓě ké sáa-kɔ̃-zàìn-gbàà ɖò po ɓó Bounɓo mɔ̀à ɓěɛ̀ Gèɖèpɔ́ɔ̀ kɛɛ bìì, ɖé toɖoɔ̀ dya.

⁶ Ɓě mɛ pòìn Bounɓoɔ̀ sáa-kɔ̃-zàìn-gbààɔ̀ sɔ́ɔ́-kpò ɓě ɓɛ́ wa se bũ̌in wa kɛ, ɓɛ́ ɓě ké ɓó ɔ kɔ̃ fɔ̃ɔ-sàǎ-zàìn-ɖɛ̀ ɓě nyùìn ɖé Bounɓo mɔ̀à ɓěɛ̀ Gèɖèpɔ́ɔ̀ kɛɛ gbo.

⁷ Ké ɓóɛ̀ ɓě mɛ nyùìn gbo-kpɔ̃ìn-sàǎ-zàìn-ɖɛ̀ ɓě, ɓɛ́ ɓě ké wa ɖi, ɓɛ́ ɓě ké múàǔn kpá ɓó Bounɓo mɔ̀à ɓěɛ̀ Gèɖèpɔ́ɔ̀ kɛɛ dyúa.

⁸ Ɓě mɛ céè gma séín ɓěɛ̀ pùɖùé ɓó sɔ́ɔ́-kpò ɓě ɓɛ́ ɓě nyànàìn kà dyiɛɛ kɔ̃.”

⁹ Hwɛ̀ ké Mózè kè Ɖíìváà-nyɔ̀ ɓě mɔ̀à sáa-zà-nyɔ̀ ɓěɔ̀ kɛɛ cɛ̃ɛ ma Éézùɖùɛ̀-nyɔ̀ séín ɓěɔ̀ gbo, ké wa ɖá, “Óó Éézùɖùɛ̀-nyɔ̀ ɓě, ɓě nì tɔ̃̀ǔn-tɔ̃̀ǔno, ɓɛ́ ɓě ké ɖùǔ tòo. Ɓó zɛ̃̌ɛ̀ kɛɛ, ɓě mɔ̀ǎ Bounɓo mɔ̀à ɓěɛ̀ Gèɖèpɔ́ɔ̀ kɛɛ mìɔùn nììn nyɔ ɓě.

¹⁰ Ɔ jèɛɛ, ɓě mɛ nyu ɔ wuɖu, ɓɛ́ ɓě ké ɔ gma séín ɓɛ́ ḿ nìà zɛ̃̌ɛ̀ ɓě gbo cɛ̃iń nyɛɛ dyi kpɔ̃.”

Hwòɛ̌-wùɖù ɓě nì nyɔ ɓě se wuɖu nyuɛɛ kɔ̃ɛ

¹¹ Ɓó wé dyúáɖòɔ̀ ɓaɖaa, Mózè cɛ̃ɛ ma Éézùɖùɛ̀-nyɔ̀ ɓěɔ̀ gbo, ké ɔ ɖá,

¹² “Ɔ jǔ ké ɓě ɖǎ Jɔ́nì-nìɔ̀ péɖé ní, xwéɖé-dù ɓěɛ̀ mɛ nyànà ɖé Gèwíɖízĩ̀ìn-tòɖòɔ̀ dyai, ɓɛ́ wa ké nyɔ-mana-kɔ̃-po-wùɖù ɓěɔ̀ cɛ̃. Xwéɖé-dù ɓěɔ̀ mɔ̀ Símìɔ̀ nììn xwéɖé-dùɔ̀ kè Ɖíìváà nììn xwéɖé-dùɔ̀ kè Júɖà nììn xwéɖé-dùɔ̀ kè Ɛ́sàkà nììn xwéɖé-dùɔ̀ kè Jòsé nììn xwéɖé-dùɔ̀ ɔ kè Bɛ̃́címà nììn xwéɖé-dùɔ̀.

¹³ Ké xwéɖé-dù tɔ̀ɔ̀ ɓěɛ̀ mɛ nyànà ɖé Éɓàò-tòɖòɔ̀ dyai, ɓɛ́ wa ké nyɔ-hwòɛ̌-ɓàɖàìn-wùɖù ɓěɔ̀ cɛ̃. Xwéɖé-dù ɓěɔ̀ mɔ̀ Wuɖuɓíín nììn xwéɖé-dùɔ̀ kè Gáà nììn xwéɖé-dùɔ̀ kè Ásè nììn xwéɖé-dùɔ̀ kè Zɛ́ɓíúɖɔ̀ùn nììn xwéɖé-dùɔ̀ kè Dɛ̃́ìn nììn xwéɖé-dùɔ̀ ɔ kè Náfátàɖì nììn xwéɖé-dùɔ̀.

¹⁴ Ké Ɖíìváà-nyɔ̀ ɓěɔ̀ mɛ cɛ̃ wuɖu ɓěɛ̀ Éézùɖùɛ̀-nyɔ̀ séín ɓěɔ̀ gbo ɖé wuɖu zoo mú, ɓɛ́ wa ké níiń,

¹⁵ “ ‘Gèɖèpɔ́ɔ̀ hwòɛ̌-wùɖù mu nyɔ séín ɓě ɓɛ́ wa mu hwɔìn-ɖɛ̀ sɛ-sɛ mɔɔ kũùn-kpò mɛ-mɛ nyuùn, ɓɛ́ wa kéɛ ɓiè vǐè-kà kɛɛ kɔ̃ nììn, sepóɛɖé kũùn-kpò ɓiè-ɓiè nyàìn Bounɓoɔ̀ dyi.’ ” “Nìí, nyɔ séín ɓěɔ̀ mɛ ɖá, ‘Kǎà ɔ mɛ nì.’ ”

¹⁶ “ ‘Gèɖèpɔ́ɔ̀ hwòɛ̌-wùɖù mu nyɔ séín ɓě ɓɛ́ wa zàìn wa ɖe mɔɔ ɓǎ zùǔn wɛ̃ɛ kɔ̃ nììn.’ ” “Nìí, nyɔ séín ɓěɔ̀ mɛ ɖá, ‘Kǎà ɔ mɛ nì.’ ”

¹⁷ “ ‘Gèɖèpɔ́ɔ̀ hwòɛ̌-wùɖù mu nyɔ séín ɓě ɓɛ́ wa zàìn wa mǔè ɖòɛ̀ bã̀à-dyí-sɔ̀ɔ̌-kpò daí kɛɛ kɔ̃ nììn.’ ” “Nìí, nyɔ séín ɓěɔ̀ mɛ ɖá, ‘Kǎà ɔ mɛ nì.’ ”

¹⁸ “ ‘Gèɖèpɔ́ɔ̀ hwòɛ̌-wùɖù mu nyɔ séín ɓě ɓɛ́ wa muɛ nyuùn ɓɛ́ dyéɖéín-dyi-kpè-nyɔ̀ ké hwìǐ sɔ̀ìn nyɛɛ kɔ̃ nììn.’ ” “Nìí, nyɔ séín ɓěɔ̀ mɛ ɖá, ‘Kǎà ɔ mɛ nì.’ ”

¹⁹ “ ‘Gèɖèpɔ́ɔ̀ hwòɛ̌-wùɖù mu nyɔ séín ɓě ɓɛ́ wa mu ɖɛ mɔ̀ dyí-sɛ́ɖɛ́ìn-ɖɛ̀ kɛɛ hwìǐ zàìn ɓó ɖíà ɓěɔ̀ kè xwíè-dyù ɓěɔ̀ ɔ kè jɔ̌ɔ̀-màà ɓěɔ̀ bììɛɛ kɔ̃ nììn.’ ” “Nìí, nyɔ séín ɓěɔ̀ mɛ ɖá, ‘Kǎà ɔ mɛ nì.’ ”

²⁰ “ ‘Gèɖèpɔ́ɔ̀ hwòɛ̌-wùɖù mu nyɔ séín ɓě ɓɛ́ wa zàìn wa ɓǎ zùǔn dyììn ɖé wa ɓǎà gmàà gbo-pɛ̃́-pɛ̃́ múɛɛ kɔ̃ nììn.’ ” “Nìí, nyɔ séín ɓěɔ̀ mɛ ɖá, ‘Kǎà ɔ mɛ nì.’ ”

²¹ “ ‘Gèɖèpɔ́ɔ̀ hwòɛ̌-wùɖù mu nyɔ séín ɓě ɓɛ́ wa kè nimii ɖò mu ɓó da nììn nyɛɛ kɔ̃ nììn.’ ” “Nìí, nyɔ séín ɓěɔ̀ mɛ ɖá, ‘Kǎà ɔ mɛ nì.’ ”

²² “ ‘Gèɖèpɔ́ɔ̀ hwòɛ̌-wùɖù mu nyɔ séín ɓě ɓɛ́ wa kè waà ɖíí-màà mu ɓó da nììn nyɛɛ kɔ̃ nììn, kɛbì ɔ mɛ mɔ̀ wa ɓǎà xwíníín-zà-dyù-màà kɛ, mɔɔ kɛbì ɔ mɛ mɔ̀ wa ɖeɛ̀ xwíníín-zà-dyù-màà kɛ.’ ” “Nìí, nyɔ séín ɓěɔ̀ mɛ ɖá, ‘Kǎà ɔ mɛ nì.’ ”

²³ “ ‘Gèɖèpɔ́ɔ̀ hwòɛ̌-wùɖù mu nyɔ séín ɓě ɓɛ́ wa kè waà bùǐ-nyɔ́nɔ́ mu ɓó da nììn nyɛɛ kɔ̃ nììn.’ ” “Nìí, nyɔ séín ɓěɔ̀ mɛ ɖá, ‘Kǎà ɔ mɛ nì.’ ”

²⁴ “ ‘Gèɖèpɔ́ɔ̀ hwòɛ̌-wùɖù mu nyɔ séín ɓě ɓɛ́ wa ɖáɓá wa mǔè ɖò vǐè-kà kɛɛ kɔ̃ nììn.’ ” “Nìí, nyɔ séín ɓěɔ̀ mɛ ɖá, ‘Kǎà ɔ mɛ nì.’ ”

²⁵ “ ‘Gèɖèpɔ́ɔ̀ hwòɛ̌-wùɖù mu nyɔ séín ɓě ɓɛ́ wa mu wíɖí dyi kpɔ̃ùn ɓó nyɔ ɖò ɖáɓá jè pídyiɛɛ kɔ̃ nììn.’ ” “Nìí, nyɔ séín ɓěɔ̀ mɛ ɖá, ‘Kǎà ɔ mɛ nì.’ ”

²⁶ “ ‘Gèɖèpɔ́ɔ̀ hwòɛ̌-wùɖù mu nyɔ séín ɓě ɓɛ́ wa se Gèɖèpɔ́ɔ̀ gma ɓěɔ̀ dyi kpɔ̃ɔ́ muɛɛ kɔ̃ nììn.’ ” “Nìí, nyɔ séín ɓěɔ̀ mɛ ɖá, ‘Kǎà ɔ mɛ nì.’ ”