Dìtɔ̀wáɖánámɛ̀ 26 - Ɓǎsɔ́ɔ̀ Báɓòɔ̀

Gma ɓě ɓá ɓáá-ɖɛ̀-ɓò kĩ́ín-kĩ́ín tò jè dyíɛ

¹ “Ti ɓě mu ɓóɖó ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ nìà ɓě nyíɛń, ɓɛ́ ɔ kéà ɓěɛ̀ kɔ̃̀ɔ̀-ɖɛ̀ jǔɛɛ kɔ̃ muùn, ɓɛ́ ɓě kéɛ dyí ɖú, ɓɛ́ ɓě kéɛ kɔ̃ cĩ́ɛɛ ní,

² nìí, ɓě ɖò-ɖò mɛ ɖú ɓěɛ̀ ɓáá-ɖɛ̀ séín ɓě mu ɖé ɓóɖóɔ̀ mú ɓáùn wɛ̃ɛ ɓo kĩ́ín-kĩ́ín ɓěɔ̀ dyí, ɓɛ́ ɓě ké wa tìě mú po, ɓɛ́ ɓě kéɛ pá ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ muà gãùn, ɓɛ́ ɓě kéà ɖé ɔ ɓièìn nyɛɛ mú kpa.

³ Ké ɓě mɛ mu ɖé sáa-zà-nyɔ̀ ɓɛ́ ɔ muà kũ̀à kɔ̃ún nììn ɓó tia ɓaɖaa gbo, ɓɛ́ ɓě ké níiń, ‘À nìɛ̀ cɛ̃iń ɓó Bounɓo mɔ̀à nì Gèɖèpɔ́ɔ̀ kɛɛ dyúa kà à ɖǎ ɓóɖó ɓɛ́ ɔ ɖáìnǒ zɔ̃̌ɔ̀ à ɓǎ nììn ɓǎ ɓě nyɛ́nɛ́ín nyɛɛ kɔ̃ dyiɛ.’

⁴ “Ɔ ɖǎ ná nìǐn, sáa-zà-nyɔ̀ɔ̀ mɛ kpɔ̃ ɓě tìěɔ̀ xwaún, ɓɛ́ ɔ kéɛ ɓóɛ Bounɓo mɔ̀à ɓěɛ̀ Gèɖèpɔ́ɔ̀ kɛɛ sáa-kɔ̃-zàìn-gbààɔ̀ dyúa dyi dè.

⁵ Sɔ̀ìn ɓóɛ gboɛɛ ní, nìí, ɓě mɛ kpaìn wuɖu ɓě nìà kɛ kɔ̃in ɓó Bounɓo mɔ̀à ɓěɛ̀ Gèɖèpɔ́ɔ̀ kɛɛ dyúa, ɓɛ́ ɓě ké níiń, ‘À ɓǎ nììn ɓǎ mɔ̀ǒ zɔ̃̌ɔ̀ Áwàɖàùn-nyɔ̀ ɓɛ́ ɔ nàǒ zɔ̃̌ɔ̀ ɓóɖó gboɛ. Ɔ kè ɔ gbǒ-xwíníín-nyɔ̀ wè muó zɔ̃̌ɔ̀ ɖé Íjè-ɓòɖòɔ̀ kɔ̃, ké wa cĩ́ zɔ̃̌ɔ̀ ɖé. Ké ɖéɛ̀ wa zaìn kà dúún, ké wa vòà dyí, ké wa mɔ̀à xwéɖé-dù vɛ̀nɛ̀ ɓéɖé kpé kɛ̀.

⁶ Kɛɛ Íjè-nyɔ̀ ɓěɔ̀ kpɔ̃ ma à kànàǎ-kà, ké wa dyéìn ma à gǎ, ké wa nyuɛ ké à nyu ma gǐì-kũ̀à.

⁷ Hwɛ̀ ké à pòìn ma Bounɓo mɔ̀à à ɓǎ nììn ɓǎ ɓěɔ̀ Gèɖèpɔ́ɔ̀ kɛɛ kpéi, ké Bounɓoɔ̀ wɔ̃́ ma à kpé-po-wùɖùɔ̀, ké ɔ dyé ma à gǎ-dyé-dyéɔ̀ kè à gǐì-kũ̀à nyu-nyuɔ̀ ɔ kè à dyi-pĩ́à-pĩ́àɔ̀.

⁸ Ɔ jèɛɛ, Bounɓoɔ̀ zà ma à ɖé Íjè-ɓòɖòɔ̀ kɔ̃, dyììn ɖé ɔ kpé-sɔ̃̀ɔ̀ mú. Ɔ nyu ma nyɔ-díɖí-tàɓàìn-ɖɛ̀ ɓě kè zɛ̃̀ìn-ɖɛ̀ ɓě ɔ kè ɖɛ dĩ́ín-dĩ̀ìn ɓě.

⁹ Ké ɔ dyà à pá nìà kɛ mú, ké ɔ ɖǎà à ɓóɖó mɔ̀à bãa-ɓòɖòɛ̀ kɛɛ nyíɛ̀.

¹⁰ Ɔ jèɛɛ, ɓó kàǔn wɛ̃ɛ, óó Bounɓo, à dyà ɓáá-ɖɛ̀-ɓò kĩ́ín-kĩ́ín ɓě sɔ̀à ɓóɖó ɓɛ́ m̀ ɖǎà à nyíɛ múɛɛ m̀ gbo.’ “Ɓě ɖǎ ɖɛ ɓěɛ̀ cɛ̃ɛ hwɔ ní, nìí, ɓě mɛ dè tìěɔ̀ ɓó Bounɓoɔ̀ dyúa dyi, ɓɛ́ ɓě ké Bounɓo mɔ̀à ɓěɛ̀ Gèɖèpɔ́ɔ̀ kɛɛ ɓiè.

¹¹ Ké sɔ̀ìn ɓóɛ gboɛɛ, ɓě kè ɓěɛ̀ gbǒ-xwíníín-nyɔ̀ ɓě kè Ɖíìváà-nyɔ̀ ɓě ɔ kè ɖíà ɓě nìà ɓě hwìɛ̀ kɛɛ mɛ kpáìn ɖɛ nɔ̀mɔ̀ dyíin séín ɓě ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ ɖǎà ɓě nyíɛɛ jè múàǔn dyi.

¹² “Ti ɓɛ́ ɓě ɖǎ ɓěɛ̀ ɓáá-ɖɛ̀ séín ɓěɔ̀ ɓàɖàìn-bùè ɓěɔ̀ wáká poɛ hwɔ ɓó zɔ̃ɔ̀ tã nììn ɓɛ́ ɔ mɔ̀à ɓàɖàìn-bùè-tò-zɔ̃̀ɔ̀ kɛɛ ní, nìí, ɓě mɛ nyí ɓěɛ̀ ɓàɖàìn-bùè ɓěɔ̀ Ɖíìváà-nyɔ̀ ɓěɔ̀ kè ɖíà ɓěɔ̀ kè xwíè-dyù ɓěɔ̀ ɔ kè jɔ̌ɔ̀-màà ɓěɔ̀, ɓɛ́ wa ké ɖɛ ɖi ɖé ɓěɛ̀ hwɔɖɔ ɓěɔ̀ mú, ɓɛ́ wa ké ɖoɓo.

¹³ Nìí, ɓě mɛ cɛ̃ɛ Bounɓoɔ̀ gbo, ɓɛ́ ɓě ké níiń, ‘À ɖǎ ɓàɖàìn-bùè hwɛ̀ǐn-hwɛ̀ǐn ɓěɔ̀ ɖé à taà ɓěɔ̀ mú zà. À ɖǎa Ɖíìváà-nyɔ̀ ɓěɔ̀ kè ɖíà ɓěɔ̀ kè xwíè-dyù ɓěɔ̀ ɔ kè jɔ̌ɔ̀-màà ɓěɔ̀ nyí kà m̀ nyuà à gbo cɛ̃ɛ kɛ. À se nì ɓàɖàìn-bùè-gmàɔ̀ wáɖá, mɔɔ ké ɖɛ ɓě m̀ cɛ̃à ɓá ɓàɖàìn-bùè jè dyíɛɛ se à hwìɖǐi sɔ̀.

¹⁴ À se ma ɓàɖàìn-bùè ɓěɔ̀ ɖò ɖi ti à nì ma wìǐn kpáùn wɛ̃, mɔɔ ké à se ɖò ɖé à gbǒɔ̀ mú zà ti ɓɛ́ à se ma mú hwɛ̀ kɛ, mɔɔ ké à se ɖò gĩɔ-nyɔ̀ ɖò xwáɖáún zàìn. Óó Bounɓo, à ɖǎ nì wuɖuɔ̀ nyu. À ɖǎ ɖɛ séín m̀ ɖǎà cɛ̃ ɓá ɓàɖàìn-bùè jè dyíɛɛ nyu.

¹⁵ Bounɓo, gmɔ̀ ɓíɖíi sɔ̀ìn ɖé nì pá hwɛ̀ǐn-hwɛ̀ǐn nìà ɖé dyɔún wɛ̃ɛ mú, ɓɛ́ m̀ ké nì nyɔ ɓě mɔ̀à Éézùɖùɛ̀-nyɔ̀ ɓěɔ̀ kɛ kè bãa-ɓòɖò ɓɛ́ m̀ ɖǎà à nyí kà m̀ nyuɛ ma kà à ɓǎ nììn ɓǎ ɓěɔ̀ nyɛ́nɛ́ín ɖáìn nyɛɛ mana kɔ̃ po.’

Bounɓoɔ̀ mìɔùn nììn nyɔ ɓěɔ̀

¹⁶ “Ɓó zɛ̃̌ɛ̀ kɛɛ, Bounɓo mɔ̀à ɓěɛ̀ Gèɖèpɔ́ɔ̀ kɛɛ ɖá ɓě mɛ kpɔ̃ ɔ gma séín ɓěɛ̀ dyi. Ɔ jèɛɛ, ɓě mɛ kpɔ̃ wa dyi hwòɖǒɛ̀-ɖé-hwɛ̀-kà.

¹⁷ Ké ɓó zɛ̃̌ɛ̀ kɛɛ, ɓě ɖǎa cɛ̃ kà Bounɓoɔ̀ mɔ̀ ɓěɛ̀ Gèɖèpɔ́ɔ̀ kɛ, ké ɓě ɖǎa cɛ̃ kà ɓě mu ɔ kpeɖe ɓěɔ̀ kíɖíí síìn, ɓɛ́ ɓě ké ɔ gma séín ɓěɔ̀ dyi kpɔ̃, ɔ kè ɓɛ́ ɓě ké ɔ wuɖu nyuɛ.

¹⁸ Ké ɓó zɛ̃̌ɛ̀ kɛɛ, Bounɓoɔ̀ ɖǎa cɛ̃ kà ɓě mɔ̀ ɔ mìɔùn nììn kɔ̃̀ɔ̀-ɖɛ̀ kà ɔ nyuà ɓě gbo cɛ̃ɛ kɛ, ké ɔ cɛ̃ɛ kà ɓě mɛ kpɔ̃ ɔ gma séín ɓěɔ̀ dyiɛ.

¹⁹ Ɔ ɖǎa cɛ̃ kà ɓɛ́ ɔ mu ɓě dyi dèìn, ɓɛ́ ɓě ké ɓàìn-ɓàìn kè nyɛ́nɛ́ín-nyɛ̀nɛ̀ ɔ kè dya-dè-dè ɓéɖé ɓó ɓóɖó-dù tɔ̀ɔ̀ séín ɓɛ́ ɔ ɖǎà dyi dèɛɛ kɔ̃in, ɓɛ́ ɓě ké wáká kpá ɓó Bounɓoɔ̀ bìì kà ɔ nyuà cɛ̃ɛ kɛ.”