Dìtɔ̀wáɖánámɛ̀ 25 - Ɓǎsɔ́ɔ̀ Báɓòɔ̀

¹ “Ɔ jǔ ké nyɔ sɔ̃́ dyi zaa nyu, ké tɔ̀ɔ̀-ɓìɔ̀ ɓěɔ̀ dyi zaaɔ̀ wɔ̃ po, ké wa dyi nyɔ ɓɛ́ ɔ seà je mɔ́ kɛɛ gɔ̃̌ nyí, ké wa dyi nyɔ ɓɛ́ ɔ mɔ́à jeɛɛ zaaɔ̀ dúún wáɖá,

² ké tɔ̀ɔ̀-ɓìɔ̀ vɛ̀nɛ̀ɔ̀ dyiɛ cɛ̃, ɓɛ́ wa ké nyɔ ɓɛ́ zaaɔ̀ kpɔ̃à kɛɛ ɓaɖa ní, nìí, tɔ̀ɔ̀-ɓìɔ̀ vɛ̀nɛ̀ɔ̀ mɛ nyuɛ ɓɛ́ nyɔɔ̀ ké ɓó ɔ dyúa dyi jìɖǐ, ɓɛ́ wa ké ɓà-cù-wùɖù jĩ̀ kà ɓɛ́ ɖɛ gbà ɔ nyuà kɛɛ kpaa ɔ kɔ̃ún zà.

³ Kɛɛ tɔ̀ɔ̀-ɓìɔ̀ mɛ ɓɔ́ nyɔɔ̀ ɓà-cù-wùɖù ɓɛ́ ɔ zi kpáɖá-nyɔ sɔ̃́ kɔ̃ɛɛ nyíɛ. Ɔ jǔ ké ɓà-cù-wùɖùɔ̀ dyi kpáɖá-nyɔ sɔ̃́ kɔ̃ ziín, nìí, ɓěɛ̀ ɖííɔ̀ ɓɛ̀ɖɛ̀ mu dyi kpáùn ɓó ɓě dyúa.

⁴ “Nyɔ ɖò mɛ ɓɔ́ ɓìɖǐ ɓɛ́ ɔ nì hwítì dyí síɛń nyɛɛ kpã́ wĩín poɛ.

Ɖíí-gàà ɖò dúí sè jè

⁵ “Ɔ jǔ ké ɖíí-gàà sɔ̃́ dyi dà dyúáɖò cĩ́, ké wa ɖò dyi mɛ́, ké nyɔ mɛ́à kɛɛ se dyú-gàà ɖò ɓéɖé ní, nìí, nyɔ mɛ́à kɛɛ gmàà mɛ ɓɔ́ nyɔ sɔ̀ìn ɖé píé kɛɛ dyi kpɔ̃ɔ. Ɔ ɖíí-gààɔ̀ mɛ kpɔ̃ jɔ̌ɔ̀-mààɔ̀ dyi, ɓɛ́ ɔ ké ɔ gbo gmɔ̀.

⁶ Ké gàa-dyù kĩ́ín-kĩ́ín ɓɛ́ màaɔ̀ mu wóɖóìn nyɛɛ mu ɔ ɖíí-gàà mɛ́à kɛɛ nyɛ́nɛ́ín mùìn, ɓɛ́ ɔ nyɛ́nɛ́ ké se ɖé Éézùɖùɛ̀-nyɔ̀ ɓěɔ̀ hwìɛ̀ dyi pa.

⁷ Kɛɛ wɛ̃́ɛ́ kɛɛ, ɔ jǔ ké nyɔ mɛ́à kɛɛ ɖíí-gààɔ̀ se màaɔ̀ dyi kpɔ̃ɔ mɔ́ ní, nìí, màaɔ̀ mɛ mu ɖé hwɔɖɔɔ̀ gmɔ-wɔ̃̀ɔ̀ gbo, ɓɛ́ ɔ ké hwɔɖɔɔ̀ nyɔ vɛ̀nɛ̀ ɓěɔ̀ zaa dè, ɓɛ́ ɔ ké níiń, ‘Ní dyú-ɓǎà ɖíí-gààɔ̀ se mɔ́ ɓɛ́ ɔ ké ɔ ɖíí-gààɔ̀ nyɛ́nɛ́ dyúa kpa nɔ̄ Éézùɖùɛ̀-nyɔ̀ ɓěɛ̀ hwìɛ̀. Ɔ se ɖɛ ɓɛ́ dyú-ɓǎà ɖíí-gàà kéɔ́ má ḿ bìì nyu kɛɛ nyuɛ mɔ́.’

⁸ Ɔ ɖǎ ná nìǐn, hwɔɖɔɔ̀ nyɔ vɛ̀nɛ̀ ɓěɔ̀ mɛ ɖá gàaɔ̀, ɓɛ́ wa ké ɔ gbo wùɖù. Ɔ jǔ ké ɔ dyi ɖùǔ kã̀, ké ɔ dyiɛ cɛ̃, ké ɔ dyi níiń, ‘Ḿ se màaɔ̀ dyi kpɔ̃ɔ mɔ́o’ ní,

⁹ nìí, ɔ ɖíí-gàà jɔ̌ɔ̀-mààɔ̀ mɛ xwɛ̃́ìn ɓó ɔ bũ̌in ɓó nyɔ vɛ̀nɛ̀ ɓěɔ̀ dyéɖé waí, ɓɛ́ ɔ ké gàaɔ̀ bǎ-ɓò dyúáɖò ɓoún zà, ɓɛ́ ɔ ké gàaɔ̀ tɔ̃ɔ dyúa hwana, ɓɛ́ ɔ ké níiń, ‘Ɖɛ nìà kɛ mɔ̀ ɖɛ ɖéɛ̀ wa nyu gàa seà ɔ ɖíí-gàà gbǒ-xwíníínɔ̀ poɛ mɔ́ɛɛ bũ̌.’

¹⁰ Ké sɔ̀ìn ɓóɛ gboɛɛ, wa mu gàaɔ̀ kè ɔ xwéɖé-dù séín kɔ ɓó ɔ ɖeín dyíɛɛ Gbǒ-xwíníín Zà Bǎ Ɓoún wɛ̃ɛ ɖáìn ɖé Éézùɖùɛ̀-ɓòɖòɔ̀ kɔ̃.

Gma ɖíɛ́ ɓě ɖe

¹¹ “Ɔ jǔ ké gàa sɔ̃́ ɓě dyi vɔ̃uń nì, ké ɖòɛ̀ sɔ̃ dyi ɔ mǔèɔ̀ wɔ̃ zi, ké nyɔ ɓɛ́ ɔ mǔèɔ̀ nìà ɓaɖauń wɛ̃ɛ gmàà dyi ɔ dyú-ɓǎɔ̀ gbo kpá, ké màaɔ̀ dyi gàa tɔ̀ɔ̀ sɔ̃ ɖɔún kpa, ké ɔ dyi gàaɔ̀ dya jiɖi ní,

¹² nìí, ɓě mɛ cɛ̃ màaɔ̀ sɔ̃ gbɔ. Ɓě mɛ ɓɔ́ ɔ wìì kɔ̃ ɓéɖéɛ.

¹³ “Ɓě mɛ ɓɔ́ pṹá sɔ̃́ ɖé ɓěɛ̀ ɓɔ̀ɔ̌ mú ɓéɖéɛ, ɖò ké dyí ɓúá, ɓɛ́ ɖò ké dyí ɓíè.

¹⁴ Ké ɓě mɛ ɓɔ́ ɖɛ-mú-ɖàɓàìn-ɖɛ̀ sɔ̃́ ɖé ɓěɛ̀ taàɔ̀ mú ɓéɖéɛ, ɖò ké dyí ɓúá, ɓɛ́ ɖò ké dyí ɓíè.

¹⁵ Ɓě mɛ nyùìn pṹá kè ɖɛ-mú-ɖàɓàìn-ɖɛ̀ jɛ́ɛ́ɔ̀ kũ̀à mú, ɓɛ́ ɓě ké hwèɖèìn ɖé ɓóɖó ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ nìà ɓě nyíɛń nyɛɛ kɔ̃.

¹⁶ Sepóɛɖé nyɔ séín ɓě ɓɛ́ wa nyu ɖɛ ɓěɛ̀ ké wa nyu gbá-gbáa jè nyàìn Bounɓo mɔ̀à ɓěɛ̀ Gèɖèpɔ́ɔ̀ kɛɛ dyi.

Àmáɖɛ̀-nyɔ̀ ɓěɔ̀ ɖáɓá jè

¹⁷ “Ɖɛ ɓɛ́ Àmáɖɛ̀-nyɔ̀ ɓěɔ̀ nyuà ɓě bũ̌ ti ɓɛ́ ɓě nìà Íjè-ɓòɖòɔ̀ kɔ̃ sɔ̀ǔn wɛ̃ɛ jè mɛ nì ɓě hwìɖǐi.

¹⁸ Wa se ma Gèɖèpɔ́ɔ̀ fã̀à ɖò peɖe jèɛɛ, wa dyììn ma ɓě ɖeín, ké wa po ma ɓě to kɔ̃ ti ɓɛ́ ɓě ɖǎ ma sa, ké kpé ɖò se ma ɓě dyí nì ɖeɛ. Ké wa ɖáɓá ma nyɔ séín ɓě ɓɛ́ wa dyà ma kà dyi ɓuɖuɛ̀n ɖé ɓě ɖeín nyɛ.

¹⁹ Ɔ jèɛɛ, ti ɓɛ́ Bounɓo mɔ̀à ɓěɛ̀ Gèɖèpɔ́ɔ̀ kɛɛ ɖǎ ɓě ɓóɖóɔ̀ nyí, ɓɛ́ ɔ ké ɓěɛ̀ kɔ̃̀ɔ̀-ɖɛ̀ jǔ, ké ɔ ɖǎ ɓěɛ̀ mú-nyɛ́-nyɔ̀ séín ɓěɔ̀ ɓě xwíɖíi po, ké ɓě ɖǎ gìɖìǐ ɓéɖé ní, nìí, ɓě mɛ ɖáɓá Àmáɖɛ̀-nyɔ̀ ɓěɔ̀ séín, ɓɛ́ wa jè ké se nyɔ ɖò hwìɖǐi dyi ɖe. Ɖɛ nìà kɛ ní sɔ̀ ɓě hwìɖǐi.