Dìtɔ̀wáɖánámɛ̀ 24 - Ɓǎsɔ́ɔ̀ Báɓòɔ̀

Gma ɓě ɓá nyɔ ɓě ɓɔ́ìn hwɛ̀ ké wa kpɔ̃ìn dyi ɖeɛɛ jè dyíɛ

¹ “Ɔ jǔ ké gàa ɖò dyi màa ɖò dyi kpɔ̃, ké ɔ se màaɔ̀ mɔ́ ɖe, sepóɛɖé ɔ dyé dɛ̃-ɖɛ̀ ɖò ɓá màaɔ̀ dyíɛɛ ní, nìí, ɔ mɛ céè buɛ̀-cèè-ɖɛ̀, ké ɔ mɛ nyíɛ màaɔ̀, ɓɛ́ màaɔ̀ ké ɔ taàɔ̀ mú sɔ̀.

² Ké màaɔ̀ dyi ɔ taàɔ̀ mú sɔ̀, ké ɔ dyi gàa kà kò ɖòɛ̀ gmàà jǔ,

³ ké gàa tɔ̀ɔ̀ se ɔ mɔ́ ɖe, ké ɔ dyi màaɔ̀ buɛ̀-cèè-ɖɛ̀ nyí ɖekè, mɔɔ ké ɔ dyú-ɓǎ ɖìèɔ̀ dyi mɛ́ ní,

⁴ nìí, màaɔ̀ dyú-ɓǎ kĩ́ín-kĩ́ínɔ̀ mɛ ɓɔ́ ɔ dyi kpɔ̃ɔ ɖe kà ɓɛ́ ɔ seà mú hwɛ̀ ɖe ɓó ɔ bììɛ. Ɔ jǔ ké ɔ dyi màaɔ̀ dyi kpɔ̃ ɖe ní, nìí, ɔ mu Bounɓoɔ̀ dyi-nyàìn-ɖɛ̀ jǔùn. Ɓě mɛ ɓɔ́ zaa-dúún-wáɖá-wáɖá ɓóɖó ɓɛ́ Bounɓoɔ̀ nìà ɓě nyíɛń, ɓɛ́ ɔ kéà ɓěɛ̀ kɔ̃̀ɔ̀-ɖɛ̀ jǔɛɛ kɔ̃ dyàà.

Gma-dù kò-kò ɖíɛ́ ɓě ɖe

⁵ “Ɔ jǔ ké gàa ɖò dyi nyɔ́nɔ́ dyi kpɔ̃ ɖie ní, nìí, ɔ mɛ ɓɔ́ to gbo muɛ, mɔɔ ɔ mɛ ɓɔ́ ɓóɖó-kũ̀à séín ɖò nyuɛ, kɛɛ ɔ mɛ nì ɖé ɔ ɓíɖí-taún ɓó zɔ̃ gàná, ɓɛ́ ɔ kè ɔ gmààɔ̀ ké múàǔn dyi kpáìn kpàìn.

⁶ “Ɔ jǔ ké ɓě dyi nyɔ ɖò kpaún poín, nìí, ɓě mɛ ɓɔ́ ɔ ɖɛ-kɔ̃-sũ̀ìn-sɔ̀ɔ̌-kpò ɓě tɔ̀ɔ̀-má mú kpɔ̃ɔ, sepóɛɖé ɔ mɔ̀ nyɔɔ̀ cĩ́-cĩ́ tɔ̀ɔ̀-má mú dè-dè.

⁷ “Nyɔ ɖò dyi ɔ mǔè Éézùɖùɛ̀-nyɔ̀ ɖò dyíɖí, ɓɛ́ ɔ ké nyɔɔ̀ gǐì mú kpɔ̃, mɔɔ ké ɔ dyi ɔ gǐì mú peɖe ní, nìí, ɓě mɛ ɖáɓá nyɔɔ̀. Kǎà ɓě mɛ zà ɖɛ gbàɔ̀ ɖé ɓě hwìɛ̀.

⁸ “Ɔ jǔ ké ɓě ɖò dyi caà ɓéɖé ní, nìí, ɔ mɛ nyu ɖɛ séín ɓɛ́ Ɖíìváà-nyɔ̀ ɓě mɔ̀à sáa-zà-nyɔ̀ ɓěɔ̀ kɛɛ muà ɔ gbo cɛ̃ìn nyɛ. Ɓě mɛ kpɔ̃ ɖɛ ɓě ɓɛ́ ḿ cɛ̃à sáa-zà-nyɔ̀ ɓěɔ̀ gboɛɛ dyi kóɖó-kóɖó.

⁹ Ɖɛ kpá ma kà Méwìɖìàùn gbo ɓó hwìèɔ̀ gba ti ɓě nì ma kà ɖé Íjè-ɓòɖòɔ̀ kɔ̃ sɔ̀ǔn wɛ̃ɛ jè mɛ nì ɓě hwìɖǐi.

¹⁰ “Ɔ jǔ ké ɓě dyi ɓě mǔè ɖò kpaún po ní, nìí, ɓě ní dyá ɖé ɔ ɓíɖí-gbǒǔn, ɓɛ́ ɓě ké ɖɛ ɔ dèà tɔ̀ɔ̀-má mú ɖé ɓě gboɛɛ ɖé zà.

¹¹ Kɛɛ ɓě mɛ fòìn ɖé píé, ɓɛ́ nyɔɔ̀ mìɔùn ké ɔ tɔ̀ɔ̀-máɔ̀ ɓě gbo dyà.

¹² Ɔ jǔ ké nyɔ ɓɛ́ ɔ dèà ɓě tɔ̀ɔ̀-máɔ̀ gboɛɛ dyi gǎ-dyé-nyɔ̀ jǔ, ké ɔ tɔ̀ɔ̀-máɔ̀ dyi ɔ mú-po-ɖɔ̀ jǔǐn, nìí, ɔ ní goò ɖé ɓě gbo.

¹³ Hwɛ̀ ɓɛ́ dyóɖó ké dyi kpáa, ɓě mɛ tò ɔ ɖɔɔ̀ ɖe, ɓɛ́ ɔ kéɛ kɔ̃ pɛ̃́. Nìí, ɔ mu ɓě zùo poùn, ké Bounɓo mɔ̀à ɓěɛ̀ Gèɖèpɔ́ɔ̀ kɛɛ mu ɓě dyí-sɛ́ɖɛ́ìn-nyɔ̀ ɖáìn.

¹⁴ “Ɓě mɛ ɓɔ́ gǎ-dyé-nyɔ̀ ɓɛ́ ɓě kpɔ̃ dyi ɓó pɛ́ɛ̀ jèɛɛ gbá-gbá mú nyuɛ, kɛbì ɔ mɛ mɔ̀ ɓě mǔè Éézùɖùɛ̀-nyɔ̀ mɔɔ ɖíà ɓɛ́ ɔ cĩ́ ɖé ɓěɛ̀ hwɔɖɔ ɓěɔ̀ ɖò múɛ.

¹⁵ Ɓě mɛ pɛ́ɛ̀ nyɔɔ̀ wé séín, hwɛ̀ ɓɛ́ dyóɖó ké dyi kpáa, sepóɛɖé ɔ dyé gǎ, ké ɔ dè pɛ́ɛ̀-ɖɛ̀ɔ̀ hwòɖǒ kɔ̃. Ɔ se ná nìǐn, ɔ mu Bounɓoɔ̀ kpéi pòìn ɓó ɖɛ ɓě nyuà ɔ bũ̌ɛɛ jè, ké zaa mu ɓě kpɔ̃ùn ɓóɛ jè.

¹⁶ “Dyú-ɖɛ̌ kè dyú-ɓǎ mɛ ɓɔ́ mɛ́ɛ ɓó waà dyú ɓěɛ̀ nyuu-nàmàǔn jè, mɔɔ ké dyú ɓěɔ̀ mɛ ɓɔ́ mɛ́ɛ ɓó waà wóɖóìn-nyɔ̀ ɓěɛ̀ nyuu-nàmàǔn jè. Nyɔ ɖò-ɖò kɔ̃̀ ɓɛ́ ɔ ké ɔ mìɔùn nììn nàmàǔn jè mɛ́.

¹⁷ “Ɓě mɛ ɓɔ́ ɖɛ mɔ̀ dyí-sɛ́ɖɛ́ìn-ɖɛ̀ kɛɛ hwìǐ zàìn ɓó ɖíà ɓěɔ̀ mɔɔ xwíè-dyù ɓěɔ̀ bìì, mɔɔ ké ɓě ní kpɔ̃ jɔ̌ɔ̀-màà ɖòɛ̀ mú-po-ɖɔ̀ dyi ɓó tɔ̀ɔ̀-má jè.

¹⁸ Ɔ mɛ nì ɓě hwìɖǐi kà ɓě mɔ̀ǒ zɔ̃̌ɔ̀ gǐì ɖé Íjè-ɓòɖòɔ̀ kɔ̃, ké Bounɓo mɔ̀à ɓěɛ̀ Gèɖèpɔ́ɔ̀ kɛɛ gbǎà zɔ̃̌ɔ̀ ɓěɛ. Ɔ jè ḿ nìà ɓě gma nìà kɛ gbo cɛ̃iń nyɛ̀.

¹⁹ “Ɔ jǔ ké ɓě dyi ɓěɛ̀ geɖe ɓěɔ̀ cɛ̃iń nì, ké mɔɔ́-jũ̌ ɖò dyi ɖé mɔɔ́-pìǐɔ̀ mú sè ní, nìí, ɓě mɛ ɓɔ́ ɔ jè muɛ ɖe. Ɔ mɛ sè ɖé ɓó ɖíà ɓěɔ̀ kè xwíè-dyù ɓěɔ̀ ɔ kè jɔ̌ɔ̀-màà ɓěɔ̀ bìì. Ɓě dyiɛ náa nyuín, Bounɓo mɔ̀à ɓěɛ̀ Gèɖèpɔ́ɔ̀ kɛɛ mu ɓěɛ̀ nyuu-ɖɛ̀ séín mana kɔ̃ poùn.

²⁰ Ké ti ɓɛ́ ɓě mu ɓěɛ̀ ɔ́ɖè-cù ɓěɔ̀ ɓo dyai kpã́ùn wɛ̃ɛ, ɓě ɖǎ cuɔ̀ dyi túò ní, nìí, ɔ́ɖè-ɓòɔ̀ nyɔ ɓě sèà cuɔ̀ dyaa, ɓě mɛ ɓɔ́ wa kpã́a ɖe. Ɖíà ɓěɔ̀ kè xwíè-dyù ɓěɔ̀ ɔ kè jɔ̌ɔ̀-màà ɓěɔ̀ mɔ̀ nyɔ kɔ̃̀ǎ wa.

²¹ Ké ti ɓɛ́ ɓě mu ɓěɛ̀ géɖéè-gbǎɔ̀ kpã́ùn wɛ̃ɛ, nìí, ɓě mɛ ɓɔ́ géɖéèɔ̀ bɛ̃̌ poɛ ɖe. Ɖíà ɓěɔ̀ kè xwíè-dyù ɓěɔ̀ ɔ kè jɔ̌ɔ̀-màà ɓěɔ̀ mɔ̀ nyɔ kɔ̃̀ géɖéèɔ̀ nyɔ ɓě sèà géɖéè-gbǎɔ̀ múɛ.

²² Ɔ mɛ nì ɓě hwìɖǐi kà ɓě mɔ̀ǒ zɔ̃̌ɔ̀ gǐì ɖé Íjè-ɓòɖòɔ̀ kɔ̃ɛ. Ɔ jè ḿ nìà ɓě gma nìà kɛ gbo cɛ̃iń nyɛ̀.