Dànyá 9 - Ɓǎsɔ́ɔ̀ Báɓòɔ̀

Dànyá ɓaà ɔ nyɔ ɓěɔ̀ bìì

¹ Sɔ̀ìn ɓóɛ gboɛɛ, Dìwáɖádyà mɔ̀à Míì-nyɔ̀, ɓɛ́ ɔ mɔ̀à Àhàzúwàɖàà dyú-gààɔ̀ kɛɛ mɔ̀ ma Báɓèɖɔ́ùn-ɓòɖòɔ̀ kã́á.

² Ɖé Dìwáɖádyà nììn ɓóɖó-wuɖuí-kɔ̃̀-zɔ̃̀ɔ̀ kĩ́ín-kĩ́ín nììnɔ̀ múɛɛ, mɔ̄ Dànyá, ḿ nì ma wuɖu ɓɛ́ Bounɓoɔ̀ tòìn ma kà Jɛ̀ɖèmádyà mɔ̀à kpáá-ɖɛ̀-cɛ̃-nyɔ̀ɔ̀ kɛ múɛɛ múin gmɔìn, ké ḿ wɔ̃́ɔ ma múin kà Jùɖúsɛ̀ɖɛ̀ìn-hwɔ̀ɖɔ̀ɔ̀ mú-gbɔɔ̀-gbɔɔ̀ mu ná dyi gã̀ùn tee, ɓɛ́ zɔ̃ kpáɖá-nyɔ tã ɓaɖa-bùè ké ziɛ.

³ Ɔ jèɛɛ, ḿ gmɔ̀ìn ma ɖé Ɖɛɓíɔ́ Gèɖèpɔ́ɔ̀ gbo, ké ḿ ɓaà ma ɔ kóɖó-kóɖó. Ḿ hwèɖè ma wɔ̃ kɔ̃, ké ḿ po ma ɖɔ-zɔ̃̀ mú, ké ḿ kò ma tĩ́ɔ-pɛ̀ɛ̀ múin, ké ḿ nì ma ɔ ɖɛ zɔ̀ǐn.

⁴ Ḿ ɓaà ma Bounɓo mɔ̀à ní Gèɖèpɔ́ɔ̀ kɛ, ké ḿ wɔ̃́ìn ma ní nyɔ ɓěɔ̀ nàmàǔn ɓěɔ̀ mú, ké ḿ ɖá, “Óó Ɖɛɓíɔ́, mɔ̀ mɔ̀ Gèɖèpɔ́ɔ̀ vɛ̀nɛ̀, ké m̀ gã̌ ní. M̀ kpɔ̃ dèè-wùɖù ɓɛ́ ɔ nìà ɓó m̀ kè nì nyɔ ɓěɔ̀ pṹa kɛ kè nì ɖɛ̀ɓɛ̀ǐn-ɖɛ̀ɓɛ̀ǐnɔ̀ dyi ɓó nyɔ ɓě ɓɛ́ wa ɖɛ̀ɓɛ̀ m̀ mú, ké wa kpɔ̃ nì gma ɓěɔ̀ dyiɛɛ bìì.

⁵ “À ɖǎ nàmàǔn nyu, ké à ɖǎ m̀ ɖɛ se dyí sɛ́ɖɛ́ìn nyɛɛ bũ̌ nyu. À ɖǎ hwòɖǒ kɔ̃in nyìnììn, ké à ɖǎ m̀ gbo vɔ̃. À ɖǎ nì gma séín ɓěɔ̀ kɔ̃ín pòìn.

⁶ À se nì gbo-nì-nyɔ̀ ɓě mɔ̀à kpáá-ɖɛ̀-cɛ̃-nyɔ̀ ɓěɔ̀ kɛɛ ɖùǔ gbo tò. Wa mɔ̀ nyɔ ɓě wùɖù ma kà à kã́á ɓěɔ̀ kè à wuɖuí-kɔ̃̀-nyɔ̀ tɔ̀ɔ̀ ɓěɔ̀ kè à ɓǎ nììn ɓǎ ɓěɔ̀ ɔ kè nyɔ séín nì ma ɖé à ɓóɖóɔ̀ múɛɛ gbo ɖé nì nyɛ́nɛ́ɔ̀ múɛ.

⁷ Ɖɛɓíɔ́, mɔ̀ mɔ̀ dyí-sɛ́ɖɛ́ìn-nyɔ̀. Kɛɛ ɓá à mɔ̀ Júɖà-nyɔ̀ ɓěɔ̀ kè Jùɖúsɛ̀ɖɛ̀ìn-nyɔ̀ ɓěɔ̀ ɔ kè Éézùɖùɛ̀-nyɔ̀ tɔ̀ɔ̀ séín ɓěɔ̀ nyɔ ɓě xwɛ̃́ìn dyiɛ kè nyɔ ɓě tɔ̀mɔ̀ gbo ɖé ɓóɖó séín ɓě kɔ̃̀ kɔ̃ ɓɛ́ m̀ ɖǎà à dyi gbɛ̀ìn ɓó à se m̀ jǎà gbo nyu jèɛ dyíɛɛ, dɛ̃ ɖǎ à kɔ̃in ɓáìn ɓó zɛ̃̌ɛ̀.

⁸ Bounɓo, dɛ̃ ɖǎ à kè à kã́á ɓěɔ̀ kè à wuɖuí-kɔ̃̀-nyɔ̀ tɔ̀ɔ̀ ɓěɔ̀ ɔ kè à ɓǎ nììn ɓǎ ɓěɔ̀ kɔ̃in ɓáìn ɓó nàmàǔn ɓě ɓɛ́ à ɖǎ m̀ bũ̌ nyuɛɛ jè.

⁹ Mɔ̀ Ɖɛɓíɔ́ mɔ̀à à Gèɖèpɔ́ɔ̀ kɛɛ, m̀ mɔ̀ wìì-ɓéɖé-Gèɖèpɔ́ɔ̀, ké nì zĩ̀ìn à kɔ̃in kɛbì à mɛ vɔ̃ m̀ gboɛ.

¹⁰ À se mɔ̀ Bounɓo mɔ̀à à Gèɖèpɔ́ɔ̀ kɛɛ gma ɓě ɓɛ́ m̀ nyí ma à dyììn ɖé nì gbo-nì-nyɔ̀ ɓě mɔ̀à kpáá-ɖɛ̀-cɛ̃-nyɔ̀ ɓěɔ̀ kɛ múɛɛ dyi kpɔ̃.

¹¹ À mɔ̀ Éézùɖùɛ̀-nyɔ̀ séín ɓěɔ̀ kɛɛ ɖǎ nì gma ɓěɔ̀ wáɖá, ké à ɖǎ m̀ kɔ̃ín pòìn. À se mɔ́ ɓɛ́ à ké nì wuɖuɔ̀ nyu. Ɔ jèɛɛ, hwòɛ̌-wùɖù ɓě kè gboò-wùɖù ɓě kɔ̃̀ jè céè zɔ̃̌ɔ̀ kà ɖé Mózè mɔ̀à nì gbo-nì-nyɔ̀ɔ̀ kɛɛ gma-cèè-ɖɛ̀ɔ̀ múɛɛ ɖǎ à kɔ̃ púè, sepóɛɖé à ɖǎ m̀ nàmàǔn bũ̌ nyu jè.

¹² M̀ ɖǎ ɖɛ ɓě ɓɛ́ m̀ cɛ̃ ma ɓá à kè à wuɖuí-kɔ̃̀-nyɔ̀ ɓěɔ̀ jè dyíɛɛ à bũ̌ nyu dyììn ɖé à gǎ ɓɛ́ kà dyíɛ̀ kɔ̃ tò-tò mú. Ɖɛ ɓɛ́ kà dyí ɓɛ́ m̀ nyuà Jùɖúsɛ̀ɖɛ̀ìn-hwɔ̀ɖɔ̀ɔ̀ bũ̌ɛɛ, m̀ séèɛ̀ ɓóɖó-kpà gànáà wáká ɖò kɔ̃ nyu ɖò.

¹³ Gǎ ɓɛ́ kà dyíɛ̀ ɖǎ à kɔ̃ dyi kà ɔ jè nyuà ɖé Mózèɛ̀ gma-cèè-ɖɛ̀ɔ̀ mú céèɛ̀ kɛ. Kɛɛ dyéɛ, à séè mɔ̀ Bounɓo mɔ̀à à Gèɖèpɔ́ɔ̀ kɛɛ mana zɔ̀ìn dyììn ɖé à nàmàǔn ɓěɔ̀ kɔ̃ín-pòìn-pòìn kè nì jǎàɔ̀ dyi-kpɔ̃-kpɔ̃ mú.

¹⁴ M̀ se ma ti zĩ̀ìn ɓó à gǎ kɔ̃ tò jè, sepóɛɖé mɔ̀ Bounɓo mɔ̀à à Gèɖèpɔ́ɔ̀ kɛɛ, m̀ mɔ̀ dyí-ɓɛ̀ɖɛ̀ìn-nyɔ̀, kɛɛ dyéɛ, à se nì wuɖuɔ̀ nyu.

¹⁵ “Ɓó kàǔn wɛ̃ɛ, óó Ɖɛɓíɔ́ à Gèɖèpɔ́ɔ̀, mɔ̀ mɔ̀ nyɔ kɔ̃̀ gana-sɔ̃̀ zà ma kà nì nyɔ ɓěɔ̀ ɖé Íjè-ɓòɖòɔ̀ kɔ̃, ɓɛ́ nì nyɛ́nɛ́ dyi ma kà mu, ké ɔ dyià muɛń nì ke ɓó zɛ̃̌ɛ̀ kɛɛ, à ɖǎ m̀ nàmàǔn bũ̌ nyu. À ɖǎ m̀ hwòɖǒ-kɔ̃in-nyìnììn-ɖɛ̀ bũ̌ nyu.

¹⁶ Óó Ɖɛɓíɔ́, dyììn ɖé nì wìì se-sèìn-naín-kɔ̃̀ɔ̀ múɛɛ, m̀ mɛ zà nì dyoɖoɔ̀ Jùɖúsɛ̀ɖɛ̀ìn-hwɔ̀ɖɔ̀ɔ̀ kɔ̃. Ɔ mɔ̀ nì hwɔɖɔ ɓɛ́ ɔ nìà ɖé nì toɖo hwɛ̀ǐn-hwɛ̀ǐnɔ̀ dya kɛ. À nàmàǔn ɓěɔ̀ kè à ɓǎ nììn ɓǎ ɓěɛ̀ nàmàǔn ɓěɔ̀ ɖǎa nyu ké Jùɖúsɛ̀ɖɛ̀ìn-hwɔ̀ɖɔ̀ɔ̀ kè nì nyɔ ɓěɔ̀ ɖǎ dyɔ́-cù jǔ ɖé nyɔ séín nìà à ɖeiɛɛ gbo.

¹⁷ À Gèɖèpɔ́ɔ̀, ɓó kàǔn wɛ̃ɛ, wɔ̃́ nì gbo-nì-nyɔ̀ɔ̀ ɓaà-wùɖùɔ̀ kè ɔ ɖɛ-zɔ̀-wùɖùɔ̀. Óó Ɖɛɓíɔ́, ɓó nì nyɛ́nɛ́ɔ̀ jèɛɛ, gmɔ̀ nì pá hwɛ̀ǐn-hwɛ̀ǐn ɓɛ́ ɔ ɖǎà mú gbɔɔ̀ kɛɛ kɔ̃, ɓɛ́ m̀ kéɛ po ɖe.

¹⁸ Óó Gèɖèpɔ́ɔ̀, tò ɖùǔ, ɓɛ́ m̀ ké à wuɖuɔ̀ wɔ̃́. Ɓáà nì dyéɖéɔ̀, ɓɛ́ m̀ ké hwɔɖɔ ɓɛ́ ɔ mùìn kà m̀ nyɛ́nɛ́ín nyɛɛ mú-gbɔɔ̀-gbɔɔ̀ dyé. À se dyí-sɛ́ɖɛ́ìn-nyɔ̀ ɓɛ́ à ké m̀ ɖɛ zɔ̀ǐn nì, kɛɛ ɔ mɔ̀ ɓó nì wìì vɛ̀nɛ̀ɔ̀ jè.

¹⁹ Ɖɛɓíɔ́, tò à wuɖuɔ̀ ɖùǔ gbo. Ɖɛɓíɔ́, zĩ̀ìn à kɔ̃in. Ɖɛɓíɔ́, nyu à bìì kũ̀à. Óó ní Gèɖèpɔ́ɔ̀, ɓó nì nyɛ́nɛ́ɔ̀ jèɛɛ, m̀ mɛ ɓɔ́ ti zĩ̀ɛ̀n, sepóɛɖé nì hwɔɖɔɔ̀ kè nì nyɔ ɓěɔ̀ mùìn m̀ nyɛ́nɛ́ín.”

Gééɓòɖò zà ɖɛ Jɛ̀ɖèmádyà cɛ̃ ma kɛɛ xwíníín

²⁰ Ti ɓɛ́ ɓaà-wùɖùɔ̀ nì ma ḿ wĩín, ké ḿ nì ma ní nàmàǔn kè ní nyɔ ɓě mɔ̀à Éézùɖùɛ̀-nyɔ̀ ɓěɔ̀ kɛɛ nììn nàmàǔn mú wɔ̃́ǐn, ké ḿ nì ma Bounɓo mɔ̀à ní Gèɖèpɔ́ɔ̀ kɛɛ ɖɛ zɔ̀ǐn ɓá ɔ toɖo hwɛ̀ǐn-hwɛ̀ǐnɔ̀ jè dyíɛɛ,

²¹ púɛɛ, ínjà kɔ̃̀ nyɛ́nɛ́ mɔ̀à Gééɓòɖò ɓɛ́ ḿ dyé ma kà ɖé ní dyí-tɛ̀mɛ̀ìn-ɖɛ̀ɔ̀ múɛɛ kpá ma pìɔ̌ kɔ̃ún, ké ɔ dyi ma ɓó ḿ gbo wàɖà. Ɔ ɓɛ́ìn ma hwìo-sàǎ-zà-tìɔ̀ jǔɛ.

²² Ɔ cɛ̃ɛ ma ḿ gbo, ké ɔ ɖá, “Dànyá, ḿ ɖǎ dyi, ɓɛ́ ḿ ké m̀ xwíníín-dyi-cɛ̃̀-cɛ̃̀ kè fɔ̀nɔ̀-hwòɖǒ nyí.

²³ Ti ɓɛ́ m̀ dè ma ɓaà gbɔ nyɛ̀nɛ̀ɛ̀ kɛɛ, Gèɖèpɔ́ɔ̀ tò ma nì ɓaà-wùɖùɔ̀ gɔ̃̌-jǔ-wùɖù. Ké ḿ ɖǎ dyi, ɓɛ́ ḿ kéɛ m̀ gbo cɛ̃, sepóɛɖé Gèɖèpɔ́ɔ̀ ɖɛ̀ɓɛ̀ m̀ mú mìɔ cá. Ɔ jèɛɛ, m̀ mɛ tò ɖùǔ, ɓɛ́ ḿ ké Gèɖèpɔ́ɔ̀ wuɖu ɓɛ́ m̀ zàà múɛɛ xwíníín mú zà.

²⁴ “Zɔ̃ hɔ̃dɛ̀ɖɛ̀ hĩinyɛ kè kpáɖá-nyɔ hĩinyɛ ɓaɖa-bùè mɔ̀ ti Gèɖèpɔ́ɔ̀ ɖǎ dyi dè, ɓɛ́ ɔ ké zi, hwɛ̀ ɓɛ́ Gèɖèpɔ́ɔ̀ ké nì nyɔ ɓěɔ̀ kè nì hwɔɖɔ hwɛ̀ǐn-hwɛ̀ǐnɔ̀ nàmàǔn kè ɖɛ-gbà-nyu-nyu xwaún zà. Ɔ ɖǎ ná nìǐn, nìí, Gèɖèpɔ́ɔ̀ mu nàmàǔn ɖɛ kɔ̃in ɓáìn, ɓɛ́ dyí-sɛ́ɖɛ́ìn-ɖɛ̀ nyu-nyu ké nì kánáá pū, nìí, ɓɛ́ dyí-tɛ̀mɛ̀ìn-ɖɛ̀ɔ̀ kè ɖɛ mu kpáùn ɓɛ́ wa cɛ̃à kɛɛ ké jǎà kpá, ɓɛ́ wa ké mú-hwɛ̀-nyɔ̀ɔ̀ Gèɖèpɔ́ɔ̀ xwáɖáún zàìn.

²⁵ M̀ mɛ dè ɖɛ nìà kɛ dyéɖé gbo, ɓɛ́ m̀ kéɛ múin wɔ̃́. Ɖɛɔ̀ mɔ̀, sɔ̀ìn ɓó ti wa tò ma wuɖu, ɓɛ́ wa ké ma Jùɖúsɛ̀ɖɛ̀ìn-hwɔ̀ɖɔ̀ɔ̀ po ɖe, ɓɛ́ ɔ ké ɓóɖó-wuɖuí-kɔ̃̀-nyɔ̀ ɓɛ́ Gèɖèpɔ́ɔ̀ ɖǎ gãa nììn dyi-tì dyɛ̀ìn nyɛɛ, zɔ̃ kpáɖá-nyɔ sɔ̃́ sè mɛ̀nɛ̌ìn-hĩinyɛ kè zɔ̃ hɔ̃dɛ̀ɖɛ̀ hĩinyɛ kè kpáɖá-nyɔ ɓaɖa-bùè sè hĩinyɛ mu ziìn. Wa mu Jùɖúsɛ̀ɖɛ̀ìn-hwɔ̀ɖɔ̀ɔ̀ poùn ɖe, ɓɛ́ hwìè ɓě kéɛ gboi nì, ɓɛ́ ɔ ké to-pèɖèìn-naín ɓě ɓéɖé, kɛɛ ɔ po-tìɔ̀ mu ti kàmàǔn-kàmàǔn jǔùn.

²⁶ Ti ɓɛ́ zɔ̃ hɔ̃dɛ̀ɖɛ̀ hĩinyɛ kè kpáɖá-nyɔ ɓaɖa-bùè sè hĩinyɛɔ̀ ɖǎ ziɛɛ ní, nìí, wa mu nyɔ ɓɛ́ Gèɖèpɔ́ɔ̀ ɖǎà gã kɛɛ ɖáɓáùn ɓó se-dyí-sɛ́ɖɛ́ìn-kà. Ké ɓóɖó-wuɖuí-kɔ̃̀-nyɔ̀ ɖò kè ɔ nììn sójà ɓě mu hwɔɖɔɔ̀ kè Gèɖèpɔ́ɔ̀ gbǒɔ̀ wáɖáùn. Ɖɛ séín ɓěa mánáín-hwɛ̀-tìɔ̀ mu dyiìn kà ní-tò dyià kɛ. Ɔ mu to kè ɖɛ-mú-gbɔɔ̀-gbɔɔ̀ ɓɛ́ Gèɖèpɔ́ɔ̀ ɖǎ dyí sɔ́ɛɛ dyàùn.

²⁷ Ɓóɖó-wuɖuí-kɔ̃̀-nyɔ̀ɔ̀ kè nyɔ ɓáún-ɓáún mu wuɖu dèìn kóɖó-kóɖó ɓó zɔ̃ mɛ̀nɛ̌ìn-sɔ̃́ bìì. Ké ti ɓɛ́ tiɔ̀ mu hwìɛ̀ ɓɛ́ìn nyɛɛ, ɔ mu sáa-zàìn-ɖɛ̀ kè nyíí-ɖɛ̀ séín jè dyi zĩ̀ìn. Ɔ ɖǎ ná nìǐn, ɔ mu Gèɖèpɔ́ɔ̀ gmaɔ̀ ɖuà-ɖɛ̀ ɓɛ́ ɔ dyàà ɖɛ nyàìn nyɔǔn dyiɛɛ dyí ɖúùn, ɓɛ́ ɔ kéɛ ɖéé ɖé Gèɖèpɔ́ɔ̀ gbǒɔ̀ dú-hwìɛ̀ dyi nyànàìn, ké ɔ mu ɖé dyi gã̀ùn tee ɓɛ́ ɔ ké nyɔ poà ɖéɛ kɛɛ mú-gbɔɔ̀-tì ɓɛ́ Gèɖèpɔ́ɔ̀ ɖǎà dyí sɔ́ ɓó ɔ bììɛɛ dyɛ̀ìn hwɛ̀.”