Dànyá 7 - Ɓǎsɔ́ɔ̀ Báɓòɔ̀

DÀNYÁ DÈ Ɔ DYÍ-TƐ̀MƐ̀ÌN-ƉƐ̀ ƁĚƆ̀ MƐ ( 7:1–12:13 ) Dànyáà dyí-tɛ̀mɛ̀ìn-ɖɛ̀ ɓá nimii hĩinyɛ jè dyíɛ

¹ Ɖé Bɛ̀síázɔ̀ nììn Báɓèɖɔ́ùn-ɓòɖòɔ̀ wuɖuí-kɔ̃̀-zɔ̃̀ɔ̀ kĩ́ín-kĩ́ín nììnɔ̀ múɛɛ, Dànyá ɓéɖé ma dya-dya ɖò. Ti ɔ pɛ̃́ ma ɓó ɔ kɔ̃-pɛ̃́-ɖɛ̀ɔ̀ kɔ̃ dyiɛɛ, ɔ dya ma ɖɛ ɖò, ké ɔ céè ma ɖɛ ɔ dya ma kà kɛɛ ɓíɖíi.

² Dànyá cɛ̃ɛ ma, ké ɔ ɖá, “Ɖé ní dya-dya ɓɛ́ ḿ ɓéɖéà ɓó máaúnɔ̀ ɓaɖaa múɛɛ, ḿ gmɔ̀ ma ɖé dyúa, ké ḿ dyéɛ, ké pìɔ̌ sɔ̀ìn ma ɓóɖó-gã̀ hĩinyɛɔ̀ gbo, ké ɔ nì ma dyóóɔ̀ dyi túòɛ̌n gana-kà.

³ Púɛɛ, nimii vɛ̀nɛ̀ kò-kò hĩinyɛ sɔ̀ ma ɖé dyóóɔ̀ kɔ̃.

⁴ “Nimii kĩ́ín-kĩ́ínɔ̀ hwɔìn ganìǎ, kɛɛ ɔ ɓéɖé ke-pìɔ̌-kpà. Ti ní dyéɖéɔ̀ nì ma ɖé keɛɛ, ḿ dyéɛ, ké ɔ pìɔ̌ ɓěɔ̀ fá ma ɓó. Púɛɛ, ɖɛ ɖò sɔ̀ìn ma nimiiɔ̀ ɓó ɓíɖíi dyí, ké ɔ nyànàìn ma nimiiɔ̀ ɓo sɔ̃́ kɔ̃ dyi kà nyɔǔn-dyù nìà kɛ. Ké ɔ nyí ma nimiiɔ̀ nyɔǔn-dyù fɔ̀nɔ̀-hwòɖǒ.

⁵ “Ké ḿ dyé ma nimiiɔ̀ sɔ̃́ nììn. Ɔ kè kìɖìǒ hwɔìn ma ní. Ké ɔ nyànàìn ma ɔ ɖeín-ɓò sɔ̃́ɔ̀ kɔ̃ dyi, ké ɔ gbǎìn ma wáá-sè-kpà tã wĩín. Ké wuɖu ɖò cɛ̃ɛ ma ɔ gbo, ké wuɖuɔ̀ ɖá, ‘Sɔ̀ dyí, ɓɛ́ m̀ ké suaɖɛ̀ tà, ɓɛ́ m̀ ké ɖoɓo!’

⁶ “Sɔ̀ìn ɓóɛ gboɛɛ, ḿ gmɔ̀ ma ɖé dyúa, ké ḿ dyé ma nimii ɖò ɖe. Nimiiɔ̀ dyɛ mɔ̀ɔ̀ kè ji hwɔìn ní. Ɔ ɓéɖé ma pìɔ̌-kpà hĩinyɛ ɖéɛ kɔ̃ún kà naà-pìɔ̌-kpà nìà kɛ, ké ɔ ɓéɖé ma dú hĩinyɛ. Ké wa nyí ma ɔ kpé, ɓɛ́ ɔ ké ɖɛ wuɖuí kɔ̃̀.

⁷ “Ti ní dyéɖéɔ̀ nì ma ɖé keɛɛ, ḿ dyé ma nimiiɔ̀ hĩinyɛ nììn. Ɔ nì ma díɖí kè fã̀à, ké ɔ ɓéɖé ma gana mìɔ cá. Ɔ ɓéɖé ma nɛɛ̀-kpà-nyɛ̀nɛ̀ vɛ̀nɛ̀ ɓě ɖé ɔ wɔ̃ɔ̀ mú. Ɔ wàìn ɖɛ séín ɔ kpɔ̃ɛɛ dyi, ké ɔ tàà, ké ɔ síìn ɖɛ séín sè ɓóɛɛ kɔ̃in. Ɔ mɔ̀ùn kò ma ɓó nimii tɔ̀ɔ̀ séín ɓěɔ̀ gbo, ké gmɛ̌ ɓaɖa-bùè nì ɔ dú.

⁸ Ti ɓɛ́ ḿ nì ma gmɛ̌ ɓěɔ̀ dya gmɔ̀ǔn keɛɛ, púɛɛ, gmɛ̌ tííwè ɖò wóɖóìn ma ɓó gmɛ̌ tɔ̀ɔ̀ ɓěɔ̀ hwìɛ̀, ké ɔ zà ma gmɛ̌ ɓě nì ma ɓó kĩ́ín nyɛɛ tã hwuɖu ɓóɛ dyúa. Gmɛ̌ tííwèɔ̀ nì ma dyéɖé dú kà nyɔǔn-dyèɖè nìà kɛ, ké ɔ ɓéɖé wɔ̃, ké ɔ nì ma ɓɔ́ɖɔ́-kà wùɖùɛ̌n.

Dyí-tɛ̀mɛ̀ìn-ɖɛ̀ ɓá nyɔ ɓɛ́ ɔ cĩ́à kánáá pūɛɛ jè dyíɛ

⁹ “Sɔ̀ìn ɓóɛ gboɛɛ, ḿ dyéɛ, ké wa dè ma zaa-wɔ̃-po-zèè ɓě dyi. Nyɔ ɓɛ́ ɔ cĩ́à kánáá pūɛɛ kò ma ɓó zèèɔ̀ ɖò kɔ̃ dyi. Ɖɔ nì ma ɔ múɛɛ nì ma séɖéé tá-tá. Mí nì ma ɔ dúɛɛ nì ma púú kà ɓáɖáá-mì hwɛ̀ zɛ̀nɛ̌ǐn nìà kɛ. Ké nyɛ-mìɔ̀ nì ma zèèɔ̀ mú wãuń, ké kǎà ɖɛ hwɔìn hwíì-ɓò nì ma zèèɔ̀ gbɔɛɛ nì ma ɖekè.

¹⁰ Nyɛɔ̀ zi dyi kà ní zià dyiɛɛ ɓó ɔ dyúa. Nyɔ táázĩ̀ìn ɓáún-ɓáún mɔ̀ ma ɔ gbo-nì-nyɔ̀, ké nyɔ táázĩ̀ìn ɓaɖa-bùè dú táázĩ̀ìn ɓaɖa-bùè nyànà ma ɓó ɔ dyúa dyi. Zaa-wɔ̃-po-poɔ̀ dè ma gbɔ, ké wa kaà ma céè-ɖɛ̀ ɓě dyí.

¹¹ “Ti ḿ nì ma ɖé gmɔ̀ǔn keɛɛ, ḿ wɔ̃́ɔ, ké gmɛ̌ tííwèɔ̀ nì ma ɓɔ́ɖɔ́-kà wùɖùɛ̌n ke. Ḿ gã̀ ma ɖé gmɔ̀ǔn dyi tee, ké wa ɖáɓá ma nimiiɔ̀ hĩinyɛ nììnɔ̀, ké wa po ma ɔ xwɛ́ɔ̀ ɖé nyɛ-ɓɔ́ɔ̀ mú.

¹² Nimii tɔ̀ɔ̀ ɓěɔ̀ nììn kpéɔ̀ sɔ̀ ma wa xwa, kɛɛ wa táà ma wa dyi, ɓɛ́ wa ké ma cĩ́ ɓó ti wè mú.

¹³ “Ɖé dya-dyaɔ̀ múɛɛ, ḿ dyéɛ ɓó máaúnɔ̀, ké ɖɛ ɖò nì ma ɖé dyúa kà nyɔǔn-dyù nìà kɛ. Ɔ nì ma ɖé dyɔún sɔ̀ǔn, ké ɔ nì ma ní-kpò ɖò mú dyìɛ̌n. Ɔ dyi ma, ké ɔ xwɛ̃́ìn ma nyɔ ɓɛ́ ɔ cĩ́à kánáá pūɛɛ bũ̌in, ké wa kpa ma ɔ ɓó nyɔ ɓɛ́ ɔ cĩ́à kánáá pūɛɛ dyúa.

¹⁴ Ké nyɔ ɓɛ́ ɔ cĩ́à kánáá pūɛɛ nyí ma ɔ nyɔ-wuɖuí-kɔ̃̀-kpè kè dĩ́ín-dĩ̀ìn ɔ kè kã́á-ɓòɖò ɖò. Ké nyɔ-dù kò-kò séín ɓɛ́ wa po wuɖu-dù kò-kò ɓěɛɛ ɓiè ma ɔ ní. Ɔ nyɔ-wuɖuí-kɔ̃̀-kpèɔ̀ se sèìn-naín ɖò kɔ̃̀, ké nyɔ ɖò se ɔ kã́á-ɓòɖòɔ̀ mú gbɔɔ̀ ɓɛ́ìn sɔ̃̀ɔ̀.

Dyí-tɛ̀mɛ̀ìn-ɖɛ̀ɔ̀ xwíníín-zà-zà

¹⁵ “Ɖɛ ɓɛ́ mɔ̄ Dànyá dya ma kà kɛɛ tàɓàìn ma ḿ díɖí, ké ɔ nyùìn ma ḿ fũ̀à-fṹá.

¹⁶ Ké ḿ mu ma nyɔ ɓě nyànà ma kà ɓó dyiɛɛ ɖò gbo, ké ḿ diè ma ɔ dyi ɓó ɖɛ ké ɖɛ séín ɓěa kɛɛ xwíníín jɛ́ɛ́ jǔɛ. Hwɛ̀ ké ɔ cɛ̃ɛ ma ḿ gbo, ké ɔ zàà ma séín xwíníín mú ɖé ḿ gbo.

¹⁷ Ɔ ɖá, ‘Nimii vɛ̀nɛ̀-vɛ̀nɛ̀ hĩinyɛ ɓěɔ̀ mɔ̀ kã́á-ɓòɖò hĩinyɛ ɓɛ́ wa mu dyi dèìn nɔ̄ ɓóɖó-kpàà kɔ̃ɛ.

¹⁸ Sɔ̀ìn ɓóɛ gboɛɛ, Ɖɛɓíɔ́ nììn nyɔ ɓěɔ̀ mu kã́á-ɓòɖò ɖò jè dyi kpɔ̃ùn, ɓɛ́ ɔ ké waà kɔ̃̀ɔ̀-ɖɛ̀ jǔ kánáá pū.’

¹⁹ “Hwɛ̀ ké ḿ diè ɔ dyi ɓó ɖɛ ké nimiiɔ̀ hĩinyɛ nììnɔ̀ xwíníín jɛ́ɛ́ jǔɛ, sepóɛɖé ɔ mɔ̀ùn kò ma ɖé nimii tɔ̀ɔ̀ séín ɓěɔ̀ hwìɛ̀. Ɔ nì ma díɖí mìɔ ɓó nɛɛ̀-kpà-nyɛ̀nɛ̀ kè bàɖàsǐ-xwɛ̃̀ɛ̀ ɓɛ́ ɔ ɓéɖé ma kà ɓɛ́ ɔ kéà ɖɛ ɓě ɔ kpɔ̃ɛɛ dyi wàìn, ɓɛ́ ɔ kéà wa tà, ɓɛ́ ɔ kéà ɖɛ séín sè ɓóɛɛ kɔ̃in síìn nyɛɛ jè.

²⁰ Ké ní mɔ́ ɓɛ́ ḿ ké ma gmɛ̌ ɓaɖa-bùè nì ma kà ɔ dúɛ kè gmɛ̌ tɔ̀ɔ̀ ɓɛ́ ɔ wóɖóìn ma kà ɓó, ɓɛ́ gmɛ̌ ɓě nì ma kà ɓó kĩ́ín nyɛɛ tã dyi ma kà ɓó ɔ dyúa dyi kpáa xwíníín dyuò. Ɔ mɔ̀ gmɛ̌ ɓéɖé ma kà dyéɖé, ké ɔ ɓéɖé ma kà wɔ̃ ɓɛ́ ɔ wùɖùà ɓɔ́ɖɔ́-kà kɛ. Gmɛ̌-dyù tííwèɔ̀ nì ma fã̀à mìɔ ké ɔ zi gmɛ̌ tɔ̀ɔ̀ ɓěɔ̀ dyí.

²¹ “Ti ɓɛ́ ḿ nì ma ɖé gmɔ̀ǔn wɛ̃ɛ, ḿ dyéɛ, ké gmɛ̌ dyúáɖòɔ̀ nì ma Gèɖèpɔ́ɔ̀ nyɔ ɓěɔ̀ to kɔ̃ poɛń, ké ɔ nì wa toún ɖuɛń.

²² Ɔ gã̀à ma náa nyuɛń dyi tee, ké Ɖɛɓíɔ́ ɓɛ́ ɔ cĩ́à kánáá pūɛɛ dyi ma, ké ɔ po ma zaaɔ̀ wɔ̃ ɓó ɔ nyɔ ɓěɔ̀ bìì, ké ɔ nyí ma wa kã́á-ɓòɖòɔ̀.

²³ “Ké nyɔ nyànà ma kà ɓó ḿ wáún dyiɛɛ zàà ma xwíníín ɖé ḿ gbo, ké ɔ ɖá, ‘Nimiiɔ̀ hĩinyɛ nììnɔ̀ xwíníín mɔ̀ kã́á-ɓòɖòɔ̀ hĩinyɛ nììn ɓɛ́ ɔ mu xwáɖáún wóɖóùn nɔ̄ ɓóɖó-kpàà kɔ̃ɛ. Ɔ mu kòùn ɓó kã́á-ɓòɖò tɔ̀ɔ̀ séín ɓěɔ̀ hwìɛ̀. Ɔ mu ɓóɖó-kpà gànáà manaùn. Ɔ muɛ kɔ̃in síìn, ɓɛ́ ɔ kéɛ dyi wàìn.

²⁴ Gmɛ̌ ɓaɖa-bùè nìà ɔ dúɛɛ xwíníín mɔ̀ kã́á ɓaɖa-bùè ɓɛ́ wa mu kã́á-ɓòɖò nìà kɛ mú sɔ̀ùn wɛ̃. Ké kã́á ɖò mu ɓó wa mɔ̀ùn ɖeín dyí kɔùn. Ɔ mɔ̀ùn mu kòùn ɓó kã́á ɓě nìɔ̌ kà kĩ́ín nyɛɛ gbo. Ɔ mu kã́á ɓěɔ̀ tã toún ɖuùn.

²⁵ Ké ɔ mu Ɖɛɓíɔ́ ɖɛ gbà kɔ̃ún cɛ̃ìn, ɓɛ́ ɔ ké Ɖɛɓíɔ́ɛ̀ nyɔ ɓěɔ̀ dyi pĩ́à, ɓɛ́ ɔ ké waà hwɔ ɓěɔ̀ kè waà gma ɓěɔ̀ gbo zĩàìn mɔ́. Ké Ɖɛɓíɔ́ɛ̀ nyɔ ɓěɔ̀ mu ɔ kpéɔ̀ xwíɖíi nììn ɓó zɔ̃ tã kè ɓɛ́ìn-hwìɛ̀ xwíníín.

²⁶ Ɔ ɖǎ ná nìǐn, zaa-wɔ̃-po-gbò nìà ɖé dyɔún wɛ̃ɛ mu kaàùn ɓó zaa wɔ̃ po jè. Ké zaa-wɔ̃-po-nyɔ̀ ɓěɔ̀ mu ɔ nyɔ-wuɖuí-kɔ̃̀-kpèɔ̀ xwa zàùn, ɓɛ́ wa ké ɔ mú gbɔɔ̀.

²⁷ Ɔ ɖǎ ná nìǐn, nìí, kã́á-ɓòɖò séín nìà dyɔɔ̀ xwíɖíiɛɛ nììn kpé kè gana ɔ kè nyɔ-wuɖuí-kɔ̃̀-kɔ̃̀ séínɔ̀, wa muɛ Ɖɛɓíɔ́ɛ̀ nyɔ ɓěɔ̀ xwáɖáún zàìn. Wa nììn kã́á-ɓòɖòɔ̀ mɔ̀ sè-kpáà ɖɛ, ké nyɔ-wuɖuí-kɔ̃̀-nyɔ̀ séín ɓěɔ̀ mu waà gbo-nì-nyɔ̀ jǔùn.’

²⁸ “Ɓóɛ̀ ní dya-dyèɖèɔ̀ sèìn ma. Púɛɛ, mɔ̄ Dànyá nìà kɛɛ, fũ̀à-fṹá dyí ma ɖé ḿ mú mìɔ cá ɓó ɖɛɔ̀ jè. Ké ní dyúaɔ̀ zàìn ma dyí, kɛɛ ḿ se ma ɖɛɔ̀ nyɔ ɖò gbo cɛ̃.”