Dànyá 6 - Ɓǎsɔ́ɔ̀ Báɓòɔ̀

Wa po Dànyá ganìǎ-ɓì mú

¹ Ti ɓɛ́ Dìwáɖádyà ɖǎ ma kã́á jǔɛɛ, ɔ gã ma gàa hɔ̃dɛ̀ɖɛ̀ ɖò kè kpáɖá-nyɔ, ɓɛ́ wa ké ma ɓóɖóɔ̀ gbɛ̌ɛ̀ ɖò-ɖò wuɖuí kɔ̃̀ ɖé ɔ kã́á-ɓòɖòɔ̀ mú.

² Ké kã́áɔ̀ gã ma gàa tã ɖekè, ɓɛ́ wa ké ma gɔ̌mànà-nyɔ̀ hɔ̃dɛ̀ɖɛ̀ ɖò kè kpáɖá-nyɔɔ̀ kɔ̃in nì. Dànyá mɔ̀ ma gàa tã ɓěɔ̀ ɖò. Gɔ̌mànà-nyɔ̀ ɓěɔ̀ mɔ̀ ma kã́á-ɓòɖòɔ̀ jè gbo-gmɔ̀-nyɔ̀ ɓó kã́áɔ̀ bìì, ɓɛ́ ɔ ní kɔ̃̀ ɖà má.

³ Dànyá fɔ̀nɔ̀ ma hwòɖǒ mìɔ, ké ɔ kpeɖeɔ̀ sɛ́ɖɛ́ìn ma dyí mìɔ, ké ɔ zi ma ɔ mǔè gɔ̌mànà-nyɔ̀ tɔ̀ɔ̀ ɓěɔ̀ dyí jèɛɛ, kã́áɔ̀ mɔ́ ɓɛ́ ɔ ké ma ɔ kã́á-ɓòɖò gànáɔ̀ wuɖuí-kɔ̃̀-nyɔ̀ mú nyu. Ɔ xwíníín mɔ̀, ɓɛ́ ɔ ké ma ɓó kã́áɔ̀ gbo dyí kɔ.

⁴ Ti ɓɛ́ ɖɛ ɓěa ɖǎ ma ná nìɛɛ, púɛɛ, Dànyá mǔè gɔ̌mànà-nyɔ̀ tɔ̀ɔ̀ ɓěɔ̀ ɖú ma bɛ̃̌ dyi mɔ́ kpàǐ ɓá kà ɔ nyu ɔ gɔ̌mànà-kũ̀àɔ̀ nyuɛ kɛɛ dyí. Kɛɛ wa se ma ɖɛ kɔ̃̀ zaa wa ké ma ɔ kpɔ̃̀ìn nyɛɛ ɖò dyéɛ ɓɛ́ìn. Wa se ma ɔ gbá-gbá ɖò mú dyéɛ ɓɛ́ìn, sepóɛɖé ɔ mɔ̀ ma jǎà-nyɔ̀, ké ɔ se ma kɛɛ ɖò ɓéɖé.

⁵ Hwɛ̀ ké gàa ɓěɔ̀ ɖá, “À se kɛɛ ɖò Dànyá mú dyéɛ ɓɛ́ìn, ɓɛ́ à ké ɔ zaa kpɔ̃̀ìn, ɔ sèìn gma à ɓɛ́ìn poɛ ɓá ɔ Gèɖèpɔ́ɔ̀ jè dyíɛɛ ɖòùn.”

⁶ Ɔ jèɛɛ, gɔ̌mànà-nyɔ̀ ɓěɔ̀ poìn ma dyí, ké wa mu ma ɖé kã́áɔ̀ gbo, ké wa ɖá, “Kã́á Dìwáɖádyà, ɓɔ̌ɔ̀, m̀ mɛ kɔ̃̀ à wuɖuí kánáá pū.

⁷ À mɔ̀ gɔ̌mànà-nyɔ̀ vɛ̀nɛ̀ ɓě kè ɓóɖóɛ̀ gbɛ̌ɛ̀ ɖò-ɖò wuɖuí-kɔ̃̀-nyɔ̀ ɓě kè à sɔ̃-xwíɖíi-dè-nyɔ̀ ɓě ɔ kè ɓóɖóɔ̀ cu-kpà ɓěɛɛ ɖǎ wuɖu dyí poìn kà ɓɛ́ m̀ ké gma ɖò po, ɓɛ́ à mɔ̀à nì nyɔ ɓěɛɛ kéɛ dyi kpɔ̃ɛ. Gmaɔ̀ mɔ̀, nyɔ ɖò mɛ ɓɔ́ gèɖèpɔ́ɔ̀ ɖò mɔɔ nyɔ ɖò ɓaà ɓó wé kpáɖá-nyɔ ɓaɖa-bùè xwíníín, ɔ sèìn m̀ ɖòùn wa ké ɓaà. Nyɔ mɔ̀ nyɔ mu gma nìà kɛ wáɖáùn wɛ̃ɛ, wa mɛ po ɔ ganìǎ-ɓì mú.

⁸ Ɓɔ̌ɔ̀, po gma nìà kɛ, ɓɛ́ m̀ kéɛ céè-ɖɛ̀ kɔ̃ po, ɓɛ́ ɔ ké nì kà Míì kè Pɔ́sìà-nyɔ̀ ɓěɔ̀ gma nyuà nìɛ̀ kɛ. Waà gma se dyí zàìn ɓɛ́ìn.”

⁹ Ké Kã́á Dìwáɖádyà céè ma gmaɔ̀.

¹⁰ Ti ɓɛ́ Dànyá wɔ̃́ɔ ma kà kã́áɔ̀ ɖǎ ma gmaɔ̀ poɛɛ, ɔ mu ma ɖé ɔ ɓíɖí-taún, ɖé ɔ dyií-ɓì-dyùɔ̀ mú, ké ɔ kaà ma wúɖɛ̀-wɔ̃̀ ɓɛ́ ɔ gmɔ̀ìn ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ gboɛ. Ɔ taɓa ma kɔ́-dù hwuɖu, ké ɔ po ma Gèɖèpɔ́ɔ̀ zùo, ké ɔ ɓaàìn ma kpa tã ɓó wéa ɓaɖa kà ɔ nyuɛ ma kà nyuɛ kĩ́ín ɓó wé séín nyɛ.

¹¹ Hwɛ̀ ké gàa ɓěɔ̀ poìn ma dyí, ké wa mu ma, ké wa dyɛ̀ìn ma Dànyá ɓaà dyi. Ɔ nì ma Gèɖèpɔ́ɔ̀ dyi dièɛ̌n, ɓɛ́ ɔ ké ɔ gbo kpá.

¹² Ké wa mu ma ɖé kã́áɔ̀ gbo, ké wa cɛ̃ ma gma ɓɛ́ ɔ ɖǎ ma kà poɛɛ jè, ké wa ɖá, “Ɓɔ̌ɔ̀, má, m̀ po ma gma ɖò kà nyɔ ɖò mɛ ɓɔ́ gèɖèpɔ́ɔ̀ ɖò mɔɔ nyɔ ɖò ɓaà ɓó wé kpáɖá-nyɔ ɓaɖa-bùè nìà kɛ xwíníín, ɔ sèìn mɔ̀ mɔ̀à kã́áɔ̀ kɛɛ ɖòùn wa ké ɓaà kɛe? Ké má, gmaɔ̀ cɛ̃ɛ kà nyɔ muɛ wáɖáùn wɛ̃ɛ, wa ɓéɖé wa ké ɔ ganìǎ-ɓìɔ̀ mú poɛe?” Ké kã́áɔ̀ ɖá, “Ǹdye, kà ɔ nìe. Ké gmaɔ̀ nì ní ke kóɖó-kóɖó kà Míì kè Pɔ́sìà-nyɔ̀ ɓěɔ̀ gma nyuà nìɛ̀ kɛ. Ɔ se dyí zàìn ɓɛ́ìn.”

¹³ Hwɛ̀ ké wa cɛ̃ɛ ma kã́áɔ̀ gbo, ké wa ɖá, “Ɓɔ̌ɔ̀, Dànyá ɓɛ́ ɔ mɔ̀à toɛ̀-kpɔ̃-nyɔ̀ ɓěɔ̀ ɖò, ɓɛ́ ɔ sɔ̀à ɖé Júɖà-ɓòɖòɔ̀ kɔ̃ɛɛ se nì gma ɓɛ́ m̀ ɖǎà céèɛɛ kpéín dyéo. Ɔ nì ɓaàǔn kpa tã ɓó wé séín.”

¹⁴ Ti ɓɛ́ kã́áɔ̀ wɔ̃́ ma ɖɛa kɛɛ, ɔ hwòɖǒ kpá ma ɖé ɖei mìɔ, ké ɔ vɔ̃ ma ɖé hwìè séín mú, ɓɛ́ ɔ ké ma Dànyá póìn. Ɔ gã̀ ma hwìè dyi mɔ́uń dyi tee ké dyóɖó zi ma.

¹⁵ Hwɛ̀ ké gàa ɓěɔ̀ poìn ma dyí ɖe, ké wa mu ma ɖé kã́áɔ̀ gbo, ké wa ɖá, “Ɓɔ̌ɔ̀, ɔ mɛ nì m̀ hwìɖǐi kà dyììn ɖé Míì kè Pɔ́sìà-nyɔ̀ ɓěɔ̀ nììn gma múɛɛ, gma ɓɛ́ kã́áɔ̀ ɖǎ poɛɛ se dyí zàìn ɓɛ́ìn nyɛ.”

¹⁶ Ɔ jèɛɛ, kã́áɔ̀ zà ma ɓó wuɖu, ké wa dyà ma Dànyá, ké wa po ma ɔ ganìǎ-ɓìɔ̀ mú. Hwɛ̀ ɓɛ́ wa ké ma ɖé Dànyá poɛɛ, kã́áɔ̀ cɛ̃ɛ ma ɔ gbo, ké ɔ ɖá, “Nì Gèɖèpɔ́ɔ̀ ɓɛ́ m̀ ɓièà teeɛɛ mɛ póìn m̀.”

¹⁷ Ti wa ɖǎ ma Dànyá ɖé ganìǎ-ɓìɔ̀ mú poɛɛ, wa kiɖiò ma sɔ́ɔ́-kpò ɖò, ké wa dèɛ̀ ma ɓóɛ ɓíɔ̀ wĩín. Ké kã́áɔ̀ po ma ɓó ɔ mìɔùn nììn sɔ̃-bɛ̃̀ mɔ̀à ɔ jìǐn-po-ɖɛ̀ɔ̀ bɛ̃̌ kɛ, ké ɔ gɔ̌mànà-nyɔ̀ vɛ̀nɛ̀ ɓěɔ̀ mɔ̀ùn po ma ɓó wa nììn sɔ̃-bɛ̃̀ ɖekè, nìí, ɓɛ́ nyɔ ɖò ní kɔ̃̀ ma Dànyá ɖé ɓíɔ̀ mú zà.

¹⁸ Ké kã́áɔ̀ kɔ́ìn ma ɖe, ké ɔ mu ma ɖé ɔ kã́á-gbòɔ̀ dya ɖe. Ɔ se ma ɖɛ ɖò ɖi ɓó hwìoɔ̀ ɓaɖa, ké ɔ se ma péé ɖò mɔ́ fɔɔ. Ɔ se ma nyíɔ-ɓò ɖò dyéɖéí dè ɓó máaún-hwùɖù gànáɔ̀ mú.

¹⁹ Ti ɓɛ́ zɔ̃ nìǎ ma hwɔɖɔún dyi wáɖáuń nyɛ̀nɛ̀ɛ̀ kɛɛ, kã́áɔ̀ sɔ̀ ma dyí, ké ɔ kpa ma ɖé ganìǎ-ɓìɔ̀ wĩín peɖeɛ.

²⁰ Ti ɓɛ́ ɔ nyini ma ɓó ɓíɔ̀ wĩín nyɛɛ, ɔ ɖá ma Dànyá ɖé wuɖu tɛɖɛ kɔ̃in mú, ké ɔ ɖá, “Dànyá, mɔ̀ mɔ̀à nì-nì Gèɖèpɔ́ɔ̀ gbo-nì-nyɔ̀ɔ̀ kɛɛ, nì Gèɖèpɔ́ɔ̀ ɓɛ́ m̀ ɓièà teeɛɛ ɖǎ m̀ ganìǎ ɓěɔ̀ xwaún póìnǹ?”

²¹ Ké Dànyá jǔ ma ɔ gɔ̃̌, ké ɔ ɖá, “Ɓɔ̌ɔ̀, m̀ mɛ kɔ̃̀ à wuɖuí kánáá pū.

²² Ní Gèɖèpɔ́ɔ̀ tò ɔ ínjàɔ̀, ké ɔ kã ganìǎ ɓěɔ̀ wɔ̃. Wa se ḿ bũ̌in puà, sepóɛɖé ní Gèɖèpɔ́ɔ̀ se ḿ kɛɛ ɖò mú dyé, ké ḿ se mɔ̀ mɔ̀à kã́áɔ̀ kɛɛ ɖɛ gbà ɖò bũ̌ nyu.”

²³ Ti ɓɛ́ kã́áɔ̀ wɔ̃́ ma Dànyáà wuɖuɔ̀ kɛɛ, ɔ zi ma múàǔn kpáuń mìɔ, ké ɔ cɛ̃ɛ ma ɔ gbo-nì-nyɔ̀ ɓěɔ̀ gbo, ɓɛ́ wa ké ma Dànyá ɖé ganìǎ-ɓìɔ̀ mú zà. Ké ti ɓɛ́ wa zà ma Dànyá ɖé ganìǎ-ɓìɔ̀ múɛɛ, bɛ̃̌ ɖò se ma ɔ bũ̌ nì fɔɔ, sepóɛɖé ɔ taɓa ma ɔ Gèɖèpɔ́ɔ̀ hwìɖǐǐ jè.

²⁴ Ké kã́áɔ̀ tò ma wuɖu, ké wa dyà ma nyɔ ɓě ɓɛ́ wa kpɔ̃̀ìn ma kà Dànyá zaa kɛ. Wa dyà ma wa kè waà gmàà ɓě kè waà dyú ɓě, ké wa po wa ɖé ganìǎ-ɓìɔ̀ mú. Wa se ma ɖé ɓíɔ̀ gbɔún nyini fóɖóún, ké ganìǎ ɓěɔ̀ sá ma wa, ké wa fáìn wa dyi, ké wa wàìn ma waà kpá séín ɓěɔ̀ dyi.

²⁵ Sɔ̀ìn ɓóɛ gboɛɛ, Kã́á Dìwáɖádyà céè ma nyɔ-dù kò-kò séín nì ɓóɖó-kpàà kɔ̃, ɓɛ́ wa po wuɖu-dù kò-kò ɓěɛɛ gbo. Céè-ɖɛ̀ɔ̀ wuɖu ɖá, “Ḿ zà ɓě nyíɔún!

²⁶ Ḿ nì gma nìà kɛ poɛń kà ɖé ní kã́á-ɓòɖòɛ̀ dà séín nyɛɛ, nyɔǔn séín mɛ fɛ̃̀ìn Dànyáà Gèɖèpɔ́ɔ̀ dyi, ɓɛ́ wa ké ɔ kpéín dyéɛ. Ɔ mɔ̀ nì-nì Gèɖèpɔ́ɔ̀, ké ɔ nì kánáá pū. Ɔ kã́á-ɓòɖòɔ̀ se dya gbɛ̀ɛ̌ mu, ké ɔ nyɔ-wuɖuí-kɔ̃̀-kɔ̃̀ɔ̀ se mánáín ɖò kɔ̃̀ɔ̌ mu.

²⁷ Ɔ mɔ̀ nyɔ-gbǎà-nyɔ̀ kè nyɔ-póìn-nyɔ̀. Ɔ nyu zɛ̃̀ìn-ɖɛ̀ kè ɖɛ dĩ́ín-dĩ̀ìn ɓě ɖé dyɔún kè nɔ̄ ɓóɖó-kpàà kɔ̃. Ɔ ɖǎ Dànyá póìn sɔ̀ìn ɖé ganìǎ ɓěɔ̀ kpéɔ̀ xwaún.”

²⁸ Sɔ̀ìn ɓóɛ gboɛɛ, Dànyá ɓéɖé ma dyií-ɖú-ɖú ɖé ɔ gɔ̌mànà-kũ̀àɔ̀ mú ɖé Dìwáɖádyà nììn ɓóɖó-wuɖuí-kɔ̃̀-tìɔ̀ kè Sáwàɖà mɔ̀à Pɔ́sìà-nyɔ̀ɔ̀ kɛɛ nììn ɓóɖó-wuɖuí-kɔ̃̀-tìɔ̀ mú kánáá pū.