Dànyá 3 - Ɓǎsɔ́ɔ̀ Báɓòɔ̀

Nɛ̀ɓùkànɛ́zà cɛ̃ɛ nyɔ séín gbo ɓɛ́ wa ké góò-kũ̀ùn-kpòɔ̀ ɓiè

¹ Ti ɖòɛ̀ ɓaɖaa, Kã́á Nɛ̀ɓùkànɛ́zà nyu ma góò-kũ̀ùn-kpò ɖò. Kũùn-kpòɔ̀ dya-tɔ̀mɔ̀-tɔ̀mɔ̀ mɔ̀ ma ɓáɖáa ɓaɖa-bùè sè hm̀m̌, ké ɔ xwíɖí-kùɔ̀ mɔ̀ ma ɓáɖáa dyúáɖò kè fá-kɛ́ín. Ɔ nyànàìn ma kũùn-kpòɔ̀ dyi ɖé Dúwàɖà Bɔɔ-kpà ɓɛ́ ɔ nì ɖé Báɓèɖɔ́ùn-ɓòɖòɔ̀ kɔ̃ɛɛ kɔ̃.

² Hwɛ̀ ké kã́áɔ̀ poìn ma ɔ gɔ̌mànà-nyɔ̀ séín ɓěɔ̀ dyí. Nyɔ ɓě ɔ poìn ma kà dyíɛɛ hwɔìn kà gɔ̌mànà-nyɔ̀ vɛ̀nɛ̀ ɓěɔ̀ kè ɓóɖóɔ̀ gbɛ̌ɛ̀ ɖò-ɖò wuɖuí-kɔ̃̀-nyɔ̀ ɓěɔ̀ kè waà sɔ̃-xwíɖíi-dè-nyɔ̀ ɓěɔ̀ kè ɓóɖóɔ̀ cu-kpà ɓěɔ̀ kè ɓóɖóɔ̀ wíɖí-dyi-dè-nyɔ̀ ɓěɔ̀ kè tɔ̀ɔ̀-ɓìɔ̀ ɓěɔ̀ ɔ kè gɔ̌mànà-nyɔ̀ tɔ̀ɔ̀ ɓěɔ̀. Ɔ ɖá wa, ɓɛ́ wa ké dyi, ɓɛ́ ɔ ké kũùn-kpò ɓɛ́ ɔ ɖǎà dyi nyànàìn nyɛɛ wa xwáɖáún zàìn.

³ Ɔ jèɛɛ, gɔ̌mànà-nyɔ̀ vɛ̀nɛ̀ ɓěɔ̀ kè ɓóɖóɔ̀ gbɛ̌ɛ̀ ɖò-ɖò wuɖuí-kɔ̃̀-nyɔ̀ ɓěɔ̀ kè waà sɔ̃-xwíɖíi-dè-nyɔ̀ ɓěɔ̀ kè ɓóɖóɔ̀ cu-kpà ɓěɔ̀ kè ɓóɖóɔ̀ wíɖí-dyi-dè-nyɔ̀ ɓěɔ̀ kè tɔ̀ɔ̀-ɓìɔ̀ ɓěɔ̀ ɔ kè gɔ̌mànà-nyɔ̀ tɔ̀ɔ̀ séín ɓěɔ̀ poìn ma dyí ɓó kũùn-kpò ɓɛ́ Kã́á Nɛ̀ɓùkànɛ́zà nyànàìn ma kà dyiɛɛ xwáɖáún zà jè. Wa dyi, ké wa nyànà ma ɓó kũùn-kpòɔ̀ dyúa dyi.

⁴ Hwɛ̀ ké zio-po-nyɔ̀ ɖò po ma zio, ké ɔ ɖá, “Ɓě mɔ̀ nyɔ-dù kò-kò ɓě ɓɛ́ ɓě po wuɖu-dù kò-kò ɓěɛɛ, kã́áɔ̀ ɖá ɖɛ ɓě mɛ nyuɛɛ kɛà kɛ̀.

⁵ Ti ɓɛ́ ɓě mu gã̀àɔ̀ kè péé-pooɔ̀ kè gbǎɖí-dù kò-kò ɓěɔ̀ kè ɓaɖaa-ɖɛ̀ tɔ̀ɔ̀ kò-kò ɓěɔ̀ wuɖu wɔ̃́ùn nyɛ̀nɛ̀ɛ̀ kɛɛ, ɓě mɛ jìɖǐ dyi, ɓɛ́ ɓě ké góò-kũ̀ùn-kpò ɓɛ́ ɔ ɖǎà dyi nyànàìn nyɛɛ ɓiè.

⁶ Nyɔ kã̀ìn séín ɓɛ́ wa se dyi jìɖǐɛ mu, ɓɛ́ wa ké kũùn-kpòɔ̀ ɓièɛɛ, wa mu nyɔɔ̀ ɖé nyɛ-ɓì ɖò mú poùn, ké wa se ti ɖò zĩ̀ɛ̌n mu.”

⁷ Ɔ jèɛɛ, ti ɓɛ́ nyɔ-dù kò-kò ɓě ɓɛ́ wa po wuɖu-dù kò-kò ɓěɛɛ wɔ̃́ ma ɓaɖaa-ɖɛ̀ ɓěɔ̀ wuɖuɛɛ, púɛɛ, wa jìɖǐ ma dyi, ké wa ɓiè ma góò-kũ̀ùn-kpò ɓɛ́ Kã́á Nɛ̀ɓùkànɛ́zà nyànàìn ma kà dyiɛ.

Wa kpɔ̃̀ìn Dànyá ɓǎto tã ɓěɔ̀ zaa ɓá wuɖuún jaɖa jè dyí

⁸ Ɓó tia ɓaɖaa, Báɓèɖɔ́ùn-nyɔ̀ ɖíɛ́ ɓě kpɔ̃̀ìn ma Júù-nyɔ̀ ɓěɔ̀ zaa. Wa mu ma,

⁹ ké wa cɛ̃ɛ ma Kã́á Nɛ̀ɓùkànɛ́zà gbo, ké wa ɖá, “Ɓɔ̌ɔ̀, m̀ mɛ kɔ̃̀ à wuɖuí kánáá pū.

¹⁰ Má, m̀ po ma gma ɖò kà nyɔ séín dyi gã̀àɔ̀ kè péé-pooɔ̀ kè gbǎɖí-dù kò-kò ɓěɔ̀ kè ɓaɖaa-ɖɛ̀ tɔ̀ɔ̀ kò-kò ɓěɔ̀ wuɖu wɔ̃́ ní, wa mɛ jìɖǐ dyi, ɓɛ́ wa ké góò-kũ̀ùn-kpòɔ̀ ɓiè kɛe?

¹¹ Má, m̀ cɛ̃ɛ ma kà nyɔ kã̀ìn séín se dyi jìɖǐɛ mu, ɓɛ́ wa ké kũùn-kpòɔ̀ ɓièɛɛ, wa mu nyɔɔ̀ nyɛ-ɓì ɖò mú poùn wɛ̃e?

¹² Kɛɛ gmɔ̀ nɔ̄, Júù-nyɔ̀ ɖíɛ́ ɓě ɓɛ́ m̀ ɖǎà Báɓèɖɔ́ùn-ɓòɖò nìà kɛ wuɖuí-kɔ̃̀-nyɔ̀ ɓě mú nyu, kɔ̃̀ nyɛ́nɛ́ mɔ̀à Síáwàɖà kè Mísìà ɔ kè Àbɛ́nɛ́gò kɛɛ, ɓɔ̌ɔ̀, wa se nì wuɖuɔ̀ kpéín dyéo. Wa se nì gèɖèpɔ́ɔ̀ ɓěɔ̀ ɓiè, mɔɔ ké wa se mɔ́ ɓɛ́ wa ké góò-kũ̀ùn-kpò ɓɛ́ m̀ ɖǎà dyi nyànàìn nyɛɛ ɓièo.”

¹³ Púɛɛ, Kã́á Nɛ̀ɓùkànɛ́zà kpá ma dyoɖoún mìɔ cá. Ké ɔ ɖoɓo ma nyɔ, ɓɛ́ wa ké ma Síáwàɖà kè Mísìà ɔ kè Àbɛ́nɛ́gò ɔ gbo dyà. Ké wa dyà ma gàa ɓěɔ̀ ɓó kã́áɔ̀ dyúa.

¹⁴ Ké kã́áɔ̀ diè ma wa dyi, ké ɔ ɖá, “Síáwàɖà, Mísìà kè Àbɛ́nɛ́gò, ɔ mɔ̀ jǎà kà ɓɛ́ ɓě se mɔ́ ɓɛ́ ɓě ké ní gèɖèpɔ́ɔ̀ ɓěɔ̀ ɓiè, mɔɔ ké ɓě se mɔ́ ɓɛ́ ɓě ké ní góò-kũ̀ùn-kpò ɓɛ́ ḿ ɖǎà dyi nyànàìn nyɛɛ ɓiè kɛɛ̀?

¹⁵ Sɔ̀ìn ɓó kàǔn gboɛɛ, wa mu ɓaɖaa-ɖɛ̀ ɓěɔ̀ ɓaɖaùn ɖe, ké ti ɓɛ́ ɓě mu gã̀àɔ̀ kè péé-pooɔ̀ kè gbǎɖí-dù kò-kò ɓěɔ̀ kè ɓaɖaa-ɖɛ̀ tɔ̀ɔ̀ ɓěɔ̀ wuɖu wɔ̃́ùn nyɛ̀nɛ̀ɛ̀ kɛɛ, ɓě mɛ jìɖǐ dyi, ɓɛ́ ɓě ké kũùn-kpò ɓɛ́ ḿ ɖǎà mɛ kɛɛ ɓiè. Ɓě dyiɛ náa nyu ní, ɔ mɔ̀ ɖɛ sɛ́ɖɛ́ìn dyí. Kɛɛ ɔ jǔ ké ɓě seɛ ɓiè ní, wa mu ɓě ɖé nyɛ-ɓì ɖò mú poùn wàɖà cá. Ɔ dyi ná nìɛ̌ muùn ní, gèɖèpɔ́ɔ̀ nyɛ́ mu ɓě ḿ xwaún zàà ɓɛ́ìn nyɛ́?”

¹⁶ Hwɛ̀ ké Síáwàɖà kè Mísìà ɔ kè Àbɛ́nɛ́gò cɛ̃ɛ ma kã́áɔ̀ gbo, ké wa ɖá, “Ɓɔ̌ɔ̀, à se à mìɔùn póìn jè vɔ̃ɔ́ mu.

¹⁷ Kɛbì wa mɛ po à nyɛ-ɓìɔ̀ múɛɛ, Gèɖèpɔ́ɔ̀ ɓɛ́ à ɓièà kɛɛ ɓɛ́ìn à póɛ̀n sɔ̀ìn ɖe nyɛ-ɓìɔ̀ mú. Ɔ mu à póìn sɔ̀ìn ɖé m̀ xwaún.

¹⁸ Ké kɛbì ɔ mɛ se à póìn nyɛɛ, ɓɔ̌ɔ̀, à mɔ́ ɓɛ́ m̀ kéɛ dyuò kà à se nì gèɖèpɔ́ɔ̀ ɓěɔ̀ ɓièɛ̌ muɛ, mɔɔ ké à se góò-kũ̀ùn-kpò ɓɛ́ m̀ ɖǎà dyi nyànàìn nyɛɛ ɓièɛ̌ muɛ.”

Dànyá ɓǎto tã ɓěɔ̀ ké mɛ́

¹⁹ Ti ɓɛ́ Síáwàɖà kè Mísìà ɔ ké Àbɛ́nɛ́gò cɛ̃ ma ɖɛa kɛɛ, púɛɛ, Kã́á Nɛ̀ɓùkànɛ́zà kpáìn ma wa dyoɖoún mìɔ cá, ké ɔ hwòɖǒ zĩàìn ma gbo ɓá wa jè dyí. Ɔ jèɛɛ, ɔ tò ma wuɖu, ɓɛ́ wa ké ma nyɛɔ̀ daɓa, ɓɛ́ ɔ ké kà ɔ nyu ma sùmùɛ̀ kĩ́ín nyɛɛ kɔ̃ zĩ̀ìn kpa mɛ̀nɛ̌ìn-sɔ̃́.

²⁰ Ké ɔ cɛ̃ɛ ma ɔ sójà ɓěɔ̀ nyɔ ɓě ɓéɖé gana mìɔ kɛɛ ɖíɛ́ ɓě gbo, ɓɛ́ wa ké Síáwàɖà kè Mísìà ɔ kè Àbɛ́nɛ́gò sã, ɓɛ́ wa ké wa ɖé nyɛ-ɓìɔ̀ mú po.

²¹ Ɔ jèɛɛ, Síáwàɖà kè Mísìà ɔ kè Àbɛ́nɛ́gò mú-po-ɖɔ̀ séín ɓě hwɔìn kà waà gã́ùn kè gbɛ̀tɛ̀ ɔ kè dú-dèìn-ɖɛ̀ ɓěɔ̀ gã̀ ma wa mú dyi, ké wa sã ma wa, ké wa po wa ɖé nyɛ-ɓìɔ̀ mú.

²² Gana-wùɖù ɓɛ́ kã́áɔ̀ tò ma kà kɛɛ jè wa nyuɛ ké nyɛɔ̀ ku ma wɔ̃ mìɔ. Nyɛɔ̀ ku ma wɔ̃ mìɔ jèɛɛ, ɔ zùzùɔ̀ ɖáɓá ma gàa ɓě ɓɛ́ wa po ma kà Síáwàɖà kè Mísìà ɔ kè Àbɛ́nɛ́gò ɖé nyɛ-ɓìɔ̀ múɛɛ ní.

²³ Ké Síáwàɖà kè Mísìà ɔ kè Àbɛ́nɛ́gò gã̀ ma ɖúúɔ̀ mú dyi, ké wa kpá ma ɖé nyɛ-ɓìɔ̀ mú.

²⁴ Ti ɓɛ́ Kã́á Nɛ̀ɓùkànɛ́zà gmɔ̀ ma ɖé nyɛ-ɓìɔ̀ múɛɛ, ɔ giniìn ma dyi mìɔ, ké ɔ wã ma ɓíɖíi. Ɔ diè ma ɔ náún-po-nyɔ̀ ɓěɔ̀ dyi, ké ɔ ɖá, “Má, à sã má gàa tã, ké à po má wa ɖé nyɛ-ɓìɔ̀ múe?” Ké wa jǔ ma ɔ gɔ̃̌, ké wa ɖá, “Ǹdye. Kǎà ɔ nìe, ɓɔ̌ɔ̀.”

²⁵ Ké kã́áɔ̀ ɖá, “Ɓě gmɔ̀ ɖéa, ḿ dyé gàa hĩinyɛ, ké wa nì ɖé nyɛɔ̀ mú dyi nàǔn, ké ɖúú ɖò se wa bũ̌ nì, ké nyɛɔ̀ se wa kà ɖò nyuɛń nì, ké nyɔ poà wa hĩinyɛ kɛɛ hwɔìn ínjà ɖò.”

Wa zà gàa tã ɓěɔ̀ ɖé nyɛ-ɓìɔ̀ mú

²⁶ Hwɛ̀ ké Nɛ̀ɓùkànɛ́zà xwɛ̃́ìn ma ɓó nyɛ-ɓìɔ̀ wĩín dyi, ké ɔ páná ma mú, ké ɔ ɖá, “Síáwàɖà, Mísìà kè Àbɛ́nɛ́gò, ɓě mɔ̀à Ɖɛɓíɔ́ gbo-nì-nyɔ̀ ɓěɛɛ, ɓě dyi sí! Ɓě dyi nɔ̄!” Ɔ jèɛɛ, Síáwàɖà kè Mísìà ɔ kè Àbɛ́nɛ́gò sɔ̀ ma ɖé nyɛ-ɓìɔ̀ mú.

²⁷ Ké kã́áɔ̀ gɔ̌mànà-nyɔ̀ vɛ̀nɛ̀ ɓěɔ̀ kè ɓóɖóɔ̀ gbɛ̌ɛ̀ ɖò-ɖò wuɖuí-kɔ̃̀-nyɔ̀ ɓěɔ̀ kè waà sɔ̃-xwíɖíi-dè-nyɔ̀ ɓěɔ̀ ɔ kè ɓóɖóɔ̀ cu-kpà ɓěɔ̀ poìn ma ɓó wa ɖei dyí. Ké wa dyéɛ kà nyɛɔ̀ se ma gàa ɓěɔ̀ ɖɛ ɖò bũ̌ nyuɛ, hwɛ̀ ḿ po níiń, waà mú-po-ɖɔ̀ mɔɔ waà mí-wɔ́ɖɔ́ ɖò se ma sĩ, ké nyɛɛ̀ nyɔ́ ɖò se ma wa mú dyi.

²⁸ Hwɛ̀ ké kã́áɔ̀ ɖá, “Ɓàìn-ɓàìn mɛ nì Síáwàɖà kè Mísìà kè Àbɛ́nɛ́gòɛ̀ Gèɖèpɔ́ɔ̀ kɔ̃. Ɔ mɔ̀ nyɔ ɓɛ́ ɔ ɖǎà ɔ ínjàɔ̀ ɖoɓo, ɓɛ́ ɔ kéà ɔ gbo-nì-nyɔ̀ ɓěɔ̀ póìn nyɛ. Wa taɓa ma ɔ hwìɖǐǐ, ké wa se gma ɓɛ́ kã́á poɛɛ dyi kpɔ̃, ké wa zà ma waà fɛ̀ɛ̀ ɓěɔ̀ hwòɖǒ gbo. Ké wa se gèɖèpɔ́ɔ̀ kà kò ɖò ɓiè, ɔ sèìn wa nììn Gèɖèpɔ́ɔ̀ ɖòùn.

²⁹ Ɔ jèɛɛ, ḿ nì gma ɖìè ɖò poɛń. Gmaɔ̀ mɔ̀ kà nyɔ-dù kò-kò ɓě ɓɛ́ wa po wuɖu-dù kò-kò, ɓɛ́ wa mu Síáwàɖà kè Mísìà ɔ kè Àbɛ́nɛ́gòɛ̀ Gèɖèpɔ́ɔ̀ ɖɛ gbà ɖò kɔ̃ún cɛ̃ìn nyɛɛ, wa mu wa dyi cɛ̃ìn, ké wa mu waà gbǒ ɓěɔ̀ wáɖáùn, sepóɛɖé gèɖèpɔ́ɔ̀ kà kò ɖò se kà nyɔ ɖò póɛ̀n ɓɛ́ìn kà waà Gèɖèpɔ́ɔ̀ nyuà kɛ.”

³⁰ Sɔ̀ìn ɓóɛ gboɛɛ, kã́áɔ̀ nyí ma Síáwàɖà kè Mísìà ɔ kè Àbɛ́nɛ́gò kũ̀à vɛ̀nɛ̀-vɛ̀nɛ̀ ɓě ɖé Báɓèɖɔ́ùn-ɓòɖòɔ̀ kɔ̃.