Dànyá 2 - Ɓǎsɔ́ɔ̀ Báɓòɔ̀

Nɛ̀ɓùkànɛ́zàà dya-wùɖùɔ̀

¹ Ɖé Nɛ̀ɓùkànɛ́zà nììn ɓóɖó-wuɖuí-kɔ̃̀-zɔ̃̀ɔ̀ sɔ̃́ nììnɔ̀ xwíníín nyɛɛ, ɔ ɓéɖé ma dya-dya ɖò. Ti ɔ giniìn ma nyíɔún dyiɛɛ, ɔ dya-dyèɖèɔ̀ nyùìn ma ɔ fũ̀à-fṹá mìɔ, ké ɔ se ma mɔ́ɔ ɓɛ́ìn ɖe.

² Ɔ jèɛɛ, ɔ poìn ma ɔ zɛ̃̀ìn-ɖɛ̀-nyu-nyɔ̀ ɓěɔ̀ kè ɔ sɛ̀ɛ̀-po-nyɔ̀ ɓěɔ̀ ɔ kè hwĩɔ̀-dù kò-kò tɔ̀ɔ̀ ɓěɔ̀ dyí, ɓɛ́ wa ké ma ɔ dya-wùɖùɔ̀ po. Ti ɓɛ́ wa dyi ma ké wa nyànà ma ɓó kã́áɔ̀ dyúa dyiɛɛ,

³ kã́áɔ̀ cɛ̃ɛ ma wa gbo, ké ɔ ɖá, “Ḿ dya ɖɛ ɖò, ké ɔ nì ḿ fũ̀à-fṹá nyùɛ̌n. Ní mɔ́ ɓɛ́ ḿ ké ɖɛ mɔ̀ ɔ xwíníín nyɛɛ dyuò.”

⁴ Hwɛ̀ ké wa jǔ ma kã́áɔ̀ gɔ̃̌ ɖé Áwàɖàùn-wùɖù mú, ké wa ɖá, “Ɓɔ̌ɔ̀, m̀ mɛ kɔ̃̀ à wuɖuí kánáá pū! Po nì dya-wùɖùɔ̀, nìí, à mɔ̀à nì gbo-nì-nyɔ̀ ɓěɛɛ muɛ xwíníín zàùn.”

⁵ Ké kã́áɔ̀ cɛ̃ɛ ma wa gbo, ké ɔ ɖá, “Ɖɛ ɓɛ́ ní hwòɖǒ ɖǎ dyí sɔ́ cáa kɛà kɛ̀. Ɔ mɔ̀, ɔ jǔ ké ɓě se ní dya-wùɖùɔ̀ po, ɓɛ́ ɓě kéɛ xwíníín mú zà ní, nìí, ní mu ɓě wuɖu kɔ̃ zàùn, ɓɛ́ wa ké ɓě dyi cɛ̃ìn, ɓɛ́ wa ké ɓěɛ̀ gbǒ ɓěɔ̀ wáɖá.

⁶ Kɛɛ ɔ jǔ ké ɓě dyi ní dya-dyèɖèɔ̀ ḿ gbo cɛ̃, ké ɓě dyiɛ xwíníín mú zà ní, nìí, ní mu ɓě nyíí-ɖɛ̀ kpa ɖɛ ɓě kè dya-dè-dè vɛ̀nɛ̀ nyíìn. Ɔ jèɛɛ, ɓě mɛ cɛ̃ ní dya-dyèɖèɔ̀, ɓɛ́ ɓě kéɛ xwíníín mú zà.”

⁷ Ké wa jǔ ma kã́áɔ̀ gɔ̃̌ ɖe, ké wa ɖá, “Ɓɔ̌ɔ̀, m̀ mɛ po nì dya-wùɖùɔ̀, nìí, à mɔ̀à nì gbo-nì-nyɔ̀ ɓěɛɛ muɛ xwíníín zàùn.”

⁸ Hwɛ̀ ké kã́áɔ̀ cɛ̃ɛ ma wa gbo, ké ɔ ɖá, “Ḿ dyuòɛ̀ dyí wáɖáá kà ɓě nì ti zĩ̀ɛ̌n nyɛ, sepóɛɖé ɓě dyuòɛ̀ kà ɖɛ nìà kɛ mɔ̀ ɖɛ ḿ ɖǎ dyí sɔ́ jɛ́ɛ́ kɛ.

⁹ Ɖɛ ḿ ɖǎà dyí sɔ́ɛɛ mɔ̀, ɔ jǔ ké ɓě se ní dya-dyèɖèɔ̀ ḿ gbo cɛ̃ ní, ɖɛ dyúáɖòɔ̀ mu ɓě séín gbo kpáùn. Ḿ dyuòɛ̀ dyí kà ɓě ɖǎa dyí sɔ́ ɓɛ́ ɓě ké ḿ se wĩin tɔ́mɔ́ìn tee, ɓɛ́ ɓě ké ḿ hwe-ɖɛ̀ ɓě gbo cɛ̃ kɛ. Ɓě poɛ̀n hwìɖǐi kà ní mu wuɖu dyí zàìn nyɛ. Ɓě mɛ po ní dya-wùɖùɔ̀, nìí, ní muɛ dyuòùn kà ɓě ɓɛ́ìn dya-wùɖùɔ̀ xwíníín mú zàà kɛ.”

¹⁰ Ké hwĩɔ̀ ɓěɔ̀ jǔ ma kã́áɔ̀ gɔ̃̌, ké wa ɖá, “Ɓɔ̌ɔ̀, nyɔ ɖò se toɖo-kpàà kɔ̃ nì ɓɛ́ ɔ ké ɖɛ nì mɔ́ à kéà nyuɛɛ nyuɛ ɓɛ́ìn. Kã́á ɖò, hwɛ̀ ḿ po níiń, kã́á ɓéɖé kpé mìɔ ɖò séè ɔ zɛ̃̀ìn-ɖɛ̀-nyu-nyɔ̀ ɓě kè sɛ̀ɛ̀-po-nyɔ̀ ɓě ɔ kè hwĩɔ̀-dù kò-kò ɓě ganaún kpɔ̃̀ìn ɖò, ɓɛ́ wa ké ɖɛ nì kàà nyu.

¹¹ Ɓɔ̌ɔ̀, ɖɛ m̀ diè kà dyiɛɛ kàmà mú mìɔ, ké nyɔ ɖò seɛ nyuɛ ɓɛ́ìn, ɔ sèìn gèɖèpɔ́ɔ̀ ɓěɔ̀ ɖòùn, kɛɛ dyéɛ, wa se nyɔǔn hwìɛ̀ cĩ́.”

¹² Ti ɓɛ́ kã́áɔ̀ wɔ̃́ ma wa wuɖuɔ̀ kɛɛ, ɔ kpá ma dyoɖoún mìɔ cá. Ké ɔ tò ma wuɖu, ɓɛ́ wa ké ma hwĩɔ̀ ɓě ɓɛ́ wa mɔ̀ ma hwòɖǒ-fɔ̀nɔ̀-nyɔ̀ séín ɓě nì ma ɖé Báɓèɖɔ́ùn-ɓòɖòɔ̀ kɔ̃ɛɛ ɖáɓá nyɛ̀nɛ̀ɛ̀.

¹³ Ɔ jèɛɛ, wuɖuɔ̀ ɓeìn ma dyi kà ɓɛ́ wa ké ma hwòɖǒ-fɔ̀nɔ̀-nyɔ̀ ɓěɔ̀ ɖáɓá kɛ, dè Dànyá kè ɔ ɓǎto ɓěɔ̀ kɔ̃.

Gèɖèpɔ́ɔ̀ zà dya-wùɖùɔ̀ xwíníín mú ɖé Dànyá gbo

¹⁴ Hwɛ̀ ɓɛ́ Àwíɖíɔ̀ mɔ̀ ma kã́áɔ̀ dyí-gmɔ̀-nyɔ̀ ɓěɔ̀ nyɔ vɛ̀nɛ̀ kɛɛ ké ma nyɔ ɓěɔ̀ ɖáɓáuń muɛɛ, Dànyá mu ma ɖé ɔ gbo, ké ɔ diè ma ɔ dyi hwòɖǒ-fɔ̀nɔ̀-kà kè ɖé kpéín-dyé-dyé mú,

¹⁵ ké ɔ ɖá, “Ɓɔ̌ɔ̀, ɖɛ́ kɔ̃̀ jè kã́áɔ̀ tòà gana-wùɖù nì kàà kɛ́?” Hwɛ̀ ké Àwíɖíɔ̀ zaìn ma ɖɛ séín ɖǎ ma kà kpáa Dànyá gbo kɔ̃in.

¹⁶ Ti ɓɛ́ Dànyá wɔ̃́ ma ɖɛɔ̀ múin nyɛɛ, ɔ mu ma ɖé kã́áɔ̀ gbo, ké ɔ ɖáɓá ma ti, nìí, ɓɛ́ ɔ ké ma kã́áɔ̀ dya-wùɖùɔ̀ mú zà.

¹⁷ Hwɛ̀ ké Dànyá mu ma ɔ ɓíɖí-taún ɖe, ké ɔ zaìn ma ɖɛ ɖǎ ma kà kpáa ɔ ɓǎto ɓě mɔ̀à Hánàníà kè Mìsáè ɔ kè Ázàwíɖíà kɛɛ gbo kɔ̃in.

¹⁸ Ké ɔ wùɖù ma wa gbo, ɓɛ́ wa ké ɓaà kóɖó-kóɖó, ɓɛ́ Gèɖèpɔ́ɔ̀ nìà ɖé dyɔún wɛ̃ɛ ké wa wìǐn dyé ɓá ɖɛ kàmàǔn-kàmàǔn nìà kɛ jè dyí, nìí, ɓɛ́ wa ní kɔ̃̀ ɖà wa kè hwòɖǒ-fɔ̀nɔ̀-nyɔ̀ tɔ̀ɔ̀ ɓě nìà Báɓèɖɔ́ùn-ɓòɖòɔ̀ kɔ̃ɛɛ mú gbɔɔ̀.

¹⁹ Hwɛ̀ ké Gèɖèpɔ́ɔ̀ tɛ̀mɛ̀ìn ma dya-dyèɖèɔ̀ Dànyá dyí ɖé dyí-tɛ̀mɛ̀ìn-ɖɛ̀ ɖò mú ɓó máaún-hwùɖù dyúáɖòɔ̀ mú. Púɛɛ, Dànyá ɖú ma Gèɖèpɔ́ɔ̀ nìà ɖé dyɔún wɛ̃ɛ ɓàìn kpàǐ,

²⁰ ké ɔ ɖá, “Ɓàìn-ɓàìn mɛ nì Gèɖèpɔ́ɔ̀ nyɛ́nɛ́ɔ̀ kɔ̃ ɓó sè-ná-sèɛ̀ tiín. Ɔ mɔ̀ nyɔ kɔ̃̀ fɔ̀nɔ̀-hwòɖǒ kè kpé.

²¹ Ɔ mɔ̀ ti-dyí-zàìn-nyɔ̀. Ɔ mɔ̀ kã́á ɓě kũ̀à-kɔ̃ún-po-nyɔ̀, ké ɔ mɔ̀ kã́á ɓě kũ̀à-kɔ̃ún-zà-nyɔ̀. Ɔ mɔ̀ nyɔ nyíà hwòɖǒ-fɔ̀nɔ̀-nyɔ̀ ɓěɔ̀ fɔ̀nɔ̀-hwòɖǒ kɛ̀, ké ɔ mɔ̀ nyɔ nyíà ɖɛ-múin-ɖe-nyɔ̀ ɓěɔ̀ fɔ̀nɔ̀-hwòɖǒ kɛ̀.

²² Ɔ mɔ̀ ɖɛ ɓě mɔ̀ sáná-ɖɛ̀ ké nyɔǔn-dyù se múin wɔ̃́ɔ ɓɛ́ìn nyɛɛ nyɔǔn dyí-tɛ̀mɛ̀ìn-nyɔ̀. Ɔ mɔ̀ nyɔ dyuò ɖɛ pɛ̃́ ɖé tíe-kpò mú dyiɛ, ké ce nì ɖé ɔ gbo.

²³ Óó, ḿ ɓǎ ɓěɛ̀ Gèɖèpɔ́ɔ̀, ḿ po m̀ zùo, ké ḿ nyí m̀ ɓàìn-ɓàìn. Sepóɛɖé mɔ̀ mɔ̀ nyɔ ɖǎà ḿ fɔ̀nɔ̀-hwòɖǒ kè kpé nyíɛ̀. M̀ ɖǎ ḿ ɖɛ à zɔ̀ìn ma m̀ wɛ̃ɛ nyí. M̀ ɖǎ à kã́áɔ̀ dya-dyèɖèɔ̀ dyí tɛ̀mɛ̀ìn.”

Dànyá po kã́áɔ̀ bìì dya-wùɖùɔ̀ ké ɔ zàà xwíníín

²⁴ Ti ɓɛ́ Dànyá ɖǎ ma Gèɖèpɔ́ɔ̀ ɓàìn hwɔɛɛ, ɔ sɔ̀ ma dyí, ké ɔ mu ma ɖé Àwíɖíɔ̀ gbo. Àwíɖíɔ̀ mɔ̀ nyɔ ɓɛ́ kã́áɔ̀ ɖǎ ma kà jìì tò ɓɛ́ ɔ ké ma kà hwòɖǒ-fɔ̀nɔ̀-nyɔ̀ ɓě nì ma ɖé Báɓèɖɔ́ùn-ɓòɖòɔ̀ kɔ̃ɛɛ ɖáɓá kɛ̀. Dànyá cɛ̃ɛ ma ɔ gbo, ké ɔ ɖá, “Ɓɔ́ hwòɖǒ-fɔ̀nɔ̀-nyɔ̀ ɓě nìà Báɓèɖɔ́ùn-ɓòɖòɛ̀ kɔ̃ɛɛ ɖáɓáa. Kpa ḿ ɖé kã́áɔ̀ gbo, ɓɛ́ ḿ ké ɔ dya-wùɖùɔ̀ mú zà ɓó ɔ bìì.”

²⁵ Púɛɛ, Àwíɖíɔ̀ kpa ma Dànyá ɖé kã́áɔ̀ gbo wàɖà, ké ɔ ɖá, “Ḿ ɖǎ gàa ɖò dyé ɖé toɛ̀-kpɔ̃-nyɔ̀ ɓě sɔ̀à Júɖà-ɓòɖòɔ̀ kɔ̃ɛɛ hwìɛ̀, ké ɔ ɓɛ́ìn ɖɛ mɔ̀ nì dya-dyèɖèɔ̀ xwíníín nyɛɛ m̀ gbo cɛ̃ɛ.”

²⁶ Ké kã́áɔ̀ diè ma Dànyá kɔ̃̀ nyɛ́nɛ́ tɔ̀ɔ̀ mɔ̀à Bɛ́tèsíázɔ̀ kɛɛ dyi, ké ɔ ɖá, “M̀ ɓɛ́ìn ɖɛ ḿ dyéà ɖé ní dya-dyaɔ̀ múɛɛ ḿ gbo cɛ̃ɛ, ɓɛ́ m̀ kéɛ xwíníín zàà?”

²⁷ Ké Dànyá jǔ ma ɔ gɔ̃̌, ké ɔ ɖá, “Ɓɔ̌ɔ̀, hwòɖǒ-fɔ̀nɔ̀-nyɔ̀ ɖò se nì, hwɛ̀ ḿ po níiń, nì zɛ̃̀ìn-ɖɛ̀-nyu-nyɔ̀ mɔɔ sɛ̀ɛ̀-po-nyɔ̀ mɔɔ hwĩɔ̀ ɖò se nì ɓɛ́ ɔ ké vǐè-ɖɛ̀ nìà kɛ m̀ gbo cɛ̃.

²⁸ Kɛɛ Gèɖèpɔ́ɔ̀ ɖò nì ɖé dyɔún, ké ɔ mɔ̀ nyɔǔn-dyù vǐè-ɖɛ̀ dyí-tɛ̀mɛ̀ìn-nyɔ̀. Ɔ mɔ̀ nyɔ tɛ̀mɛ̀ìn kà m̀ ɖɛ mu kpáùn ɖé dyúa kɛɛ dyíɛ̀. Dyí-tɛ̀mɛ̀ìn-ɖɛ̀ ɓɛ́ m̀ dya ma kà ti ɓɛ́ m̀ pɛ̃́ ma kà ɓó nì kɔ̃-pɛ̃́-ɖɛ̀ɔ̀ kɔ̃ dyiɛɛ, ɔ kɛà kɛ̀.

²⁹ “Ɓɔ̌ɔ̀, ti ɓɛ́ m̀ pɛ̃́ ma dyiɛɛ, nì hwòɖǒɔ̀ nàìn ma ɖɛ ɓě ké kpá ɖé dyúa kɛɛ gboi. Ké Gèɖèpɔ́ɔ̀ mɔ̀à ɖɛ ɓě ɓɛ́ wa vǐè nyɔǔn dyíɛɛ nyɔ-dyí-tɛ̀mɛ̀ìn-nyɔ̀ kɛɛ tɛ̀mɛ̀ìn ma m̀ ɖɛ mu kpáùn wɛ̃ɛ dyí.

³⁰ Gèɖèpɔ́ɔ̀ ɖǎ mɔ́ún vǐè-ɖɛ̀ nìà kɛ dyí tɛ̀mɛ̀ìn ɖekè. Ɔ se ɖɛ ɓɛ́ ḿ ké hwòɖǒ fɔ̀nɔ̀ ɓɛ́ ḿ ké nyɔ tɔ̀ɔ̀ ɓě mɔ̀ùn dyí ziɛ, kɛɛ ɔ mɔ̀ ɓɛ́ m̀ ké dyí-tɛ̀mɛ̀ìn-ɖɛ̀ ɓɛ́ m̀ dya ma kà kɛɛ xwíníín dyuò jè, ɔ kè ɓɛ́ m̀ ké nì hwòɖǒ-dyií-gbǎìn-ɖɛ̀ ɓěɔ̀ dyí dyuò.

³¹ “Ɓɔ̌ɔ̀, m̀ gmɔ̀ ma ɖé nya, ké mɛɛ-ɖɛ̀ vɛ̀nɛ̀ hwɔìn nyɔǔn-dyù ɖò nyànà ma ɖé dyi. Ɔ mɔ̀ mɛɛ-ɖɛ̀ fã-fã ɖò, ké ɔ nì díɖí mìɔ, ké nyɔ ɖò seɛ dya gmɔ̀ɔ̀ ɓɛ́ìn.

³² Mɛɛ-ɖɛ̀ɔ̀ dúɔ̀ mɔ̀ ma góò hwɛ̀ zɛ̀nɛ̌ǐn, ké ɔ kɛ́ɔ̀ kèɛ̀ sɔ̃ ɓěɔ̀ mɔ̀ ma séɓàɖà. Ɔ xwíɖíɔ̀ kèɛ̀ gbùàɔ̀ mɔ̀ ma bàɖàsǐ.

³³ Ɔ ɓo-kpììɔ̀ mɔ̀ ma nɛɛ̀-kpà, ké ɔ ɓo-pìɔ̌ ɓěɔ̀ wáká ɖò mɔ̀ ma nɛɛ̀, ké wáká ɖò mɔ̀ ma mɛ.

³⁴ Ti ɓɛ́ nì dyéɖéɔ̀ nì ma ɖé keɛɛ, m̀ dyéɛ, ké sɔ́ɔ́-kpò vɛ̀nɛ̀ ɖò cɛ̃̀ ma ɓó toɖo ɖò dyéɖéí. Nyɔ ɖòɛ̀ sɔ̃ seɛ ma ɓóɛ cɛ̃. Ɔ dyi, ké ɔ kpá ma mɛɛ-ɖɛ̀ɔ̀ ɓo-pìɔ̌ mɔ̀à nɛɛ̀-kpà kè mɛ kɛɛ kɔ̃, ké ɔ wàìn ma wa dyi.

³⁵ Ké nɛɛ̀ɔ̀ kè mɛɔ̀ kè bàɖàsǐɔ̀ kè séɓàɖàɔ̀ ɔ kè góòɔ̀ wɛ̀ìn ma dyi séín ɓó ti dyúáɖòɔ̀ mú, ké wa nì kà mɔɔ́-fèɖè nìà ɓó mɔɔ́-dyí-síìn-naín nyɛɛ nìà ɓó dyóɖó-bà-ɓàɖà kɛ. Pìɔ̌ sámá ma wa séín ɓó dyi. Kɛɛ sɔ́ɔ́-kpò vɛ̀nɛ̀ ɓɛ́ ɔ kpá ma kà mɛɛ-ɖɛ̀ɔ̀ ɓo kɔ̃ɛɛ zɛ̃̀ìn ma toɖo vɛ̀nɛ̀ ɖò mú, ké ɔ ɓáìn ma ɓóɖó-kpà gànáɔ̀ kɔ̃in.

³⁶ “Ɓɔ̌ɔ̀, ɖɛ m̀ dya ma kà kɛɛ nìà ɓóɛ̀. Dyììn ɖé Gèɖèpɔ́ɔ̀ kpéɔ̀ múɛɛ, ní muà nì dya-dyèɖèɔ̀ xwíníín mú zàùn.

³⁷ Ɓɔ̌ɔ̀, mɔ̀ mɔ̀ kã́á ɓó kã́á séín kɔ̃in. Gèɖèpɔ́ɔ̀ nìà ɖé dyɔún wɛ̃ɛ ɖǎ m̀ ɓóɖó-wuɖuí-kɔ̃̀-kɔ̃̀ kè kpé kè gana ɔ kè dĩ́ín-dĩ̀ìn nyí.

³⁸ Mɔ̀ mɔ̀à góò-dù-ɓòɔ̀ kɛ̀. Gèɖèpɔ́ɔ̀ ɖǎ m̀ nyɔǔn-dyù séín kè xwáɖá-xwíɖíi-nìmìì ɓě kè naà ɓě xwaún dyi po. Ɔ ɖǎa nyu ɓɛ́ m̀ ké wa séín wuɖuí kɔ̃̀ dɛ̀ séín wa cĩ́ɛ.

³⁹ Kɛɛ kã́á-ɓòɖò ɖò mu ɓó m̀ ɖeín dyí kɔùn. Ɔ nììn kpéɔ̀ se nììnɔ̀ dyɛ̀ǐn mu. Ké kã́á-ɓòɖò ɖò mu ɓó dyɛ mɔ̀ɔ̀ mɔ̀ùn ɖeín dyí kɔùn, ké ɔ mu ɓóɖó-kpà gànáɔ̀ wuɖuí kɔ̃̀ùn. Ɔ mɔ̀ bàɖàsǐ nììnɔ̀.

⁴⁰ Kã́á-ɓòɖòɔ̀ hĩinyɛ nììnɔ̀ mu dyi kuùn kà nɛɛ̀-kpà nìà kɛ. Nɛɛ̀-kpà jaɖa ɖɛ, ké ɔ wàìn ɖɛ séín dyi. Ké kà nɛɛ̀-kpà nyuà ɖɛ dyi wàìn nyɛɛ, kǎà ɔ mu kã́á-ɓòɖò tɔ̀ɔ̀ ɓěɔ̀ dyi wàìn.

⁴¹ Kà ɓɛ́ m̀ dyéɛ ma kà, ké mɛɛ-ɖɛ̀ɔ̀ ɓo-pìɔ̌ ɓěɔ̀ kèɛ̀ ɓìɛ̀-dyùà ɓěɔ̀ wáká ɖò mɔ̀ ma kà mɛ, ké wáká ɖò mɔ̀ ma kà nɛɛ̀-kpà kɛɛ, kǎà kã́á-ɓòɖòɔ̀ hĩinyɛ nììnɔ̀ mu mú geìn. Kɛɛ ɔ mu nɛɛ̀-kpà nììn kpé ɖò ɓéɖéìn kà m̀ nyuà nɛɛ̀-kpà kè mɛ caìn-caìnɔ̀ dyéɛ kɛ.

⁴² Kà ɓɛ́ ɓìɛ̀-dyùà ɓěɔ̀ ɖíɛ́ ɓě mɔ̀à nɛɛ̀-kpà, ké ɖíɛ́ ɓě mɔ̀à mɛ kɛɛ, kǎà kã́á-ɓòɖòɔ̀ mu nììn. Wáká ɖò mu kùmùùn, ɓɛ́ wáká ɖò ké mùɛ̀-mùɛ̀ nì.

⁴³ Ké kà m̀ dyéà nɛɛ̀-kpà caìn mɛɔ̀ kɛɛ, kǎà nyɔ ɓěɔ̀ mu caìn mɔ́ùn dyììn ɖé dyi-kpɔ̃ìn-kpɔ̃ìn mú, kɛɛ wa se gbo kpɔ̃ǐn mu fɔɔ cá kà nɛɛ̀-kpà kè mɛ ní kpɔ̃ìn kà gboɛ.

⁴⁴ Ɓó kã́á ɓěa nììn ɓóɖó-wuɖuí-kɔ̃̀-tìɔ̀ ɓaɖaa, Gèɖèpɔ́ɔ̀ nìà ɖé dyɔún wɛ̃ɛ mu kã́á-ɓòɖò ɓɛ́ nyɔ ɖò se dyi gbaà ɓɛ́ìn nyɛɛ dyi dèìn. Ké nyɔ ɖò se kã́á-ɓòɖòɔ̀ toún ɖuɛ́ mu. Ɔ mu kã́á-ɓòɖò tɔ̀ɔ̀ séín ɓěɔ̀ dyi wàìn, ɓɛ́ wa jè ké dyi zi, ɓɛ́ ɔ mɔ̀ùn ké ɓó sè kánáá pū.

⁴⁵ Sɔ́ɔ́-kpò vɛ̀nɛ̀ ɓɛ́ ɔ cɛ̃̀à ɖé toɖoɔ̀ dyéɖéí, ɓɛ́ nyɔ ɖòɛ̀ sɔ̃ seà ɓó cɛ̃, ké ɔ wàìn kà nɛɛ̀-kpàɔ̀ kè bàɖàsǐɔ̀ kè mɛɔ̀ kè séɓàɖàɔ̀ ɔ kè góòɔ̀ dyiɛɛ mɔ̀ kã́á-ɓòɖò ɓɛ́ Gèɖèpɔ́ɔ̀ muà dyi dèìn nyɛ. Gèɖèpɔ́ɔ̀ vɛ̀nɛ̀ ɖǎ m̀ ɖɛ mu kpáùn ɖé dyúa kɛɛ dyí tɛ̀mɛ̀ìn. Nì dya-dyèɖèɔ̀ nìàǒ wɛ̀, ké ɔ xwíníín-zà-zàɔ̀ mɔ̀ jǎà.”

Kã́áɔ̀ nyí Dànyá nyíí-ɖɛ̀

⁴⁶ Ti ɓɛ́ Dànyá ɖǎ ma kã́áɔ̀ dya-dyèɖèɔ̀ xwíníín zàa, púɛɛ, Kã́á Nɛ̀ɓùkànɛ́zà taɓa ma dú hwuɖu ɓó Dànyá dyúa. Ké ɔ tò ma wuɖu, ɓɛ́ wa ké ma sáa-zàìn-ɖɛ̀ nyu, ɓɛ́ wa ké ma nyɔ́ún-nɔ̀mɔ̀-ɖɛ̀ fɔ̃ ɓó Dànyá bìì.

⁴⁷ Hwɛ̀ ké kã́áɔ̀ cɛ̃ɛ ma Dànyá gbo, ké ɔ ɖá, “Nì Gèɖèpɔ́ɔ̀ kɔ̃̀ gèɖèpɔ́ɔ̀ séín wuɖuí jǎà cá, ké ɔ kɔ̃̀ kã́á séín wuɖuí. Ké ɔ mɔ̀ vǐè-ɖɛ̀ ɓě píé-dyà-nyɔ̀, sepóɛɖé ɔ mɔ̀ nyɔ nyuɛ ké m̀ ɖǎà vǐè-ɖɛ̀ nìà kɛ píé dyà kɛ̀.”

⁴⁸ Ti ɓɛ́ ɖɛ ɓěɛ̀ ɖǎ ma ná nìɛɛ, kã́áɔ̀ nyí ma Dànyá dya-dè-dè kè nyíí-ɖɛ̀ nɔ̀mɔ̀ kɔ̃in ɓáún-ɓáún. Ɔ nyu ma ɔ Báɓèɖɔ́ùn-ɓòɖò gànáɔ̀ wuɖuí-kɔ̃̀-nyɔ̀ mú, ké ɔ nyu ma Dànyá hwòɖǒ-fɔ̀nɔ̀-nyɔ̀ séín ɓěɔ̀ kɔ̃in-nyɔ̀ mú.

⁴⁹ Ké Dànyá zɔ̀ìn ma kã́áɔ̀, ké kã́áɔ̀ nyu ma Dànyá ɓǎto tã ɓě mɔ̀à Síáwàɖà kè Mísìà ɔ kè Àbɛ́nɛ́gò kɛɛ kũ̀à ɓě ɓá Báɓèɖɔ́ùn-ɓòɖòɔ̀ dyíɛɛ kɔ̃in-gmɔìn-nyɔ̀ ɓě mú, kɛɛ Dànyá mìɔùn nì ma ɖé kã́áɔ̀ gbǒɔ̀ dya.