Dànyá 12 - Ɓǎsɔ́ɔ̀ Báɓòɔ̀

Ɖɛ séínɛ̀ mánáín-hwɛ̀-tìɔ̀

¹ “Ɓó tia ɓaɖaa, Makɔ́ mɔ̀à ínjà vɛ̀nɛ̀ ɓɛ́ ɔ mɔ̀à nì nyɔ ɓěɔ̀ dyí-gmɔ̀-nyɔ̀ɔ̀ kɛɛ mu xwáɖáún wóɖóùn. Tia mu gǎ-tì vɛ̀nɛ̀ ɖò jǔùn. Gǎ ku wɔ̃ nì náa ɖò séè ná kpá ɖò sɔ̀ìn ɓó ti ɓɛ́ ɓóɖó-dù séín ɖǎǒ gbɔ dèɛ, ɓɛ́ ɔ ké tiɛ̀ dyɛ̀ìn nyɛ. Kɛɛ ɓó tia ɓaɖaa, nì nyɔ séín kɔ̃̀ nyɛ́nɛ́ ɓɛ́ wa mu ɖé Gèɖèpɔ́ɔ̀ céè-ɖɛ̀ɔ̀ mú dyéìn nyɛɛ, wa mu póùn.

² Nyɔ kúɖúú ɓě ɓɛ́ wa nì nyíɔún ɖé ɓóɖóɔ̀ hwuɖuɛɛ, wa mu dyí sɔ̀ùn. Ɖíɛ́ ɓě mu sè-ná-sèɛ̀ fɛ̀ɛ̀ mú muùn, ké ɖíɛ́ ɓě mu pá kɔ̃̀ mú ɓɛ́ dɛ̃ kè sè-ná-sèɛ̀ nyɔ-dyɔ́-ɓaɖa-ɓaɖa nìà kɛɛ muùn.

³ Ké nyɔ ɓě ɓɛ́ wa fɔ̀nɔ̀ hwòɖǒɛɛ mu fãùn kà dɛ̀nɛ̀-dyù ɓě nìà ɖé dyɔɔ̀ dyíɛɛ fãà kɛ. Nyɔ ɓě ɓɛ́ wa mu nyɔ ɓáún-ɓáún hwìè sɛ́ɖɛ́ìn dyíɔ̀ xwíníín poùn wɛ̃ɛ, wa mu fãùn kánáá pū kà dɛ̀nɛ̀ mɛ́nɛ́ɛ́ nìà ɖé dyɔɔ̀ dyíɛɛ fãà kɛ.

⁴ “Dànyá, mɔ̀ǔn ɖá ɓɛ́ m̀ ké ɖɛ ɓě céèà nɔ̄ céè-ɖɛ̀ nìà kɛ múɛɛ ɖò píé po. M̀ mɛ kã céè-ɖɛ̀ɔ̀ dyí, ɓɛ́ m̀ kéɛ gbǎìn-ɖɛ̀ɔ̀ ɓó po. Kǎà ɔ mɛ gã̀ tee ɓɛ́ ɖɛ séínɛ̀ mánáín-hwɛ̀-tìɔ̀ ké ɓó nyini. Nyɔ ɓáún-ɓáún mu sɔ̀ dà mu dà nyuùn ɓó waà fɔ̀nɔ̀-hwòɖǒ ké kɔ̃ kpá jè.”

⁵ Hwɛ̀ ké mɔ̄ Dànyá ɖú ma dyéɖé dyií, ké ḿ dyé nyɔ sɔ̃́ ɓó ḿ dyúa dyi nyànàà ɖe. Waà nyɔ dyúáɖò nyànà ní vɛ̀nɛ̀ɔ̀ kpóó hwɔà nɔ̄ ḿ gbo dyíɛɛ kɔ̃, ké dyúáɖò nì ɖé kpóó tɔ̀ɔ̀ kɔ̃.

⁶ Ké waà nyɔ dyúáɖò cɛ̃ɛ ma ínjà ɓɛ́ ɔ po ma kà ɖénì-ɖɔ̀ɔ̀ mú, ɓɛ́ ɔ nìà ɓó ní vɛ̀nɛ̀ɔ̀ kɔ̃in nyɛɛ gbo, ké ɔ ɖá, “Ti jĩ̀ xwɛ̌ mu ziìn hwɛ̀ ɓɛ́ nyɔ dĩin-dɔ̃ kɔ̃-kpɔ̃̀ìn-ɖɛ̀ ɓěɛ̀ ké kpá kɛ́?”

⁷ Ké ínjà nìà níɔ̀ kɔ̃in nyɛɛ tò ma ɔ ɖiaùn-sɔ̃̀ɔ̀ kè ɔ kunuà-sɔ̃̀ɔ̀ dyɔún, ké ḿ wɔ̃́ɔ, ké ɔ gboò ma nyɔ ɓɛ́ ɔ cĩ́à kánáá pūɛɛ dyí, ké ɔ ɖá, “Ɔ mu ti goun dyí ɖúùn. Ɔ mɔ̀ zɔ̃ tã kè ɓɛ́ìn-hwìɛ̀. Ti ɓɛ́ Gèɖèpɔ́ɔ̀ nyɔ ɓěɔ̀ kpéɔ̀ ɖǎ dyi wɛ̀ìn hwɛ̀ kɛɛ, nìí, ɖɛ séín ɓěa ɖǎ kpáa hwɛ̀.”

⁸ Ḿ wɔ̃́ ma wuɖuɔ̀ ní, kɛɛ ḿ seɛ ma múin wɔ̃́. Ɔ jèɛɛ, ḿ diè ma ɖɛi, ké ḿ ɖá, “Ɓɔ̌ɔ̀, ɖɛ́ ɖɛ séín ɓěɛ̀ mu gbo wóɖóùn wɛ̃́?”

⁹ Ké ínjàɔ̀ jǔ ma ḿ gɔ̃̌, ké ɔ ɖá, “Mu nì ɖɛ, Dànyá, sepóɛɖé wuɖu séín ɓěɔ̀ se kɔ̃̀ wa ké píé kpá. Kǎà ɔ mɛ nì tee, ɓɛ́ ɖɛ séínɛ̀ mánáín-hwɛ̀-tìɔ̀ ké ɓó nyini hwɛ̀.

¹⁰ Gèɖèpɔ́ɔ̀ mu nyɔ ɓáún-ɓáún sɛɛ poùn. Ɔ mu wa mú hwɔùn, ɓɛ́ wa ké se kɛɛ ɖò ɓéɖé. Kɛɛ hwòɖǒ-kɔ̃in-nyìnììn-nyɔ̀ ɓěɔ̀ nììn hwòɖǒ mu kɔ̃in nyìnììn ke kánáá pū. Hwòɖǒ-kɔ̃in-nyìnììn-nyɔ̀ ɓěɔ̀ ɖò se ɖɛ múin wɔ̃́ɔ mu, kɛɛ hwòɖǒ-fɔ̀nɔ̀-nyɔ̀ ɓěɔ̀ mu ɖɛ múin wɔ̃́ùn.

¹¹ “Sɔ̀ìn ɓó ti ɓɛ́ wa ɖǎ wé séínɛ̀ sáa-zà-zàɔ̀ jè dyi zĩ̀ìn nyɛɛ gbo, ké Gèɖèpɔ́ɔ̀ gmaɔ̀ ɖuà-ɖɛ̀ ɓɛ́ ɔ dyàà ɖɛ nyàìn nyɔǔn dyiɛɛ jè dyɛ̀ìn nyɛɛ mu wé táázĩ̀ìn ɖò hɔ̃dɛ̀ɖɛ̀ sɔ̃́ kè kpáɖá-nyɔ hĩinyɛ ɓaɖa-bùè dyí ɖúùn.

¹² Mana nì nyɔ ɓɛ́ ɔ mu ti nìà kɛ fòìn, ké ɔ mu hwòɖǒ kuùn tee ɓɛ́ wé táázĩ̀ìn ɖò hɔ̃dɛ̀ɖɛ̀ tã kè kpáɖá-nyɔ ɓaɖa-bùè sè hm̀m̌ ké ɖé hwɛ̀ɛ kɔ̃.

¹³ “Dànyá, ɓá mɔ̀ùn jè dyíɛɛ, mu nì ɖɛ, ɓɛ́ m̀ ké fòìn, ɓɛ́ ɖɛ séín ɓěa ké mánáín hwɛ̀ hwɛ̀. Nì sɔ̃ mu m̀ mìɔùn kɔ̃ pɛ̃́ìn. Ɔ ɖǎ ná nìǐn, ti ɓɛ́ tiɔ̀ mu ɖé hwɛ̀ìn nyɛɛ, nìí, nì mu dyí sɔ̀ùn ɖe, ɓɛ́ Gèɖèpɔ́ɔ̀ ké ɖɛ ké nììn kɔ̃̀ɔ̀-ɖɛ̀ jǔ kánáá pūɛɛ m̀ nyí.”