Dànyá 11 - Ɓǎsɔ́ɔ̀ Báɓòɔ̀

¹ Ɖé Dìwáɖádyà mɔ̀à Míì-nyɔ̀ɔ̀ kɛɛ nììn ɓóɖó-wuɖuí-kɔ̃̀-zɔ̃̀ɔ̀ kĩ́ín-kĩ́ín nììnɔ̀ xwíníín nyɛɛ, ḿ nyànà ma dyi kóɖó-kóɖó, ɓɛ́ ḿ ké ma Makɔ́ dyí gmɔ̀, ɔ kè ɓɛ́ ḿ ké ɔ gbo kpá.

Íjè-ɓòɖòɔ̀ kè Síwíɖíà-ɓòɖòɔ̀

² “Ɖɛ ḿ nìà m̀ gbo cɛ̃iń dyiɛń nyɛɛ mɔ̀ jǎà. Gmɔ̀ nɔ̄, kã́á-dù kò-kò tã ɓě mu Pɔ́sìà-ɓòɖòɔ̀ wuɖuí kɔ̃̀ùn ɖe. Sɔ̀ìn ɓóɛɛ, ɔ hĩinyɛ nììn mu ɓó dyí kɔùn. Ɔ mɔ̀ùn mu bãùn mìɔ ɓɛ́ ɔ ké kã́á tɔ̀ɔ̀ séín ɓěɔ̀ dyí zi. Ti ɓɛ́ ɔ mu kpé ɓéɖéìn dyììn ɖé ɔ kɔ́mɔ́ɔ̀ múɛɛ, nìí, ɔ mu nyɔǔn séín vã kɔ̃ poùn, ɓɛ́ wa ké Gíɖíì-ɓòɖòɔ̀ gbo vɔ̃.

³ “Ɔ ɖǎ ná nìǐn, nìí, Gíɖíì-kã̀ǎ ɖò ɓɛ́ ɔ kɔ̃̀ kpé ɓúá dyí mìɔ ɖeɛɛ mu ɓóɖó ɓěɛ̀ wuɖuí kɔ̃̀ùn ɖé kpé vɛ̀nɛ̀ mú, ké ɔ mu ɖɛ kã̀ìn séín ɔ hwòɖǒ mɔ́ nyuɛ dyiɛɛ nyuùn.

⁴ Kɛɛ ti ɓɛ́ ɔ nììn kã́á-ɓòɖòɔ̀ ɖǎ dúi kuɛɛ, nìí, wa mu ɔ kã́á-ɓòɖòɔ̀ xwa zàùn, ɓɛ́ wa kéɛ mú ge dú hĩinyɛ. Kã́á-ɓòɖòɔ̀ se ɔ xwíníín-dyù ɓě xwa sèɛ̌ mu, sepóɛɖé wa muɛ ɔ xwa zàùn, ɓɛ́ wa kéɛ nyɔ kà kò ɖò ɓě nyí. Kɛɛ wa nììn kpéɔ̀ se ɔ nììnɔ̀ dyɛ̀ǐn mu.

⁵ “Ɓó tia ɓaɖaa, Íjè-kã̀ǎɔ̀ mu kpé ɓéɖéìn mìɔ. Kɛɛ ɔ sójà-nàìn-nyɔ̀ ɓěɔ̀ ɖò mu kpé ɓéɖéìn, ɓɛ́ ɔ ké kã́áɔ̀ dyí zi, ké ɔ mɔ̀ nyɔ mu Síwíɖíà-ɓòɖòɔ̀ wuɖuí kɔ̃̀ùn.

⁶ Ti ɓɛ́ zɔ̃ gbɛ̀ǐ-gbɛ̀ǐ ɖǎ ziɛɛ, nìí, Íjè-ɓòɖòɔ̀ kã́áɔ̀ kè Síwíɖíà-ɓòɖòɔ̀ kã́áɔ̀ mu sɔ̃ ní gbo poìn. Íjè-kã̀ǎɔ̀ mu ɔ dyú-mààɔ̀ Síwíɖíà-kã̀ǎɔ̀ nyíìn, ɓɛ́ ɔ ké ɔ gmàà jǔ. Kɛɛ waà sɔ̃-ní-gbo-poìn-poìnɔ̀ se hwèɖèɛ̌n mu, ké wa mu màaɔ̀ kè ɔ dyú-ɓǎɔ̀ kè dyú ɓɛ́ wa wóɖóìn nyɛ ɔ kè màaɔ̀ gbo-nì-nyɔ̀ ɓěɔ̀ ɖáɓáùn.

⁷ “Kɛɛ ɔ se hwèɖèɛ̌n mu, ké màaɔ̀ gbǒ-xwíníín-nyɔ̀ ɓěɔ̀ ɖò mu kã́á jǔùn. Ké ɔ mu Síwíɖíà-kã̀ǎɔ̀ kè ɔ sójà ɓěɔ̀ gbo vɔ̃ùn, ké ɔ mu ɖé waà to-pèɖèìn-naínɔ̀ dyáùn, ɓɛ́ ɔ ké wa toún ɖu.

⁸ Ɔ mu waà kũùn-kpò-gèɖèpɔ́ɔ̀ ɓěɔ̀ kpaùn, ké ɔ mu waà séɓàɖà kè góò-ɖɛ̀ kpa ɖɛ ɓěɔ̀ kpaùn ɖekè. Ɔ mu ɖɛ ɓěa ɖé Íjè-ɓòɖòɔ̀ kɔ̃ kpaùn. Ɔ ɖǎ ná nìǐn, ɔ mu Síwíɖíà-kã̀ǎɔ̀ dyi táàùn ɓó zɔ̃ gbɛ̀ǐ-gbɛ̀ǐ xwíníín.

⁹ Sɔ̀ìn ɓóɛ gboɛɛ ní, nìí, Síwíɖíà-kã̀ǎɔ̀ mu Íjè-kã̀ǎɔ̀ to kɔ̃ kpaùn ɓó ti wè mú. Kɛɛ ɔ se hwèɖèɛ̌n mu, ké toɔ̀ mu Síwíɖíà-kã̀ǎɔ̀ nyìnììn, ké ɔ mu ɖe kɔ́ìn, ɓɛ́ ɔ ké ɔ ɓíɖí ɖe mu.

¹⁰ “Ɔ ɖǎ ná nìǐn, Síwíɖíà-kã̀ǎɔ̀ dyú-gàà ɓě mu naɓaàùn ɓó to jè. Wa mu sójà kúɖúú dyí poìn, ɓɛ́ wa ké Íjè-kã̀ǎɔ̀ to kɔ̃ kpa. Wa mu dà séín dyi dyíìn kà dyíí-nì nìà kɛ. Wa mu toɔ̀ kpaùn tee, ɓɛ́ wa ké ɖé waà mú-nyɛ́-nyɔ̀ ɓěɔ̀ to-pèɖèìn-naínɔ̀ nyini.

¹¹ Ké Íjè-kã̀ǎɔ̀ mu ɔ nììn sójà ɓěɔ̀ dyí poìn ɖé dyoɖo mú, ɓɛ́ ɔ ké Síwíɖíà-kã̀ǎɔ̀ wɔ̃ mu. Síwíɖíà-kã̀ǎɔ̀ mu gana dyàùn dyɛo, kɛɛ Íjè-kã̀ǎɔ̀ mu ɔ toún ɖuùn.

¹² Ti ɓɛ́ Íjè-kã̀ǎɔ̀ ɖǎ to ɖu, ké ɔ ɖǎ toɛ̀-kpɔ̃-nyɔ̀ ɓěɔ̀ ɔ ɓíɖí kpaa, nìí, ɔ mu ɔ mìɔùn dyí ɓúáìn ɓó sójà kúɖúú ɔ ɖǎà ɖáɓá kɛɛ jè. Kɛɛ ɔ to-ɖu-kpèɔ̀ se ɔ xwa sèɛ̌ mu.

¹³ “Ɔ ɖǎ ná nìǐn, Síwíɖíà-kã̀ǎɔ̀ mu sójà kúɖúú dyí poìn ɖe. Wa mu dyí vòùn mìɔ ɓɛ́ wa ké nyɔ kĩ́ín-kĩ́ínɔ̀ dyí zi. Ti ɓɛ́ zɔ̃ gbɛ̀ǐ-gbɛ̀ǐ ɖǎ ziɛɛ ní, nìí, ɔ kè ɔ sójà kúɖúú ɓɛ́ wa ɓéɖéà vɔ̃̀ìn-ɖɛ̀ kúɖúúɛɛ mu Íjè-kã̀ǎɔ̀ to kɔ̃ kpaùn ɖe.

¹⁴ “Ɓó tia ɓaɖaa, nyɔ ɓáún-ɓáún mu Íjè-kã̀ǎɔ̀ kɛ́ɛ́ dyí poùn, ké wa mu ɔ gbo vɔ̃ùn. To-mú-ɖɛ̀ɓɛ̀-nyɔ̀ ɓě nì ɖé m̀ mìɔùn nììn nyɔ ɓěɔ̀ hwìɛ̀ kɛɛ mu kɛ́ɛ́ poùn ɓó dyí-tɛ̀mɛ̀ìn-ɖɛ̀ wa dyéɛɛ jè, ké wa mu Íjè-kã̀ǎɔ̀ to kɔ̃ kpaùn ɖekè. Kɛɛ toɔ̀ mu wa ɖuùn.

¹⁵ Sɔ̀ìn ɓóɛ gboɛɛ, Síwíɖíà-kã̀ǎɔ̀ mu dyiìn, ɓɛ́ ɔ kè ɔ sójà ɓěɔ̀ ké Íjè-ɓòɖòɔ̀ toún-pèɖèìn-hwɔ̀ɖɔ̀ ɓěɔ̀ ɖò wɔ̃ gbǎìn, ɓɛ́ wa keɛ dyí ɖú. Íjè-ɓòɖòɔ̀ se wa dyí ɓɛ́ǐn mu, hwɛ̀ ḿ po níiń, gàa-zà-nyɔ̀ ɓě nì waà sójà ɓěɔ̀ hwìɛ̀ kɛɛ se wa dyúa dyi nyànàà ɓɛ́ǐn mu.

¹⁶ Síwíɖíà-sòjà ɓě ɓɛ́ wa dyàà Íjè-ɓòɖòɔ̀ to kɔ̃ɛɛ mu ɖɛ ɓě ɓɛ́ wa hwòɖǒ mɔ́ nyuɛ dyiɛɛ nyuùn. Nyɔ ɖò se Síwíɖíà-sòjà ɓěɔ̀ dyúa dyi nyànàà ɓɛ́ǐn mu. Síwíɖíà-kã̀ǎɔ̀ mu ɔ mìɔùn dyi kùìn ɖé Nyɛ́nɛ́ín-Ɖáìn-Ɓòɖòɔ̀ mú, ké ɔ mu kpé ɓéɖéìn ɓɛ́ ɔ kéɛ mú gbɔɔ̀, ɔ dyiɛ náa nyuɛ mɔ́ ní.

¹⁷ “Sɔ̀ìn ɓóɛ gboɛɛ, Síwíɖíà-kã̀ǎɔ̀ muɛ dyí sɔ́ùn, ɓɛ́ ɔ ké Íjè-kã̀ǎɔ̀ toún ɖu. Ɔ kè Íjè-kã̀ǎɔ̀ mu wuɖu ɓíín poùn, ɓɛ́ Síwíɖíà-kã̀ǎɔ̀ ké ɔ dyú-màà ɓěɔ̀ ɖò Íjè-kã̀ǎɔ̀ nyí, ɓɛ́ ɔ ké ɔ gmàà jǔ. Ké Síwíɖíà-kã̀ǎɔ̀ mu ɔ kã́á-ɓòɖòɔ̀ nììn kpé séínɔ̀ dyàùn, kɛɛ ɖɛ ɓɛ́ ɔ sɔ́à dyíɛɛ se ná kpáa mu.

¹⁸ Ɔ ɖǎ ná nìǐn, nìí, Síwíɖíà-kã̀ǎɔ̀ mu ɓóɖó ɓě nìà dyóóɔ̀ wĩin nyɛɛ gbo dú pòìn, ɓɛ́ ɔ ké wa ɓáún-ɓáún dyí ɖú. Kɛɛ ɓóɖó-dù kà kò ɖòɛ̀ sójà ɓěɔ̀ wuɖuí-kɔ̃̀-nyɔ̀ ɖò mu ɔ ɓɔ́ɖɔ́-ɓɔ́ɖɔ́ɔ̀ ɓíɖíi dyi poùn, ɓɛ́ ɔ ké ɖɛ kɔ̃̀ jè ɔ ɓɔ́ɖɔ́à kɛɛ ɔ mìɔùn kɔ̃ dyà.

¹⁹ Ɔ ɖǎ ná nìǐn, Síwíɖíà-kã̀ǎɔ̀ mu xwa cɛ́ɛ̀ìn, ɓɛ́ ɔ ké ɔ mìɔùn nììn to-pèɖèìn-naín ɓě nìà ɖé ɔ ɓíɖí-ɓòɖòɔ̀ kɔ̃ɛɛ mú mu. Kɛɛ ɔ mu gbǒùn, ɓɛ́ ɔ ké ɓuɖu, ké nyɔ ɖò se ɔ dyéɛ mu ɖe fɔɔ.

²⁰ “Sɔ̀ìn ɓóɛ gboɛɛ, nyɔ muà ɓó ɔ ɖeín dyí kɔùn wɛ̃ɛ mu nyɔ ɖò tòùn, ɓɛ́ ɔ ké nyɔ ɓěɔ̀ dyi pĩ́à, ɓɛ́ wa ké tácì pɛ́ɛ̀, ɓɛ́ tácì-wìɖìɔ̀ ké ɔ kã́á-ɓòɖòɔ̀ bã̀ìn ɖe mìɔ. Kɛɛ wɛ̃́ɛ́ kɛɛ, zɔ̃ gbɛ̀ǐ-gbɛ̀ǐ dyi zi ní, wa mu ɔ mɔ̀ùn ɖáɓáùn. Ɔ ɖáɓá-ɖáɓáɔ̀ se ɖé dyoɖo mú mɔɔ to gbo jǔɛ mu.

²¹ “Ɔ ɖǎ ɓó sɔ̀ ní, nyɔ mu ɓó ɔ ɖeín dyí kɔùn wɛ̃ɛ mɔ̀ hwòɖǒ-kɔ̃in-nyìnììn-kã̀ǎ ɖò. Wa se ɔ kã́á nììn dya-dè-dè ɖò nyíɛ mu. Kà ɔ mu kã́á-kũ̀àɔ̀ dyéɛ nyuùn wɛ̃ɛ mɔ̀, ɔ mu nyɔ ɓěɔ̀ kɔ̃ún gèìn, ɓɛ́ ɔ ké kũ̀àɔ̀ dyí ɖú gbá-gbá-kà.

²² Nyɔ mɔ̀ nyɔ mu ɔ gbo vɔ̃ùn wɛ̃ɛ, kɛbì ɔ mɛ mɔ̀ Gèɖèpɔ́ɔ̀ mìɔùn nììn sáa-zà-nyɔ̀ vɛ̀nɛ̀ɔ̀ kɛɛ, ɔ mu ɓó nyɔɔ̀ jè dyi sámáùn.

²³ Ɔ kɔ̃̀ ɓóɖó-dù tííwè wuɖuí dyɛo, kɛɛ ɔ kè ɓóɖó-dù kà kò ɖò ɓě mu wuɖu ɓíín poùn, ké dyììn ɖéɛ múɛɛ, ɔ mu nyɔ ɓáún-ɓáún cáùn, ké ɔ kpéɔ̀ mu kɔ̃ kpáùn kánáá pū.

²⁴ Ɔ mu nyɔ ɓěɔ̀ kɔ̃ún gèìn, ké ɔ mu ɓóɖóɔ̀ gbɛ̌ɛ̀ bã-bã ɓě dyí ɖúùn, ké ɔ mu ɖɛ ɔ ɓǎ nììn ɓǎ ɓěɔ̀ séèǒ nyu ɖòɛɛ nyuùn. Ɔ ɖǎ ná nìǐn, ɔ mu to-gbo-zà-ɖɛ̀ ɓěɔ̀ nyɔ ɓě síà ɔ ɖeín nyɛɛ múin geìn. Ɔ mu to-pèɖèìn-naín ɓě ɓɛ́ ɔ ké to kɔ̃ poɛɛ jè dyí sɔ́ùn, kɛɛ ɔ tiɔ̀ mu ɓoún xwã́ùn mìɔ.

²⁵ “Ɔ mu sójà kúɖúú dyí poìn ɓɔ́ɖɔ́-kà, ɓɛ́ ɔ ké Íjè-kã̀ǎɔ̀ to kɔ̃ kpa, ké Íjè-kã̀ǎɔ̀ mu ɔ jè ti dyéìn dyììn ɖé gana-sòjà kúɖúú dyà-dyà mú. Kɛɛ sɔ́-sɔ́ ɓɛ́ wa ɖǎ nyu ɓó Íjè-kã̀ǎɔ̀ bììɛ jèɛɛ, ɔ se Síwíɖíà-kã̀ǎɔ̀ dyúa dyi nyànàà ɓɛ́ǐn mu.

²⁶ Nyɔ ɓě ɓɛ́ wa kè Íjè-kã̀ǎɔ̀ ɖi ɖɛ ɓó dà dyúáɖòɛɛ mu ɔ mú gbɔɔ̀ mɔ́ùn. Wa mu ɔ sójà ɓěɔ̀ ɓáún-ɓáún ɖáɓáùn, ké wa mu ɔ to-vɔ̃-nyɔ̀ séín ɓěɔ̀ ɓó dyi sámáùn.

²⁷ Ɔ ɖǎ ná nìǐn, kã́á sɔ̃́ ɓěɛ̀ mu téɓèɖè dyúáɖò gbɔ dyi kòùn. Wa mu ɖɛ gbà dyí sɔ́ùn, ɓɛ́ wa ké se wĩin tɔ́mɔ́ìn tɔ̀mɔ̀ìn, kɛɛ ɖɛa se wa kpáná ɖò dyí nyuɛ́ mu, sepóɛɖé ɖɛ séín ɓěɔ̀ mánáín-hwɛ̀-tì ɓɛ́ Gèɖèpɔ́ɔ̀ ɖǎ dyi dèɛɛ mu dyiìn wɛ̃́ɛ́ pū.

²⁸ Ɔ ɖǎ ná nìǐn, Síwíɖíà-kã̀ǎɔ̀ mu to-gbo-zà-ɖɛ̀ kúɖúú ɓěɔ̀ dyí ɖúùn, ɓɛ́ ɔ ké ɔ ɓíɖí-ɓòɖòɔ̀ kɔ̃ ɖe kɔ́ìn. Ti ɔ muà ɔ ɓíɖí muɛń nììn nyɛɛ, ɔ hwòɖǒ mu Gèɖèpɔ́ɔ̀ ɓiè jè dyi zĩ̀ɛ̀n mɔ́ùn, ké ɔ mu ɖɛ ɔ hwòɖǒ mɔ́ nyuɛ dyiɛɛ nyuùn, hwɛ̀ ɔ ké ɔ ɓíɖí mu.

²⁹ “Ti ɓɛ́ Gèɖèpɔ́ɔ̀ ɖǎà dyi dèɛɛ dyi ɓó nyini ní, ɔ mu Íjè-kã̀ǎɔ̀ to kɔ̃ kpaùn ɖe. Kɛɛ ɓó tiɛ̀ múɛɛ, ɖɛ ɓě mu gbo zĩàìn ɓɛ́ ɔ ké kà ɔ nyu ma nìɛ̀ kĩ́ín nyɛɛ dyí zi.

³⁰ Ɓó tia ɓaɖaa, Wóɖóùn-nyɔ̀ ɓěɔ̀ mu méè mú dyììn, ɓɛ́ wa ké Síwíɖíà-kã̀ǎɔ̀ gbo vɔ̃, ké fã̀à mu ɔ nyuùn. “Ɔ ɖǎ ná nìǐn, nìí, ɔ mu ɖe kɔ́ìn ɖé dyoɖo mú, ɓɛ́ ɔ ké Gèɖèpɔ́ɔ̀ ɓiè jè dyi zĩ̀ìn. Ɔ hwòɖǒ mu nyɔ ɓě ɓɛ́ wa táà ɓiè-ɓièɔ̀ jè dyiɛɛ múin dèìn.

³¹ Ɔ sójà ɓěɔ̀ mu to poùn, ɓɛ́ wa ké ɖɛ ɓě ɓá ɓiè-ɓiè jè dyí nìà ɖé Gèɖèpɔ́ɔ̀ gbǒɔ̀ múɛɛ zùǔn zàìn. Wa mu wé séínɛ̀ sáa-zà-zàɔ̀ ɓɔ́í poùn. Ɔ ɖǎ ná nìǐn, wa mu Gèɖèpɔ́ɔ̀ gmaɔ̀ ɖuà-ɖɛ̀ ɓɛ́ ɔ dyàà ɖɛ nyàìn nyɔǔn dyiɛɛ dyí ɖúùn, ɓɛ́ wa kéɛ ɖéɛ Gèɖèpɔ́ɔ̀ gbǒɔ̀ mú dyi nyànàìn.

³² Síwíɖíà-kã̀ǎɔ̀ mu nyɔ ɓě ɓɛ́ wa seà Gèɖèpɔ́ɔ̀ ɓiè jèɔ̀ ɖɛ ɖáa wuɖu fóɖóún mú cáìn. Kɛɛ nyɔ ɓě ɓɛ́ wa dyuòà waà Gèɖèpɔ́ɔ̀ dyíɛɛ mu ɔ gbo vɔ̃ùn kóɖó-kóɖó.

³³ Nyɔ ɓě ɓɛ́ wa fɔ̀nɔ̀ hwòɖǒɛɛ mu nyɔ ɓáún-ɓáún ɖɛ tɛ̀mɛ̀ìn. Kɛɛ ɓó ti wè xwíníín nyɛɛ, wa mu wa ɖíɛ́ ɓě ɖáɓáùn ɖé to gbo, ké wa mu ɖíɛ́ ɓě fɔ̃ùn, ké wa mu ɖíɛ́ ɓě gǐì mú nyuùn, ké wa mu ɖíɛ́ ɓě bũ̌ dyíɖíìn.

³⁴ Ti ɓɛ́ nyɔ-ɖáɓá-ɖáɓáɔ̀ nì dyúa muɛń keɛɛ, Gèɖèpɔ́ɔ̀ nyɔ ɓěɔ̀ mu gbo-kpá-kpá tííwè dyéìn, ké nyɔ ɓáún-ɓáún mu Gèɖèpɔ́ɔ̀ nììn nyɔ ɓěɔ̀ hwìɛ̀ kpáùn ɓó ɖɛ wa ké dyéɛɛ jè.

³⁵ Hwòɖǒ-fɔ̀nɔ̀-nyɔ̀ ɓěɔ̀ ɖíɛ́ ɓě mu mɛ́ìn. Ɖɛ nìà kɛ hwɔìn wa sɛɛ-po-po, ɓɛ́ wa ké se kɛɛ ɖò ɓéɖé, ɓɛ́ ɖɛ séínɛ̀ mánáín-hwɛ̀-tìɔ̀ ké ɓó nyini. Ɔ mɔ̀ ti ɓɛ́ Gèɖèpɔ́ɔ̀ ɖǎà dyi dèɛ.

³⁶ “Síwíɖíà-kã̀ǎɔ̀ mu ɖɛ ɓě ɓɛ́ ɔ hwòɖǒ mɔ́ nyuɛ dyiɛɛ nyuùn. Ɔ mu ɔ mìɔùn dyií ɖúùn, ɓɛ́ ɔ ké ɔ mìɔùn dya dè ɓó gèɖèpɔ́ɔ̀ séín kɔ̃in. Ké ɔ mu ɖɛ ɓě ɓɛ́ nyɔ ɖò séè wɔ̃́ ɖòɛɛ Gèɖèpɔ́ɔ̀ nìà gèɖèpɔ́ɔ̀ séín kɔ̃in nyɛɛ kɔ̃ún cɛ̃ìn. Ɔ mu ɖɛ nìà kɛ nyuɛń dyi gã̀ùn tee, ɓɛ́ ti ɓɛ́ Gèɖèpɔ́ɔ̀ ɖǎ dyi dè ɓɛ́ ɔ ké ɔ gǎ kɔ̃ tòɛɛ ké ɓó nyini hwɛ̀. Ɖɛ ɓɛ́ Gèɖèpɔ́ɔ̀ ɖǎ dyi dèɛɛ ɓéɖé ɔ ké kpá.

³⁷ Ɔ se gèɖèpɔ́ɔ̀ ɓě ɓɛ́ ɔ ɓǎ nììn ɓǎ ɓěɔ̀ ɓiè ma kɛɛ ti ɓéɖéɛ mu, hwɛ̀ ḿ po níiń, gèɖèpɔ́ɔ̀ nyɔ ɓɛ́ màa ɓě ɖɛ̀ɓɛ̀à múɛ. Ɔ se gèɖèpɔ́ɔ̀ ɖòɛ̀ ti ɓéɖéɛ mu fɔɔ cá, kɛɛ ɔ mu ɔ mìɔùn dyií ɖúùn ɓó wa séín kɔ̃in.

³⁸ Kɛɛ wɛ̃́ɛ́ kɛɛ, ɔ mu to-pèɖèìn-naín ɓě nììn gèɖèpɔ́ɔ̀ dya dèìn. Ɔ mɔ̀ gèɖèpɔ́ɔ̀ ɓɛ́ ɔ ɓǎ nììn ɓǎ ɓěɔ̀ se ma dyí dyuòɛ. Ɔ muɛ dya dèìn dyììn ɖé séɓàɖà kè góò kè sɔ́ɔ́ kpa ɖɛ ɔ kè nyíí-ɖɛ̀ kpa wíɖí ɓáún-ɓáún wɛ̃ɛ tò-tò mú.

³⁹ Dyììn ɖé ɓóɖó-dù kà kò ɖòɛ̀ gèɖèpɔ́ɔ̀ gbo-kpá-kpá múɛɛ, ɔ mu to-pèɖèìn-naín kui-kui ɓě to kɔ̃ kpaùn, ké ɔ mu nyɔ séín ɓɛ́ wa mu ɔ jè dyi kpɔ̃ùn wɛ̃ɛ dya dèìn. Ɔ mu wa nyɔ ɓáún-ɓáún wuɖuí-kɔ̃̀-nyɔ̀ mú nyuùn, ké ɔ mu pá ɓě dyi cɛ̃ìn, ɓɛ́ ɔ kéɛ wa múin geìn.

⁴⁰ “Ɖɛ séínɛ̀ mánáín-hwɛ̀-tìɔ̀ ɓaɖaa, Íjè-kã̀ǎɔ̀ mu Síwíɖíà-kã̀ǎɔ̀ to kɔ̃ kpaùn ɖe. Ké Síwíɖíà-kã̀ǎɔ̀ mu ɔ gbo vɔ̃ùn ɖé ɔ kpé séín mú. Ɔ mu hwíì-sǒ ɓě kè sǒ ɓě ɔ kè méè ɓáún-ɓáún vɔ̃̀ìn. Ɔ mu ɓóɖó ɓáún-ɓáún kɔ̃in ɓáìn kà dyíí-nì ɓáìn kà ɖɛ ɖò kɔ̃in nyɛ.

⁴¹ Ké ɔ mu Nyɛ́nɛ́ín-Ɖáìn-Ɓòɖòɔ̀ kɔ̃in ɓáìn ɖekè. Ɔ mu ɓóɖó-dù ɓáún-ɓáún toún ɖuùn, kɛɛ Íɖɔ̀ùn-ɓòɖòɔ̀ kè Móà-ɓòɖòɔ̀ ɔ kè nyɔ vɛ̀nɛ̀ ɓě nìà ɖé Ámɔ̀-ɓòɖòɔ̀ kɔ̃ɛɛ mu ɔ xwaún póùn.

⁴² Ɔ mu ɓóɖó ɓáún-ɓáún kɔ̃in ɓáìn, ké Íjè-ɓòɖòɔ̀ se ɔ xwaún póɛ mu ɖekè.

⁴³ Ɔ mu Íjè-ɓòɖòɔ̀ góò kè séɓàɖà ɔ kè ɔ kɔ́mɔ́-ɖɛ̀ tɔ̀ɔ̀ séín dyí ɖúùn. Ké ɔ mu Ɖéɓìà-ɓòɖòɔ̀ kè Kúsì-ɓòɖòɔ̀ toún ɖuùn ɖekè.

⁴⁴ Kɛɛ bɔ̃̌ ɓě sɔ̀ ɖé dyóɖó-xwáɖáún-wóɖóìn-naínɔ̀ kè ɖé xwía kɛɛ mu ɔ fã̀àǔn poùn, ké ɔ mu to kpaùn ɖé dyoɖo-hwòɖò vɛ̀nɛ̀ mú, ɓɛ́ ɔ ké nyɔ ɓáún-ɓáún mú gbɔɔ̀.

⁴⁵ Ké ɔ mu ɔ jàɖàìn-gbò kpa ɖɛ ɓěɔ̀ dyi nyànàìn ɖé dyóóɔ̀ kè Gèɖèpɔ́ɔ̀ toɖo nɔ̀mɔ̀ dyíinɔ̀ pṹa. Ɖɛ séín ɓěa mu ná kpáùn dyɛo, kɛɛ ɔ nììn tiɔ̀ mu ɖé hwɛ̀ìn wɛ̃́ɛ́ pū, ké nyɔ ɖò se nìɛ̌ mu, ɓɛ́ ɔ ké ɔ gbo kpá.