Dànyá 10 - Ɓǎsɔ́ɔ̀ Báɓòɔ̀

Dyí-tɛ̀mɛ̀ìn-ɖɛ̀ ɓɛ́ Dànyá dyé ɓó Táígàɖà-nìɔ̀ wĩín nyɛ

¹ Ɖé Sáwàɖà mɔ̀à Pɔ́sìà-ɓòɖòɔ̀ kã́áɔ̀ kɛɛ nììn ɓóɖó-wuɖuí-kɔ̃̀-zɔ̃̀ɔ̀ tã nììnɔ̀ xwíníín nyɛɛ, Gèɖèpɔ́ɔ̀ tò ma mɔ̄ Dànyá kɔ̃̀ nyɛ́nɛ́ tɔ̀ɔ̀ mɔ̀à Bɛ́tèsíázɔ̀ kɛɛ wuɖu ɖò gbo. Wuɖuɔ̀ mɔ̀ ma jǎà. Ɔ ɓá ma to vɛ̀nɛ̀ ɖò jè dyí. Nyɔ ɖò zà ma wuɖuɔ̀ xwíníín ɖé ḿ gbo, ɖé dyí-tɛ̀mɛ̀ìn-ɖɛ̀ ɖò mú.

² Ɓó tia ɓaɖaa, mɔ̄ Dànyá nì ma wìǐn ɓó wíkì tã xwíníín.

³ Ɖii-ɖɛ̀ nɔ̀mɔ̀ dyíin mɔɔ suaɖɛ̀ mɔɔ wã́ìn ɖò se ma ní wɔ̃ɔ̀ mú kpá, ké ḿ se ma cáná nɔ̀mɔ̀ nyɔ́ún ɖò fiè fɔɔ cá, ké wíkì tãɔ̀ jɛ̀ɖɛ̀ ma hwɛ̀.

⁴ Ɓó dɛ̀nɛ̀ kĩ́ín-kĩ́ínɔ̀ wé kpáɖá-nyɔ sè hĩinyɛ nììnɔ̀ ɓaɖaa, ḿ nyànà ma ɓó ní vɛ̀nɛ̀ mɔ̀à Táígàɖà kɛɛ wĩín dyi.

⁵ Ḿ ɖú ma dyéɖé dyií, ké ḿ dyé ma gàa ɖò ɓɛ́ ɔ po ɖénì-ɖɔ̀ múɛɛ ɓó ḿ dyúa dyi nyànàà. Gàaɔ̀ jìnììn ma gbo-jìnììn-ɖɛ̀ ɖò ɓɛ́ ɔ mɔ̀ góò hwɛ̀ zɛ̀nɛ̌ǐn nyɛɛ gbo.

⁶ Gàaɔ̀ kpóɖó-dyùàɔ̀ fã ma kà sɔ́ɔ́ kpa ɖɛ ɖò nìà kɛ. Ɔ dyúa-kpàɔ̀ nyu ma wànà-wànà kà wɛ́ɖɛ́-wɛ́ɖɛ́ poà kɛ, ké ɔ dyéɖéɔ̀ nì ma wãuń kà nyɛ wãà kɛ. Ɔ sɔ̃ kè ɔ ɓoɔ̀ fã kà bàɖàsǐ ɓɛ́ wa fiè ɖɛ-fã̀ìn-ɖɛ̀ bũ̌in nyɛɛ fãà kɛ. Ké ɔ wuɖuɔ̀ nì pū kà vòò-nyɔ̀ wuɖu dyià kɛ.

⁷ Mɔ̄ Dànyá ɖòùn mɔ̀ nyɔ dyé ma dyí-tɛ̀mɛ̀ìn-ɖɛ̀ɔ̀. Gàa ɓě nì ma ɓó ḿ gboɛɛ ɖò seɛ ma dyé, kɛɛ díɖí taɓa ma wa mìɔ, ké ɔ nyuɛ ké wa gbǔ, ké wa vǐè ma.

⁸ Púɛɛ, ḿ ɖòǔn sè ma ɓó, ké ḿ nì ma dyí-tɛ̀mɛ̀ìn-ɖɛ̀ vɛ̀nɛ̀ ɓɛ́ kà ɓɛ́ ḿ dyéà kɛɛ dyéɖéín dyi ɓɛ̀ɖɛ̀ǐn. Kpé ɖò se ma ḿ dyí nì. Ní dyúaɔ̀ zàìn ma dyí, ké ḿ se ma ɖɛ ɖò nyuɛ ɓɛ́ìn.

⁹ Hwɛ̀ ké ḿ wɔ̃́ ma gàaɔ̀ wuɖu. Ti ɓɛ́ ḿ nì ma kà gàaɔ̀ wuɖuɔ̀ ɖùǔ gbo tòɛ̌n nyɛɛ, púɛɛ, ḿ kpá ma ɓó ɓíɖíi dyi, ké ḿ kpá ma nyíɔ vɛ̀nɛ̀ ɖò mú.

¹⁰ Hwɛ̀ ké sɔ̃ ɖò tìnììn ma ḿ dyi, ké ɔ sɔ̀ìn ma ḿ dyí. Ḿ wáɖá ma kɔ́-dù hwuɖu, ké ḿ taɓa ma xwa ɓíɖíi, ké ḿ nì ma tɛɖɛiń.

¹¹ Ké gàaɔ̀ ɖá, “Dànyá, mɔ̀ mɔ̀ nyɔ ɓɛ́ Gèɖèpɔ́ɔ̀ ɖɛ̀ɓɛ̀à mú mìɔ kɛɛ, m̀ mɛ sɔ̀ dyí, ɓɛ́ m̀ ké wuɖu ní muà m̀ gbo cɛ̃ìn nyɛɛ ɖùǔ gbo tò nɔ̀mɔ̀ dyíin, sepóɛɖé Gèɖèpɔ́ɔ̀ ɖǎ ḿ nɔ̄ m̀ gbo ɖoɓo.” Ké ti ɓɛ́ gàaɔ̀ ɖǎ ma ḿ gbo wùɖùɛ̀ hwɔɛɛ, ḿ sɔ̀ ma dyí, ké ḿ nì ma tɛɖɛiń ke.

¹² Hwɛ̀ ké gàaɔ̀ ɖú ma wuɖuí ɖe, ké ɔ ɖá, “Dànyá, ɓɔ́ fɛ̃̀ìn. Sɔ̀ìn ɓó wé kɔ̃̀ ɓaɖa ɓɛ́ nì hwòɖǒ ɖǎa ma gbɔ po, ɓɛ́ m̀ ké m̀ mìɔùn ɓíɖíi dyà, ɓɛ́ m̀ kéɛ Gèɖèpɔ́ɔ̀ zɔ̀ìn, ɓɛ́ ɔ ké nì ɖɛ-múin-wɔ̃́-wɔ̃́ɔ̀ kɔ̃ poɛɛ, ɔ mɔ̀ ti nì Gèɖèpɔ́ɔ̀ wɔ̃́ ma nì ɓaà-wùɖùɔ̀, ké ḿ ɖǎ dyi, ɓɛ́ ḿ kéɛ gɔ̃̌ jǔ.

¹³ Kɛɛ Nɔɔ́-nàmàǔnɔ̀ ínjà mɔ̀à Pɔ́sìà-ɓòɖòɔ̀ dyí-gmɔ̀-nyɔ̀ kɛɛ kã̀ìn ma ḿ dyí ɓó wíkì tã xwíníín. Hwɛ̀ ké Makɔ́ mɔ̀à Bounɓoɔ̀ ínjà vɛ̀nɛ̀ ɓěɔ̀ ɖòɛɛ dyi ma, ɓɛ́ ɔ ké ma ḿ gbo kpá, sepóɛɖé Nɔɔ́-nàmàǔnɔ̀ ínjà gmɔ̀à Pɔ́sìà-ɓòɖòɔ̀ dyíɛɛ zĩ̀ìn ma ní ti.

¹⁴ Ɓó kàǔn wɛ̃ɛ, ḿ ɖǎ dyi, ɓɛ́ ḿ ké ɖɛ mu nì nyɔ ɓěɔ̀ gbo kpáùn ɖé dyúa kɛɛ jè kɔ̃in zaìn, sepóɛɖé dyí-tɛ̀mɛ̀ìn-ɖɛ̀ nìà kɛ ɓá ti nì ɖé dyúa keɛɛ jè dyí.”

¹⁵ Ti ɓɛ́ ɔ nì ma kà ḿ ɖɛa gbo cɛ̃iń nyɛɛ, ḿ taɓa ma dú hwuɖu, ké ḿ se ma wùɖùɛ̀ ɓɛ́ìn.

¹⁶ Hwɛ̀ ké ínjà ɓɛ́ ɔ kè nyɔǔn-dyù hwɔìn kà kɛɛ tìnììn ma ní wɔ̃-kpũ̀àɔ̀ dyi, ké ḿ ɓáà ma ní wɔ̃ɔ̀, ké ḿ ɖú ma wùɖù kpàǐ. Ké ḿ cɛ̃ɛ ma ɔ gbo, ké ḿ ɖá, “Ɓɔ̌ɔ̀, wìì nyu ḿ ní mìɔ ɓá dyí-tɛ̀mɛ̀ìn-ɖɛ̀ nìà kɛ jè dyí, ké kpé ɖò se ḿ dyí nì.

¹⁷ Ɓɔ̌ɔ̀, xwɛ̌ mɔ̄ se ɖɛ kpa nìà kɛ ɓɛ́ìn m̀ gbo wùɖùɛ̀ kɛ́? Sepóɛɖé kpé ɖò se ḿ dyí nì ɖe, ké ḿ se fɔ̀ɔ̀ ɓɛ́ìn dyɛ mɔ̀ùn.”

¹⁸ Hwɛ̀ ké ínjà ɓɛ́ ɔ kè nyɔǔn-dyù hwɔìn kà kɛɛ tìnììn ma ḿ dyi ɖe, ké ɔ nyí ma ḿ kpé.

¹⁹ Ké ɔ cɛ̃ɛ ḿ gbo, ké ɔ ɖá, “Mɔ̀ mɔ̀ nyɔ ɓɛ́ Gèɖèpɔ́ɔ̀ ɖɛ̀ɓɛ̀à múɛɛ, mɔ̀ǔn ɖá m̀ ké fɛ̃̀ìn. Gìɖìǐ mɛ nì m̀ kɔ̃. Kpé mɛ kpá m̀ dyí ɖe. M̀ mɛ ku dyi ɓó kàǔn.” Ti ɓɛ́ ɔ ɖǎ ma ḿ gbo wùɖùɛ̀ hwɔɛɛ, púɛɛ, kpé kpá ma ḿ dyí ɖe, ké ḿ ɖá, “Ɓɔ̌ɔ̀, kà ɓɛ́ m̀ ɖǎà ḿ kpéí poɛɛ, kpa nì wuɖu.”

^20-21 Hwɛ̀ ké ɔ ɖá, “M̀ dyuò ɖɛ kɔ̃̀ jè ḿ dyià nɔ̄ m̀ gboɛɛ níì? Ɔ mɔ̀, ɓɛ́ ḿ ké ɖɛ céèà ɖé Jǎà-cèè-ɖɛ̀ɔ̀ múɛɛ m̀ gbo cɛ̃. Ɔ se hwèɖèɛ̌n mu, ké ní mu ɖe muùn, ɓɛ́ ḿ ké Nɔɔ́-nàmàǔnɔ̀ ínjà gmɔ̀à Pɔ́sìà-ɓòɖòɔ̀ dyíɛɛ gbo vɔ̃ ɖe. Ti ní mu ɔ toún ɖuùn wɛ̃ɛ, nìí, Nɔɔ́-nàmàǔnɔ̀ ínjà mɔ̀à Gíɖíì-ɓòɖòɔ̀ dyí-gmɔ̀-nyɔ̀ kɛɛ mu dyiìn, ɓɛ́ ɔ ké ḿ gbo vɔ̃. Nyɔ ɖò se nì ɓɛ́ ɔ ké ɓó ḿ gbo kpɔ̃̀ìn ɓá to ɓěɛ̀ vɔ̃ jè dyí, ɔ sèìn ínjà mɔ̀à Makɔ́ ɓɛ́ ɔ mɔ̀à Éézùɖùɛ̀-nyɔ̀ ɓěɔ̀ dyí-gmɔ̀-nyɔ̀ɔ̀ kɛɛ ɖòùn.