Àzédyà 66 - Ɓǎsɔ́ɔ̀ Báɓòɔ̀

Bounɓoɔ̀ tò ɓóɖó-dù ɓěɔ̀ gǎ kɔ̃

¹ Bounɓoɔ̀ cɛ̃ɛ ɖe, ké ɔ ɖá, “Dyɔún mɔ̀ ní zèèɔ̀ dè-naín, ké ɓóɖó-kpàɔ̀ mɔ̀ ní ɓo-síìn-naín. Gbǒɔ̀ nyɛ́ ɓě kéà ḿ bìì poɛ́? Cĩ́-naínɔ̀ nyɛ́ ɓě ké ḿ bìì nyuɛ́?

² Ní sɔ̃ɔ̀ mɔ̀ nyɔ mɛ dyɔɔ̀ kè ɓóɖó-kpàɔ̀. Ɔ jèɛɛ, mɔ̄ mɔ̀ nyɔ kɔ̃̀ wa. “Nyɔ mɔ̀ nyɔ ɓɛ́ ní hwòɖǒ dèìn múin nyɛɛ mɔ̀ nyɔ ɓɛ́ ɔ dyà ɔ mìɔùn ɓíɖíi, ké ɔ se ɔ mìɔùn-dyií-ɖú-hwòɖò-dyùà ɓéɖéɛ. Ɔ mɔ̀ nyɔ dyé ní wuɖuɔ̀ kpéín nyɛ. Mɔ̄ Bounɓoɔ̀ mɔ̀ nyɔ cɛ̃à kɛ̀.

³ “Ní nyɔ ɓěɔ̀ gã wa mìɔùn nììn hwòɖǒɛ̀-mɔ́ɔ́-ɖɛ̀, ké waà hwòɖǒ dèìn ɖɛ mɔ̀ ḿ dyi-nyàìn-ɖɛ̀ kɛɛ nyu-nyu múin. Ɔ jèɛɛ, nyɔ mɔ̀ nyɔ ɓɛ́ ɔ ɖáɓá ɓìɖǐ ɓó ḿ bììɛ kè nyɔ ɓɛ́ ɔ ɖáɓá kúɛɛ hwɔìn ní. Ké nyɔ mɔ̀ nyɔ ɓɛ́ ɔ zàìn ɓáɖáá ɖò sáa ɓó ḿ bììɛ kè nyɔ ɓɛ́ ɔ jaɖa gbe bùnù ɓó kũùn-kpò-gèɖèpɔ́ɔ̀ bììɛɛ hwɔìn ní. Ké nyɔ mɔ̀ nyɔ ɓɛ́ ɔ nyu ɖii-ɖɛ̀-sàǎ-zàìn-ɖɛ̀ ɓó ḿ bììɛ kè nyɔ ɓɛ́ ɔ zàìn ɓeé-nyɔ̀mɔ̀ sáa ɓó kũùn-kpò-gèɖèpɔ́ɔ̀ bììɛɛ hwɔìn ní. Ké nyɔ mɔ̀ nyɔ fɔ̃ nyɔ́ún-nɔ̀mɔ̀-ɖɛ̀ ɓó ḿ bììɛ kè nyɔ ɓɛ́ ɔ ɓiè kũùn-kpòɛɛ hwɔìn ní.

⁴ Ɔ ná nì jèɛɛ, mɔ́ún mu gǎ gãùn ɓó wa bìì, ɓɛ́ ḿ ké ɖɛ ɓě kɔ̃̀ fã̀à wa peɖeà kɛɛ wa kɔ̃ dyà, sepóɛɖé ḿ dyi ɖá ní, wa nyɔ ɖò ní jǔ ḿ gɔ̃̌. Ḿ dyi wùɖù ní, wa ní tò ḿ ɖùǔ gbo. Kɛɛ wa nì ḿ nàmàǔn bũ̌ nyuɛń kánáá pū. Wa gã ɖɛ ní hwòɖǒ se múin dèìn nyɛɛ nyu-nyu kánáá pū.”

⁵ Ɓě mɔ̀ nyɔ ɓě ɓɛ́ ɓě dyé Bounɓoɔ̀ wuɖuɔ̀ kpéín nyɛɛ, ɓě tò ɔ wuɖuɔ̀ gbo ɖùǔ. Ɔ ɖá, “Ɓě mìɔùn nììn nyɔ ɓěɔ̀ nyɛ́ ɓě mú, ké wa se ɓě ɖé wa mìɔùn hwìɛ̀ dyi mɔ́ìn, sepóɛɖé ɓě nyu ní wuɖuɔ̀ jè. Wa nì ɓě dyɔ́ ɓaɖauń, ké wa ɖá, ‘Bounɓoɔ̀ mɛ tɛ̀mɛ̀ìn ɔ dĩ́ín-dĩ̀ìnɔ̀ à dyí dyììn ɖé ɓě póìn-póìn mú, nìí ɓɛ́ à ké ɓě múàǔn kpáa dyé.’ Kɛɛ wa mɔ̀ nyɔ dɛ̃ mu nyuùn.

⁶ Ɓě tò ɖùǔ kà kuɖu-kuɖu ɖò nì dyí sɔ̀ǔn ɖé hwɔɖɔɔ̀ mú kè ɖé Gèɖèpɔ́ɔ̀ gbǒɔ̀ múɛ. Ɔ mɔ̀ Bounɓoɔ̀ nyɔ-gǎ-kɔ̃-tò-jĩ̀. Ɔ nì ɔ mú-nyɛ́-nyɔ̀ ɓěɔ̀ pɛ́ɛ̀ǐn ɓó ɖɛ gbà ɓě wa ɖǎ nyuɛɛ jè.”

⁷ Bounɓoɔ̀ cɛ̃ɛ ɖe, ké ɔ ɖá, “Zádyɔún-hwɔ̀ɖɔ̀ɔ̀ hwɔìn màa ɖò kɔ̃̀ póó-xwìɖì se puà fɔɔ, ɓɛ́ ɔ dyi gàa-dyù ɖò wóɖóìn nyɛ.

⁸ Nyɛ́ ɖǎ ɖɛ nì náa wɔ̃́ ɖòɛ́? Nyɛ́ ɖǎ ɖɛ nì náa dyé ɖòɛ́? Ɓóɖó ɖò ɓɛ́ìn wóɖóɛ ɓó wé dyúáɖò múe? Ɓóɖó-dù ɖò ɓɛ́ìn wóɖóɛ wàɖà cáe? Gmɔ̀ nɔ̄, ti Zádyɔún-hwɔ̀ɖɔ̀ɔ̀ póó-xwìɖì mu puàà gbɔ dèìn nyɛ̀nɛ̀ɛ̀ kɛɛ, ɔ mu ɔ gàa-dyù ɓě wóɖóìn cá.

⁹ Nì hwòɖǒ ɖá ní muɛ nyuùn ɓɛ́ ní nyɔ ɓěɔ̀ wóɖó-tì kéá ɓó nyini hwɛ̀ ɓɛ́ wa ké se wóɖóe? Nì hwòɖǒ ɖá mɔ̄ mɔ̀à nyu-nyɔ̀ ɓɛ́ dyú dyià wóɖóɛɛ ké xwíɖíɔ̀ dyí kãe? Mɔ̄ Bounɓo mɔ̀à ɓěɛ̀ Gèɖèpɔ́ɔ̀ kɛɛ mɔ̀ nyɔ cɛ̃à kɛ̀.”

¹⁰ Ɓě mɔ̀ nyɔ séín ɓě ɓɛ́ ɓě ɖɛ̀ɓɛ̀à Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ, ɓě kpá múàǔn ɓó ɔ jè. Ɓě mɔ̀ nyɔ ɓě ɓɛ́ ɓě nì ɔ jè vĩ̌ɛń nyɛɛ, ɓěɛ̀ hwòɖǒ mɛ zi múàǔn kpáuń ɓó ɔ jè.

¹¹ Ɓě mu ɔ nɛɛ̀ɔ̀ nyáùn, ɓɛ́ ɓěɛ̀ hwòɖǒ ké dyi dè. Ɓě mu ɔ kɔ́mɔ́ɔ̀ náùn, ɓɛ́ ɓěɛ̀ hwòɖǒ ké dyi dè.

¹² Sepóɛɖé ɖɛ Bounɓoɔ̀ cɛ̃ɛ kɛà kɛ̀. Ɔ ɖá, “Gmɔ̀ nɔ̄, ní mu ɔ mana kɔ̃ púèìn, ɓɛ́ manaɔ̀ ké dyi zi kà zii-nì nìà kɛ. Ní mu ɓóɖó-dù ɓěɔ̀ kɔ́mɔ́ɔ̀ ɔ kɔ̃ púèìn kà ní-dyèɖè síà kɛ. Ké ɔ mu ɓě nyáìn, ɓɛ́ ɔ ké ɓě wáún dè. Ɔ mu ɓě ɓo kɔ̃ kòìn, ɓɛ́ ɔ ké ɓě gbo ɓèɖèìn.

¹³ Kà ɖe nyuà ɔ dyú pɛ́í poɛ kɛɛ, kà dyúáɖòɔ̀ kǎà ní mu ɓěɛ̀ hwòɖǒ dyi dèìn ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú.

¹⁴ Ɓě muɛ dyéìn, ké ɓěɛ̀ hwòɖǒ mu múàǔn kpáùn. Ɓěɛ̀ kpóɖó-dyùàɔ̀ mu kpéí kpáùn ɖe kà pìǐ tɔɔ̀ kà kɛ. Ɔ ɖǎ ná nìǐn, nìí, ɓě muɛ dyuòùn kà mɔ̄ Bounɓoɔ̀ nì ɓó ní gbo-nì-nyɔ̀ ɓěɔ̀ gbo, ké kà ḿ kpáìn ní mú-nyɛ́-nyɔ̀ ɓěɔ̀ dyoɖoún mìɔ kɛ.”

¹⁵ Gmɔ̀ nɔ̄, Bounɓoɔ̀ mu dyiìn ɖé nyɛ mú, ké ɔ hwíì-sǒ ɓěɔ̀ mu dyiìn kà dìì vɛ̀nɛ̀ ɖò dyià kɛ, ɓɛ́ ɔ ké ɔ mú-nyɛ́-nyɔ̀ ɓěɔ̀ gǎ kɔ̃ tò ɖé ɔ dyoɖo ku wɔ̃ɔ̀ mú.

¹⁶ Sepóɛɖé Bounɓoɔ̀ mu nyɔ séín gǎ kɔ̃ tòùn dyììn ɖé nyɛ kè gàsíà mú, ké nyɔ ɓě ɓɛ́ Bounɓoɔ̀ mu ɖáɓáùn wɛ̃ɛ mu dyí vòɛ̌n ziìn mìɔ.

¹⁷ Bounɓoɔ̀ cɛ̃ɛ ɖé, ké ɔ ɖá, “Nyɔ ɓě ɓɛ́ wa hwɔ wa mìɔùn mú, ké wa po wa mìɔùn wáká ɓó kũùn-kpò-gèɖèpɔ́ɔ̀ ɓiè jè, ɓɛ́ wa séín dyi ɖé ɓáá-ɖɛ̀-pà ɓě ɓɛ́ wa gãà ɓó ɓiè jèɛɛ mú mu, ɓɛ́ wa dyi ɓeé kè bũ̀ɛ̌ ɔ kè ɖii-ɖɛ̀ tɔ̀ɔ̀ ɓě ɓɛ́ wa nyàìn ḿ dyiɛ ɖiɛɛ, wa séín mu mɛ́ìn ɓó ti dyúáɖò mú,

¹⁸ sepóɛɖé ḿ dyuò waà nyuu-ɖɛ̀ kè waà hwìɖǐi-poìn-ɖɛ̀ ɓě dyí. Ḿ nì dyiɛń, ɓɛ́ ḿ ké ɓóɖó-dù séín ɓɛ́ wa po wuɖu-dù kò-kò ɓěɛɛ dyí poìn. Wa mu dyiìn, ɓɛ́ wa ké ní dĩ́ín-dĩ̀ìnɔ̀ dyé.

¹⁹ Ní mu gǎ vɛ̀nɛ̀ ɖò ɖé wa hwìɛ̀ tòùn. Ké ní mu waà nyɔ ɓě ɓɛ́ wa pó gǎɔ̀ xwaún wɛ̃ɛ ɖé Tásìà-hwɔ̀ɖɔ̀ɔ̀ kè Pútì-ɓòɖòɔ̀ kè Ɖúɖì-ɓòɖòɔ̀ nyɔ ɓě ɓɛ́ wa mɔ̀ sé-po-nyɔ̀ ɓěɛ kè Túɓàò-ɓòɖòɔ̀ kè Jávã̀-ɓòɖòɔ̀ ɔ kè ɓóɖó tɔ̀ɔ̀ ɓě nìà ɖé dyóóɔ̀ wĩin ɖé nya vɛ̃in, ɓɛ́ wa séè ní dĩ́ín-dĩ̀ìnɔ̀ jè wɔ̃́ ɖò, mɔɔ ké wa séèɛ̀ dyé ɖòɛɛ gbo ɖoɓoùn, ké wa mu ní dĩ́ín-dĩ̀ìnɔ̀ jè ɓóɖó-dù ɓěa gbo cɛ̃ìn.

²⁰ Ké wa mu ɓěɛ̀ ɖíí séín ɓěɔ̀ ɖe dyàùn sɔ̀ìn ɖé ɓóɖó ɓěɔ̀ kɔ̃, ɓɛ́ wa ké ní nyíí-ɖɛ̀ jǔ. Wa ɖíɛ́ ɓě mu sǒ ɓě kè jǎkasì ɓě ɔ kè sǒ-nì-gbu-kɔ̃ún ɓě kɔ̃ún dyììn, ké ɖíɛ́ ɓě mu hwíì-sǒ ɓě kè mú-kpá-ɖɛ̀ tɔ̀ɔ̀ ɓě mú dyììn, ɓɛ́ wa ké ɖé ní toɖo hwɛ̀ǐn-hwɛ̀ǐnɔ̀ dya dyi ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú. Wa mu ɓěɛ̀ ɖíí ɓěɔ̀ dyàùn kà ɓě mɔ̀ Éézùɖùɛ̀-dyù ɓěɔ̀ nyuà ɓěɛ̀ ɖii-ɖɛ̀-sàǎ-zàìn-ɖɛ̀ ɓě ɖɛ-fùù hwɛ̀ǐn-hwɛ̀ǐn ɓě mú dyàìn, ɓɛ́ ɓě dyià wa ɖé ní gbǒɔ̀ mú dyà kɛ.

²¹ Ké ní mu waà nyɔ ɖíɛ́ ɓě dyí ɖúùn, ɓɛ́ ḿ ké wa sáa-zà-nyɔ̀ ɓě kè Ɖíìváà-nyɔ̀ ɓě mú nyu. Mɔ̄ Bounɓoɔ̀ mɔ̀ nyɔ cɛ̃à kɛ̀.

²² “Kà dyɔɔ̀ ɖìè kè ɓóɖó-kpà ɖìè ɓɛ́ ní muà mɛìn nyɛɛ muà ɓó ḿ dyúa nììn kánáá pūɛɛ, kà dyúáɖòɔ̀ kǎà ɓěɛ̀ xwíníín-dyù ɓěɔ̀ kè ɓěɛ̀ nyɛ́nɛ́ɔ̀ jè se dyi ziɛ́ mu.

²³ Ɓó Dɛ̀nɛ̀-Ɖìè-Hwèɖè-hwɔ̀ séín kè ní fɔ̀-wè séín ɓaɖaa, nyɔǔn séín mu ɓó ḿ dyúa dyiìn, ɓɛ́ wa ké ḿ ɓiè.

²⁴ Ti wa mu Jùɖúsɛ̀ɖɛ̀ìn-hwɔ̀ɖɔ̀ɔ̀ mú sɔ̀ùn wɛ̃ɛ, wa mu nyɔ ɓě ɓɛ́ wa nyu ḿ kɛ́ɛ́ múɛɛ xwɛ́ ɓěɔ̀ dyéìn, sepóɛɖé sɔ̀mɔ̀ɔ̌ ɓě muà wa ɖiìn nyɛɛ se mɛ́-mɛ́ kɔ̃̀, ké nyɛ muà wa fɔ̃ùn wɛ̃ɛ se mɔ́-mɔ́ kɔ̃̀. Ké waà xwɛ́ ɓěɔ̀ mu nyɔǔn-dyùɛ̀ dyi-nyàìn-ɖɛ̀ jǔùn. Mɔ̄ Bounɓoɔ̀ mɔ̀ nyɔ cɛ̃à kɛ̀.”