Àzédyà 62 - Ɓǎsɔ́ɔ̀ Báɓòɔ̀

¹ Ḿ se gìɖìǐ nìɛ̌ mu ɓó Zádyɔún-hwɔ̀ɖɔ̀ɔ̀ jè. Ní mu wùɖùùn ɓó Jùɖúsɛ̀ɖɛ̀ìn-hwɔ̀ɖɔ̀ɔ̀ jè. Ḿ se ɓɔ́í kpáa mu, ké ɔ pó-póɔ̀ fã kà dyóɖó fãà kɛɛ hwɛ̀. Ḿ se ɓɔ́í kpáa mu, ké ɔ to-ɖu-ɖuɔ̀ fã kà dɔ̀ɔ̀-kpà ɓɛ́ ɔ kpɔ̃ dyí ɓó máaún wɛ̃ɛ nìà kɛɛ hwɛ̀.

² Jùɖúsɛ̀ɖɛ̀ìn-hwɔ̀ɖɔ̀ wè, ɓóɖó-dù ɓěɔ̀ mu nì to-ɖu-ɖuɔ̀ dyéìn. Kã́á séín ɓěɔ̀ mu nì dĩ́ín-dĩ̀ìnɔ̀ dyéìn. Wa mu m̀ nyɛ́nɛ́ ɖìè ɖò mú ɖáìn. Ɔ mɔ̀ nyɛ́nɛ́ ɓɛ́ Bounɓoɔ̀ mìɔùn mu m̀ jǔìn nyɛ.

³ Nì mu kã́á-gbàǎ nɔ̀mɔ̀ dyíin jǔùn ɖé Bounɓoɔ̀ xwaún. Nì mu kã́á-gbàǎ jǔùn ɓó nì Gèɖèpɔ́ɔ̀ bìì.

⁴ Wa se m̀ “Hwɔɖɔ ɓɛ́ wa ɖǎ dyi táà kɛɛ” ɖáǐn mu ɖe, mɔɔ ké wa se nì ɓóɖóɔ̀ “Nyɔ́nɔ́ ɓɛ́ ɔ dyú-ɓǎ ɖǎ ɓɔ́ɛɛ” ɖáǐn mu ɖe. Kɛɛ nyɛ́nɛ́ ɖìè ɓɛ́ wa muá m̀ ɖáìn nyɛɛ mɔ̀, “Bounɓoɔ̀ hwòɖǒ dèìn ɔ múin,” ké wa muá nì ɓóɖóɔ̀ “Nyɔ́nɔ́ ɖìè” ɖáìn. Sepóɛɖé Bounɓoɔ̀ hwòɖǒ dèìn m̀ múin, ké ɔ mu nììn kà dyú-ɓǎ nìà kɛɛ ɓó nì ɓóɖóɔ̀ bìì.

⁵ Kà gàa-dyù gmɔ̀ ɖò kpɔ̃à màa-dyù gmɔ̀ se toɖo kɔ̃ jè dyuòɛ dyiɛɛ, kà dyúáɖòɔ̀ kǎà Gèɖèpɔ́ɔ̀ mɔ̀ nyɔ mɛà m̀ wɛ̃ɛ mu m̀ dyi kpɔ̃ùn. Ké kà gàa-dyù gmɔ̀ɔ̀ nyuà múàǔn kpáa ɓó ɔ nyɔ́nɔ́ ɖìèɔ̀ jèɛɛ, kà dyúáɖòɔ̀ kǎà nì Gèɖèpɔ́ɔ̀ mu múàǔn kpáùn ɓó nì jè.

⁶ Jùɖúsɛ̀ɖɛ̀ìn-hwɔ̀ɖɔ̀ wè, ḿ ɖǎ hwɔɖɔ-dyí-gmɔ̀-nyɔ̀ ɓě ɖé nì gmɔ ɓěɔ̀ kɔ̃ po, ké wa mɛ ɓɔ́ wĩín kã́a ɓó máaún kè dyóɖóaún. Wa mɛ nì Bounɓoɔ̀ ɖɛ hwìɖǐi dyàǔn kánáá pū, ké wa mɛ ɓɔ́ saa.

⁷ Wa mɛ gã̀ Bounɓoɔ̀ ɓaàǔn dyi tee, ɓɛ́ ɔ ké Jùɖúsɛ̀ɖɛ̀ìn-hwɔ̀ɖɔ̀ɔ̀ po ɖe, ɓɛ́ ɔ kéɛ nyu ɓɛ́ ɓóɖó-kpàà kéɛ ɓàìn.

⁸ Bounɓoɔ̀ ɖǎ ɔ kpé vɛ̀nɛ̀ɔ̀ dyí gboò, ké ɔ ɖá, “Ḿ se nì ɖii-ɖɛ̀ ɓěɔ̀ nì mú-nyɛ́-nyɔ̀ ɓěɔ̀ xwáɖáún zàǐn mu, ɓɛ́ ɔ ké waà ɖii-ɖɛ̀ jǔ ɖe, ké ɓóɖó-dù kà kò ɖò ɓěɛ̀ nyɔ ɓě se nì wã́ìn kɔ̃̀ kũ̀à ɓɛ́ m̀ ɖǎ nyuɛɛ náa mu ɖe.

⁹ Kɛɛ nyɔ ɓě ɓɛ́ wa mu ɓáá-ɖɛ̀ ɓěɔ̀ kpã́ùn wɛ̃ɛ, wa mɔ̀ nyɔ muɛ ɖiìn, ɓɛ́ wa ké mɔ̄ Bounɓoɔ̀ ɓàìn. Ké nyɔ ɓě ɓɛ́ wa mu géɖéèɔ̀ kpã́ùn wɛ̃ɛ, wa mɔ̀ nyɔ muɛ wã́ìnɔ̀ náùn ɖé ní gbǒ hwɛ̀ǐn-hwɛ̀ǐnɔ̀ kɔ̃̀pã́ùnɔ̀ mú.”

¹⁰ Jùɖúsɛ̀ɖɛ̀ìn-nyɔ̀ ɓě, ɓě sí. Ɓě síìn gmɔ-wɔ̃̀ ɓěɔ̀ mú. Ɓě nyu hwìè ɓó ɓěɛ̀ nyɔ ɓěɔ̀ bìì. Ɓě wáɖáìn hwìèɔ̀ ɓóɖó gboi. Ɓě zà ɓó sɔ́ɔ́-kpò séín dyi. Ɓě po kɔ́ɖɔ̀ dyií ɓó ɓóɖó-dù ɓěɔ̀ bìì.

¹¹ Gmɔ̀ nɔ̄, Bounɓoɔ̀ ɖǎ wuɖui po, ké ɔ wuɖuɔ̀ nyini ɖé ɓóɖó-kpàà sèìn-naín. Ɔ ɖá, “Ɓě cɛ̃ɛ Zádyɔún-hwɔ̀ɖɔ̀ɔ̀ gbo, ɓɛ́ ɓě ké níiń, ‘Gmɔ̀ ɖéa kà nì póìn-nyɔ̀ɔ̀ nì dyiɛń nyɛ. Gmɔ̀ nɔ̄, ɔ ɓéɖé pɛ́ɛ̀-ɖɛ̀, ké ɔ nìɛ̀ dyàǔn. Ɔ nì nì pɛ́ɛ̀-ɖɛ̀ dyàǔn.

¹² Wa mu nì nyɔ ɓěɔ̀ “Gèɖèpɔ́ɔ̀ nyɔ ɓě” ɖáìn. Wa mu wa “Nyɔ ɓě ɓɛ́ Bounɓoɔ̀ ɖǎ póìn nyɛɛ” ɖáìn. Wa mu m̀ “Hwɔɖɔ ɓɛ́ Gèɖèpɔ́ɔ̀ gã kɛɛ” ɖáìn. Wa mu m̀ “Hwɔɖɔ ɓɛ́ Gèɖèpɔ́ɔ̀ se dyi táà kɛɛ” ɖáìn.’ ”