Àzédyà 61 - Ɓǎsɔ́ɔ̀ Báɓòɔ̀

Bɔ̃̌ nɔ̀mɔ̀ dyíin ɓá nyɔ ɓěɔ̀ póìn jè dyíɛ

¹ Bounɓo Ɖɛɓíɔ́ɔ̀ Zùùɔ̀ nì ḿ kɔ̃. Bounɓoɔ̀ ɖǎ ḿ gã, ɓɛ́ ḿ ké bɔ̃̌ nɔ̀mɔ̀ dyíin gǎ-dyé-nyɔ̀ ɓěɔ̀ gbo cɛ̃. Ɔ ɖǎ ḿ ɖoɓo, ɓɛ́ ḿ ké nyɔ ɓě kɔ̃̀ hwòɖǒ-dyùà wɛ̀ìn dyiɛɛ dyi kánáìn, ɓɛ́ ḿ ké buɛ̀ jè zio mu pòìn ɖé nyɔ ɓě mɔ̀ toɛ̀-kpɔ̃-nyɔ̀ ɓěɛɛ gbo, ɓɛ́ ḿ ké nyɔ ɓě ɓɛ́ wa nì kpɔɖɔ ɖeín nyɛɛ wa buɛ̀ jè gbo cɛ̃.

² Ɔ ɖǎ ḿ gã, ɓɛ́ ḿ ké zio po kà tiɔ̀ ɖǎ ɓó nyini, ɓɛ́ Bounɓo mɔ̀à à Gèɖèpɔ́ɔ̀ kɛɛ hwòɖǒǔn-hwòɖò ké ɖé ɔ nyɔ ɓěɔ̀ gbo gmɔ̀ìn, ɓɛ́ ɔ ké wa bìì kpa zà kɛ. Ɔ ɖǎ ḿ ɖoɓo, ɓɛ́ ḿ ké nyɔ séín ɓě ɓɛ́ wa nì vĩ̌ɛń nyɛɛ hwòɖǒ dyi dè.

³ Ɔ ɖǎ ḿ gã, ɓɛ́ ḿ ké nyɔ ɓě ɓɛ́ wa nì vĩ̌ɛń ɖé Zádyɔún-hwɔ̀ɖɔ̀ɔ̀ múɛɛ múà gbo dyà, ɓɛ́ ɔ ké waà wììɔ̀ pá dyí ɖú, ɓɛ́ ɔ ɓàìn-wɛ̀ɖɛ̀ ké waà wììɔ̀ pá dyí ɖú. Wa mu nììn kà cu-gɔ̃̀ ɓě ɓɛ́ Bounɓoɔ̀ mìɔùn ɓá kɛɛ nìà kɛ. Wa séín mu ɖɛ mɔ̀ dyí-sɛ́ɖɛ́ìn-ɖɛ̀ kɛɛ nyuùn, ké wa mu ɔ dĩ́ín-dĩ̀ìnɔ̀ nyɔǔn dyí tɛ̀mɛ̀ìn.

⁴ Wa mu hwɔɖɔ ɓě ɖǎǒ zɔ̃̌ɔ̀ wáɖáa poùn ɖe, ɓɛ́ wa ké pá ɓě nyìnììn ma dyíin nyɛɛ dyíin nɔ̀mɔ̀ìn ɖe. Wa mɔ̀ dà ɓě ɖǎǒ zɔ̃̌ɔ̀ wáɖáa.

⁵ Ní nyɔ ɓě, ɓóɖó-dù kà kò ɖò ɓěɛ̀ nyɔ ɓě mɔ̀ nyɔ mu ɓěɛ̀ ɓáɖáá ɓěɔ̀ dyi-ɖi-naín kpaùn. Wa mɔ̀ nyɔ mu ɓóɖó-wa-nyɔ̀ jǔùn ɖé ɓěɛ̀ geɖe ɓěɔ̀ gbo, ké wa mɔ̀ nyɔ mu ɓěɛ̀ géɖéè-gbǎ ɓěɔ̀ kũ̀à-gbo-nyu-nyɔ̀ jǔùn.

⁶ Kɛɛ nyɔǔn-dyù mu ɓě Bounɓoɔ̀ sáa-zà-nyɔ̀ ɓě ɖáìn. Wa muɛ cɛ̃ìn kà ɓě mɔ̀ à Gèɖèpɔ́ɔ̀ bìì kũ̀à-nyu-nyɔ̀ ɓěɛ. Ké ɓě mu ɓóɖó-dù ɓěɔ̀ kɔ́mɔ́-ɖɛ̀ ɓěɔ̀ ɖò ɖiìn, ké ɓě muɛ múà múin kpáìn.

⁷ Dɛ̃ se ɓě nyuɛ́ mu ɖe, kɛɛ ɓě mu ɖɛ ɓɛ́ ɓě ké dyéɛɛ dú sɔ̃́ dyéìn. Nyɔ ɖò se ɓě zùǔn zàǐn mu ɖe, kɛɛ ɓě mu ɓěɛ̀ dúí-sè-ɖɛ̀ɔ̀ múà múin kpáìn. Ɓěɛ̀ kɔ́mɔ́ɔ̀ mu kɔ̃ kpáùn ɖé ɓěɛ̀ ɓóɖóɔ̀ kɔ̃, ɓɛ́ ɔ kéɛ dú sɔ̃́ jǔ, ké ɓě mu múàǔn kpáùn ɓó sè-ná-sèɛ̀ tiín.

⁸ Bounɓoɔ̀ cɛ̃ɛ, ké ɔ ɖá, “Ḿ ɖɛ̀ɓɛ̀ dyí-sɛ́ɖɛ́ìn-ɖɛ̀ mú, kɛɛ ḿ nyɛ́ dyíɖí-dyíɖí kè ɖɛ-gbà-nyu-nyu mú. Ní mu ní nyɔ ɓěɔ̀ pɛ́ɛ̀-ɖɛ̀ tòùn kánáá pū, ké ḿ kè wa mu sè-ná-sèɛ̀ dèè-wùɖù ɖò ɓéɖéìn.

⁹ Waà xwíníín-dyù ɓěɔ̀ nyɛ́nɛ́ mu muùn ɖé ɓóɖó-dù ɓěɔ̀ hwìɛ̀. Nyɔ séín ɓě ɓɛ́ wa mu wa dyéìn nyɛɛ, wa muɛ dyuòùn kà mɔ̄ Bounɓoɔ̀ ɖǎ wa mana kɔ̃ poɛ.”

¹⁰ Ḿ kpá múàǔn mìɔ ɖé Bounɓoɔ̀ mú. Ní hwòɖǒ dèìn ní Gèɖèpɔ́ɔ̀ mú dyi. Sepóɛɖé ɔ ɖǎ ḿ pó-pó mú po kà nyɔ poà ɖɔún wɛ̃. To-ɖu-ɖu mɔ̀ ɖɔ, ké ɔ poɛ ḿ mú. Ɔ nì kà gàa ɖò ɓɛ́ ɔ bɛ̃̀ìn ɓó ɔ nyɔ́nɔ́ dyi kpɔ̃ jèɛ, mɔɔ kà màa ɖò bɛ̃̀ìn kà ɔ mìɔùn ɓó ɔ dyú-ɓǎ dyi kpɔ̃ jèɛ.

¹¹ Kà ɓɛ́ ɓáá-ɖɛ̀ ɓɛ́ wa ɓá ɖé ɓáá-ɖɛ̀-pà ɖò múɛɛ nyuà mɛɛ kɛɛ, kà dyúáɖòɔ̀ kǎà Bounɓo Ɖɛɓíɔ́ muɛ nyuùn, ɓɛ́ dyí-sɛ́ɖɛ́ìn-sɛ́ɖɛ́ìn kè ɔ ɓàìn-ɓàìn ké ɖé ɓóɖó-dù séín ɓěɔ̀ hwìɛ̀ dyí sɔ̀.