Àzédyà 60 - Ɓǎsɔ́ɔ̀ Báɓòɔ̀

Jùɖúsɛ̀ɖɛ̀ìn-hwɔ̀ɖɔ̀ɔ̀ dĩ́ín-dĩ̀ìn ɓɛ́ ɔ nì ɖé dyúa kɛ

¹ Jùɖúsɛ̀ɖɛ̀ìn-hwɔ̀ɖɔ̀ wè, sɔ̀ dyí, ɓɛ́ m̀ ké fã, sepóɛɖé nì ceɔ̀ ɖǎ dyi. Bounɓoɔ̀ dĩ́ín-dĩ̀ìnɔ̀ ɖǎ m̀ kɔ̃ dyi.

² Gmɔ̀ nɔ̄, tíe-kpò kuún-kuún mu ɓóɖó-kpàà nyɔ ɓěɔ̀ kɔ̃in ɓáìn, kɛɛ Bounɓoɔ̀ ceɔ̀ mu m̀ kɔ̃ fã̀ìn, ké nyɔǔn-dyù mu ɔ dĩ́ín-dĩ̀ìnɔ̀ dyéìn ɓó m̀ kɔ̃.

³ Ɓóɖó-dù ɓě mu nì ceɔ̀ dyí dyiìn. Kã́á ɓě mu nì ceɔ̀ xwáɖáún-wóɖó-wóɖóɔ̀ dyí dyiìn.

⁴ Gmɔìn m̀ mìɔùn ɖei, ɓɛ́ m̀ kéɛ dyé kà nyɔ séín ɓěɔ̀ nì dyí poɛ̌n nyɛ. Wa nìǎ m̀ gbo dyiɛń. Nì dyú-gàà ɓěɔ̀ mu dà vɛ̃in sɔ̀ùn, ɓɛ́ wa ké dyi, ké nyɔǔn ɓě mu nì dyú-màà ɓěɔ̀ xwaún dyi ɓéɖéìn, ɓɛ́ wa ké wa dyà.

⁵ Nì mu ɖɛ nìà kɛ kpáa dyéìn, ké múà mu m̀ múin dyíìn, ké nì hwòɖǒ mu dyi dèìn mìɔ. Sepóɛɖé wa mu ɓóɖó-dù ɓěɔ̀ kɔ́mɔ́ ɓěɔ̀ m̀ gbo dyàùn sɔ̀ìn ɖéé ɖé dyóóɔ̀ ɖeín.

⁶ Sǒ-nì-gbu-kɔ̃ún kúɖúú ɓě mu nì ɓóɖóɔ̀ kɔ̃ dyi dyíìn. Wa mɔ̀ sǒ-nì-gbu-kɔ̃ún gmɔ̀ ɓě ɓɛ́ wa sɔ̀ìn ɖé Míɖìàùn-ɓòɖòɔ̀ kè Éfà-ɓòɖòɔ̀ kɔ̃ɛ. Ké sǒ-nì-gbu-kɔ̃ún séín nì ɖé Síɓà-ɓòɖòɔ̀ kɔ̃ɛɛ mu ɖé sɔ̀ùn, ɓɛ́ wa ké dyi ɖekè. Wa mu góò kè nyɔ́ún-nɔ̀mɔ̀-ɖɛ̀ dyàùn, ké nyɔ ɓěɔ̀ mu Bounɓoɔ̀ ɓàìn-bɔ̃̀ dyi poùn.

⁷ Wa mu ɓáɖáá séín ɓě nìà ɖé Kéɖà-ɓòɖòɔ̀ kè Nɛ̀bádyò-ɓòɖòɔ̀ kɔ̃ɛɛ m̀ gbo dyàùn, ɓɛ́ wa ké sáa-zàìn-ɖɛ̀ jǔ. M̀ dyi wa sáa zàìn ɓó Bounɓoɔ̀ sáa-kɔ̃-zàìn-gbààɔ̀ kɔ̃ ní, nìí, ɔ muɛ dyi kpɔ̃ùn, ké ɔ mu ɔ gbǒ dĩ́ín-dĩ̀ìnɔ̀ dya dèìn.

⁸ Ɖɛ́ ɓě nìà kà ɖé ziɛń kà ní-kpò zià ɖé dyɔɔ̀ dyíɛ́? Wa nì ziɛń kà gbúɛ́ zià ké ɔ nìà téɖé kɔ̃ muɛń nyɛ.

⁹ Wa mɔ̀ méè ɓě ɓɛ́ wa sɔ̀ìn ɖé ɓóɖó vɛ̃in ɓěɔ̀ kɔ̃ɛ. Méè ɓě sɔ̀ìn ɖé Tásìà-hwɔ̀ɖɔ̀ɔ̀ múɛɛ nì wa dyúa. Wa nì nì dyú ɓěɔ̀ dyàǔn sɔ̀ìn ɖé ɓóɖó vɛ̃in ɓěɔ̀ kɔ̃. Wa nì waà séɓàɖà kè góò ɓěɔ̀ dyàǔn ɓó Bounɓo mɔ̀à nì Gèɖèpɔ́ɔ̀ ɓɛ́ ɔ mɔ̀à Éézùɖùɛ̀ɛ̀ Mú-hwɛ̀-nyɔ̀ɔ̀ kɛɛ bìì, sepóɛɖé ɔ ɖǎ m̀ dya dè.

¹⁰ Bounɓoɔ̀ cɛ̃ɛ Jùɖúsɛ̀ɖɛ̀ìn-hwɔ̀ɖɔ̀ɔ̀ gbo, ké ɔ ɖá, “Ɓóɖó-dù kà kò ɖò ɓěɛ̀ nyɔ ɓě mu nì gmɔ ɓěɔ̀ poùn ɖe, ké waà kã́á ɓě mu nì gbo-nì-kũ̀à nyuùn. Sepóɛɖé ḿ tò ma m̀ gǎ kɔ̃ ɖé ní dyoɖoɔ̀ mú, kɛɛ ɓó kàǔn wɛ̃ɛ, ní mu m̀ wìǐn dyéìn dyììn ɖé ní ɖɛ̀ɓɛ̀ǐn-ɖɛ̀ɓɛ̀ǐnɔ̀ mú.

¹¹ Nì gmɔ-wɔ̃̀ ɓěɔ̀ mu kaàùn kánáá pū ɓó máaún kè dyóɖóaún. Wa se kãá mu, nìí ɓɛ́ ɓóɖó-dù ɓěɔ̀ ké waà kɔ́mɔ́-ɖɛ̀ ɓěɔ̀ m̀ gbo dyà. Waà kã́á ɓě mu hwìèɔ̀ nya nììn.

¹² Sepóɛɖé ɓóɖó-dù ɓě ɓɛ́ wa se nì gbo-nì-kũ̀à nyuɛ́ muɛɛ, wa mu mú gbɔɔ̀ùn. Waà ɓóɖó ɓěɔ̀ mu fóɖóún kpáùn.

¹³ “Ɖɛ́ɓèɖɔ́ùn-ɓòɖòɔ̀ nììn dĩ́ín-dĩ̀ìn ɓɛ́ ɔ mɔ̀à sápàɖà-cù kè jùnípà-cù ɔ kè pã́ìn-cù ɓěɔ̀ kɛɛ, wa mu wa m̀ gbo dyàùn, ɓɛ́ wa ké ní pá hwɛ̀ǐn-hwɛ̀ǐnɔ̀ dyíin nɔ̀mɔ̀ìn ɖe. Ní muɛ nyuùn ɓɛ́ ní ɓo-síìn-naínɔ̀ ké dĩ́ín-dĩ̀ìn ɓéɖé ɖe.

¹⁴ Nyɔ ɓě ɓɛ́ wa pĩ́à ma m̀ dyiɛɛ dyú ɓěɔ̀ mu m̀ gbo dyiìn. Wa se dú dyií ɖúɛ ɓɛ́ǐn mu ɓó m̀ dyúa. Ké nyɔ séín ɓě ɓɛ́ wa zàìn ma m̀ zùǔn wɛ̃ɛ, wa mu dú hwuɖu taɓaùn ɓó m̀ ɓo zɔ̃̌. Wa mu m̀ Bounɓoɔ̀ hwɔɖɔ ɖáìn. Wa mu m̀ Zádyɔún-hwɔ̀ɖɔ̀ ɓɛ́ ɔ mɔ̀ Éézùɖùɛ̀ɛ̀ Mú-hwɛ̀-nyɔ̀ɔ̀ ɓíɖí-hwɔ̀ɖɔ̀ kɛɛ ɖáìn.

¹⁵ “Nyɔǔn-dyù ɖǎ m̀ dyi táà, ké wa nyɛ́ m̀ mú, ké nyɔ ɖò ní zĩ̀ìn ɖé m̀ mú ɖe dyɛo, kɛɛ ní muɛ nyuùn ɓɛ́ m̀ ké hwɔɖɔ kɔ̃̀ jè nyɔǔn-dyù ɓɔ́ɖɔ́ kɛɛ jǔ kánáá pū. Nì mu hwɔɖɔ kɔ̃̀ mú ɓɛ́ múà nì kánáá pū kɛɛ jǔùn.

¹⁶ Ɓóɖó-dù ɓěɔ̀ kè waà kã́á ɓě mu m̀ gbo gmɔ̀ùn, kà ɖe gmɔ̀à ɔ nyáá-dyù-pɛ̀ɖɛ̀ gbo kɛ. Ɔ ɖǎ ná nìǐn, nìí, nì muɛ dyuòùn, kà mɔ̄ Bounɓoɔ̀ mɔ̀ nì póìn-nyɔ̀ kè nì gbǎà-nyɔ̀ mɔ̀à Éézùɖùɛ̀ɛ̀ Kpé-séín-ɓéɖé-nyɔ̀ɔ̀ kɛ.

¹⁷ “Ní mu m̀ góò dyàùn, ké ɔ se bàɖàsǐ. Ní mu m̀ séɓàɖà dyàùn, ké ɔ se nɛɛ̀-kpà. Ní mu m̀ bàɖàsǐ dyàùn, ké ɔ se cu. Ní mu m̀ nɛɛ̀-kpà dyàùn, ké ɔ se sɔ́ɔ́-kpò. Ké nyɔ ɓě ɓɛ́ wa mu m̀ wuɖuí kɔ̃̀ùn wɛ̃ɛ se m̀ dyi pĩ́àǎ mu ɖe. Ní muɛ nyuùn ɓɛ́ wa ké m̀ wuɖuí kɔ̃̀ ɖé gìɖìǐ kè dyí-sɛ́ɖɛ́ìn-sɛ́ɖɛ́ìn mú.

¹⁸ Nyɔ-ɖɛ-gana-xwa-zàìn-zàìn ɖò se nì ɓóɖóɔ̀ kɔ̃ nìɛ̌ mu ɖe, mɔɔ ɖɛ-mú-gbɔɔ̀-gbɔɔ̀ ɖò se ɖé nìɛ̌ mu ɖe. Nì gmɔɔ̀ xwíníín ɖé mu póìn-naín jǔùn, ké ní ɓàìn-ɓàìn mu ɖé nì gmɔ-wɔ̃̀ ɓěɔ̀ xwíníín nììn.

¹⁹ “Dyóɖóɔ̀ se ɓéɖé ɔ ké fã ɖe ɓó ce tò jè ɓó dyóɖóaún, ké dɛ̀nɛ̀ɔ̀ se ɓéɖé ɔ ké fã ɖe ɓó máaún ɓó m̀ ce nyí jè ɖe. Mɔ̄ Bounɓoɔ̀ mɔ̀ nyɔ muá nì sè-ná-sèɛ̀ ce jǔùn. Mɔ̄ mɔ̀à nì Gèɖèpɔ́ɔ̀ kɛɛ, mɔ̄ muá nì dĩ́ín-dĩ̀ìn jǔùn.

²⁰ Nì dyóɖóɔ̀ se dyi kpáa mu ɖe, mɔɔ ké nì dɛ̀nɛ̀ɔ̀ se dyi kpáa mu ɖe, sepóɛɖé mɔ̄ Bounɓoɔ̀ mɔ̀ nì sè-ná-sèɛ̀ ce. Ké nì wìǐn-kpá-tìɔ̀ mu dyi ziìn.

²¹ Ɔ ɖǎ ná nìǐn, nìí, nì nyɔ ɓěɔ̀ séín mu dyí sɛ́ɖɛ́ìn, ké ɓóɖóɔ̀ mu waà kɔ̃̀ɔ̀-ɖɛ̀ jǔùn kánáá pū. Wa hwɔìn ɓáá-ɖɛ̀ ɖí ɓɛ́ ḿ ɖǎ ɓá kɛ. Wa mɔ̀ ní sɔ̃ɔ̀ nyuu-kũ̀à. Wa mu ní dĩ́ín-dĩ̀ìnɔ̀ nyɔǔn dyí tɛ̀mɛ̀ìn.

²² Ké nì nyɔ ɓɛ́ ɔ ɓíè dyí, ké ɔ se ɖɛ kpa kɛɛ, ní mu ɔ dúún zaìn, ɓɛ́ ɔ ké ɓóɖó-dù vɛ̀nɛ̀ ɓéɖé kpéɛɛ jǔ. Mɔ̄ mɔ̀ Bounɓoɔ̀. Ní mu ɖɛ nìà kɛ nyuùn wàɖà ɓó ɔ ti ɓɛ̀ɖɛ̀ìn dyíɔ̀ mú.”