Àzédyà 59 - Ɓǎsɔ́ɔ̀ Báɓòɔ̀

Àzédyà kpɔ̃̀ìn nyɔ ɓěɔ̀ zaa ɓá waà nàmàǔn ɓěɔ̀ jè dyí

¹ Gmɔ̀ nɔ̄, Bounɓoɔ̀ sɔ̃ɔ̀ se xwã́, ɓɛ́ ɔ ké se ɓě póɛ̀n ɓɛ́ìn nyɛ, mɔɔ ɔ se sṹ, ɓɛ́ ɔ ké se ɓěɛ̀ wuɖu wɔ̃́ɔ ɓɛ́ìn nyɛ.

² Kɛɛ ɓěɛ̀ ɖɛ gbà ɓěɔ̀ ɖǎ ɓě ɓó ɓěɛ̀ Gèɖèpɔ́ɔ̀ bũ̌ zà. Ɓěɛ̀ nàmàǔn ɓěɔ̀ ɖǎa nyu ké ɔ ɖǎ ɓě dyúa xwáɖáún pòìn, ké ɔ ní wɔ̃́ ɓěɛ̀ wuɖu ɖe.

³ Sepóɛɖé nyɔmɔɔ dyí ɓě xwa, ké ɓěɛ̀ jìì-dyùà nì ɖɛ gbà hwìɛ̀, ké ɓě tɔ́mɔ́ se, ké ɓě cɛ̃ hwòɖǒ-kɔ̃in-nyìnììn-ɖɛ̀ ɓě.

⁴ Ɓě dyi ɖé ɓěɛ̀ zɔ̃́ín-cɛ̃̀ìn-naín ɓěɔ̀ muín, nyɔ ɖò ní zaìn ɔ zɔ̃́ín kɔ̃in dyí-sɛ́ɖɛ́ìn-kà. Ɓě séín taɓa wuɖu fóɖóún hwìɖǐǐ. Ɓě tɔ́mɔ́ se. Ɓě sɔ́ ɖɛ gbà dyí ɖé ɓě xwíníín, ké ɓě nyu hwòɖǒ-kɔ̃in-nyìnììn-ɖɛ̀ ɓě.

⁵ Ɖɛ mɔ̀ gɛ̃ ɓɛ́ ɓě jìɖǐ kɔ̃, ɓɛ́ ɓě dyi wa kɛɛ mɔ̀ cɛ̃́-sɛ̀. Nyɔ mɔ̀ nyɔ ɓɛ́ ɔ mu ɓěɛ̀ gɛ̃ ɖiìn nyɛɛ, ɔ mu mɛ́ìn. Ɔ jǔ ké ɓěɛ̀ gɛ̃ ɓěɔ̀ ɖò dyi wɛ̀ ní, ɖɛ sɔ̀ ɖéɛɛ mɔ̀ cɛ̃́-sɛ̀. Ɓěɛ̀ ɖɛ gbà ɓěɔ̀ hwɔìn sãà-dɛ̃̀ ɓɛ́ wa ɖaɓa ɖɔ múɛ.

⁶ Ɖɛ gbà ɓě ɓɛ́ ɓě sɔ́à dyíɛɛ se ɓě kpáná ɖò dyí nyuɛ ɓɛ́ìn kà sãà-dɛ̃̀ ɓɛ́ wa ɖaɓa ɖɔ múɛɛ nìà kɛ. Ɖɛ ɓě ɓɛ́ ɓě nyuɛɛ mɔ̀ ɖɛ gbà saá-saá, ké nyɔ-ɖɛ-gana-xwa-zàìn-kpèɔ̀ nì ɖé ɓě xwaún.

⁷ Ɓěɛ̀ ɓo fṹà xwai ɓó ɖɛ gbà gbo mu jè, ké ɓě fṹà xwai ɓó nyɔ se ɖɛ gbà ɖò nyuɛɛ nyɔmɔɔ dyi wáɖáìn jè. Ɓěɛ̀ hwòɖǒɛ̀-gbɔ-po-ɖɛ̀ mɔ̀ ɖɛ gbà kánáá pū. Mú-gbɔɔ̀-gbɔɔ̀ nì ɓó ɓěɛ̀ hwìè ɓěɔ̀ dyí kánáá pū ɓó nyɔ ɓě kpaa kɛɛ bìì.

⁸ Ɓě se gìɖìǐ jè dyuò fɔɔ cá. Dyí-sɛ́ɖɛ́ìn-ɖɛ̀-nyu-tò se ɖé ɓě xwíníín nì fɔɔ cá. Ɓě ɖǎ ɓěɛ̀ hwìè ɓěɔ̀ múin kíɖíìn. Nyɔ mɔ̀ nyɔ ɓɛ́ ɔ kpá ɓěɛ̀ hwìè ɓěɔ̀ ɖò xwíníín nyɛɛ se gìɖìǐ ɖò dyéɛ mu fɔɔ cá.

Éézùɖùɛ̀-nyɔ̀ ɓěɔ̀ wɔ̃́ìn waà nàmàǔn ɓěɔ̀ mú

⁹ Ɓó à nàmàǔn ɓěɔ̀ jèɛɛ, Bounɓoɔ̀ nyɔ-póìn-kpèɔ̀ ɖǎ à bũ̌in tɔmɔìn mìɔ cá, ké jǎà-ɖɛ̀-wɔ̃-po-po se à kíɖíí kpáa ɓɛ́ìn, ɓɛ́ ɔ ké à dyɛ̀ìn ɖe. À dèɔ̌ má ce hwòɖǒ kɔ̃, kɛɛ gmɔ̀ nɔ̄, ɖɛ à dyéɛ mɔ̀ tíe-kpò saá-saá. À mɔ́ɔ́ má ce fɔ̀nɔ̀-fɔ̀nɔ̀, kɛɛ à nà tíe-kpò kpɛ̃̀ mú.

¹⁰ À ɓéɖé dyi ɓɛɛ̀ǐn kà dyéɖéín-dyi-kpè-nyɔ̀ nyuà kɛ, ɓɛ́ à ké gbǒ dyéɖéín dyi kpɔ̃. À ɓéɖé dyi ɓɛɛ̀ǐn kà nyɔ se dyéɖé dú nì nìà kɛ. À ɓéɖé gbǒɛń ɓó dyóɖóaún pū kà xwaún-dyi-tìě dyià kpɔ̃uń nìǐn, nyɔ ní dyéà ɓíɖíi dyiɛ. À hwɔìn nyɔ ɓě ɓɛ́ wa ɖǎ mɛ́ kɛɛ ɖé nyɔ ɓě ɓéɖé gana kɛɛ hwìɛ̀.

¹¹ À séín nì dyoɖo poɛń kà kìɖìǒ nyuà kɛ, ké à vĩ̌ kà gbúɛ́ nyuà kɛ. À dè jǎà-ɖɛ̀-wɔ̃-po-po hwòɖǒ kɔ̃, kɛɛ à se ɖò dyéɛ ɓɛ́ìn. À nì pó-pó dyi mɔ́uń, kɛɛ ɔ tɔmɔìn à bũ̌in.

¹² Bounɓo, ɖɛ kɔ̃̀ jè ɖɛ ɓěɛ̀ nìà náa, ɔ mɔ̀ sepóɛɖé à gma-ɖuà-ɖuà ɓěɔ̀ ɖǎ dyí vòɛ̌n zi mìɔ ɓó m̀ dyúa, ké à mìɔùn nììn nyuu-nàmàǔn ɓěɔ̀ wáɖá à zaa dúún. À dyuò à ɖɛ gbà ɓěɔ̀ dyí.

¹³ À nì m̀ kɛ́ɛ́ mú nyuɛń, ké à nì m̀ gbo vɔ̃uń, ké à nì mɔ̀ mɔ̀à à Gèɖèpɔ́ɔ̀ kɛɛ kɔ̃ín pòɛ̌n. À nì nyɔ-dyi-pĩ́à-wùɖù ɓě kè m̀ gbo-vɔ̃-wùɖù ɓě cɛ̃iń. À hwòɖǒ po se-ɖɛ̀ saá-saá ɓě gbɔ, hwɛ̀ ké à tɔ́mɔ́ se.

¹⁴ À ɖǎ jǎà-ɖɛ̀-wɔ̃-po-po kúmú, ké dyí-sɛ́ɖɛ́ìn-sɛ́ɖɛ́ìn tɔmɔìn à bũ̌in. Jǎàɔ̀ ɖǎ ɓíɖíi dyi kpá ɖé zɔ̃́ín-wɔ̃-pòìn-naín ɓěɔ̀, ké dyí-sɛ́ɖɛ́ìn-sɛ́ɖɛ́ìn se ɖé dyáa ɓɛ́ìn ɖe.

¹⁵ Jǎà gǎ ɖǎ kpá, ké nyɔ mɔ̀ nyɔ ɓɛ́ ɔ táà ɖɛ-gbà-nyu-nyu dyiɛɛ, nìí, ɔ kpá à xwaún dyi. Bounɓoɔ̀ dyéɛ kà jǎà-ɖɛ̀-wɔ̃-po-po ɖò se nìɛ, ké ɔ hwòɖǒ kpá ɖé ɖei mìɔ.

Bounɓoɔ̀ ɖǎ ti dyé ɓɛ́ ɔ ké ɔ nyɔ ɓěɔ̀ póìn

¹⁶ Ɔ dyéɛ kà nyɔ ɖò se nì ɓɛ́ ɔ ké nyɔ ɓě ɓɛ́ wa pĩ́à dyiɛɛ póìn nyɛ, ké ɔ giniìn dyi. Ɔ jèɛɛ, ɔ mu ɔ mìɔùn nììn kpéɔ̀ kũ̀à mú nyùìn, ké ɔ mu wa póìn dyììn ɖé ɔ dyí-sɛ́ɖɛ́ìn-sɛ́ɖɛ́ìnɔ̀ mú.

¹⁷ Dyí-sɛ́ɖɛ́ìn-sɛ́ɖɛ́ìn mɔ̀ ɔ toún-vɔ̃̀ìn-ɖɔ̀, ké pó-pó mɔ̀ ɔ dú-dèìn-ɖɛ̀. Kpa-zà-zà mɔ̀ ɔ mú-po-ɖɔ̀, ké ɖɔ ɔ bĩìn ɓó kɔ̃in nyɛɛ mɔ̀ ɔ dyoɖo-hwòɖò ku wɔ̃ɔ̀.

¹⁸ Ɔ mu ɔ mú-nyɛ́-nyɔ̀ ɓěɔ̀ gǎ kɔ̃ tòùn dyììn ɖé waà nyuu-ɖɛ̀ mú. Ɔ mu ɔ dyoɖoɔ̀ ɔ gbo-vɔ̃-nyɔ̀ ɓěɔ̀ kɔ̃ púèìn. Ɔ mu ɓóɖó ɓě nìà ɖé dyóóɔ̀ wĩin nyɛɛ gǎ kɔ̃ tòùn.

¹⁹ Ɔ jèɛɛ, nyɔǔn mu Bounɓoɔ̀ dyi fɛ̃̀ìn sɔ̀ìn ɖé dyóɖó-dyi-kpáìn-naínɔ̀, ké wa mu ɔ dĩ́ín-dĩ̀ìnɔ̀ dya dèìn sɔ̀ìn ɖé dyóɖó-xwáɖáún-wóɖóìn-naínɔ̀, sepóɛɖé ɔ mu dyiìn kà ní-dyèɖè ku wɔ̃ ɓɛ́ ɔ pìɔ̌ ku wɔ̃ɔ̀ ɓaɖa kɛɛ nìà kɛ.

²⁰ Bounɓoɔ̀ cɛ̃ɛ ɔ nyɔ ɓěɔ̀ gbo, ké ɔ ɖá, “Ní mu ɖé Zádyɔún-hwɔ̀ɖɔ̀ɔ̀ mú dyiìn, ɓɛ́ ḿ ké ɓě mɔ̀à Jékɔ̀ɛ̀ xwíníín-dyù ɓě ɓɛ́ ɓě ɖǎà ɓěɛ̀ gma-ɖuà-ɖuàɔ̀ dyi táà kɛɛ póìn.

²¹ Dèè-wùɖù ɓɛ́ ḿ kè ɓě mu dèìn nyɛɛ kɛà kɛ̀. Ní Zùùɔ̀ mu ɓě kɔ̃ nììn kánáá pū, ké ní wuɖu ɓɛ́ ḿ ɖǎà ɓě wĩín poɛɛ se ɓě wĩín sɔ̀ɔ̌ mu, hwɛ̀ ḿ po níiń, ɓěɛ̀ dyú ɓěɔ̀ kè wa nììn dyú ɓě wĩín. Kǎà ɔ mu nììn sɔ̀ìn dà ké dyúa muɛ. Mɔ̄ Bounɓoɔ̀ mɔ̀ nyɔ cɛ̃à kɛ̀.”