Àzédyà 58 - Ɓǎsɔ́ɔ̀ Báɓòɔ̀

Wɔ̃-kɔ̃-hwèɖè-hwèɖè jɛ́ɛ́ɔ̀ jè

¹ Bounɓoɔ̀ cɛ̃ɛ ɖe, ké ɔ ɖá, “Páná mú ɖé wuɖu zoo mú. Mɔ̀ǔn ɖá ɓɛ́ m̀ ké m̀ mìɔùn dyí kpɔ̃. Kpa wuɖu dyií kà gã̀à-wùɖù nìà kɛ. Cɛ̃ ní nyɔ ɓě mɔ̀à Jékɔ̀ɛ̀ xwíníín-dyù ɓěɛɛ waà nàmàǔn ɓěɔ̀ jè wa gbo.

² Wa nì ḿ ɓièɛ̌n wé séín pū, ké wa mɔ́ ɖɛ mɔ̀ ní hwòɖǒɛ̀-mɔ́ɔ́-ɖɛ̀ɛ dyí dyuòɛ̀ dyi. Wa nyuɛ ké ɔ nì pū kà wa mɔ̀ɔ̌ kà dyí-sɛ́ɖɛ́ìn-ɖɛ̀-nyu-nyɔ̀, ké wa kpɔ̃ɔ́ kà mɔ̄ mɔ̀à waà Gèɖèpɔ́ɔ̀ kɛɛ gma ɓěɔ̀ dyiɛ. Wa diè ḿ dyi ɓá dyí-sɛ́ɖɛ́ìn-ɖɛ̀ ɓě wɔ̃ po jè dyí. Wa mɔ́ ɓɛ́ wa ké ḿ bũ̌in xwɛ̃́ìn.

³ “Ní nyɔ ɓě, ɓě cɛ̃ɛ ḿ gbo, ké ɓě ɖá, ‘Ɖɛ́ kɔ̃̀ jè à hwèɖèà wɔ̃ kɔ̃, ké mɔ̀ǔn dyéà kɛ́? Ɖɛ́ kɔ̃̀ jè à dyàà à mìɔùn ɓíɖíi, ké mɔ̀ǔn dèà à dyéɖé gboɛ́?’ Kɛɛ nìí, ɓó ɓěɛ̀ wɔ̃-kɔ̃-hwèɖè-tìɔ̀ ɓaɖaa, ɓě nyu ɓěɛ̀ hwòɖǒɛ̀-mɔ́ɔ́-ɖɛ̀, ké ɓě pĩ́à nyɔ séín ɓě ɓɛ́ wa nyu ɓě bìì kũ̀à kɛɛ dyi.

⁴ Gmɔ̀ nɔ̄, ɓě hwèɖè wɔ̃ kɔ̃, ɓɛ́ ɓě ké ɖɛín zà, ɓɛ́ ɓě ké vɔ̃, nìí ɓɛ́ ɓě ké ɓě mǔè ɖò hwòɖǒ-kɔ̃in-nyìnììn-ɓɔ̀táà taɓa. Wɔ̃-kɔ̃-hwèɖè-hwèɖè nì ná ɓɛ́ ɓě nyuà ɓó zɛ̃̌ɛ̀ kɛɛ seɛ nyuɛ ɓɛ́ìn ɓɛ́ ḿ ké ɓěɛ̀ wuɖuɔ̀ wɔ̃́ nɔ̄ dyɔún.

⁵ Ɓěɛ̀ hwòɖǒ ɖá wɔ̃-kɔ̃-hwèɖè-hwèɖè nì kàà mɔ̀ ɖɛ ní hwòɖǒ mɔ́e? Ɔ mɔ̀ ti ɓɛ́ nyɔ ɖò ké ɔ mìɔùn ɓíɖíi dyà pūe? Ɔ mɔ̀ ɓɛ́ nyɔ ké dú hwuɖu taɓa pū kà gɛ̃̀ǐn-pìǒ nyuà kɛ, ɓɛ́ ɔ ké ɖɔ-zɔ̃̀ mú po, ɓɛ́ ɔ ké tĩ́ɔ mú dyi kò pūe? Ɖɛ nìà kɛ mɔ̀ ɖɛ ɓě ɖáìn wɔ̃-kɔ̃-hwèɖè-wè mɔ̀ wé kɔ̃̀ jè ɓɛ́ mɔ̄ Bounɓoɔ̀ hwòɖǒ dèìn múin nyɛe?

⁶ “Wɔ̃-kɔ̃-hwèɖè-hwèɖè ɓɛ́ ní hwòɖǒ dèìn múin nyɛɛ mɔ̀, ɓɛ́ ɓě ké dyɔ̀ɔ̌ ɓɛ́ nyɔ-dyi-pĩ́à-nyɔ̀ ɓěɔ̀ sã̀ìn kà nyɔɛɛ buɛ̀, ɓɛ́ ɓě ké ɖúú ɓɛ́ nyɔ-dyi-pĩ́à-nyɔ̀ ɓěɔ̀ sã̀ìn kà gɛ̀ɛ̀ ɓɛ́ ɔ nìà nyɔ wa pĩ́à dyiɛ ɖɔɛɛ buɛ̀, ɓɛ́ nyɔɔ̀ ké buɛ̀-nyɔ̀ǔn kpá. Ɓě mɛ jaɖa gɛ̀ɛ̀ séín nì nyɔǔn ɓě ɖɔɛɛ ɓó dyi.

⁷ Ɖɛ ní hwòɖǒ dèìn múin ɖeɛɛ mɔ̀, ɓɛ́ ɓě ké ɓěɛ̀ ɖii-ɖɛ̀ɔ̀ ɖò nyɔ ɓɛ́ mɔ́ nì nyuɛń nyɛɛ nyí, ɓɛ́ ɓě ké gǎ-dyé-nyɔ̀ se pɛ̃́-naín kɔ̃̀ɛɛ ɓě ɓíɖí-taún dyà, ɓɛ́ ɓě ké nyɔ fɔ̀nɔ̀ gbɔɛɛ ɖɔún po, ɓɛ́ ɓě ké se ɓěɛ̀ ɖíí ɖò dyúa xwáɖáún pòìn.

⁸ “Ɓě dyiɛ náa nyu ní, nìí, ní ceɔ̀ mu ɓě fã̀ìn kà zɔ̃ zɔ̃à kɛ, ké ɓě mu dyi kánáùn wàɖà. Ɓěɛ̀ dyí-sɛ́ɖɛ́ìn-sɛ́ɖɛ́ìnɔ̀ mu ɓě dyúa nììn, ké mɔ̄ Bounɓoɔ̀ dĩ́ín-dĩ̀ìnɔ̀ mu ɓěɛ̀ dyí-gmɔ̀ìn-ɖɛ̀ jǔùn ɖé ɓě ɖeín.

⁹ Ɔ dyi ná nì, hwɛ̀ ké ɓě dyi ḿ ɓaà ní, nìí, ní mu ɓě gɔ̃̌ jǔùn. Ɓě dyi ḿ kpéi pòìn ní, ní mu ɓěɛ̀ kpé-po-wùɖùɔ̀ wɔ̃́ùn. “Ɔ jǔ ké ɓě dyi gɛ̀ɛ̀ mɔ̀à nyɔ-dyi-pĩ́à-pĩ́à kɛ kè nyɔ mǔè ɖò jìì-tò-tò, ɔ kè ɖɛ-gbà-cɛ̃-cɛ̃ ɖé ɓě hwìɛ̀ zà,

¹⁰ ké ɓě dyi ɓěɛ̀ ɖii-ɖɛ̀ púè ɓó nyɔ ɓɛ́ mɔ́ nì nyuɛń nyɛɛ bìì, ké ɓě dyi gǎ-dyé-nyɔ̀ gbo kpá ní, nìí, ní ceɔ̀ mu ɓě fã̀ìn ɖé tíe-kpòɔ̀ mú. Ɓěɛ̀ tíe-kpòɔ̀ mu ce mú zɛ̃̀ìn, ɓɛ́ ɔ ké fã kà dyóɖóaún sá-sá nìà kɛ.

¹¹ Ké ní mu ɓě nàìn kánáá pū, ɓɛ́ ḿ ké ɓěɛ̀ hwòɖǒ dyi dè dyììn ɖé ɓě ɖɛ nɔ̀mɔ̀ kɔ̃in kúɖúú nyí-nyí mú. Ké ní mu ɓěɛ̀ kpóɖó-dyùàɔ̀ dyi kánáìn, ké ɓě mu nììn kà ɓáá-ɖɛ̀ ɓɛ́ wa wáɖá ní gbo teeɛɛ nìà kɛ. Ɓě mu nììn kà ní-dù kɔ̃̀ mú ɓɛ́ ní sɔ̀ teeɛɛ nìà kɛ.

¹² Ké ɓě mu ɓěɛ̀ hwɔɖɔ ɓě ɖǎǒ zɔ̃̌ɔ̀ wáɖáa poùn ɖe. Ɓě mu waà hìɖì-kpà sùà ɓěɔ̀ dèìn ɖe. Ké wa mu ɓě gmɔ ɓěɔ̀ dɛ̀ ɓě ɖǎ wáɖáa gma-nyɔ̀ ɖáìn. Wa mu ɓě hwɔɖɔ-gboi-hwìè ɓěɔ̀ dyíin-nɔ̀mɔ̀ìn-nyɔ̀ ɖáìn.”

Pɛ́ɛ̀-ɖɛ̀ ɓá Gèɖèpɔ́ɔ̀ fɔ̀-wèɔ̀ wáká po jè dyíɛ

¹³ Bounɓoɔ̀ cɛ̃ɛ ɖe, ké ɔ ɖá, “Ɔ jǔ ké ɓě dyi ní fɔ̀-wè mɔ̀à ní wé hwɛ̀ǐn-hwɛ̀ǐnɔ̀ kɛɛ wáká po, ké ɓě dyiɛ kpéín dyé, ké ɓě se ɓěɛ̀ hwòɖǒɛ̀-mɔ́ɔ́-ɖɛ̀ nyu, mɔɔ ké ɓě se wuɖu fóɖóún wùɖù ní,

¹⁴ nìí, ɓě mu múàǔn kpáùn ɖé ḿ mú, ké ní muɛ nyuùn ɓɛ́ ɓěɛ̀ nyɛ́nɛ́ ké ɓóɖó-kpàɔ̀ dà séín mu. Ké ɓě mu ɖii-ɖɛ̀ ɓɛ́ ɔ mu ɓóɖó ɓɛ́ ḿ nyí ma kà ɓě ɓǎ Jékɔ̀ɛɛ kɔ̃ sɔ̀ùn wɛ̃ɛ ɖiìn. Mɔ̄ Bounɓoɔ̀ mɔ̀ nyɔ cɛ̃à kɛ̀.”