Àzédyà 57 - Ɓǎsɔ́ɔ̀ Báɓòɔ̀

Gèɖèpɔ́ɔ̀ kpɔ̃̀ìn Éézùɖùɛ̀-nyɔ̀ ɓěɔ̀ zaa ɓá waà kũùn-kpò ɓiè jè dyí

¹ Bounɓoɔ̀ cɛ̃ɛ ɖe, ké ɔ ɖá, “Dyí-sɛ́ɖɛ́ìn-nyɔ̀ mɛ́, ké nyɔ ɖò ní poɛ̀n jè hwìɖǐi. Jǎà-nyɔ̀ mɛ́, ké nyɔ ɖò seɛ múin wɔ̃́. Kɛɛ dyí-sɛ́ɖɛ́ìn-nyɔ̀ dyi mɛ́ ní, ɔ ɖǎ ɖɛ gbà xwaún pó.

² Nyɔ ɓɛ́ ɔ cĩ́ fɛ̀ɛ̀ sɛ́ɖɛ́ìn dyíɛɛ dyi gĩɔ mu ní, ɔ mɔ̀ gìɖìǐ kè fɔ̀-fɔ̀ ɓó ɔ bìì.

³ “Kɛɛ ɓě mɔ̀ nyɔ ɓě muà jìɖǐ-ɓuɖu-hwĩ̀ɔ̀ ɓě gbo, ké ɓě ɓièà kũùn-kpò-gèɖèpɔ́ɔ̀ ɓěɛɛ, ɓě xwɛ̃́ìn nɔ̄ ḿ bũ̌in, ɓɛ́ ḿ ké ɓěɛ̀ zaa wɔ̃ po.

⁴ Nyɛ́ mɔ̀ nyɔ ɓě nìà dyɔ́ ɓaɖauń wɛ̃́? Nyɛ́ mɔ̀ nyɔ kɔ̃̀ jè ɓɛ́ ɓě fɔ̀nɔ̀à wɔ̃, ɓɛ́ ɓě dyià ɔ miɔ kíɖíí tò kɛ́? Má, ɓě mɔ̀ ḿ kɛ́ɛ́-mú-nyu-nyɔ̀ kè se-tɔ́mɔ́-nyɔ̀ ɓěe?

⁵ Má, ɓě ɓiè kũùn-kpò-gèɖèpɔ́ɔ̀ ɓěɔ̀ ɖé óò-cù ɓě kè cu gùsùù tɔ̀ɔ̀ ɓě xwíɖíi dyììn ɖé gbàɖàùn-po-po múe? Ɓě zàìn ɓěɛ̀ dyú ɓěɔ̀ sáa ɖé sɔ́ɔ́-ɓì ɓě mú, ɖé bɔɔ-kpà ɓě kɔ̃.

⁶ Ɓě ɖú sɔ́ɔ́-kpò ɓɔ̀ɖɔ̀ɔ̀-ɓɔ̀ɖɔ̀ɔ̀ ɓě dyí ɖé bɔɔ-kpà ɓěɔ̀ kɔ̃, ké ɓě nyu wa ɓěɛ̀ gèɖèpɔ́ɔ̀ ɓě mú, ké ɓě ɓiè wa. Ɓě púè náá-ɖɛ̀-sàǎ-zàìn-ɖɛ̀ ɓě ɓó wa dyúa, ké ɓě dyà wa ɖii-ɖɛ̀-sàǎ-zàìn-ɖɛ̀ ɓě. Ɓěɛ̀ hwòɖǒ ɖá ɖɛ ɓěɛ̀ dè ḿ hwìɖǐie?

⁷ Ɖéé ɖé toɖo tɔ̀mɔ̀ dya ɓě dya, ɖé mɔ̀ ɓěɛ̀ gbàɖàùn-pòìn-naín, ké ɖéɛ̀ ɓě mu sáa zà naín ɖekè.

⁸ Ɓě táà ḿ ɓiè jè dyi, ké ɓě nyànàìn ɓěɛ̀ kũùn-kpò ɓěɔ̀ ɓó ɓěɛ̀ gbǒ-kĩ̀ǐn ɓěɔ̀ ɖeín dyi. Ɓě zà ɖɔún dyi, ké ɓě kè ɓěɛ̀ gmaɖe ɓě ɓɛ́ ɓě ɖǎà pɛ́ɛ̀ ɓó gbo pɛ̃́ jèɛɛ dyá ɖé ɓěɛ̀ kɔ̃-pɛ̃́-ɖɛ̀ vɛ̀nɛ̀ ɓěɔ̀ kɔ̃, ké ɖéɛ̀ ɓě nyùìn ɓěɛ̀ fɔ́ɔ̀ mɔ́ɔ́-ɖɛ̀ ɓěɔ̀.

⁹ Ɓě fiè ɓěɛ̀ cáná nɔ̀mɔ̀ nyɔ́ún dú kò-kò ɓěɔ̀, ké ɓě mu, ɓɛ́ ɓě ké ɓěɛ̀ gèɖèpɔ́ɔ̀ mɔ̀à Móɖɛ̀ kɛɛ ɓiè. Ɓě ɖoɓo ɓěɛ̀ kíá ɓěɔ̀ ɖé ɓóɖó-kpàà dà séín, ɓɛ́ wa ké gèɖèpɔ́ɔ̀ ɓě ké ɓièɛɛ dyi mɔ́, hwɛ̀ ḿ po níiń, dɛ̀ nyɔ ɓě ɖǎà mɛ́ɛ nìà kɛ.

¹⁰ Ɓě mìɔùn nììn nyuu-ɖɛ̀ ɓěɔ̀ nyuɛ ké ɓě sa mìɔ, kɛɛ ɓě seɛ cɛ̃, ɓɛ́ ɓě ké níiń, ‘Ɖɛ nìà kɛ se kpáná ɖò mú nì.’ Ɓě po ɓě mìɔùn kpéí ɖe, ké ɓě ní sa.

¹¹ “Nyɛ́ mɔ̀ nyɔ poà kà ɓě fã̀àǔn, ɓɛ́ ɓě dyià se tɔ́mɔ́, ké ní jè seà ɓě hwìɖǐi nì ɖe, mɔɔ ké ɓě ní poìn kà ḿ jè hwìɖǐi fɔɔ cá kɛ́? Má, ḿ kpɔ̃ ḿ mìɔùn dyí, ké ḿ se ɖɛ ɖò ɓě bũ̌ nyu ɓó ti cɛ̃̀ kà ɓoún wɛ̃̀ jè, ké ɓě seà ḿ dyi fɛ̃̀ìn nyɛ̀e?

¹² Ní mu ɓěɛ̀ nyuu-ɖɛ̀ ɓě ɓɛ́ ɓě ɖáìn ɓěɛ̀ dyí-sɛ́ɖɛ́ìn-sɛ́ɖɛ́ìn nyɛɛ píé dyàùn, kɛɛ wa se ɓě kpáná ɖò dyí nyuɛ́ mu.

¹³ Ti ɓě mu ɖáuń nììn ɓó gbo-kpá-kpá jèɛɛ, nìí, ɓěɛ̀ kũùn-kpò kúɖúú ɓěɔ̀ mɛ dyi, ɓɛ́ wa ké ɓě póìn dɔ̃̌ùn. Pìɔ̌ mu wa kpaùn, hwɛ̀ ḿ po níiń, pìɔ̌ sɔ̀à nyɔ máná-ɓìǐn nyɛɛ mu wa kpaùn. Kɛɛ nyɔ mɔ̀ nyɔ ɓɛ́ ɔ mu ɖé ḿ gbo pèɖèìn nyɛɛ, ɔ mu ɓóɖóɔ̀ wuɖuí kɔ̃̀ùn, ké ní toɖo hwɛ̀ǐn-hwɛ̀ǐnɔ̀ mu ɔ kɔ̃̀ɔ̀-ɖɛ̀ jǔùn kánáá pū.”

Gèɖèpɔ́ɔ̀ ɖáìn ɔ nyɔ ɓěɔ̀ nyɛ́nɛ́ín kà ɔ mu wa gbo kpáùn ké ɔ mu wa dyi kánáìn nyɛ

¹⁴ Bounɓoɔ̀ cɛ̃ɛ ɖe, ké ɔ ɖá, “Ɓě nyu hwìèɔ̀. Ɓě naɓaà hwìèɔ̀. Ɓě zà dyí-gbǒ-ɖɛ̀ séín ɓó ní nyɔ ɓěɔ̀ hwìèɔ̀ dyí.

¹⁵ “Mɔ̄ mɔ̀ Gèɖèpɔ́ɔ̀ hwɛ̀ǐn-hwɛ̀ǐn ɓɛ́ ḿ nì ɖéé ɖé ɖɛ séín kɔ̃in nyɛ. Mɔ̄ mɔ̀ nyɔ cĩ́ ɓó sè-ná-sèɛ̀ tiín. Ní cĩ́-naín nìà ɖéé ɖé dyiíɛɛ hwɛ̀ mú, ké ḿ cĩ́ ɖé nyɔ ɓě ɓɛ́ wa dyà wa mìɔùn ɓíɖíi, ké wa kpá wìǐn ɓó waà ɖɛ gbà ɓěɔ̀ jèɛɛ mú ɖekè, nìí ɓɛ́ ḿ ké waà hwòɖǒ-dyùàɔ̀ kpéí po.

¹⁶ Mɔ̄ mɔ̀ nyɔ nyí ma ní nyɔ ɓěɔ̀ fɛ̀ɛ̀, ké ḿ se wa zaa kpɔ̃̀ǐn mu kánáá pū, mɔɔ ké ḿ se wa dyoɖoún kpáǐn mu kánáá pū. Ɔ dyi ná nìǐn, nìí, waà nyɔ ɖò se cĩ́ɛ mu.

¹⁷ Ḿ kpáìn ma wa dyoɖoún ɓó waà nàmàǔn mɔ̀à ɖɛ-mɔ́-mɔ́ kánáá pūɛɛ jè. Ḿ kpáìn ma wa dyoɖoún, ké ḿ tò ma wa gǎ kɔ̃, ké ḿ pòìn ma wa dyúa xwáɖáún. Kɛɛ wa pòìn ma ḿ kɔ̃ín, ké wa nì ma waà hwòɖǒɛ̀-mɔ́ɔ́-ɖɛ̀ nyuɛń.

¹⁸ “Ḿ ɖǎ waà xwai-nyu-ɖɛ̀ ɓěɔ̀ dyé, kɛɛ ní mu wa dyi kánáìn. Ní mu wa nàìn, ɓɛ́ ḿ ké wa gbo kpá, ké ní mu nyɔ ɓě nì vĩ̌ɛń nyɛɛ hwòɖǒ dyi dèìn.

¹⁹ Ní mu nyɔ ɓě ɓɛ́ wa tɔ̀mɔ̀ gboɛ kè nyɔ ɓě ɓɛ́ wa xwɛ̃́ìn dyiɛɛ gìɖìǐ gbo dyàùn, ké ní mu wa dyi kánáìn.

²⁰ Kɛɛ hwòɖǒ-kɔ̃in-nyìnììn-nyɔ̀ kè dyóó-kpɛ̀ hwɔìn ní. Ɔ ní fɔ̀. Ɔ níɔ̀ nì sĩ̀ɔ̌ kè pɔ̃ dyií dyàǔn kánáá pū.

²¹ Gìɖìǐ ɖò se nì ɓó hwòɖǒ-kɔ̃in-nyìnììn-nyɔ̀ɔ̀ bìì.” Kǎà ní Gèɖèpɔ́ɔ̀ ɖá.