Àzédyà 56 - Ɓǎsɔ́ɔ̀ Báɓòɔ̀

Ɓóɖó-dù kà kò ɖò ɓěɛ̀ nyɔ ɓěɔ̀ mu Gèɖèpɔ́ɔ̀ nyɔ ɓě jǔùn ɖekè

¹ Bounɓoɔ̀ cɛ̃ɛ ɖe, ké ɔ ɖá, “Ɓě kpɔ̃ jǎà-ɖɛ̀-wɔ̃-po-po kɔ̃in, ɓɛ́ ɓě ké dyí-sɛ́ɖɛ́ìn-ɖɛ̀ nyu kánáá pū, sepóɛɖé ɔ se hwèɖèɛ̌n mu, ké ní mu ɓě póìn dyììn ɖé ní nyɔ-póìn-kpèɔ̀ mú.

² Mana nì nyɔ mɔ̀ nyɔ ɓɛ́ ɔ po ní fɔ̀-wèɔ̀ wáká, ké ɔ seɛ zùǔn zàìn nyɛɛ kɔ̃. Ɔ mɔ̀ nyɔ ɓɛ́ ɔ ní kpa ɖɛ gbà sɔ̃ún wɛ̃.”

³ Ɓóɖó-dù kà kò ɖòɛ̀ nyɔ ɓɛ́ ɔ ɖǎ Bounɓoɔ̀ nyɔ ɓěɔ̀ hwìɛ̀ kpá, ɓɛ́ ɔ ké ɔ nyɔ ɓěɔ̀ ɖò jǔɛɛ mɛ ɓɔ́ɔ cɛ̃ɛ, ɓɛ́ ɔ ké níiń, “Bounɓoɔ̀ mu ḿ ɔ nyɔ ɓěɔ̀ hwìɛ̀ zàùn.” Ké gàa ɓɛ́ ɔ se gàa mɔɔ wa nyuɛ ké ɔ se gàa kɛɛ mɛ ɓɔ́ɔ cɛ̃ɛ, ɓɛ́ ɔ ké níiń, “Bounɓoɔ̀ mu ḿ ɔ nyɔ ɓěɔ̀ hwìɛ̀ zàùn, sepóɛɖé ḿ mɔ̀ cu sùà.”

⁴ Ɖɛ ɓɛ́ Bounɓoɔ̀ cɛ̃ɛ kɛà kɛ̀. Ɔ ɖá, “Gàa ɓɛ́ ɔ se gàa, kɛɛ ɔ po ní fɔ̀-wèɔ̀ wáká, ké ɔ gã ɖɛ ɓě ɓɛ́ wa dè ní hwòɖǒ dyiɛ, ké ɔ kpɔ̃ ní dèè-wùɖùɔ̀ kɔ̃in kóɖó-kóɖóɛɛ,

⁵ ní mu nyɔ nì náa nyɛ́nɛ́ céèìn ɓó nyɔ-ɖɛ-hwìɖǐi-dyàìn-ɖɛ̀ ɖò kɔ̃, ɖé ní gbǒɔ̀ mú. Ɔ mu ɖɛ kpaùn ɖé ɔ gbo ké ɔ zi gàa-dyù kè màa-dyù ɓě wóɖóìn-wóɖóìn dyí. Ní mu ɔ sè-ná-sèɛ̀ nyɛ́nɛ́ ɖò jǔìn, ké ɔ jè se dyi ziɛ́ mu.

⁶ “Ké ɓóɖó-dù kà kò ɖò ɓěɛ̀ nyɔ ɓě ɓɛ́ wa ɖǎà ní nyɔ ɓěɔ̀ hwìɛ̀ kpá, ɓɛ́ wa kéà ní kũ̀à nyu, ɓɛ́ wa kéà ní nyɛ́nɛ́ɔ̀ jè kàmà, ɓɛ́ wa kéà ní gbo-nì-nyɔ̀ ɓě jǔ, ké wa poà ní fɔ̀-wèɔ̀ wáká, ké wa seà ɔ jè zùǔn zàìn, ké wa kpɔ̃à ní dèè-wùɖùɔ̀ kɔ̃in kóɖó-kóɖóɛɛ,

⁷ ní mu nyɔ nì ná ɓěa nɔ̄ ní toɖo hwɛ̀ǐn-hwɛ̀ǐnɔ̀ gbo dyàùn, ɓɛ́ ḿ kéɛ nyu ɓɛ́ wa ké múàǔn kpá ɖé gbǒ kɔ̃̀ mú ɓɛ́ wa ɓaà ḿ wɛ̃, ké ní mu waà fɔ̃ɔ-sàǎ-zàìn-ɖɛ̀ ɓěɔ̀ kè sáa-zàìn-ɖɛ̀ tɔ̀ɔ̀ ɓě ɓɛ́ wa mu ɓó ní sáa-kɔ̃-zàìn-gbààɔ̀ kɔ̃ nyùìn nyɛɛ jè dyi kpɔ̃ùn, sepóɛɖé wa mu ní gbǒɔ̀ ɓaàìn-naín ɖáìn ɓó nyɔ séín bìì.”

⁸ Bounɓo Ɖɛɓíɔ́ ɓɛ́ ɔ poìn kà ɔ nyɔ ɓě mɔ̀ Éézùɖùɛ̀-nyɔ̀ ɓě ɓɛ́ wa mɔ̀ ma kà toɛ̀-kpɔ̃-nyɔ̀ ɓěɛ dyíɛɛ cɛ̃ɛ ɖe, ké ɔ ɖá, “Ní mu nyɔ ɖíɛ́ ɓě dyí poìn ɖe, ɓɛ́ wa ké ní nyɔ ɓěɔ̀ kɔ̃ kpá.”

Zaa wáɖá Éézùɖùɛ̀-ɓòɖòɔ̀ wuɖuí-kɔ̃̀-nyɔ̀ ɓěɔ̀ dúún

⁹ Bounɓoɔ̀ cɛ̃ɛ ɖe, ké ɔ ɖá, “Ɓě mɔ̀ nimii séín nì ɖé xwáɖá xwíɖíiɛɛ, ɓě dyi ɖɛ tà.

¹⁰ Éézùɖùɛ̀-nyɔ̀ ɓěɔ̀ dyí-gmɔ̀-nyɔ̀ séín ɓěɔ̀ kpè dyéɖéín dyi. Waà nyɔ ɖò se hwòɖǒ fɔ̀nɔ̀. Wa hwɔìn gbǒ-dyí-gmɔ̀-gbè ɓɛ́ ɔ se gbɔ̌ɔ ɓɛ́ìn nyɛ. Wa pɛ̃́ dyi, ké wa nì dyauń pū. Wa kàmà nyíɔ mɔ́ jè.

¹¹ Gbe ɓěɔ̀ kàmà ɖii-ɖɛ̀ jè. Wa ní ɖoɓo. Éézùɖùɛ̀-nyɔ̀ ɓěɔ̀ dyí-gmɔ̀-nyɔ̀ ɓěɛ̀ ní wɔ̃́ ɖɛ múin ɖekè. Wa ɖǎ wa mìɔùn nììn hwòɖǒɛ̀-mɔ́ɔ́-ɖɛ̀ gbo gmɔ̀ìn. Waà nyɔ ɖò-ɖò séín nìǎ ɔ mìɔùn nììn kpáná poɛń.

¹² Wa cɛ̃ìn cɛ̃̀ìn gbo, ké wa ɖá, ‘Ɓě dyi, ɓɛ́ ɓěà ké wã́ìn kè náá-ɖɛ̀ kàmà-kàmà ná. Kà zɛ̃̌ɛ̀ nyuà nìɛ̀ kɛɛ, kǎà gàɖàà mu nììn, mɔɔ ɔ mu kɔ̃ ziìn.’ ”