Àzédyà 54 - Ɓǎsɔ́ɔ̀ Báɓòɔ̀

Ɖɛ̀ɓɛ̀ǐn-ɖɛ̀ɓɛ̀ǐn ɓɛ́ Bounɓoɔ̀ ɓéɖé ɓó Éézùɖùɛ̀-nyɔ̀ ɓěɔ̀ bììɛ

¹ Bounɓoɔ̀ cɛ̃ɛ ɖe, ké ɔ ɖá, “Jùɖúsɛ̀ɖɛ̀ìn-hwɔ̀ɖɔ̀ wè, mɔ̀ hwɔìn kà ɖàà-màà kɛɛ, nyu múà-kùɖǔ-kuɖu. Mɔ̀ mɔ̀ nyɔ ɓɛ́ m̀ séè kà póó-gbò ɖeín nì ɖòɛɛ, kpá múàǔn, ɓɛ́ m̀ ké mú páná. Sepóɛɖé mɔ̀ mɔ̀ nyɔ seà dyú ɖò ɓéɖéɛɛ, nì dyú mu dyí vòùn, ɓɛ́ ɔ ké màa tɔ̀ɔ̀ ɓě dyí zi.

² Ɓúáìn nì jàɖàìn-gbòɔ̀ dyí. Nyuɛ ɓɛ́ ɔ sã̀ìn-ɖùǔ ɓěɔ̀ ké tɔ̀mɔ̀. Poɛ ɓóɖóún-kɔ̀ìn-cù ɓěɔ̀ ɓóɖóún ɖe mìɔ.

³ Sepóɛɖé nì xwíníín-dyù ɓěɔ̀ mu ɓóɖóɔ̀ kɔ̃ dyi gbɛ̀ìn ɖé wáká séín kɔ̃. Wa mu ɓóɖó-dù ɓěɔ̀ dyí ɖúùn, ɓɛ́ wa ké waà hwɔɖɔ fóɖóún ɓěɔ̀ mú cĩ́.

⁴ “Ɓɔ́ fɛ̃̀ìn, sepóɛɖé dɛ̃ se m̀ nyuɛ́ mu ɖe. Ɓɔ́ fã̀à peɖeɛ, sepóɛɖé nyɔ ɖò se m̀ zùǔn zàǐn mu ɖe. Dɛ̃-ɖɛ̀ ɓě ɓɛ́ m̀ dyé ma dyí ɓó nì dyú-tìǐn nyɛɛ mu m̀ hwìɖǐi sɔ̀ùn, ké zùǔn-zàìn-zàìn ɓɛ́ wa nyu zɔ̃̌ɔ̀ kà m̀ bũ̌ ɓó nì jɔ̌ɔ̀-nyɔ̀nɔ̀-tìɔ̀ ɓaɖaa ɖò se m̀ hwìɖǐi nìɛ̌ mu ɖe.

⁵ Sepóɛɖé mɔ̄ mɔ̀ nyɔ mɛà m̀ wɛ̃ɛ hwɔìn nì dyú-ɓǎ. Ní nyɛ́nɛ́ mɔ̀ Bounɓo mɔ̀ nyɔ nìà ɖɛ séín kɔ̃in nyɛ. Mɔ̄ Éézùɖùɛ̀ɛ̀ Mú-hwɛ̀-nyɔ̀ɔ̀ mɔ̀ nì póìn-nyɔ̀. Mɔ̄ mɔ̀ Gèɖèpɔ́ɔ̀ mɔ̀ nyɔ kɔ̃̀à ɓóɖó-kpà gànáɔ̀ wuɖuíɛ̀.

⁶ “Mɔ̄ Bounɓo mɔ̀à nì Gèɖèpɔ́ɔ̀ kɛɛ ɖá m̀ ɖe kà nyɔ ɖáà màa ɖò ɓɛ́ ɔ dyú-ɓǎ wã ɔ kɔ̃, ké ɔ nì wìì múɛɛ ɖeɛ. Ɔ hwɔìn kà nyɔ ɖáà màa ɓɛ́ ɔ kpɔ̃ dyú-ɓǎ dyi ɖé ɔ nyɔ-gmɔ̀-tìɔ̀ mú, hwɛ̀ ké ɔ dyú-ɓǎɔ̀ wãà ɔ kɔ̃ɛɛ ɖeɛ.

⁷ Ḿ táà ma m̀ dyi ɓó ti wè mú, kɛɛ ní mu m̀ wìǐn dyéìn ɖe mìɔ, ké ní mu nì nyɔ ɓěɔ̀ dyí poìn ɖe.

⁸ Ḿ pòìn ma m̀ dyúa xwáɖáún ɓó ti wè mú, sepóɛɖé ní dyoɖo-hwòɖòɔ̀ zi ma wɔ̃ kuɛń mìɔ. Kɛɛ ní mu m̀ wìǐn dyéìn ɖe, dyììn ɖé ní ɖɛ̀ɓɛ̀ǐn-ɖɛ̀ɓɛ̀ǐn se-sèìn-naín-kɔ̃̀ɔ̀ mú. Mɔ̄ Bounɓo mɔ̀à nì póìn-nyɔ̀ɔ̀ kɛɛ mɔ̀ nyɔ cɛ̃à kɛ̀.

⁹ “Ti nìà kɛ hwɔìn Nóà-tìǐn ɖé ḿ gbo. Kà ḿ nyuɛ ma kà Nóà nyɛ́nɛ́ín ɖáìn kà ḿ se ní-tò ɖò ɓóɖó-kpàɔ̀ kɔ̃ tòɛ̌ mu ɖeɛɛ, kà dyúáɖòɔ̀ kǎà ḿ nìɛ̀ m̀ nyɛ́nɛ́ín ɖáǐn kà ḿ se m̀ dyoɖoún kpáǐn mu, ɓɛ́ ḿ ké m̀ gǎ kɔ̃ tò ɖeɛ.

¹⁰ Kɛbì toɖo vɛ̀nɛ̀ ɓěɔ̀ mɛ túò dyi, ɓɛ́ toɖo mɛ́nɛ́ɛ́ ɓěɔ̀ ké daí sɔ̀ìn nyɛɛ, ní ɖɛ̀ɓɛ̀ǐn-ɖɛ̀ɓɛ̀ǐn se-sèìn-naín-kɔ̃̀ɔ̀ mu ɓó m̀ gbo nììn kánáá pū, ké ní dèè-wùɖù ɓá gìɖìǐ jè dyíɛɛ mu ɓó m̀ gbo nììn kánáá pū. Mɔ̄ Bounɓo mɔ̀à m̀ wìǐn-dyé-nyɔ̀ɛɛ mɔ̀ nyɔ cɛ̃à kɛ̀.”

Kà Jùɖúsɛ̀ɖɛ̀ìn-hwɔ̀ɖɔ̀ɔ̀ mu nìɛ̀ nyuùn ɖé dyúa kɛ

¹¹ Bounɓoɔ̀ cɛ̃ɛ ɖe, ké ɔ ɖá, “Óó Jùɖúsɛ̀ɖɛ̀ìn-hwɔ̀ɖɔ̀ wè, mɔ̀ mɔ̀ nyɔ ɓɛ́ wa dyéìn kà gǎ kɛɛ, mɔ̀ mɔ̀ nyɔ ɓɛ́ dìì vũà kà dyi, ɓɛ́ nyɔ kéà nì hwòɖǒ dyi dèɛɛ ɖò seà nìɛɛ, sɔ́ɔ́ ní mu m̀ pòìn ɖeɛɛ mɔ̀ sɔ́ɔ́ kpa ɖɛ ɓě. Ɖɛ ní mu nì hìɖì-kpàɔ̀ dèìn nyɛɛ mɔ̀ sɔ́ɔ́ kpa ɖɛ kɔ̃̀ nyɛ́nɛ́ mɔ̀à sááfɔ̀ kɛ.

¹² Ɖɛ ní mu nì dyí-gmɔ̀ìn-gbò ɓěɔ̀ pòìn nyɛɛ mɔ̀ sɔ́ɔ́ kpa ɖɛ kɔ̃̀ nyɛ́nɛ́ mɔ̀à wúɖúɓì kɛ, ké ɖɛ ní mu nì gmɔɔ̀ kè nì gmɔ-wɔ̃̀ ɓěɔ̀ pòìn nyɛɛ mɔ̀ sɔ́ɔ́ kpa ɖɛ saá-saá.

¹³ “Mɔ̄ Bounɓoɔ̀ mɔ̀ nyɔ mu nì dyú séín ɓěɔ̀ ɖɛ tɛ̀mɛ̀ìn, ké wa mu mú zaìn.

¹⁴ Dyí-sɛ́ɖɛ́ìn-sɛ́ɖɛ́ìn mɔ̀ ɖɛ mu m̀ dyi kùìn, ké nyɔ ɖò se m̀ dyi pĩ́àǎ mu fɔɔ cá. Ɖɛ ɖò se m̀ fã̀àǔn poɛ́ mu. Fã̀à-ɖɛ̀ ɖò se m̀ bũ̌in xwɛ̃́ǐn mu.

¹⁵ Nyɔ ɖò dyi m̀ to kɔ̃ dyà ní, ɔ se ní nyuu-ɖɛ̀. Nyɔ mɔ̀ nyɔ ɓɛ́ ɔ mu m̀ to kɔ̃ dyàùn wɛ̃ɛ mu ɓó m̀ dyúa dyi kpáùn.

¹⁶ “Gmɔ̀ nɔ̄, mɔ̄ mɔ̀ nyɔ mɛ ɓé-pa-nyɔ̀ ɓɛ́ ɔ poà nyɛ dyí, ɓɛ́ ɔ dyià toún-vɔ̃̀ìn-ɖɛ̀ ɓě ɓaɖa kɛ. Ké mɔ̄ mɔ̀ nyɔ mɛ sójà ɓě ɓɛ́ wa ɖúà toún-vɔ̃̀ìn-ɖɛ̀ ɓěɔ̀ dyí ní, wa dyià ɖɛ mú gbɔɔ̀ kɛ.

¹⁷ Kɛɛ nyɔ mɔ̀ nyɔ ɓɛ́ ɔ dyéìn toún-vɔ̃̀ìn-ɖɛ̀ ɖò ti ɓó m̀ gbo vɔ̃ jèɛɛ sɔ̃ se m̀ wɔ̃ ziɛ́ mu, ké nyɔ mɔ̀ nyɔ ɓɛ́ ɔ sɔ̀ dyí, ɓɛ́ ɔ ké m̀ zaa kpɔ̃̀ìn nyɛɛ, nì mu ɔ zaa dúún wáɖáùn. Ɖɛ nìà kɛ mɔ̀ ɖɛ ɓɛ́ ḿ nyí ní gbo-nì-nyɔ̀ ɓěɔ̀, ɓɛ́ ɔ ké waà kɔ̃̀ɔ̀-ɖɛ̀ jǔ kánáá pū kɛ. Kǎà ní mu wa póɛ̀n nyuùn. Mɔ̄ Bounɓoɔ̀ mɔ̀ nyɔ cɛ̃à kɛ̀.”