Emɔ́ 9 - Ɓǎsɔ́ɔ̀ Báɓòɔ̀

Bounɓoɔ̀ mu Éézùɖùɛ̀-nyɔ̀ ɓěɔ̀ gǎ kɔ̃ tòùn

¹ Ké Ɖɛɓíɔ́ɔ̀ tɛ̀mɛ̀ìn ma ḿ ɖɛ ɖò dyí ɖe ɓá ɓě jè dyí. Ḿ dyé ma Ɖɛɓíɔ́ɔ̀ ɓó sáa-kɔ̃-zàìn-gbààɔ̀ wáún dyi nyànàà, ké ɔ ɖá, “Ɓě tĩ́ ní gbǒɔ̀ cúè-ɓò ɓěɔ̀ dú-hwìɛ̀, ɓɛ́ gbǒ gànáɔ̀ ké dyi túò. Ɓě jaɖa cúè-ɓò ɓěɔ̀, ɓɛ́ gbǒɔ̀ ké nyɔ ɓěɔ̀ kɔ̃in wáɖáìn. Nyɔ ɓě sè ɓóɛɛ, ní mu wa gàsíà dyí ɖáɓáùn. Waà nyɔ dyúáɖò se xwáɖáún kpáa mu dyɛ mɔ̀ùn. Waà nyɔ dyúáɖò se póɛ mu.

² Kɛbì wa mɛ ɓúɖú ɓí, ɓɛ́ wa ké ɖé dɛ̀ ɓɛ́ nyɔ ɓě ɖǎà mɛ́ɛ nìà kɛ nyiniɛɛ, ní sɔ̃ɔ̀ mu ɖé wa zàùn wɛ̃́ɛ́. Kɛbì wa mɛ dyá ɖé dyɔún wɛ̃ɛ, ní mu wa ɓíɖíi dyàùn ɖe.

³ Kɛbì wa mɛ vǐè wa mìɔùn ɖé Kámɛ̀-tòɖòɔ̀ dú-hwìɛ̀ kɛɛ, ní mu wa dyi mɔ́ùn wɛ̃́ɛ́, ɓɛ́ ḿ ké wa kpɔ̃. Kɛbì wa mɛ vǐè ḿ dyí ɖé dyóóɔ̀ hwuɖuɛɛ, ní muɛ ɖɔ-sɛ̀ɔ̀ gbo cɛ̃ìn, ɓɛ́ ɔ ké wa numu.

⁴ Kɛbì waà mú-nyɛ́-nyɔ̀ ɓěɔ̀ mɛ kpɔ̃̀ìn wa ganaún, ɓɛ́ wa ké wa ɓóɖó ɖìàǔn kpa kɛɛ, ní mu ɖé gàsíàɔ̀ wuɖu kɔ̃ zàùn, ɓɛ́ ɔ ké wa ɖáɓá. Ní mu wa dyéɖé gbo dèìn, ɓɛ́ ḿ ké wa ɖɛ gbà kɔ̃ dyà, ké ɔ se ɖɛín-ɖɛ̀ jǔɛ mu. Mɔ̄ Bounɓoɔ̀ mɔ̀ nyɔ cɛ̃à kɛ̀.”

^5-6 Nyɔ muà ɓě gǎ kɔ̃ tòùn wɛ̃ɛ, ɔ nyɛ́nɛ́ mɔ̀ Bounɓo. Ɔ mɔ̀ Gèɖèpɔ́ɔ̀ nìà ɖɛ séín kɔ̃in nyɛ̀. Ɔ mɔ̀ nyɔ dyià ɓóɖó-kpàà dyi tìnììn ní, ɔ kéà dyi túò, ɓɛ́ fũ̀à-fṹá kéà nyɔ séín cĩ́à ɖéɛ múɛɛ nyu kɛ̀. Ɔ mɔ̀ nyɔ nyuɛ ɓɛ́ ɓóɖó-kpà gànáà dyi dyá, nìí, ɔ dyià ma ɖe kà ní vɛ̀nɛ̀ mɔ̀à Náà nìà ɖé Íjè-ɓòɖòɔ̀ kɔ̃ɛɛ nyuà kɛ̀. Ɔ mɔ̀ nyɔ poà ɔ cĩ́-naínɔ̀ ɖé dyɔún, ɓɛ́ ɔ dyià dyɔɔ̀ ɖé ɓóɖó-kpàà kɔ̃in po kɛ̀. Ɔ mɔ̀ nyɔ ɖáà ní sɔ̀à ɖé dyóóɔ̀ kɔ̃ɛ, hwɛ̀ ɓɛ́ ɔ dyiàà ɓóɖó-kpàà kɔ̃ púè ɖe kɛ̀.

⁷ Bounɓoɔ̀ cɛ̃ɛ ɖe, ké ɔ ɖá, “Éézùɖùɛ̀-dyù ɓě, ɓě se ɖɛ kpa ɖe ɖé ḿ gbo. Ɓě kè Kúsì-nyɔ̀ ɓěɔ̀ ɖǎ hwɔìn. Kà ḿ zà ma kà ɓě ɖé Íjè-ɓòɖòɔ̀ kɔ̃ɛɛ, kà dyúáɖòɔ̀ kǎà ḿ zà ma Féɖésìà-nyɔ̀ ɓěɔ̀ ɖé Kátɔ̀-ɓòɖòɔ̀ kɔ̃, ké ḿ zà ma Síwíɖíà-nyɔ̀ ɓěɔ̀ ɖé Kíì-ɓòɖòɔ̀ kɔ̃ ɖekè.

⁸ Gmɔ̀ nɔ̄, mɔ̄ mɔ̀à Bounɓo Ɖɛɓíɔ́ kɛɛ, ḿ nì ɓěɛ̀ hwòɖǒ-kɔ̃in-nyìnììn-ɓòɖòɔ̀ dyéɛń. Ké ní muɛ mú gbɔɔ̀ùn, ɓɛ́ ɔ jè ké ɓóɖó-kpàɔ̀ kɔ̃ dyi zi. Kɛɛ wɛ̃́ɛ́ kɛɛ, ḿ se ɓě mɔ̀à Jékɔ̀ɛ̀ xwíníín-dyù ɓěɔ̀ kɛɛ séín mú gbɔɔ̌ mu.

⁹ “Kɛɛ ní mu wuɖu tòùn, ké wa mu ɓě mɔ̀à Éézùɖùɛ̀ɛ̀ xwíníín-dyù ɓěɔ̀ kɛɛ ɖeìn ɖé ɓóɖó-dù ɓěɔ̀ hwìɛ̀ kà nyɔ ɖeà mɔɔ́ kɛ. Ní mu ɓě ɖeìn, ɓɛ́ ḿ ké nyɔ séín se kpáná ɖò mú nìɛɛ ɖé ɓě hwìɛ̀ dyi zà.

¹⁰ Nàmàǔn-nyɔ̀ séín nì ɓě mɔ̀à ní nyɔ ɓěɔ̀ kɛɛ hwìɛ̀ kɛɛ mu gàsíà dyí mɛ́ìn. Wa mɔ̀ nyɔ séín cɛ̃à, ɓɛ́ wa dyi níiń, ‘Ɖɛ gbà ɖò se à dyɛ̀ǐn muo’ wɛ. Mɔ̄ Bounɓoɔ̀ mɔ̀ nyɔ cɛ̃à kɛ̀.”

Éézùɖùɛ̀-nyɔ̀ ɓěɔ̀ ɖe dyà-dyà

¹¹ Bounɓoɔ̀ cɛ̃ɛ ɖe, ké ɔ ɖá, “Wé ɖò nì dyiɛń, ké ɓó wéa ɓaɖaa, ní mu Dèɓéɛ̀ kã́á-ɓòɖò ɖǎ ma kà wáɖáa poùn ɖe kà nyɔ poà gbǒ ɓɛ́ ɔ ɖǎ wáɖá kɛɛ ɖie kɛ. Ní mu gbǒɔ̀ dɛ̀ ɓě ɓí nìɛɛ gmaùn ɖe, ɓɛ́ ḿ kéɛ dɛ̀ ɓě ɖǎ dyíin nyìnììn nyɛɛ dyíin nɔ̀mɔ̀ìn ɖe. Ní mu kã́á-ɓòɖòɔ̀ poùn ɖe, ɓɛ́ ɔ ké nì kà ɓɛ́ ɔ nyu ma kà nìɛ̀ kĩ́ín nyɛ,

¹² nìí, ɓɛ́ ɓě ké Íɖɔ̀ùn-nyɔ̀ ɓě sè ɓóɛ kè ɓóɖó-dù séín mùìn ḿ nyɛ́nɛ́ín nyɛɛ wuɖuí kɔ̃̀. Mɔ̄ Bounɓo muà ɖɛ ɓěɛ̀ nyuùn wɛ̃ɛ mɔ̀ nyɔ cɛ̃à kɛ̀.”

¹³ Ké Bounɓoɔ̀ cɛ̃ɛ ɖe, ké ɔ ɖá, “Ɓó wéa ɓaɖaa, mɔɔ́ mu fṹàùn mìɔ jèɛɛ, ɔ cɛ̃-nyɔ̀ ɓěɔ̀ seɛ cɛ̃-cɛ̃ dyí ɓɛ́ǐn mu. Ké géɖéè mu dyí vòùn mìɔ jèɛɛ, ɔ mú-píní-nyɔ̀ ɓěɔ̀ seɛ mú píníɛ hwɔɔ ɓɛ́ǐn mu. Géɖéè ɓáún-ɓáún mu ɖé toɖo vɛ̀nɛ̀-vɛ̀nɛ̀ kèɛ̀ mɛ́nɛ́-mɛ́nɛ́ ɓěɔ̀ dya bãùn, ɓɛ́ wã́ìn ké ɖé ɓóɖóɔ̀ kɔ̃ dyi dyíìn.

¹⁴ Ní mu ɓě mɔ̀ ní nyɔ ɓě mɔ̀à Éézùɖùɛ̀-dyù ɓěɔ̀ kɛɛ ɓě mìɔùn nììn ɓíɖí-ɓòɖòɔ̀ kɔ̃ dyàùn ɖe. Ké ɓě mu hwɔɖɔ ɓě ɖǎ wáɖáa poùn ɖe, ɓɛ́ ɓě ké wa mú cĩ́. Ké ɓě mu géɖéè ɓě ɓáùn, ɓɛ́ ɔ ké géɖéè-gbǎ ɓě jǔ, ɓɛ́ ɓě ké wã́ìn sɔ̀ɔ̀ múɛɛ ná. Ké ɓě mu ɓáá-ɖɛ̀ ɓě ɓáùn, ɓɛ́ ɓě kéɛ ɓo ɖi.

¹⁵ Ní mu ɓě ɖé ɓě mìɔùn nììn ɓíɖí-ɓòɖòɔ̀ mú ɓáùn kà nyɔ ɓáà cuɛ. Ké nyɔ ɖò se ɓě hwuɖu zàǎ mu ɖe sɔ̀ìn ɖé ɓóɖó ḿ ɖǎà ɓě nyíɛɛ kɔ̃. Mɔ̄ Bounɓo mɔ̀à ɓěɛ̀ Gèɖèpɔ́ɔ̀ kɛɛ mɔ̀ nyɔ cɛ̃à kɛ̀.”