Emɔ́ 8 - Ɓǎsɔ́ɔ̀ Báɓòɔ̀

Emɔ́ dyé dyí-tɛ̀mɛ̀ìn-ɖɛ̀ ɓá ɓáá-ɖɛ̀-ɓò tìě-wè jè dyíɛ

¹ Sɔ̀ìn ɓóɛ gboɛɛ, Bounɓo Ɖɛɓíɔ́ tɛ̀mɛ̀ìn ma ḿ ɖɛ ɖò dyí ɖe ɓá ɓě jè dyí. Ɔ mɔ̀ ɓáá-ɖɛ̀-ɓò tìě-wè ɖò.

² Ké Bounɓoɔ̀ diè ḿ dyi, ké ɔ ɖá, “Emɔ́, ɖɛ́ nìà ɓó kɛ́?” Ké ḿ ɖá, “Ɔ mɔ̀ ɓáá-ɖɛ̀-ɓò tìě-wèe.” Hwɛ̀ ké Bounɓoɔ̀ cɛ̃ɛ ḿ gbo, ké ɔ ɖá, “Ní nyɔ ɓě mɔ̀à Éézùɖùɛ̀-dyù ɓěɔ̀ kɛɛ mu nììn kà ɓáá-ɖɛ̀-ɓò ɓě m̀ dyéà nɔ̄ tìěɛ̀ múɛɛ nìà kɛ. Wa mánáín-hwɛ̀-tìɔ̀ ɖǎ dyi xwɛ̃́ìn. Ké ḿ se wa kɔ̃in zĩ̀ɛ̌n mu ɖe fɔɔ cá.

³ Wɛ́ɖɛ́-wùɖù nìà ɖé ɓièìn-naín ɓěɔ̀ kɛɛ mu kpé-po-wùɖù mú zɛ̃̀ìn ɓó tia ɓaɖa. Xwɛ́ mu dyi hwɔùn púu, ké ɖɛ séín mu gìɖǐ-gìɖǐ nììn.”

Éézùɖùɛ̀-nyɔ̀ ɓěɔ̀ mú-gbɔɔ̀-gbɔɔ̀

⁴ Ɔ jèɛɛ, ɓě tò ɖùǔo, ɓě mɔ̀ nyɔ ɓě síàìn gǎ-dyé-nyɔ̀ ɓě nì ɓóɖóɔ̀ múɛɛ kɔ̃in, ɓɛ́ wa jè kéà dyi ziɛ.

⁵ Ɓě cɛ̃ɛ, ké ɓě ɖá, “Tiɔ̀ nyɛ́ dɛ̀nɛ̀ ɖìèɔ̀ hwɔɔ̀ mu dyi ziìn, ɓɛ́ à ké à ɖii-ɖɛ̀ peɖe cá kɛ́? Ké tiɔ̀ nyɛ́ Gèɖèpɔ́ɔ̀ fɔ̀-wèɔ̀ mu dyi ziìn, ɓɛ́ à ké à mɔɔ́ peɖe cá kɛ́? Ɔ ɖǎ ná nìǐn, nìí ɓɛ́ à ké ɖɛ-mú-ɖàɓàìn-kòpòɔ̀ dyí zàìn ɔ kè ɓɛ́ à ké píɔ́ɔ̀ dyií kpa, nìí, ɓɛ́ à ké nyɔǔn gbá-gbá mú nyu dyììn ɖé à pṹá-dyèɖè se dyí sɛ́ɖɛ́ìn ɓěɔ̀ mú.

⁶ Ɔ ɖǎ ná nìǐn, nìí, ɓɛ́ à ké mɔɔ́ɔ̀ nyɔ nyìnììn dyíin ɓɛ́ nyɔ ɖò se mɔ́ɛ kè mɔɔ́ nɔ̀mɔ̀ dyíinɔ̀ dyí poìn, ɓɛ́ à kéɛ nyɔǔn gbo pèɖèìn, nìí, ɓɛ́ à ké gǎ-dyé-nyɔ̀ ɓěɔ̀ dɔ̃. Ɔ hwɔìn kà gǎ-dyé-nyɔ̀ ɓě ɓɛ́ wa se wíɖí-kpà, hwɛ̀ ḿ po níiń, ɓoún-po-bàà kpa nì wa múɛɛ pɛ́ɛ̀ ɓɛ́ìn nyɛ.”

⁷ Ɔ jèɛɛ, Éézùɖùɛ̀-nyɔ̀ ɓě, Bounɓo ɓɛ́ ɓě dèà dyaa ɖi wuɖu, ké ɔ ɖá, “Ḿ gboò ḿ mìɔùn dyí kà ɓěɛ̀ ɖɛ gbà ɓě ɓɛ́ ɓě nyuà kɛɛ se ḿ hwìɖǐi hwɛ̀ɛ̌ muɛ.

⁸ Nìí, ɓěɛ̀ ɓóɖó gànáɔ̀ mu dyi túòùn ɓó ɖɛa jè, ɓɛ́ fũ̀à-fṹá ké nyɔ séín nì ɖéɛ múɛɛ nyu. Ɓóɖó gànáɔ̀ mu dyáùn, ké ɔ mu maùn kà ní vɛ̀nɛ̀ kɔ̃̀ nyɛ́nɛ́ mɔ̀à Náà, ɓɛ́ ɔ nìà ɖé Íjè-ɓòɖòɔ̀ kɔ̃ɛɛ nyuà kɛ.

⁹ Ɓó wéa ɓaɖaa, mɔ̄ mɔ̀à Bounɓo Ɖɛɓíɔ́ kɛɛ muɛ nyuùn ɓɛ́ dyóɖóɔ̀ ké dyi kpá ɓó dyóɖóaún sá-sá, ɓɛ́ tíe ké ɓóɖó-kpàɔ̀ kɔ̃in kpɔ̃ ɓó dyóɖóaún-kà.

¹⁰ Ké ní mu ɓěɛ̀ hwɔ-pa-tì ɓěɔ̀ wìǐn-kpá-tì mú zɛ̃̀ìn, ɓɛ́ ɓěɛ̀ wɛ́ɖɛ́-wùɖù ɓěɔ̀ ké vĩ̌-wùɖù mú zɛ̃̀ìn. Ní muɛ nyuùn ɓɛ́ ɓě séín ké wìǐn-kpá-ɖɔ̀ mú po, ɓɛ́ ɓě ké mí dú zà. Ɔ mu nììn pū kà gàa ɖò kè ɔ gmàà nìɔ̌ kà vĩ̌ɛń ɓó waà dyú-kpò dyúáɖò jèɛɛ nìà kɛ. Wé gànáɔ̀ mu wìǐn-kpá-wè jǔùn.

¹¹ Ɓó tia ɓaɖaa, ní muɛ nyuùn ɓɛ́ mɔ́ vɛ̀nɛ̀ ɖò ké kpá ɖé ɓóɖóɔ̀ kɔ̃ dà séín ɖekè. Ɔ se ɖii-ɖɛ̀ mɔɔ ní-ná-tòɛ̀ mɔ́ jǔɛ mu. Kɛɛ mɔ́ mu ɓě nyuùn ɓó Gèɖèpɔ́ɔ̀-wùɖùɔ̀ wɔ̃́ jè.

¹² Ɓě mu dyi téɛń nììn ɖé ɓóɖóɔ̀ gã hĩinyɛɔ̀ gbo. Ɓě mu dyóó ɖò gbo sɔ̀ìn, ɓɛ́ ɓě ké ɖò gbo mu, ɓɛ́ ɓě ké ɖé ɓóɖóɔ̀ xwía sɔ̀, ɓɛ́ ɓě ké ɖé ɓóɖóɔ̀ zɔ̃̌in mu, ɓɛ́ ɓě ké ní wuɖuɔ̀ dyi mɔ́uń nì. Kɛɛ ɓě seɛ dyéɛ mu.

¹³ Ní-ná-tò ɓá ní wuɖuɔ̀ jè dyíɛɛ mu màa-dyù gmɔ̀ nɔ̀mɔ̀ kɔ̃in ɓěɔ̀ kè gàa-dyù gmɔ̀ kui-kui ɓěɔ̀ kpé dyí hwɔùn, ɓɛ́ wa ké kṹún kpá ɓó tia ɓaɖa.

¹⁴ Ɓě mɔ̀ nyɔ ɓě ɓɛ́ ɓě gboòà Sɛ̀mɛ́ɖìà-hwɔ̀ɖɔ̀ɔ̀ gèɖèpɔ́ɔ̀ mɔɔ Dɛ̃́ìn-hwɔ̀ɖɔ̀ɔ̀ gèɖèpɔ́ɔ̀ mɔɔ Bèsíɓà-hwɔ̀ɖɔ̀ɔ̀ gèɖèpɔ́ɔ̀ dyíɛɛ, ɓě mu mú gbɔɔ̀ hwɛ̀ìn nyɛ̀nɛ̀ɛ̀. Mɔ̄ Bounɓo Ɖɛɓíɔ́ mɔ̀ nyɔ cɛ̃à kɛ̀.”