Emɔ́ 7 - Ɓǎsɔ́ɔ̀ Báɓòɔ̀

Emɔ́ dyé dyí-tɛ̀mɛ̀ìn-ɖɛ̀ ɓá kpã̌ùn jè dyíɛ

¹ Óó Éézùɖùɛ̀-nyɔ̀ ɓě, Bounɓo Ɖɛɓíɔ́ tɛ̀mɛ̀ìn ma ḿ ɖɛ ɖò dyí ɓá ɓě jè dyí. Ɖɛɔ̀ mɔ̀, ḿ dyéɛ, ké ti ɓɛ́ ɓě ɖǎ ɓěɛ̀ ɓáá-ɖɛ̀ɔ̀ kĩ́ín-kĩ́ínɔ̀ ɓó dyi cɛ̃ɛ hwɔ ɓó kã́áɔ̀ bìì, ké dyió-ɖeɔ̀ nìǎ mɛiń nyɛ̀nɛ̀ɛ̀ kɛɛ, púɛɛ, Bounɓoɔ̀ tò kpã̌ùn-tò ɖò.

² Ti ɓɛ́ kpã̌ùn ɓěɔ̀ ɖǎ ɓáá-ɖɛ̀ séín ɓěɔ̀ ɓɛɛ hwɔɛɛ, púɛɛ, ḿ páná ma mú, ké ḿ ɖá, “Bounɓo Ɖɛɓíɔ́, ní ɓaà m̀ ní, zĩ̀ìn Jékɔ̀ɛ̀ xwíníín-dyù ɓěɔ̀ kɔ̃in. Xwɛ̌ wa mu cĩ́ɛ nyuùn, ɔ jǔ ké ɖɛ nìà kɛ dyi kpáín nyɛ́? Sepóɛɖé wa se kpé dyí nì.”

³ Púɛɛ, Bounɓoɔ̀ zĩàìn ma ɔ dyoɖo-hwòɖòɔ̀ gbo, ké ɔ ɖá, “Ɖɛɔ̀ se ná kpáa mu ɖe.”

Emɔ́ dyé dyí-tɛ̀mɛ̀ìn-ɖɛ̀ ɓá nyɛ-tò jè dyíɛ

⁴ Ké Bounɓo Ɖɛɓíɔ́ tɛ̀mɛ̀ìn ma ḿ ɖɛ ɖò dyí ɖe ɓá ɓě jè dyí. Ɔ mɔ̀, ti ɓɛ́ Bounɓoɔ̀ po ma wuɖu dyiɛɛ, ḿ dyéɛ, ké nyɛ-tò ɖò dyi, ɓɛ́ ɔ ké gǎ jǔ, ɓɛ́ ɔ ké ɓě kɔ̃ dyi. Ké nyɛ-tòɔ̀ fɔ̃ ɓóɖóɔ̀, ké ɔ fɔ̃ ní vɛ̀nɛ̀ nì ɖé ɓóɖóɔ̀ hwuɖuɛ.

⁵ Hwɛ̀ ké ḿ páná ma mú, ké ḿ ɖá, “Bounɓo Ɖɛɓíɔ́, ní ɓaà m̀ ní, ɓɔ́ɔ náa nyuɛ. Xwɛ̌ Jékɔ̀ɛ̀ xwíníín-dyù ɓěɔ̀ mu cĩ́ɛ nyuùn wɛ̃́? Sepóɛɖé wa se kpé dyí nì.”

⁶ Púɛɛ, Bounɓo Ɖɛɓíɔ́ zĩàìn ma ɔ dyoɖo-hwòɖòɔ̀ gbo ɖe, ké ɔ ɖá, “Ɖɛɔ̀ se ná kpáa mu ɖe.”

Emɔ́ dyé dyí-tɛ̀mɛ̀ìn-ɖɛ̀ ɓá ɖɛ-gbo-ɖàɓàìn-ɖùǔ nì kpo mánáín nyɛɛ jè dyíɛ

⁷ Ké Bounɓoɔ̀ tɛ̀mɛ̀ìn ma ḿ ɖɛ ɖò dyí ɖe ɓá ɓě jè dyí. Ɔ mɔ̀, ḿ dyéɛ, ké Bounɓoɔ̀ nyànà ɓó gmɔ ɖò ɓɛ́ wa ɖá ɔ sɛ́ɖɛ́ìn dyíɛɛ wáún dyi. Ɖúú nì kpo mánáín ɖò nì ma ɔ xwaún, ɓɛ́ ɔ ké gmɔɔ̀ ɖàɓàìn, ɓɛ́ ɔ kéɛ dyé kɛbì gmɔɔ̀ sɛ́ɖɛ́ìn dyí ní.

⁸ Ké Bounɓoɔ̀ diè ḿ dyi, ké ɔ ɖá, “Emɔ́, ɖɛ́ nìà kɛ́?” Ké ḿ ɖá, “Ɔ mɔ̀ ɖúú nì kpo mánáín.” Hwɛ̀ ké Bounɓoɔ̀ ɖá, “Ní muá ní nyɔ ɓě mɔ̀à Éézùɖùɛ̀-dyù ɓěɔ̀ kɛɛ nàmàǔn ɓěɔ̀ nyɔǔn dyí tɛ̀mɛ̀ìn kà poo-ɖɛ̀ po-nyɔ̀ ɖò ɖàɓàìn gmɔ ɖò dyììn ɖé ɖúú nì kpo mánáín ɖò mú, ɓɛ́ ɔ kéɛ nyɔǔn dyí tɛ̀mɛ̀ìn kà gmɔɔ̀ se dyí sɛ́ɖɛ́ìn nyɛ. Ké ḿ se wa kɔ̃in zĩ̀ɛ̌n mu ɖe fɔɔ cá.

⁹ Ní mu Éézùɖùɛ̀-dyù ɓě mɔ̀à Áázèɛ̀ xwíníín-dyù ɓěɔ̀ kɛɛ kũùn-kpò ɓièìn-naín ɓě nìà ɖé toɖo ɓěɔ̀ dya kɛɛ dyíin nyìnììn. Ké ní mu waà pá hwɛ̀ǐn-hwɛ̀ǐn tɔ̀ɔ̀ ɓěɔ̀ dyíin nyìnììn ɖekè. Ní mu Kã́á Jɛ́ɖòbóàùnɛ̀ gbǒ-xwíníínɔ̀ jè dyi zĩ̀ìn dyììn ɖé gàsíà mú ɖekè.”

Emɔ́ kè Àmàzíà

¹⁰ Hwɛ̀ ké Àmàzíà mɔ̀ Bɛ́fèò-hwɔ̀ɖɔ̀ɔ̀ sáa-zà-nyɔ̀ vɛ̀nɛ̀ kɛɛ tò ma Jɛ́ɖòbóàùn mɔ̀à Éézùɖùɛ̀-kã̀ǎɔ̀ kɛɛ gbo wuɖu, ké ɔ ɖá, “Emɔ́ nì nɔ̄ Éézùɖùɛ̀-ɓòɖòɔ̀ hwòɖǒǔn, ké ɔ nì m̀ sɔ́uń. Wuɖu jĩ̀ kà dyí ɓɛ́ ɔ ɖǎ cɛ̃ kɛɛ se ɓóɖóún ɓɛ́ìn ɖe.

¹¹ Ɔ ɖá m̀ mu gàsíà dyí mɛ́ìn, ké wa mu Éézùɖùɛ̀-nyɔ̀ ɓěɔ̀ to-xwàɖàǔn kpaùn sɔ̀ìn nɔ̄ wa mìɔùn nììn ɓíɖí-ɓòɖòɛ̀ kɔ̃.”

¹² Púɛɛ, Àmàzíà cɛ̃ɛ ma Emɔ́ gbo, ké ɔ ɖá, “Kpáá-ɖɛ̀-dyé-nyɔ̀, sɔ̀ dà. Mu ɖé Júɖà-ɓòɖòɔ̀ kɔ̃ ɖe, ɓɛ́ m̀ ké pó. Ɖéɛ̀ m̀ mɛ nì, ɓɛ́ m̀ ké ɖé nì ɖii-ɖɛ̀-kũ̀à kè nì kpáá-ɖɛ̀-cɛ̃-kũ̀àɔ̀ nyùìn.

¹³ Kɛɛ mɔ̀ǔn ɖá ɓɛ́ m̀ ké kpáá-ɖɛ̀-cɛ̃-kũ̀àɔ̀ nɔ̄ Bɛ́fèò-hwɔ̀ɖɔ̀ɛ̀ mú nyùìn ɖe, sepóɛɖé pá nìà kɛ mɔ̀ kã́áɔ̀ nììn ɓièìn-naín kè Éézùɖùɛ̀-nyɔ̀ séín ɓěɔ̀ nììn ɓièìn-naín ɖekè.”

¹⁴ Hwɛ̀ ké Emɔ́ jǔ ma Àmàzíà gɔ̃̌, ké ɔ ɖá, “Ḿ se ma kpáá-ɖɛ̀-cɛ̃-nyɔ̀, mɔɔ ké ḿ se ma kpáá-ɖɛ̀-cɛ̃-kũ̀àɔ̀ cɛ̃́. Kɛɛ ḿ mɔ̀ ma ɓáɖáá-dyí-gmɔ̀-nyɔ̀ kè síkímɔ̀-cù-ɓá-nyɔ̀.

¹⁵ Púɛɛ, Bounɓoɔ̀ zà ɖé ḿ ɓáɖáá-dyí-gmɔ̀-kũ̀àɔ̀ gbo, ké ɔ cɛ̃ɛ ḿ gbo, ké ɔ ɖá, ‘Mu, ɓɛ́ m̀ ké ɖɛ ní mu nyuùn wɛ̃ɛ ní nyɔ ɓě mɔ̀à Éézùɖùɛ̀-dyù ɓěɔ̀ kɛɛ gbo cɛ̃.’

¹⁶ Ɓó kàǔn wɛ̃ɛ, tò Bounɓoɔ̀ wuɖuɔ̀ ɖùǔ gbo. M̀ cɛ̃ɛ, ké m̀ ɖá ḿ mɛ ɓɔ́ ɖɛ gbà ɓá Áázèɛ̀ xwíníín-dyù ɓě mɔ̀à Éézùɖùɛ̀-nyɔ̀ ɓěɔ̀ kɛ dyíɛɛ jè cɛ̃ɛ.

¹⁷ Ɔ jèɛɛ, Bounɓoɔ̀ cɛ̃ɛ ɓá m̀ jè dyí, ké ɔ ɖá, ‘Nì dyú-gàà kè nì dyú-màà ɓěɔ̀ mu gàsíà dyí mɛ́ìn. Ké nì mú-nyɛ́-nyɔ̀ ɓěɔ̀ mu nì páɔ̀ ɖàɓàìn, ɓɛ́ wa kéɛ geìn. Wa mu m̀ kè Éézùɖùɛ̀-dyù ɓěɔ̀ to-xwàɖàǔn kpaùn. Ɔ ɖǎ ná nìǐn, nì gmààɔ̀ mu gbàɖàùn-màà jǔùn ɖé hwɔɖɔɔ̀ mú. Ké nì mu ɓóɖó ɖìàǔn mɛ́ìn.’ ”