Emɔ́ 6 - Ɓǎsɔ́ɔ̀ Báɓòɔ̀

Éézùɖùɛ̀-nyɔ̀ ɓěɔ̀ mú gbɔɔ̀ jè

¹ Ɔ mu ɖɛ nyìnììn dyíin jǔùn ɓó ɓě mɔ̀ nyɔ ɓě kɔ̃̀ hwòɖǒ dèàìn ɖé Zádyɔún-hwɔ̀ɖɔ̀ɔ̀ mú dyiɛ kè Sɛ̀mɛ́ɖìà-nyɔ̀ ɓě kɔ̃̀ hwòɖǒ ɖá ɖɛ gbà ɖò seà wa gbo kpáa muɛɛ bìì. Ɓě mɔ̀ nyɔ ɓě mɔ̀à Éézùɖùɛ̀-ɓòɖò vɛ̀nɛ̀ nìà kɛ nyɔ vɛ̀nɛ̀ ɓěɛ̀. Ɓě mɔ̀ nyɔ ɓě kɔ̃̀ gbo ɓɛ́ Éézùɖùɛ̀-nyɔ̀ ɓěɔ̀ dyià kɛ̀.

² Ɓě cɛ̃ɛ, ké ɓě ɖá, “Ɓě mu, ɓɛ́ ɓě ké Kánɛ̀-hwɔ̀ɖɔ̀ɔ̀ dyé. Ɔ ɖǎ ná nìǐn, ɓě sɔ̀ìn ɓó, ɓɛ́ ɓě ké mu, ɓɛ́ ɓě ké Hámà-hwɔ̀ɖɔ̀ vɛ̀nɛ̀ɔ̀ dyé, nìí, sɔ̀ìn ɓóɛ gboɛɛ, ɓɛ́ ɓě ké mu, ɓɛ́ ɓě ké Gátì-hwɔ̀ɖɔ̀ nìà ɖé Féɖésìà-ɓòɖòɔ̀ kɔ̃ɛɛ dyé. Má, wa se ɖɛ kpa ɓɛ́ wa ké à nììn kã́á-ɓòɖò ɓěɛ̀ dyɛ̀ìne? Má, wa nììn ɓóɖó ɓěɔ̀ se dyí ɓúá ɓɛ́ ɔ ké à nììn ɓěɛ̀ dyɛ̀ìne?”

³ Ɓě zàìn ɖɛ gbà muà ɓě kɔ̃ dyiìn nyɛɛ wéɔ̀ jè ɖùǔn dyi, ké ɓě nyuɛ ɓɛ́ kóɖó-kóɖó-jì-tìɔ̀ ké dyi wàɖà.

⁴ Ɓě pɛ̃́ kɔ̃-pɛ̃́-ɖɛ̀ ɓɛ́ wa nyùìn dyuɛ-nyɛ̀nɛ̀ kɛɛ kɔ̃, ké ɓě kò gmɛ̀ɛ̌ vɛ̀nɛ̀ nɔ̀mɔ̀ dyíin ɓě mú. Ɓě ɖi ɖii-ɖɛ̀ɔ̀ nyɔ kpa ɖɛ mìɔ mɔ̀à ɓáɖáá-dyù-gmɔ̀-sùàɖɛ̀ kè ɓìɖǐ-dyù-gmɔ̀-sùàɖɛ̀, ɓɛ́ wa nì cánáún wɛ̃.

⁵ Ɓě ɓaɖa ɓěɛ̀ gbǎɖí ɓěɔ̀ kà Dèɓé nyuɛ ma kà kɛ, ké ɓě zà ɓaɖaa-ɖɛ̀ ɖìè ɓě pìǐn.

⁶ Ɓě dyi wã́ìn ná ní, nìí, ɓě náa gbòɖòò-wè gàná-gàná, ké ɓě fiè cáná nɔ̀mɔ̀ nyɔ́ún wɛ̃. Kɛɛ ɓě se ɖé Jòséɛ̀ xwíníín-dyù ɓěɔ̀ mú gbɔɔ̀ jè gbo kɔ̃̀.

⁷ Ɔ jèɛɛ, ɓě mu kĩ́ín-kĩ́ín-nyɔ̀ jǔùn, ɓɛ́ wa ké ɓě to-xwàɖàǔn kpa ɖé ɓóɖó kà kò ɖò kɔ̃. Ɔ ɖǎ ná nìǐn, nìí, ɓěɛ̀ hwɔ-pa-paɔ̀ kè ɓěɛ̀ sɔ̃-pɛ̃́ín-wáɖá-wáɖáɔ̀ mu dyi ziìn.

⁸ Sepóɛɖé Bounɓo Ɖɛɓíɔ́ ɖǎ wuɖu ɖi. Ɔ ɖá, “Ɓě mɔ̀à Jékɔ̀ɛ̀ xwíníín-dyù ɓěɛɛ, ɓě mìɔùn dyí-ɓɔ́ɖɔ́ìn-ɓɔ́ɖɔ́ìnɔ̀ nyàìn ḿ dyi, ké ḿ nyɛ́ ɓěɛ̀ to-pèɖèìn-naín ɓěɔ̀ mú. Ɔ jèɛɛ, ḿ gboò ḿ mìɔùn dyí kà ní mu Sɛ̀mɛ́ɖìà-hwɔ̀ɖɔ̀ɔ̀ kè ɖɛ séín nì ɖéɛ múɛɛ ɓěɛ̀ mú-nyɛ́-nyɔ̀ ɓěɔ̀ xwáɖáún zàìn nyɛ. Mɔ̄ Bounɓo Gèɖèpɔ́ɔ̀ mɔ̀ nyɔ nìà ɖɛ séín kɔ̃in nyɛɛ mɔ̀ nyɔ cɛ̃à kɛ̀.”

⁹ Kɛbì gàa ɓaɖa-bùè mɛ sè ɖé gbǒ ɖò múɛɛ, wa mu mɛ́ìn wɛ̃́-wɛ̃́ pū.

¹⁰ Ti ɓɛ́ waà gbǒ-xwíníín-nyɔ̀ ɖò kéà xwɛ́ ɓěɔ̀ fɔ̃ɛɛ mu xwɛ́ ɓěɔ̀ ɖé gbǒɔ̀ mú zàǔn dyiìn, ké ɔ mu nyɔ vǐè ɖé keɛɛ dyi dièìn, ɓɛ́ ɔ ké níiń, “Nyɔ ɖò nì nɔ̄ m̀ gboò?” ké ɔ dyi níiń, “Gbào,” ní, nìí, ɔ mu níiń, “Ɓɔ́ wùɖùɛ̀. À mɛ ma mú, à ní kɔ̃̀ ɖà Bounɓoɛ̀ nyɛ́nɛ́ɔ̀ ɖá.”

¹¹ Éézùɖùɛ̀-nyɔ̀ ɓě, ɖɛ ɓěɛ̀ mu ɓě gbo kpáùn, sepóɛɖé Bounɓoɔ̀ ɖǎa cɛ̃ kà ɔ mu gbǒ vɛ̀nɛ̀ ɓěɔ̀ kè gbǒ-dyù ɓěɔ̀ dyi wàìn nyɛ.

¹² Sǒ ɖò ɓɛ́ìn gbǔɛ ɓó sɔ́ɔ́ kúɖúú hwìɛ̀ɛ̀? Nyɔ ɖò kè ɓìɖǐ ɓɛ́ìn ɓóɖó xwa cɛ́ɛ̀ ɓó sɔ́ɔ́ kɔ̃ɔ̀? Kɛɛ ɓě ɖǎ ɖɛ sɛ́ɖɛ́ìn dyíɔ̀ ɖɛ gbà mú zɛ̃̀ìn. Ɓě ɖǎ dyí-sɛ́ɖɛ́ìn-ɖɛ̀ ɓɛ́ ɔ ɖéè kɛɛ nyu, ké ɔ ɖǎ kɛɛ̀.

¹³ Ɓě mɔ̀ nyɔ ɓě ɓɛ́ ɓě nìà ɓɔ́ɖɔ́uń ɓó Ɖòdíɓà-hwɔ̀ɖɔ̀ɔ̀ toún ɖu jè, ɓɛ́ ɓě dyià níiń, “Má, à ɖu Kánáì-hwɔ̀ɖɔ̀ɔ̀ toún ɖé à mìɔùn nììn kpé múe?” kɛɛ,

¹⁴ Bounɓo Gèɖèpɔ́ɔ̀ mɔ̀ nyɔ nìà ɖɛ séín kɔ̃in nyɛɛ cɛ̃ɛ ɓě gbo, ké ɔ ɖá, “Éézùɖùɛ̀-dyù ɓě, ní mu ɓóɖó-dù ɖò vã kɔ̃ poùn, ɓɛ́ ɔ ké ɓě gbo vɔ̃. Ɔ mu ɓě dyi pĩ́àùn ɖé ɓěɛ̀ ɓóɖó gàná sɔ̀àìn ɖé Hámà-hwɔ̀ɖɔ̀ɔ̀ gbo, nyinià ɖé Àwáɖáɓà Bɔɔ-kpàɔ̀ kɔ̃ɛɛ mú.”