Emɔ́ 5 - Ɓǎsɔ́ɔ̀ Báɓòɔ̀

Gèɖèpɔ́ɔ̀ ɖá Éézùɖùɛ̀-dyù ɓěɔ̀ ɓɛ́ wa ké wìǐn kpá

¹ Ɔ jèɛɛ, Éézùɖùɛ̀ɛ̀ xwíníín-dyù ɓě, ɓě tò vĩ̌-wùɖù ɓɛ́ mɔ̄ Emɔ́ nìà kpauń ɓá ɓěɛ̀ mɛ́ jè dyíɛɛ ɖùǔ gbo.

² Éézùɖùɛ̀-ɓòɖò ɓɛ́ ɓóɖó-dù kà kò ɖò séè toún ɖu ɖòɛɛ ɖǎ ɓuɖu, ké ɔ se dyí sɔ̀ɔ̌ mu ɖe. Gèɖèpɔ́ɔ̀ ɖǎ ɔ kɔ̃ wã ɖé ɔ mìɔùn nììn ɓíɖí-ɓòɖòɔ̀ kɔ̃, ké nyɔ ɖò se nì ɓɛ́ ɔ ké ɔ dyí sɔ̀ìn.

³ Ɖɛ nìà kɛ mu ná kpáùn, sepóɛɖé Bounɓo Ɖɛɓíɔ́ ɖá, “Éézùɖùɛ̀-hwɔ̀ɖɔ̀ɔ̀ nyɔ ɓɛ́ ɔ tò sójà táázĩ̀ìn ɖò to gboɛɛ, sójà ɓěɔ̀ hɔ̃dɛ̀ɖɛ̀ nyɛ̀nɛ̀ɛ̀ mu ɖe kɔ́ìn. Ké hwɔɖɔɔ̀ nyɔ ɓɛ́ ɔ tò sójà hɔ̃dɛ̀ɖɛ̀ ɖò to gboɛɛ, sójà ɓěɔ̀ ɓaɖa-bùè nyɛ̀nɛ̀ɛ̀ mu ɖe kɔ́ìn.”

⁴ Óó Éézùɖùɛ̀ɛ̀ xwíníín-dyù ɓě, Bounɓoɔ̀ cɛ̃ɛ ɓě gbo ɖe, ké ɔ ɖá, “Ɓě gmɔ̀ìn ḿ gbo ɖe, ɓɛ́ ɓě ní kɔ̃̀ ɖà mɛ́.

⁵ Ɓě ɓɔ́ Bɛ́fèò-hwɔ̀ɖɔ̀ɔ̀ kúmúɛ̀n ɓó ɓiè jè, ké ɓě ɓɔ́ ɖé Gíógàò-hwɔ̀ɖɔ̀ɔ̀ mú muɛ, ké ɓě ɓɔ́ Bèsíɓà-hwɔ̀ɖɔ̀ɔ̀ hwìè-kpàɔ̀ kpaa pídyi. Sepóɛɖé wa mu Gíógàò-nyɔ̀ ɓěɔ̀ Gíógàò-hwɔ̀ɖɔ̀ɔ̀ mú dyi kúmúùn wɛ̃́-wɛ̃́ pū, ké Bɛ́fèò-hwɔ̀ɖɔ̀ɔ̀ mu fóɖóún kpáùn.”

⁶ Ɔ jèɛɛ, ɓě xwɛ̃́ìn Bounɓoɔ̀ bũ̌in nɔ̀ɔ̀, ɓɛ́ ɓě ní kɔ̃̀ ɖà mɛ́. Ɔ se ná nìǐn, ɔ mu ɓě mɔ̀à Jòséɛ̀ xwíníín-dyù ɓěɛɛ mú gbɔɔ̀ùn kà nyɛ fɔ̃à ɖɛ ɖò dà ɖò dyiɛ. Nyɛɔ̀ mu Bɛ́fèò-hwɔ̀ɖɔ̀ɔ̀ fɔ̃ùn, ké nyɛɔ̀ se mɔ́ìn-nyɔ̀ ɖò kɔ̃̀ɔ̌ mu.

⁷ Ɖɛ ɓěɛ̀ mu ɓě mɔ̀ nyɔ ɓě mɔ̀à dyí-sɛ́ɖɛ́ìn-ɖɛ̀ ɖɛ gbà mú-zɛ̃̀ìn-nyɔ̀, ɓɛ́ ɓě dyià ɖɛ sɛ́ɖɛ́ìn dyíɛɛ ɓíɖíi dyi poɛɛ gbo kpáùn.

^8-9 Nyɔ muà ɓě gǎ kɔ̃ tòùn wɛ̃ɛ nyɛ́nɛ́ mɔ̀ Bounɓo. Ɔ mɔ̀ nyɔ mɛà dɛ̀nɛ̀ mɛ́nɛ́ɛ́ ɓě kɔ̃̀ nyɛ́nɛ́ mɔ̀à Dyùǐ-kúɖúú kè Kéɖémá-hwùɖù kɛ̀. Ɔ mɔ̀ nyɔ zɛ̃̀àìn tíe-kpò ce mú, ɓɛ́ ɔ dyià ce tíe-kpò mú zɛ̃̀ìn nyɛ̀. Ɔ mɔ̀ nyɔ ɖáà ní sɔ̀à ɖé dyóó kɔ̃, hwɛ̀ ɓɛ́ ɔ dyiàà ɓóɖó-kpàà kɔ̃ púè ɖe kɛ̀. Ɔ mɔ̀ nyɔ sámáà kpé-ɓéɖé-nyɔ̀ ɓěɔ̀ ɓó dyi, ké ɔ gbɔɔ̀à waà to-pèɖèìn-naín ɓěɔ̀ múɛ̀.

¹⁰ Óó Éézùɖùɛ̀-nyɔ̀ ɓě, ɓě nyɛ́ nyɔ ɓě ɓɛ́ wa ɓàɖàìn ɖɛ gbà dyí ɖé zɔ̃́ín-cɛ̃̀ìn-naín ɓěɔ̀ kɛ kè nyɔ ɓě ɓɛ́ wa cɛ̃ jǎà kɛɛ mú.

¹¹ Ké ɓě síìn nyɔ hwɛ̀ kpéí ɓěɔ̀ kɔ̃in. Ɓě kpɔ̃̀ìn wa ganaún, ké ɓě zà waà ɖii-ɖɛ̀ ɓěɔ̀ wa xwai. Ɔ jèɛɛ, kɛbì ɓě mɛ po sɔ́ɔ́-gbò nɔ̀mɔ̀ kɔ̃in ɓěɛɛ, ɓě se wa mú cĩ́ɛ mu. Kɛbì ɓě mɛ ɓá géɖéè, ɓɛ́ ɔ ké géɖéè-gbǎ nɔ̀mɔ̀ kɔ̃in ɓě nyuɛɛ, ɓě seɛ wã́ìnɔ̀ ɖò náa mu.

¹² Sepóɛɖé Gèɖèpɔ́ɔ̀ dyuòɛ̀ kà ɓěɛ̀ ɖɛ gbà ɓěɔ̀ nyu jĩ̀ɛ̀ kɛ kè kà ɓěɛ̀ nàmàǔn ɓěɔ̀ nyu ɓɛ́ɛ kɛ. Ɓě pĩ́à dyí-sɛ́ɖɛ́ìn-nyɔ̀ ɓěɔ̀ dyi, ké ɓě kpɔ̃ nyɔ-gbo-pa-wìɖì dyi, ké ɓě zà gǎ-dyé-nyɔ̀ ɓěɔ̀ gɔ̃̌ xwa ɖé ɓěɛ̀ zɔ̃́ín-cɛ̃̀ìn-naín ɓěɔ̀.

¹³ Ɔ jèɛɛ, hwòɖǒ-fɔ̀nɔ̀-nyɔ̀ ɓěɔ̀ kã wɔ̃ ɓó tiɛ̀ mú, sepóɛɖé ɖɛ-gbà-nyu-nyuɔ̀ vò dyí mìɔ.

¹⁴ Ɓó kàǔn wɛ̃ɛ, ɓěɛ̀ hwòɖǒ-dyùà mɛ kpɔ̃ ɖɛín-ɖɛ̀ dyi. Ké ɓěɛ̀ hwòɖǒ-dyùà mɛ ɓɔ́ ɖɛ gbà dyi kpɔ̃ɔ, ɓɛ́ ɓě ní kɔ̃̀ ɖà mɛ́. Ɔ dyi ná nìǐn, nìí, Bounɓo Gèɖèpɔ́ɔ̀ mɔ̀ nyɔ nìà ɖɛ séín kɔ̃in nyɛɛ mu ɓó ɓě gbo nììn kà ɓě nyuà cɛ̃ɛ kɛ.

¹⁵ Ɓě mɛ nyɛ́ ɖɛ gbà mú, ɓɛ́ ɓě ké ɖɛín-ɖɛ̀ mú ɖɛ̀ɓɛ̀. Ɓě mɛ po ɖɛ wɔ̃ dyí-sɛ́ɖɛ́ìn-kà ɖé ɓěɛ̀ zɔ̃́ín-cɛ̃̀ìn-naín ɓěɔ̀ kánáá pū. Ti ɖíɛ́ ɓě ní, Bounɓo Gèɖèpɔ́ɔ̀ mɔ̀ nyɔ nìà ɖɛ séín kɔ̃in nyɛɛ mu ɓě mɔ̀à Jòséɛ̀ xwíníín-dyù ɓěɔ̀ nyɔ sè ɓóɛɛ wìǐn dyéìn.

¹⁶ Ɓě ɖǎ nàmàǔn nyu jèɛɛ, Bounɓo Gèɖèpɔ́ɔ̀ mɔ̀ nyɔ nìà ɖɛ séín kɔ̃in nyɛɛ ɖá, “Wa mu vĩ̌ìn ɓó ɓě jè ɖé ɓěɛ̀ hwɔɖɔ ɓěɔ̀ píé hwòɖǒǔn kè ɖé hwɔɖɔ-hwìè ɓěɔ̀ xwíníín. Wa mu níiń, ‘Néɓoo, néɓoo.’ Ké wa mu vĩ̌-nyɔ̀ ɓě ɖáùn, hwɛ̀ ḿ po níiń, geɖe-nyu-nyɔ̀ ɓěɔ̀ ɖekè.

¹⁷ Vĩ̌-wùɖù mu ɖé géɖéè-gbǎ séín ɓěɔ̀ mú dyiìn. Sepóɛɖé ní mu ɓě gǎ kɔ̃ dyàùn. Mɔ̄ Bounɓoɔ̀ mɔ̀ nyɔ cɛ̃à kɛ̀.”

Bounɓoɔ̀ wéɔ̀

¹⁸ Ɔ mu ɖɛ nyìnììn dyíin jǔùn ɓó ɓě mɔ̀ nyɔ ɓɛ́ Bounɓoɔ̀ wéɔ̀ dyé-tò nìà nyuɛń nyɛɛ bìì. Ɖɛ́ mɔ̀ kpáná ɖò ɓɛ́ Bounɓoɔ̀ wéɔ̀ mu ɓě dyí nyuùn wɛ̃́? Wéa mu tíe-kpò jǔùn ɓó ɓě bìì, ké ɔ se ce jǔɛ mu.

¹⁹ Ɔ mu nììn pū kà nyɔ ɖò ɓɛ́ ɔ dyé ɖɛ ɓěɛ̀ dyíɛɛ nìà kɛ. Ɖɛ ɓěɔ̀ mɔ̀, ɔ gbǔ ganìǎ xwaún, ké ɔ kè kìɖìǒ gmɔ̌ìn. Ti ɔ ɖǎ kìɖìǒɔ̀ xwaún póɛɛ, ɔ wáɖáìn ɖé ɔ ɓíɖí-gbǒǔn, ké ɔ wáɖá ɔ sɔ̃ɔ̀ ɓó ɔ gbǒɔ̀ dyéɖéín dyi, ɓɛ́ ɔ ké fɔ̀ nyɛ̀nɛ̀ɛ̀ kɛɛ, cɛ̃́-sɛ̀ ɖò numu ɔ cá.

²⁰ Má, Bounɓoɔ̀ wéɔ̀ mu tíe-kpò jǔùn ɓó ɓě bìì, ké ɔ se ce jǔɛ mue? Má, ɔ mu tíe-kpò kpɛ̃̀ jǔùn, ké ce ɖò seɛ mú fɔ̀nɔ̀ɔ̌ mu fɔɔ cáe?

²¹ Bounɓoɔ̀ cɛ̃ɛ ɖe, ké ɔ ɖá, “Ɓěɛ̀ hwɔ ɓě ɓá ɓiè-ɓiè jè dyíɔ̀ nyàìn ḿ dyi. Ḿ nyɛ́ɛ mú mìɔ cá. Ḿ seɛ hwìɖǐi kùɛ̀n ɓɛ́ìn.

²² Kɛbì ɓě mɛ dyà ḿ fɔ̃ɔ-sàǎ-zàìn-ɖɛ̀ mɔɔ ɖii-ɖɛ̀-sàǎ-zàìn-ɖɛ̀ ɓěɛɛ, ḿ se wa dyi kpɔ̃ɔ́ mu. Ké kɛbì ɓě mɛ dyà ḿ nyúà-ɖɛ̀ ɓúá-ɓúá ɓě ɓó gbo-kpɔ̃ìn-sàǎ-zàìn-ɖɛ̀ jèɛɛ, ḿ se wa dyi kpɔ̃ɔ́ mu.

²³ Ɓě zà dà ɓěɛ̀ wɛ́ɖɛ́-wùɖùɔ̀ kuɖu-kuɖuɔ̀ ḿ dyúa. Ké ḿ se ɓěɛ̀ gbǎɖí-wùɖù ɓěɔ̀ ɖùǔ gbo tòɛ̌ mu.

²⁴ Kɛɛ jǎà-ɖɛ̀-wɔ̃-po-po mɛ mu dyúa kánáá pū kà ní vɛ̀nɛ̀ ɖò zià kɛ. Ké dyí-sɛ́ɖɛ́ìn-sɛ́ɖɛ́ìn mɛ nì kà ní-dyù ɓɛ́ ɔ ní ma kɛɛ nìà kɛ.

²⁵ “Óó Éézùɖùɛ̀-dyù ɓě, zɔ̃ kpáɖá-nyɔ sɔ̃́ ɓɛ́ ɓě nyuà ɖé gbǎùn-fúɖúáɔ̀ kɔ̃ɛɛ, ɓě dyà ma ḿ ɖòǔn sáa-zàìn-ɖɛ̀ mɔɔ nyíí-ɖɛ̀ɛ̀?

²⁶ Ɓó kàǔn wɛ̃ɛ, ɓě nì ɓěɛ̀ gèɖèpɔ́ɔ̀ mɔ̀à Móɖɛ̀ kè dɛ̀nɛ̀-dyù-gèɖèpɔ́ɔ̀ mɔ̀à Káíwàùn kɛɛ ɓièɛ̌n ke. Ɓě ɓiè waà hwɔìn-ɖɛ̀ ɓě ɓɛ́ ɓě ɖǎà mɛ kɛɛ ní.

²⁷ Ɔ jèɛɛ, ní mu ɓě to-xwàɖàǔn tòùn ɖé Dìmásìkɔ̀-hwɔ̀ɖɔ̀ɔ̀ ɖeín. Mɔ̄ Bounɓo kɔ̃̀ nyɛ́nɛ́ mɔ̀à Ɖɛɓíɔ́ kɛɛ mɔ̀ nyɔ cɛ̃à kɛ̀.”