Emɔ́ 4 - Ɓǎsɔ́ɔ̀ Báɓòɔ̀

¹ Ɓě mɔ̀à Sɛ̀mɛ́ɖìà-màà ɓěɛɛ, ɓě mɔ̀ nyɔ ɓě ɓúáà kà ɓìɖǐ ɓě ɖià pìǐ ɓɛ̀ɖɛ̀ɛ̀-ɓɛ̀ɖɛ̀ɛ̀ nìà ɖé Básàùn-pàɔ̀ múɛɛ nìà kɛ. Ɓě mɔ̀ nyɔ nɛ́àìn nyɔ ɓě hwɛ̀ kpéíɛɛ ɓíɖíi dyi, ké ɓě wàìn gǎ-dyé-nyɔ̀ ɓěɔ̀ dyi. Ké ɓě cɛ̃ɛ ɓěɛ̀ dyú-ɓǎ ɓěɔ̀ gbo, ké ɓě ɖá, “Ɓě dyà à nɔmɔɔ, ɓɛ́ à kéɛ ná.” Ɓě mɔ̀ nyɔ ɓě nyuà ɖɛ nì kà ɓěɛ̀ kɛɛ, ɓě tò wuɖu ɓěɛ̀ ɖùǔ gbo.

² Bounɓo Ɖɛɓíɔ́ ɖǎ wuɖu ɖi, ké ɔ ɖá, “Kà ɓɛ́ ḿ hwɛ̀à múɛɛ, ti ɖò nì dyiɛń jǎà, ɓɛ́ wa ké ɓě gbǎ ɓá. Wa mu ɓě ɖò-ɖò séín kpaùn kà zimii nì xwɛ̃ɛ́ wɔ̃ nìà kɛ.

³ Ké wa mu ɓě ɓí ɓě nì ɖé hwɔɖɔɔ̀ gmɔɔ̀ múɛɛ mú jìɖììn, ɓɛ́ ɓě ké ɖé Háámɔ̀-pàɔ̀ mú kpá.”

Éézùɖùɛ̀-nyɔ̀ ɓěɔ̀ se fɔ̀nɔ̀ hwòɖǒ cɛ̃́

⁴ Ké Bounɓoɔ̀ cɛ̃ɛ ma Éézùɖùɛ̀-nyɔ̀ séín ɓěɔ̀ gbo, ké ɔ ɖá, “Ɓě mu ɖé Gèɖèpɔ́ɔ̀ ɓièìn-naín nìà ɖé Bɛ́fèò-hwɔ̀ɖɔ̀ɔ̀ múɛ, ɓɛ́ ɓě ké nàmàǔn nyu kánáá pū. Ɓě mu ɖé Gèɖèpɔ́ɔ̀ ɓièìn-naín nìà ɖé Gíógàò-hwɔ̀ɖɔ̀ɔ̀ múɛ, ɓɛ́ ɓě ké nàmàǔnɔ̀ ɖò nyu ɖe. Ɓě dyà ɓěɛ̀ sáa-zàìn-ɖɛ̀ ɓěɔ̀ ɓó gànà-kṹún-tì séín. Ɓě dyàìn ɓěɛ̀ ɓàɖàìn-bùèɔ̀ kpa dyúáɖò ɓó wé tã séín mu ziìn nyɛɛ xwíníín.

⁵ Ɓě fɔ̃ bɛɖɛɛ̀ dyá kɛ, ɓɛ́ ɔ ké zùo-po-nyìǐ-ɖɛ̀ jǔ, ɓɛ́ ɓě ké ɓɔ́ɖɔ́ ɓó ɓěɛ̀ hwòɖǒ-wáɖáá-nyìǐ-ɖɛ̀ ɓěɔ̀ jè kánáá pū. Éézùɖùɛ̀-dyù ɓě, ɓě ɓɔ́ɖɔ́ ɓó wa jè, sepóɛɖé ɖɛ nìà kɛ kɔ̃̀ nyu jè ɓěɛ̀ hwòɖǒ dèìn múin. Mɔ̄ Bounɓo Ɖɛɓíɔ́ mɔ̀ nyɔ cɛ̃à kɛ̀.”

⁶ Ké Bounɓoɔ̀ cɛ̃ɛ ɖe, ké ɔ ɖá, “Dyéɛ, ḿ nyuɛ ké mɔ́ kpá ma ɖé ɓěɛ̀ hwɔɖɔ séín ɓěɔ̀ mú, ké ɖii-ɖɛ̀ ɖò se ma ɖé ɓěɛ̀ hwɔɖɔ-kpàǎ séín ɓěɔ̀ ɖò kɔ̃ nì. Kɛɛ ɓě se ɖé ḿ gbo gmɔ̀ìn ɖe.

⁷ “Ké ti ɓɛ́ dɛ̀nɛ̀ tã sè ma ɓó ke hwɛ̀ ɓɛ́ ɓěɛ̀ ɓáá-ɖɛ̀ ɓěɔ̀ kɔ́-tìɔ̀ ké ma ɓó nyiniɛɛ, ḿ nyuɛ ké ní ɖò se ma ɖaɓa, ɓɛ́ ɔ ké ɓěɛ̀ ɓáá-ɖɛ̀ ɓěɔ̀ gbo kpá. Ḿ nyuɛ ké ní ɖaɓa ɖé hwɔɖɔɔ̀ ɖò mú, kɛɛ ɔ se hwɔɖɔ tɔ̀ɔ̀ mú ɖaɓa. Ḿ nyuɛ ké ní ɖaɓa ɖé geɖeɔ̀ ɖò gbo, kɛɛ ɔ se geɖe tɔ̀ɔ̀ gbo ɖaɓa, ké ɓáá-ɖɛ̀ séín nì ɖéɛɛ hwɛ̀ mɛ́ɛ.

⁸ Ké nyɔ ɓěɔ̀ ɓéɖé dyi ɓuɖuɛ̌n kpauń, ké wa nì sɔ̀ hwɔɖɔ ɖò mú mu ɖò mú nyuɛń, ké wa nì ní dyi mɔ́uń, kɛɛ wa ní dyé náá-nì ɓɛ́ìn wa dyíɛ. Kɛɛ wɛ̃́ɛ́ kɛɛ, ɓě se ɖé ḿ gbo gmɔ̀ìn ɖe.

⁹ “Ké ɓó ti ɓáún-ɓáún múɛɛ, ḿ nyuɛ ké ɓěɛ̀ géɖéèɔ̀ kè ɓěɛ̀ ɓáá-ɖɛ̀ tɔ̀ɔ̀ ɓěɔ̀ wɛ́ kpã̀ìn wa, ké waà mí ɓěɔ̀ páɖáìn ma kɔ̃in. Ké kpã̌ùn ɓě ɖi ɓěɛ̀ féè-cù ɓěɔ̀ kè ɓěɛ̀ ɔ́ɖè-cù ɓěɔ̀. Kɛɛ wɛ̃́ɛ́ kɛɛ, ɓě se ɖé ḿ gbo gmɔ̀ìn ɖe.

¹⁰ “Ké ḿ tò wɛ́-dù kò-kò ɓě ɖé ɓě hwìɛ̀ kà ḿ nyuɛ ma kà Íjè-nyɔ̀ ɓěɔ̀ bũ̌ kɛ. Ké ḿ ɖáɓá ɓěɛ̀ gàa-dyù gmɔ̀ ɓěɔ̀ gàsíà dyí. Ké ḿ ɖáɓá sǒ ɓě ɓɛ́ ɓě zà ma kà to gboɛ. Ɔ jèɛɛ, ɓěɛ̀ jàɖàìn-hwɔ̀ɖɔ̀ ɓěɔ̀ nyìnììn nyɔ́ún. Kɛɛ wɛ̃́ɛ́ kɛɛ, ɓě se ɖé ḿ gbo gmɔ̀ìn ɖe.

¹¹ “Ké ḿ gbɔɔ̀ ma ɓě ɖíɛ́ ɓě mú kà ḿ nyu ma kà Sáɖɔ̀ùn kè Gòmɔ́ɖɔ̀-hwɔ̀ɖɔ̀ ɓěɔ̀ wáɖáa kɛ. Ké ɓě nyɔ ɓě sè ɓíɖíiɛɛ nì ma kà nyɛ-kpĩ̀ǐn-gbɔ̀ kpɔ̃ín-kpɔ̃ín ɓɛ́ wa bǎ ɓó nyɛ-ɓɔ́ɔ́ múɛɛ nìà kɛ. Kɛɛ wɛ̃́ɛ́ kɛɛ, ɓě se ɖé ḿ gbo gmɔ̀ìn ɖe.

¹² Ɔ jèɛɛ, Éézùɖùɛ̀-dyù ɓě, ní mu ɓě gǎ dyéìn. Ní mu ɖɛà kɛɛ nyuùn jèɛɛ, Éézùɖùɛ̀-dyù ɓě, ɓě dyé ti, ɓɛ́ ɓě kè ɓěɛ̀ Gèɖèpɔ́ɔ̀ ké ɖé dyéɖéín gmɔìn. Mɔ̄ Bounɓoɔ̀ mɔ̀ nyɔ cɛ̃à kɛ̀.”

¹³ Ɔ mɔ̀ Gèɖèpɔ́ɔ̀ mɔ̀ nyɔ mɛà toɖo ɓěɔ̀, ɓɛ́ ɔ dyià pìɔ̌ɔ̀ nyuɛ̀. Ké ɔ mɔ̀ nyɔ cɛ̃à ɔ fɔ̀nɔ̀ hwòɖǒ nyɔǔn-dyù gboɛ̀. Ɔ mɔ̀ nyɔ zɛ̃̀àìn ce tíe-kpò múɛ̀. Ɔ mɔ̀ nyɔ nìà ɓóɖó-kpà gànáà kɔ̃in nyɛ̀. Ɔ nyɛ́nɛ́ mɔ̀ Bounɓo Gèɖèpɔ́ɔ̀ nìà ɖɛ séín kɔ̃in nyɛ̀.