Emɔ́ 3 - Ɓǎsɔ́ɔ̀ Báɓòɔ̀

¹ Óó Éézùɖùɛ̀-nyɔ̀ ɓě, ɓě mɔ̀ nyɔ séín ɓɛ́ Bounɓoɔ̀ zà ma kà ɖé Íjè-ɓòɖòɔ̀ kɔ̃ɛɛ, ɓě tò wuɖu ɓɛ́ ɔ ɖǎ cɛ̃ ɓá ɓě jè dyíɛɛ gbo ɖùǔ. Ɔ ɖá,

² “Ɓě ɖòùn mɔ̀ nyɔ ḿ ɖǎ gã sɔ̀ìn ɖé xwéɖé-dù séín nì ɓóɖó-kpàɔ̀ kɔ̃ɛɛ hwìɛ̀. Ɔ jèɛɛ, ní mu ɓě gǎ kɔ̃ tòùn ɓó ɓěɛ̀ nàmàǔn ɓěɔ̀ jè.”

Kpáá-ɖɛ̀-cɛ̃-nyɔ̀ɔ̀ cɛ̃ Gèɖèpɔ́ɔ̀-wùɖù

³ Nyɔ sɔ̃́ ɓɛ́ìn mú naìn, ɔ jǔ ké waà wuɖu se gbo kpɔ̃ìn níì?

⁴ Ganìǎ ɖò ɓɛ́ìn kuɖuɛ ɖé xwáɖá xwíɖíi, ɔ jǔ ké ɔ se kpɔ̃ɔ-ɖɛ̀ ɖò dyé níì? Mɔɔ ké ɔ ɓɛ́ìn dyoɖo poɛ ɖé ɔ ɓíɔ̀ mú, ɔ jǔ ké ɔ se ɖɛ ɖò kpɔ̃ níì?

⁵ Xwáɖá ɓɛ́ìn naà ɖò kpɔ̃ɔ, ɔ jǔ ké naàɔ̀ ɖii-ɖɛ̀ ɖò se xwáɖáɔ̀ wɔ̃ nì níì? Mɔɔ ké xwáɖá ɖò ɖǎ mú póìn ɖò pídyi, ɔ jǔ ké ɖɛ ɖò seɛ dyí ɓaɖa níì?

⁶ Ɔ jǔ ké ɖɔ-kpa dyi wúɖú ɖé hwɔɖɔ ɖò mú ɓó to jè ní, má, nyɔ ɓěɔ̀ fɛ̃̀ìn níe? Mɔɔ ké ɖɛ gbà ɖò ɓɛ́ìn hwɔɖɔ ɖò kɔ̃ dyiɛ, ɔ jǔ ké Bounɓoɔ̀ seɛ tò níì?

⁷ Ní mɔ́ ɓɛ́ ɓě kéɛ dyuò kà Bounɓo Ɖɛɓíɔ́ tɛ̀mɛ̀ìn ɖɛ ɓě ɔ sɔ́ dyí ɓɛ́ ɔ ké nyuɛɛ ɔ kpáá-ɖɛ̀-cɛ̃-nyɔ̀ ɓě mɔ̀à ɔ gbo-nì-nyɔ̀ ɓěɔ̀ kɛɛ dyí hwɛ̀ ké ɔ nyuɛ kɛ.

⁸ Ganìǎɔ̀ ɖǎ kuɖu. Nyɛ́ seà fã̀à peɖeɛ́ mu kɛ́? Bounɓo Ɖɛɓíɔ́ ɖǎ wùɖù, ké ḿ ɓéɖé ɓɛ́ ḿ kéɛ jè zio po.

Éézùɖùɛ̀-nyɔ̀ ɓěɔ̀ mú-gbɔɔ̀-gbɔɔ̀

⁹ Kpáá-ɖɛ̀-cɛ̃-nyɔ̀ ɓě, ɓě po zio ɖé nyɔ ɓě nì ɖé Áɖò-hwɔ̀ɖɔ̀ɔ̀ kè Íjè-ɓòɖòɔ̀ to-pèɖèìn-naín ɓěɔ̀ múɛɛ gbo, ɓɛ́ ɓě ké níiń, “Ɓě poìn dyí ɖé toɖo vɛ̀nɛ̀ ɓě nìà ɖé Sɛ̀mɛ́ɖìà-hwɔ̀ɖɔ̀ɔ̀ ɖeiɛɛ dya, ɓɛ́ ɓě ké fũ̀à-fṹá vɛ̀nɛ̀ nìà ɖé hwɔɖɔɔ̀ múɛ kè dyi-pĩ́à-pĩ́à vɛ̀nɛ̀ nìà ɖé ɔ nyɔ ɓěɔ̀ hwìɛ̀ kɛɛ dyé.”

^10-11 Ɖɛ Bounɓo Ɖɛɓíɔ́ cɛ̃ ɓá wa jè dyíɛɛ, ɔ kɛà kɛ̀. Ɔ ɖá, “Wa se ɖɛ sɛ́ɖɛ́ìn dyíɛɛ nyuɛ dyuò. Wa ɖǎ ɖɛ ɓě wa zàìn nyɔǔn gana xwaa kè ɖɛ ɓě wa dyíɖíɛɛ waà to-pèɖèìn-naín ɓěɔ̀ mú dyi dyíìn. Ɔ jèɛɛ, waà mú-nyɛ́-nyɔ̀ ɓě mu waà ɓóɖóɔ̀ dyí ɖúùn, ɓɛ́ wa ké waà to-pèɖèìn-naín ɓěɔ̀ dyíin nyìnììn, ɓɛ́ wa ké waà kɔ̃̀ɔ̀-ɖɛ̀ séín ɓě nì ɖéɛɛ dyí ɖú.

¹² “Kà ɓáɖáá-dyí-gmɔ̀-nyɔ̀ ɖò zàà ɔ ɓáɖááɔ̀ pɔ̃́ sɔ̃́ mɔɔ ɔ ɖùǔ-téé dyúáɖò nyɛ̀nɛ̀ɛ̀ ganìǎ wĩín nyɛɛ, kǎà Éézùɖùɛ̀-dyù ɓěɔ̀ nyɔ mu póùn wɛ̃ɛ mu jĩ̀ìn. Wa mɔ̀ nyɔ ɓě pɛ̃́à pɛ̃́-naín nɔ̀mɔ̀ kɔ̃in, ké wa kòà kɔ̃-kò-ɖɛ̀ nɔ̀mɔ̀ kɔ̃in ɓě kɔ̃ ɖé Sɛ̀mɛ́ɖìà-hwɔ̀ɖɔ̀ɔ̀ múɛ̀.”

¹³ Ké Bounɓo Gèɖèpɔ́ɔ̀ nìà ɖɛ séín kɔ̃in nyɛɛ cɛ̃ɛ ɖe, ké ɔ ɖá, “Ɓě tò ɖùǔ, ɓɛ́ ɓě kéɛ Jékɔ̀ɛ̀ xwíníín-dyù ɓěɔ̀ gbo cɛ̃

¹⁴ kà wé kɔ̃̀ ɓaɖa ní mu Éézùɖùɛ̀-dyù ɓěɔ̀ gǎ kɔ̃ tòùn ɓó waà nàmàǔn ɓěɔ̀ jèɛɛ, ní mu sáa-kɔ̃-zàìn-gbàà ɓě nìà ɖé Bɛ́fèò-hwɔ̀ɖɔ̀ɔ̀ múɛɛ dyíin nyìnììn nyɛ. Sáa-kɔ̃-zàìn-gbàà ɓěɔ̀ ɖò-ɖòɛ̀ gã ɓěɔ̀ mu ɓó jɛ̀ɖɛ̀ìn, ɓɛ́ wa ké dyi wáɖá.

¹⁵ Ké ní mu sɔ̃̀ɔ̀-tì nììn gbǒ ɓěɔ̀ kè zùzù-tì nììn gbǒ ɓěɔ̀ wáɖáùn. Ké gbǒ ɓě ɓɛ́ wa pòìn dyuɛ-nyɛ̀nɛ̀ kɛ ɔ kè gbǒ vɛ̀nɛ̀ ɓěɔ̀, ní mu wa wáɖáùn. Mɔ̄ Bounɓoɔ̀ mɔ̀ nyɔ cɛ̃à kɛ̀.”