Emɔ́ 2 - Ɓǎsɔ́ɔ̀ Báɓòɔ̀

¹ Hwɛ̀ ké Bounɓoɔ̀ cɛ̃ɛ ɖe, ké ɔ ɖá, “Móà-nyɔ̀ ɓěɔ̀ nyu nàmàǔn deìn kɔ̃in. Ɔ jèɛɛ, ní mu wa gǎ kɔ̃ tòùn wɛ̃́ɛ́. Nàmàǔnɔ̀ vɛ̀nɛ̀ mɔ̀, wa zà ma Íɖɔ̀ùn-kã̀ǎɔ̀ kpá ɓóɖóún, ké wa fɔ̃ɔ, ké ɔ nyu tĩ́ɔ.

² Ɔ jèɛɛ, ní mu nyɛ Móà-ɓòɖòɔ̀ kɔ̃ tòùn, ɓɛ́ nyɛɔ̀ ké to-pèɖèìn-naín ɓě nì ɖé Kéwìɖìò-hwɔ̀ɖɔ̀ɔ̀ múɛɛ fɔ̃. Ké Móà-nyɔ̀ ɓěɔ̀ mu mɛ́ìn ɖé to gbo, ti ɓɛ́ toɔ̀ jĩ̌ mu dyiìn, ɓɛ́ ɖɔ-kpa ɓě ké wúɖúɛń nì kɛ.

³ Ké ní mu ɓóɖóɔ̀ kã́áɔ̀ kèɛ̀ gɔ̌mànà-nyɔ̀ séín ɓěɔ̀ ɖáɓáùn. Mɔ̄ Bounɓoɔ̀ mɔ̀ nyɔ cɛ̃à kɛ̀.”

⁴ Hwɛ̀ ké Bounɓoɔ̀ cɛ̃ɛ ɖe, ké ɔ ɖá, “Júɖà-nyɔ̀ ɓěɔ̀ nyu nàmàǔn deìn kɔ̃in. Ɔ jèɛɛ, ní mu wa gǎ kɔ̃ tòùn wɛ̃́ɛ́. Nàmàǔnɔ̀ vɛ̀nɛ̀ mɔ̀, wa ɖǎ ní ná-wùɖù ɓěɔ̀ ɓɔ́. Wa se ní gma ɓěɔ̀ dyi kpɔ̃uń nì, kɛɛ gèɖèpɔ́ɔ̀ ɓě ɓɛ́ wa se jǎà gèɖèpɔ́ɔ̀ ɓěɛɛ ɖǎ wa hwìǐ zàìn. Wa mɔ̀ gèɖèpɔ́ɔ̀ ɓě ɓɛ́ wa ɓǎ nììn ɓǎ ɓě sí ma kíɖííɛ.

⁵ Ɔ jèɛɛ, ní mu nyɛ Júɖà-ɓòɖòɔ̀ kɔ̃ tòùn, ɓɛ́ nyɛɔ̀ ké Jùɖúsɛ̀ɖɛ̀ìn-hwɔ̀ɖɔ̀ɔ̀ to-pèɖèìn-naín ɓěɔ̀ fɔ̃.”

Gǎ mu Éézùɖùɛ̀-nyɔ̀ ɓěɔ̀ kɔ̃ dyiìn nyɛ

⁶ Hwɛ̀ ké Bounɓoɔ̀ cɛ̃ɛ ɖe, ké ɔ ɖá, “Ɓě mɔ̀ Éézùɖùɛ̀-dyù ɓěɛɛ, ɓě nyu nàmàǔn deìn kɔ̃in. Ɔ jèɛɛ, ní mu ɓě gǎ kɔ̃ tòùn wɛ̃́ɛ́. Nàmàǔn vɛ̀nɛ̀ ɓěɔ̀ mɔ̀, ɓě wáɖá dyí-sɛ́ɖɛ́ìn-nyɔ̀ ɓěɔ̀ zaa dúún ɓó séɓàɖà-wìɖì jè. Ké ɓě peɖe gǎ-dyé-nyɔ̀ ɓěɔ̀ ɓó ɓoún-po-bà kɔ̃̀ kpa ɓɛ́ wa se pɛ́ɛ̀ ɓɛ́ìn nyɛɛ jè.

⁷ Ɓě síìn nyɔ ɓě hwɛ̀ kpéíɛɛ dú ɓěɔ̀ kɔ̃in kà nyɔ síàìn ɓóɖóɔ̀ púu-púu kɔ̃in nyɛ, ké ɓě ní po nyɔ ɓě wa pĩ́à dyiɛɛ zaa wɔ̃ dyí-sɛ́ɖɛ́ìn-kà. Ké gàa kè ɔ dyú-gàà po màa-dyù dyúáɖò gbǒǔn. Wa nyuɛ náa ɓɛ́ wa ké ní nyɛ́nɛ́ hwɛ̀ǐn-hwɛ̀ǐnɔ̀ dyíin nyìnììn.

⁸ Ké ɓě pɛ̃́ mú-po-ɖɔ̀ ɓě ɓɛ́ gǎ-dyé-nyɔ̀ ɓěɔ̀ ɖǎ tɔ̀ɔ̀-má mú dè ɓó kpa ɓě jèɛɛ kɔ̃ ɓó sáa-kɔ̃-zàìn-gbàà ɓěɔ̀ wáún. Ké ɓě ná wã́ìn ɓɛ́ ɓě dɔ̃ gma-dyáìn-wìɖì, ɓɛ́ ɓě po nyɔ ɓě dya kɛ múɛɛ ɖé ɓěɛ̀ gèɖèpɔ́ɔ̀ gbǒɔ̀ mú.

⁹ “Ɓě nyu ḿ ɖɛ gbà séín bũ̌, kɛbì ḿ mɛ gbɔɔ̀ ma Ámɔ̀-nyɔ̀ ɓěɔ̀ mú ɓó ɓě dyúa kɛ. Ámɔ̀-nyɔ̀ ɓěɔ̀ tɔ̀mɔ̀ ma dya kà síɖà-cù nìà kɛ, ké wa ku ma dyi kà óò-cù nìà kɛ. Kɛɛ ḿ gbɔɔ̀ ma wa séín mú kà nyɔ nyìnìàìn cu vɛ̀nɛ̀ ɖòɛ̀ ɓo kè ɔ gmɛ̀nɛ̀ɛ̀ ɓě dyíin nyɛ.

¹⁰ Kĩ́ín-kĩ́ín nyɛɛ, ḿ zà ma ɓě ɖé Íjè-ɓòɖòɔ̀ kɔ̃, ké ḿ nàìn ma ɓě ɓó zɔ̃ kpáɖá-nyɔ sɔ̃́ xwíníín ɖé gbǎùn-fúɖúáɔ̀ kɔ̃, ɓɛ́ ḿ ké Ámɔ̀-nyɔ̀ ɓěɔ̀ ɓóɖóɔ̀ ɓě nyí jè.

¹¹ Ké ḿ gã ma ɓěɛ̀ dyú-gàà ɓěɔ̀ ɖíɛ́ ɓě, ɓɛ́ wa ké ní kpáá-ɖɛ̀-cɛ̃-nyɔ̀ ɓě jǔ. Ké ḿ gã ɓěɛ̀ gàa-dyù ɓěɔ̀ ɖíɛ́ ɓě, ɓɛ́ wa ké Názìwàɖà-nyɔ̀ ɓě jǔ. Ɓě mɔ̀ Éézùɖùɛ̀-dyù ɓěɛɛ, ɖɛ ḿ cɛ̃à kɛɛ se jǎàe?

¹² Kɛɛ ɓě nyuɛ ké Názìwàɖà-nyɔ̀ ɓěɔ̀ ná wã́ìn, ké ɓě po ní kpáá-ɖɛ̀-cɛ̃-nyɔ̀ ɓěɔ̀ ɓɔ́í, ɓɛ́ wa ní kɔ̃̀ ɖà wuɖu ḿ dèìn wa wĩín nyɛɛ cɛ̃.

¹³ Ɔ jèɛɛ, ɓó kàǔn wɛ̃ɛ, ní mu ɓě dyi wàìn kà ɓóɖó-kpò wɛ̀àìn dyi ɖé ɖɛ ɓéɖé gbɛ̌ ku xwa ɖò xwíɖíiɛɛ nìà kɛ.

¹⁴ Nyɔ ɓě ɓɛ́ wa fɛ̃́ìn xwaiɛɛ se xwáɖáún kpáa ɓɛ́ǐn mu. Ké nyɔ ɓě ɓéɖé kpéɛɛ, kpé mu wa dyí hwɛ̀ìn, ké nyɔ ɓě mɔ̀ to-vɔ̃-nyɔ̀ vɛ̀nɛ̀ ɓěɛɛ se wa mìɔùn nììn fɛ̀ɛ̀ póɛ̀n ɓɛ́ǐn mu.

¹⁵ Nyɔ ɓě mɔ̀ sé-po-nyɔ̀ ɓěɛɛ, wa se waà mú-nyɛ́-nyɔ̀ ɓěɔ̀ dyúa dyi nyànàà ɓɛ́ǐn mu. Ké nyɔ ɓě kɔ̃̀ ɓo fɛ̃́ìn xwa ɓó gbǔ jèɛɛ se wa dyúa gbǔɛ ɓɛ́ǐn mu. Ké sǒ-kɔ̃ún-kò-nyɔ̀ ɓěɔ̀ se wa mìɔùn nììn fɛ̀ɛ̀ póɛ̀n ɓɛ́ǐn mu.

¹⁶ Hwɛ̀ ḿ po níiń, nyɔ ɓě mɔ̀ gàa-zà-nyɔ̀ vɛ̀nɛ̀ ɓěɛɛ mu xwa fɔ̀nɔ̀ùn, ɓɛ́ wa ké gbǔ ɓó wéa ɓaɖa. Mɔ̄ Bounɓoɔ̀ mɔ̀ nyɔ cɛ̃à kɛ̀.”