Àpɔ́sò 28 - Ɓǎsɔ́ɔ̀ Báɓòɔ̀

Pɔ́ɔ̀ nì Mótà-tòò-kpòɔ̀ kɔ̃

¹ Ti à séín ɖǎ ma póɛɛ, hwɛ̀ ké à dyuòɛ̀ ma dyí kà tóó-kpò ɓɛ́ à nìà kɔ̃ɛɛ nyɛ́nɛ́ mɔ̀ ma Mótà kɛ.

² Ɓóɖóɔ̀ nyɔ ɓěɔ̀ kpeɖe zi ma dyíin nɔ̀mɔ̀ǔn mìɔ ɓó à gbo, ké wa kpɔ̃ ma à séín jè dyi. Ní dè ma ɖaɓaa gbɔ, ké sɔ̃̀ɔ̀ dyi ma mìɔ jèɛɛ, wa po ma à bìì nyɛ dyí.

³ Ké Pɔ́ɔ̀ mu, ké ɔ mɔ́ ma nyɛ, ké ɔ wáɖáa ma dyéɖé. Púɛɛ, sɛ ɖò gbǔ ma ɖé dyéɖéɔ̀, ké ɔ numu ma ɔ sɔ̃ɔ̀ dyí, ké ɔ beèɛ̀ ma dyí.

⁴ Ti ɓóɖóɔ̀ nyɔ ɓěɔ̀ dyéɛ ma kà sɛɔ̀ beè ma ɔ sɔ̃ɔ̀ dyíɛɛ, wa cɛ̃ìn cɛ̃̀ìn ma gbo, ké wa ɖá, “Gàa nìà kɛ ɓɛ́ìn kú-ɖáɓá-nyɔ̀ ɖò jǔɛ. Ɔ ɖǎ níɔ̀ kɔ̃ sɔ̀, ké ɔ ɖǎ pó jǎà dyɛo, kɛɛ Jǎà-nyɔ̀ɔ̀ se wɔ̃́ ɓɛ́ ɔ ké cĩ́.”

⁵ Kɛɛ Pɔ́ɔ̀ ɓaɖa ma sɔ̃ún ɓó nyɛɔ̀ kɔ̃in, ké sɛɔ̀ kpá ma dyéɖé, ké ɖɛ gbà ɖò se ma Pɔ́ɔ̀ gbo kpá fɔɔ.

⁶ Wa nì ma ɓó gmɔ̀ǔn, ɓɛ́ ɔ ké ma kɔ̃in bũ̌ìn, mɔɔ ɓɛ́ ɔ ké ma ɓuɖu, ɓɛ́ ɔ ké ma mɛ́ wàɖà. Kɛɛ ti wa ɖǎ ma ɓó gmɔ̀ tee, ké ɖɛ kà kò ɖò se ma ɔ gbo kpáa, wa zĩàìn ma wa hwòɖǒɔ̀ gbo, ké wa ɖá, “Ɔ mɔ̀ gèɖèpɔ́ɔ̀ ɖò.”

⁷ Dɛ̀ wa nì ma kà kɛɛ pá ɓě xwɛ̃́ìn ma ɓó dyiɛɛ, tóó-kpòɔ̀ wuɖuí-kɔ̃̀-nyɔ̀ kɔ̃̀ nyɛ́nɛ́ mɔ̀ ma Páɓìɖìà kɛɛ kɔ̃̀ ma wa. Ɔ kpɔ̃ ma à jè dyi, ké ɔ gmɔ̀ à gbo nɔ̀mɔ̀ dyíin ɓó wé tã xwíníín, kà nyɔ ɖá à mɔ̀ɔ̌ kà ɔ ɖíí ɖòɛ.

⁸ Ké Páɓìɖìà ɓǎ pɛ̃́ ma dyi, sepóɛɖé ɔ dyɔɔ̀ sùmù ma ní, ké ɔ ɓéɖé ma cɛ̃-xwìɖì. Ké Pɔ́ɔ̀ mu ma ɖé ɔ gbo, ké ɔ ɓaà ma, ké ɔ pɛ̃́ìn ma ɔ sɔ̃ kɔ̃, ké ɔ kánáìn ma ɔ dyi.

⁹ Ti ɖɛa ɖǎ ma kpáa, nyɔ tɔ̀ɔ̀ ɓě nì ma wɛ́iń ɖé tóó-kpòɔ̀ kɔ̃ɛɛ dyi ma ɔ gbo, ké wa mɔ̀ùn káná ma dyi ɖekè.

¹⁰ Ké wa nyí ma à ɖɛ ɓáún-ɓáún, ké ti ɔ ɖǎ ma ti jǔ ɓɛ́ à kéá ma muɛɛ, wa po ma ɖɛ séín ɓě ɓɛ́ à mɔ́ ma kɛɛ méè ɖò mú.

Sɔ̀ Mótà-tòò-kpòɔ̀ kɔ̃ muà ɖé Wóɖóùn-hwɔ̀ɖɔ̀ɔ̀ múɛ

¹¹ Méè ɖìè ɓɛ́ à nì ma kà mú mùɛ̌n nyɛɛ sɔ̀ìn ma ɖé Ɛ̀ɖìzánìà-hwɔ̀ɖɔ̀ɔ̀ mú. Ɔ nyɛ́nɛ́ mɔ̀ ma Ní-zèɖě sɔ̃́. Ɔ gã̀ ma ɖé tóó-kpòɔ̀ mú dyi tee, ké sɔ̃̀ɔ̀-tìɔ̀ zi ma dyi. À nyu ma dɛ̀nɛ̀ tã ɖé tóó-kpòɔ̀ kɔ̃, hwɛ̀ ké à mu ma.

¹² À mu, ké à po ma ɖua ɖé Sɛ́wéɖékìù-hwɔ̀ɖɔ̀ɔ̀ mú, ké à nyu ma ɓó wé tã.

¹³ Ti à sɔ̀ ma ɓóɛɛ, à kpa ma hwìè kíɖíín-kíɖíín ɖò, ké à nyini ma ɖé Wíɖíjìà-hwɔ̀ɖɔ̀ɔ̀ mú. Ké ti à ɖǎ ma ɓó wé dyúáɖò nyuɛɛ, pìɔ̌ ɖò sɔ̀ìn ma ɖé à ɖeín, ké à nyu ma wé sɔ̃́, ké à nyini ma ɖé Pútìóɖè-hwɔ̀ɖɔ̀ɔ̀ mú.

¹⁴ Ké à dyɛ̀ìn ma ɖé à ɖíí cɔ́cì-nyɔ̀ ɓě dyi, ké wa cɛ̃ɛ ma à gbo, ɓɛ́ à ké ma ɖé wa gbo wé mɛ̀nɛ̌ìn-sɔ̃́ nyu. Hwɛ̀ ké à nyini ma ɖé Wóɖóùn-hwɔ̀ɖɔ̀ɔ̀ mú.

¹⁵ Ti à ɖíí cɔ́cì-nyɔ̀ ɓě nì ma ɖéɛɛ wɔ̃́ ma à jèɛɛ, wa ɖíɛ́ ɓě dyi ma à hwìǐ ɖé Ápìàfɔ́ɖà-hwɔ̀ɖɔ̀ɔ̀ mú, ké ɖíɛ́ ɓě dyà ma à hwìǐ dyiɛ ɖé Tíɖíì-Távɛ̃̀-hwɔ̀ɖɔ̀ɔ̀ mú. Ti Pɔ́ɔ̀ dyé ma waa, ɔ po ma Gèɖèpɔ́ɔ̀ zùo, ké kpé kpá ma ɔ dyí.

Pɔ́ɔ̀ nì ɖé Wóɖóùn-hwɔ̀ɖɔ̀ɔ̀ mú

¹⁶ Ti à nyini ma Wóɖóùn-hwɔ̀ɖɔ̀ɔ̀ múɛɛ, wa wɔ̃́ ɓɛ́ Pɔ́ɔ̀ ɖòùn ké ma dà ɖò nì, ɓɛ́ sójà dyúáɖò ké ɔ dyí gmɔ̀.

¹⁷ Ti wé tã ɖǎ ma ziɛɛ, Pɔ́ɔ̀ ɖá ma Júù-nyɔ̀ ɓěɔ̀ nàìn-nyɔ̀ ɓě nì ma ɖéɛ. Ké ti wa ɖǎ ma dyí poìn nyɛɛ, ɔ cɛ̃ɛ ma wa gbo, ké ɔ ɖá, “Ɖíí ɓě, ḿ séè à nyɔ ɓěɔ̀ ɖɛ ɖò bũ̌ nyu ɖò, ké ḿ séè ɖɛ kà kò ɖò ɓɛ́ ɔ se à ɓǎ nììn ɓǎ ɓěɔ̀ kpeɖe ɓěɔ̀ dyí ɓáa ɖò nyu ɖò. Kɛɛ ḿ mɔ̀ǎ nɔ̄ kpɔɖɔ-ɖeín-nì-nyɔ̀ ɓó kàǔn, sepóɛɖé Júù-nyɔ̀ ɓě nì ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ nyí ma ḿ Wóɖóùn-nyɔ̀ ɓěɔ̀ xwa.

¹⁸ Ti wa ɖǎ ma ḿ dyi dièɛɛ, wa mɔ́ ɓɛ́ wa ké ma ḿ dyi táà, sepóɛɖé ḿ se ma ɖɛ kɔ̃̀ jè ɓɛ́ ḿ ɓéɖé ɓɛ́ ḿ ké ma mɛ́ɛ ɖò nyu.

¹⁹ Kɛɛ Júù-nyɔ̀ ɓěɔ̀ hwòɖǒ seɛ ma náa mɔ́. Ɔ jèɛɛ, ḿ ɓéɖé ɓɛ́ ḿ ké ma zaaɔ̀ Síízɛ̀ gbo kpa, kɛɛ ḿ se ḿ mìɔùn nììn nyɔ ɓěɔ̀ ɖɛ gbà ɖò kɔ̃ún cɛ̃ɛ ɓɛ́ìn.

²⁰ Ɔ kɔ̃̀ jè ḿ ɖáà ɓě, ɓɛ́ ḿ kè ɓě kéà wùɖù kɛ̀. Ɖɛ Éézùɖùɛ̀-nyɔ̀ ɓěɔ̀ dèà hwòɖǒ kɔ̃ɛɛ, ɔ kɔ̃̀ jè wa sã̀ìn kà ḿ dyɔ̀ɔ̌ nìà kɛ̀.”

²¹ Ké wa cɛ̃ɛ ma ɔ gbo, ké wa ɖá, “À se céè-ɖɛ̀ ɓá m̀ dyíɛɛ ɖò dyé sɔ̀ìn ɖé Júɖìà-ɓòɖòɔ̀ kɔ̃, ké à ɖíí Júù-nyɔ̀ ɓě dyià nɔ̄ kɛɛ séè nɔ̄ bɔ̃̌ dyà ɖò, ké wa séè m̀ ɖɛ gbà ɖò kɔ̃ún cɛ̃ ɖò.

²² Kɛɛ à mɔ́ ɓɛ́ à ké ɖɛ mɔ̀ùn mɔ́ ɓɛ́ m̀ ké cɛ̃ɛ wɔ̃́, sepóɛɖé à dyuò kà nyɔ ɖò se ɖɛ nɔ̀mɔ̀ dyíin ɓɛ́ ɔ ké Kɛ́ɖɛ́ì ɖeín-sí-nyɔ̀ ɓěɔ̀ bìì cɛ̃ɛ ɓéɖéɛ.”

²³ Sɔ̀ìn ɓóɛ gboɛɛ, wa po ma wé ɖò táí, ké wa ɓáún-ɓáún dyi ma dɛ̀ ɓɛ́ Pɔ́ɔ̀ nì ma kɛ. Sɔ̀ìn gànà-kṹún mu hwìo gboɛɛ, ɔ zaìn ma wa ɖɛ ɓěɔ̀ gbo kɔ̃in. Ɔ nyu ma zàse ɓó Gèɖèpɔ́ɔ̀ kã́á-ɓòɖòɔ̀ jè, ké ɔ vɔ̃ ɓɛ́ ɔ kéɛ nyu ɓɛ́ wa ké ma Jízɛ̀ jè dyi kpɔ̃. Ɔ nyuɛ ma náa sɔ̀ìn ɖé Mózèɛ̀ gma-cèè-ɖɛ̀ɔ̀ kè kpáá-ɖɛ̀-cɛ̃-nyɔ̀ ɓěɔ̀ céè-ɖɛ̀ ɓěɔ̀ mú.

²⁴ Ké ɖíɛ́ ɓě zi ma ɔ gbo ɓó ɖɛ ɓě ɓɛ́ ɔ cɛ̃ ma kà kɛɛ jè, kɛɛ ɖíɛ́ ɓě seɛ ma jǎà po.

²⁵ Ti Pɔ́ɔ̀ cɛ̃ ma ɖɛ dyúáɖò ɖeɛɛ, wa hwòɖǒ se ma dyúáɖò nì, ké wa mu ma. Ɖɛ ɔ cɛ̃ ma kà kɛɛ kɛà kɛ̀. Ɔ ɖá, “Zùù Hwɛ̀ǐn-hwɛ̀ǐnɔ̀ cɛ̃ ma jǎà, ti ɔ cɛ̃ ma ɖɛ ɓěɛ̀ ɖé Àzédyà mɔ̀à kpáá-ɖɛ̀-cɛ̃-nyɔ̀ɔ̀ kɛɛ múɛ. Ɔ cɛ̃ɛ ma ɓě ɓǎ nììn ɓǎ ɓěɔ̀ gbo, ké ɔ ɖá,

²⁶ ‘Mu, ɓɛ́ m̀ kéɛ nyɔ ɓěɛ̀ gbo cɛ̃, ɓɛ́ m̀ ké níiń, “Ɓěɛ wɔ̃́ ɖɛ ɓě jǎà dyɛo, kɛɛ ɓě ní wɔ̃́ɔ múin. Ɓěɛ̀ gmɔ̀ ɖɛ dya dyɛo, kɛɛ ɓě ní dyéɛ múin.”

²⁷ Sepóɛɖé nyɔ ɓěɛ̀ hwòɖǒ-dyùà kùmù, ké waà ɖùǔ ku mú, ké waà dyéɖé kpè kɔ̃in, ɓɛ́ wa ní kɔ̃̀ ɖà waà dyéɖéɔ̀ dyi dyéìn, wa ní kɔ̃̀ ɖà waà ɖùǔɔ̀ dyi wɔ̃́ìn, waà hwòɖǒ-dyùàɔ̀ ní kɔ̃̀ ɖà ɖɛ múin wɔ̃́, ɓɛ́ wa ní kɔ̃̀ ɖà ḿ gbo gmɔ̀ìn, ɓɛ́ mɔ́ún kɔ̃̀ ɖà wa dyi kánáìn.’

²⁸ “Ɔ jèɛɛ, ɓě mɛ dyuòɛ̀ kà Gèɖèpɔ́ɔ̀ pó-póɔ̀ ɖǎ ɓóɖó-dù kà kò ɖò ɓěɛ̀ nyɔ ɓěɔ̀ gbo muɛ. Wa mɔ̀ùn muɛ ɖùǔ gbo tòùn.” [

²⁹ Ti ɓɛ́ Pɔ́ɔ̀ ɖǎ ma wùɖùɛ̀ hwɔɛɛ, Júù-nyɔ̀ ɓěɔ̀ zàà ma dòǐn, ké wa mu ma.]

³⁰ Ké Pɔ́ɔ̀ nyu ma ɖé zɔ̃ gàná sɔ̃́, ké ɔ nì ma nyɔ ɓě kɔ̃̀ gbǒ ɓɛ́ ɔ nì ma kà múɛɛ pɛ́ɛ̀ǐn. Ké ɔ kpɔ̃ ma nyɔ séín ɓě dyi ma ɔ gboɛɛ jè dyi.

³¹ Ɔ nì ma Gèɖèpɔ́ɔ̀ kã́á-ɓòɖòɔ̀ jè zio poɛń, ké ɔ nì ma Bounɓo Jízɛ̀ Kɛ́ɖɛ́ì jè nyɔ ɓěɔ̀ tɛ̀mɛ̀ǐn. Ɔ cɛ̃ɛ ma wáɖáá cá, ké nyɔ ɖò se ma ɔ ɓɔ́í po.