Àpɔ́sò 27 - Ɓǎsɔ́ɔ̀ Báɓòɔ̀

Pɔ́ɔ̀ nì ɖé Wóɖóùn-hwɔ̀ɖɔ̀ɔ̀ mú muɛń

¹ Sɔ̀ìn ɓóɛ gboɛɛ, wa poɛ ma gbɔ, ɓɛ́ à ké ma dyóóɔ̀ péɖé, ɓɛ́ à ké ɖé Ítáɖè-ɓòɖòɔ̀ kɔ̃ mu. Ɔ jèɛɛ, wa zà ma Pɔ́ɔ̀ kè kpɔɖɔ-ɖeín-nì-nyɔ̀ tɔ̀ɔ̀ ɓěɔ̀ xwáɖáún, ké wa nyí ma wa nyɔ kɔ̃̀ sójà hɔ̃dɛ̀ɖɛ̀ ɖò wuɖuíɛɛ xwa. Ɔ nyɛ́nɛ́ mɔ̀ ma Júɖìɔ̀. Ɔ mɔ̀ ma sójàɔ̀ dúɛ̀ nyɔ wa ɖáìn Àgɔ́sɔ̀ɖɔ̀-dù kɛɛ nyɔ ɖò.

² Ké à kpá ma méè ɖò sɔ̀ìn ma ɖé Àdàɖàmítìà-hwɔ̀ɖɔ̀ɔ̀ múɛɛ mú. Méèǐn-gɔ̀ɖɔ̀ɔ̀ ɓěɔ̀ mɔ́ ɓɛ́ wa ké ma ɖua poɛ kpa ɖé hwɔɖɔ ɓě nì ma ɖé Ésìà-ɓòɖòɔ̀ wĩin nyɛɛ mú. À kpáa ma mú, ké à mu ma. À kè Àwèɖèsákà mu ma. Ɔ mɔ̀ ma Màsèdónìà-nyɔ̀, ké ɔ sɔ̀ ma ɖé Tɛ̀sàɖònákà-hwɔ̀ɖɔ̀ɔ̀ mú.

³ Wéɔ̀ nyɔ kɔ ma ɓó dyíɛɛ, à po ma ɖua ɖé Zíɖɔ̀ùn-hwɔ̀ɖɔ̀ɔ̀ mú. Júɖìɔ̀ɛ̀ kpeɖe nɔ̀mɔ̀ ma dyíin ɓó Pɔ́ɔ̀ gbo, ké ɔ cɛ̃ɛ ma ɔ gbo, ɓɛ́ ɔ ké ma ɖé ɔ mǔè ɓěɔ̀ gbo mu, ɓɛ́ wa ké ma ɔ gbo gmɔ̀.

⁴ Ti à sɔ̀ ma ɓó dyíɛɛ, à pɛ̃́ ma Kítììn-tòò-kpòɔ̀ wĩin, ké à mu ma, sepóɛɖé pìɔ̌ɔ̀ zi ma à fũ̀à-fṹá nyùɛ̌n mìɔ.

⁵ Ké à péɖé ma dyóó ɓɛ́ ɔ xwɛ̃́ìn ma ɖé Sàɖésìà-ɓòɖòɔ̀ kè Pã̀fíɖídyà-ɓòɖòɔ̀ bũ̌in nyɛ, ké à dyi ma ɖé Mííwàɖà-hwɔ̀ɖɔ̀ ɓɛ́ ɔ nì ma ɖé Ɖíísìà-ɓòɖòɔ̀ kɔ̃ kɛɛ mú.

⁶ Ɖéɛ̀ Júɖìɔ̀ dyé ma méè ɖò sɔ̀ìn ma ɖé Ɛ̀ɖìzánìà-hwɔ̀ɖɔ̀ɔ̀ múɛ, ké ɔ nì ma Ítáɖè-ɓòɖòɔ̀ kɔ̃ muɛń. Ké ɔ po ma ɖé à.

⁷ Ɓó wé gbɛ̀ǐ-gbɛ̀ǐ xwíníín nyɛɛ, à ma ma mú, ké à mu ma. À ɓéɖé ma ti kàmàǔn-kàmàǔn ɓó Nádà-hwɔ̀ɖɔ̀ɔ̀ mú nyini jè. Pìɔ̌ɔ̀ nì ma à fũ̀à-fṹá nyùɛ̌n. Ɔ jèɛɛ, ti à zi ma Sàmónè-hwɔ̀ɖɔ̀ɔ̀ dyíin nyɛɛ, à pɛ̃́ ma Kíɖíì-tòò-kpòɔ̀ wĩin, ké à mu ma.

⁸ À ɓéɖé ma ti kàmàǔn-kàmàǔn ɓó mu jè ke, ké à nyini ma dà ɖò ɓɛ́ wa ɖáìn Fɛ́ɛ̀ Hévɔ̃̀ kɛ. Ɔ xwɛ̃́ìn ma Ɖásìà-hwɔ̀ɖɔ̀ɔ̀ bũ̌in.

⁹ À ɖǎ ma wé ɓáún-ɓáún dyi po, ké Nàmàǔn-Ɖɛ-Kɔ̃in-Ɓáìn-wèɔ̀ ɖǎ zi. Ɔ nì fã̀à ɓɛ́ à ké dyúa mu. Ɔ jèɛɛ, Pɔ́ɔ̀ po ma wa náún,

¹⁰ ké ɔ ɖá, “Ɓɔ̌ɔ̀ ɓě, ḿ dyéɛ kà à mu-muɔ̀ mu dyíin nyìnììn nyɛ. À mu máùn mìɔ. Ɔ se gbɛ̌ ɓěɔ̀ kè méèɔ̀ ɖòùn jè, kɛɛ à fɛ̀ɛ̀ ɓěɔ̀ mu mú gbɔɔ̀ùn ɖekè.”

¹¹ Kɛɛ Júɖìɔ̀ tò ma méè-càpèɔ̀ kè méèɔ̀ kɔ̃̀-nyɔ̀ɔ̀ wuɖuɔ̀ ɖùǔ gbo, ké ɔ zi ma Pɔ́ɔ̀ nììn wuɖuɔ̀ dyí.

¹² Ɖua-pòìn-naínɔ̀ se ma dà nɔ̀mɔ̀ dyíin, ɓɛ́ à ké ma ɓó sɔ̃̀ɔ̀-tìɔ̀ dya gmɔ̀ìn. Ɔ jèɛɛ, wa zòkpɛ̀ cɛ̃ɛ ma, ɓɛ́ à ké ma dyúa mu. Wa dèɛ̀ ma hwòɖǒ kɔ̃, ɓɛ́ wa ké ɖé Fínì-hwɔ̀ɖɔ̀ɔ̀ mú nyini wɛ̃́ɛ́, ɓɛ́ wa ké ɖé dyi gã̀, ɓɛ́ sɔ̃̀ɔ̀-tìɔ̀ ké dyi zi. Fínì-hwɔ̀ɖɔ̀ɔ̀ mɔ̀ ma Kíɖíì-tòò-kpòɔ̀ ɖua-pòìn-naín ɖò. Nyɔ dyi ɖé Fínì-hwɔ̀ɖɔ̀ɔ̀ mú dyi nyànà ní, nyɔ ɓɛ́ìn dyóóɔ̀ dyéɛ hwɔ ɖé dyóɖó-xwáɖáún-wóɖóìn-naínɔ̀ dyí.

Dìì dyi dyóóɔ̀ kɔ̃

¹³ Ti pìɔ̌ pɛ̀ɛ̀ ɖò sɔ̀ìn ma ɖé dyóóɔ̀ kɔ̃ kɛɛ, méèǐn-gɔ̀ɖɔ̀ɔ̀ ɓěɔ̀ poɛ̀n ma hwìɖǐi kà wa ɖǎ ɖɛ wa mɔ́ ma kɛɛ dyéɛ. Ɔ jèɛɛ, wa zà ma ɖuaɔ̀ níɔ, ké à pɛ̃́ ma Kíɖíì-tòò-kpòɔ̀ wĩin, ké à mu ma.

¹⁴ Kɛɛ à nìǎ ma muɛń kpã́ún wɛ̃ɛ, dìì vɛ̀nɛ̀ ɖò ɓɛ́ wa ɖáìn ma Dyùɖàkíɖò kɛɛ sɔ̀ìn ma ɖé kpóóɔ̀ kɔ̃. Ɔ dyi ma gana-kà,

¹⁵ ké ɔ dè ma méèɔ̀ dyí mìɔ, ké à seɛ ma mú mùɛ̀n ɓɛ́ìn. Ɔ jèɛɛ, à táà ma dììɔ̀ dyi, ké ɔ kpa ma à.

¹⁶ Ké ɔ kpàìn ma à tóó-kpò ɖò ɓɛ́ wa ɖáìn Kɔ́dà kɛɛ wĩin. À dyé ma ti kàmàǔn-kàmàǔn, kɛɛ à vɔ̃ ma, ké à jiɖi ma ɓáɖáà-dyùɔ̀ ɓó méèɔ̀ gbo.

¹⁷ À ɖúɛ ma dyí, ké à poɛ ma ɖé méèɔ̀ mú. Ké méèǐn-gɔ̀ɖɔ̀ɔ̀ ɓěɔ̀ ɖú ma ɖɛ ɖò dyí, ké wa sã̀ìn ma méèɔ̀ xwíɖíi. Wa fɛ̃̀ìn ma ɓɛ́ wa ní kɔ̃̀ ɖà ma dà ɖò ɓɛ́ pĩ́ɔ dyá ma dyíɛɛ mùìn. Dàɔ̀ nyɛ́nɛ́ mɔ̀ ma Sátì. Ɔ jèɛɛ, wa zà ma séè vɛ̀nɛ̀ɔ̀ dyií, ké dììɔ̀ kpa ma à.

¹⁸ Wéɔ̀ nyɔ kɔ ma ɓó dyíɛɛ, dììɔ̀ nì ma à fũ̀à-fṹá nyùɛ̌n mìɔ. Ɔ jèɛɛ, wa ɖú ma gbɛ̌ ɓěɔ̀ níɔ wáɖá kpàǐ.

¹⁹ Ké zɔ̃ɔ̀ nyɔ zɔ̃ ma ɓó ɖeɛɛ, wa wáɖá ma kũ̀à-mú-nyùìn-ɖɛ̀ ɓě nì ma ɖé méèɔ̀ xwíníín nyɛɛ ɖíɛ́ ɓě níɔ. Wa mìɔùn nììn sɔ̃ wáɖá ma ɖɛ ɓěɔ̀ níɔ.

²⁰ Ɓó wé pàɖǎ xwíníín nyɛɛ, à se ma dyóɖóɔ̀ kè dɛ̀nɛ̀-dyù ɓěɔ̀ ɖò dyé fɔɔ. Dììɔ̀ nì ma dyiɛń kánáá pū, ké à se ma à pó jè ɖò hwòɖǒ kɔ̃ dèɛ̌n nì ɖe.

²¹ Ti méèǐn-gɔ̀ɖɔ̀ɔ̀ ɓěɔ̀ ɖǎ ma wé ɓáún-ɓáún nyu, ké wa se ma ɖii-ɖɛ̀ ɖò ɖiɛń nì ɖeɛɛ, Pɔ́ɔ̀ nyànà ma ɖé wa hwìɛ̀ dyi, ké ɔ ɖá, “Ɓɔ̌ɔ̀ ɓě, ɓě ɓéɖé ɓɛ́ ɓě ké ma ɖɛ ɓě ɓɛ́ ḿ cɛ̃ ma kà ɓě gboɛɛ nyu. Ɔ jǔ ké ɓěà seɔ́ má ɖé Kíɖíì-tòò-kpòɔ̀ kɔ̃ dyí sɔ̀ǐn, nìí, ɓěà seɔ́ má gǎ-ɖɛ̀ nì kà kɛɛ dyí dyéɛ mu, ké ɓěà seɔ́ má kà máa mu.

²² Kɛɛ kàǔn wɛ̃ɛ, ɓěǐn ɖá ɓɛ́ ɓěɛ̀ hwòɖǒ ké ɖé ɖei kpá. Méèɔ̀ ɖòùn mu mú gbɔɔ̀ùn pū, kɛɛ ɓěà ɖò se ɓěà fɛ̀ɛ̀ɔ̀ xwáɖáún sèɛ̌ mu.

²³ Sepóɛɖé ɓó máaún wɛ̃ɛ, Gèɖèpɔ́ɔ̀ mɔ̀ nyɔ kɔ̃̀à ḿ, ké ḿ ɓièà kɛɛ, ɔ ínjà ɖò nyànà ma ḿ dyúa dyi,

²⁴ ké ɔ cɛ̃ɛ ḿ gbo, ké ɔ ɖá, ‘Pɔ́ɔ̀, mɔ̀ǔn ɖá ɓɛ́ m̀ ké fɛ̃̀ìn. M̀ ɓéɖé ɓɛ́ m̀ ké Síízɛ̀ dyúa dyi nyànà. Ké m̀ mɛ dyuòɛ̀ kà Gèɖèpɔ́ɔ̀ mu nì jè nyɔ séín ɓě ɓɛ́ m̀ kè wa nìà muɛń nyɛɛ fɛ̀ɛ̀ póìn nyɛ.’

²⁵ Ɔ jèɛɛ, ɓɔ̌ɔ̀ ɓě, ɓěǐn ɖá ɓɛ́ ɓěɛ̀ hwòɖǒɔ̀ ké ɖé ɖei kpá, sepóɛɖé ḿ taɓa Gèɖèpɔ́ɔ̀ hwìɖǐǐ kà ɔ mu kpáùn kà ɔ nyuà ḿ gbo cɛ̃ɛ jɛ́ɛ́ kɛ.

²⁶ Kɛɛ à ɓéɖé ɓɛ́ à ké tóó-kpò ɖò kɔ̃ toɖoí dyáìn.”

²⁷ Wé ɓaɖa-bùè se hĩinyɛ ɖǎ ma zi, ké dììɔ̀ nì ma à ɖé Mɛ́ɖɛ̀tɔ̀wéɖénìà-dyòǒɔ̀ kɔ̃ kpauń ke. Ké ɓó máaún hwuɖu hwìɛ̀ǐn nyɛɛ, méèǐn-gɔ̀ɖɔ̀ɔ̀ ɓěɔ̀ poɛ̀n ma hwìɖǐi kà ɓɛ́ wa nìǎ ma toɖoí dyáuń wɛ̃.

²⁸ Ɔ jèɛɛ, wa síìn ma ɖɛ ɖò níɔ̀ gbo, ɓɛ́ wa kéɛ ma dyé kà níɔ̀ hwuɖu nyu ma mú tɔ̀mɔ̀ɔ̀ kɛ. Ɔ mɔ̀ ma ɓáɖáa kpáɖá-nyɔ. Ké wa mu ma ɓó dyúa ɖe, ké wa síìn ma ɖɛɔ̀ níɔ̀ gbo ɖe, ké ɔ mɔ̀ ma ɓáɖáa ɓaɖa-bùè sè hm̀m̌.

²⁹ Wa fɛ̃̀ìn ma ɓɛ́ à ní kɔ̃̀ ɖà sɔ́ɔ́-kpò ɓě kɔ̃ dyá. Ɔ jèɛɛ, wa po ma ɖua hĩinyɛ ɓɛ́ wa nì ma ɖé méèɔ̀ gbɔ kɔ̃ɛɛ níɔ. Ké wa ɓaà, ɓɛ́ zɔ̃ ké ma zɔ̃.

³⁰ Méèǐn-gɔ̀ɖɔ̀ɔ̀ ɓěɔ̀ mɔ́ ɓɛ́ wa ké ma méèɔ̀ mú sɔ̀, ké wa po ma ɓáɖáà-dyùɔ̀ níɔ̀ gbo. Wa nyuɛ pū kà wa nìɔ̌ kà muɛń ɓɛ́ wa kéɔ́ kà ɖua ɓě níɔ po ɖé méèɔ̀ dyúa kɛ.

³¹ Ké Pɔ́ɔ̀ cɛ̃ɛ ma sójà ɓěɔ̀ kè waà wuɖuí-kɔ̃̀-nyɔ̀ɔ̀ gbo, ké ɔ ɖá, “Ɔ jǔ ké gàa ɓě nìà kɛ se nɔ̄ sèǐn, nìí, ɓě se póɛ ɓɛ́ìn.”

³² Ké sójà ɓěɔ̀ cɛ̃ ma ɓáɖáà-dyùɔ̀ ɖúúɔ̀ wɔ̃, ké ɔ kpá ma níɔ.

³³ Ti zɔ̃ nìǎ ma zɔ̃uń muɛń nyɛɛ, Pɔ́ɔ̀ ɓaà ma wa séín, ɓɛ́ wa ké ma ɖɛ ɖi, ké ɔ ɖá, “Zɛ̃̌ɛ̀ po ɓěɛ̀ wé ɓaɖa-bùè sè hĩinyɛ, ké ɓěɛ̀ hwìɖǐi poìn jè nyu, ké ɓě séè ɖɛ ɖi ke. Ɓě séè ɖɛ ɖò ɖi fɔɔ.

³⁴ Ɔ jèɛɛ, ḿ ɓaà ɓě, ɓɛ́ ɓě ké ɖii-ɖɛ̀ ɖò ɖi, ɓɛ́ ɓě ké kpéí kpá. Ɔ mɛ nì ɓě hwìɖǐi kà ɓěɛ̀ mí-wɔ́ɖɔ́ dyúáɖò se xwáɖáún sèɛ̌ muɛ.”

³⁵ Ti ɔ ɖǎ ma ɖɛa cɛ̃ɛ, ɔ ɖú ma bɛɖɛɛ̀ dyí, ké ɔ po ma Gèɖèpɔ́ɔ̀ zùo ɓó nyɔ séín ɓěɔ̀ dyúa, ké ɔ jaɖaìn ma bɛɖɛɛ̀ɔ̀ kpói, ké ɔ ɖúɛ ma ɖi kpàǐ.

³⁶ Ké ɔ nyuɛ ké wa kpá ma kpéí, ké wa mɔ̀ùn ɖi ma ɖɛ ɖekè.

³⁷ À séín nì ma ɖé méèɔ̀ múɛɛ, à mɔ̀ ma nyɔ-kpò hɔ̃dɛ̀ɖɛ̀ sɔ̃́ kpáɖá-nyɔ tã kè ɓaɖa-bùè sè mɛ̀nɛ̌ìn-ɖò.

³⁸ Ké ti wa ɖǎ ma ɖɛ ɖi, ké wa ɖǎ ma ɖoɓoɛɛ, wa wáɖá ma hwítì nì ma ɖé méèɔ̀ múɛɛ níɔ, ɓɛ́ méèɔ̀ ké ma xwa fɛ̃́ìn.

Méèɔ̀ dyi-wɛ̀ìn-wɛ̀ìn

³⁹ Ti zɔ̃ ɖǎ ma zɔ̃ɛɛ, wa dyé ma kpóó kɔ̃, kɛɛ wa se ma ɓóɖóɔ̀ dyí dyuò. Wa dyé ma dyóóɔ̀ kpóóɔ̀ dɛ̀ ɖò ɓɛ́ pĩ́ɔ nì ma kɛ. Wa poɛ̀n ma hwìɖǐi, ɓɛ́ wa ké ma ɖé méèɔ̀ toɖoí dyáìn, ɔ jǔ ké wa dyiɛ ma náa nyuɛ ɓɛ́ìn ní.

⁴⁰ Ɔ jèɛɛ, wa zà ma ɖua ɓěɔ̀ ɖúú ɓěɔ̀ wɔ̃, ké wa sè ma wa níɔ̀ gbo. Ké wa buɛ̀ ma ɖúú ɓě ɓɛ́ wa sã̀ìn ma ɓìǎ ɓěɔ̀ dyiɛɛ ɓó ti dyúáɖòɔ̀ xwíníín. Ké wa ɖú ma séè ɓɛ́ ɔ nì ma ɖé méèɔ̀ dyúa kɛɛ dyií, ɓɛ́ pìɔ̌ɔ̀ ké ma ɔ dyí dè. Ké wa vɔ̃ ɓɛ́ wa ké ma toɖoí dyá.

⁴¹ Ti wa ɖǎ ma níɔ̀ wáɖáìn-gbà ziɛɛ, méèɔ̀ gbo ma pĩ́ɔ-kòò ɖò mú. Ké ɔ dúɔ̀ dè ma pĩ́ɔɔ̀ múin cá, ké ɔ se ma daí sɔ̀ìn ɓɛ́ìn. Ké dyóó-kpɛ̀ vɛ̀nɛ̀ɔ̀ ɖú ma ɔ gbɔɔ̀ kɔ̃ dyíin nyìnììn kpàǐ.

⁴² Sójà ɓěɔ̀ poɛ̀n ma hwìɖǐi kà ɔ mu ma dyíin nɔ̀mɔ̀ùn ɓɛ́ wa ké kpɔɖɔ-ɖeín-nì-nyɔ̀ ɓěɔ̀ ɖáɓá, ɓɛ́ wa ní kɔ̃̀ ɖà ma níɔ kpá, ɓɛ́ wa ní kɔ̃̀ ɖà xwáɖáún kpá kɛ.

⁴³ Kɛɛ waà wuɖuí-kɔ̃̀-nyɔ̀ɔ̀ mɔ́ ɓɛ́ ɔ ké ma Pɔ́ɔ̀ póìn. Ɔ jèɛɛ, ɔ nyuɛ ké wa se ma ɖɛ wa mɔ́ ma kà nyuɛ dyiɛɛ nyu ɖe. Ɔ cɛ̃ɛ ma, ɓɛ́ nyɔ ɓě dyuò ma níɛɛ ké ma níɔ kpá, ɓɛ́ wa ké ma toɖoí dyá kĩ́ín,

⁴⁴ ɓɛ́ nyɔ tɔ̀ɔ̀ ɓěɔ̀ ké ma cu-pĩ̀à ɓěɔ̀ kè méèɔ̀ pĩ́á mɛ́nɛ́-mɛ́nɛ́ ɓěɔ̀ kɔ̃ún kpá, ɓɛ́ wa ké wa mɔ̀ùn gbo mu. Ké kǎà wa nyuɛ ma, ké nyɔ séín ɓěɔ̀ dyá ma toɖoí kìɖì.