2 Tímétè 4 - Ɓǎsɔ́ɔ̀ Báɓòɔ̀

¹ Ḿ cɛ̃ m̀ ɖɛ nìà kɛ gbo ɓó Gèɖèpɔ́ɔ̀ ɔ kè Kɛ́ɖɛ́ì Jízɛ̀ mɔ̀ nyɔ ɓɛ́ ɔ muà nyɔ ɓě nì cĩ́ɛń nyɛ kè nyɔ ɓě ɖǎà mɛ́ɛ zaa wɔ̃ poùn wɛ̃ɛ dyúa. Sepóɛɖé ɓó ɔ dyi-dyiɔ̀ kè ɔ kã́á-ɓòɖòɔ̀ jèɛɛ, ḿ cɛ̃ɛ m̀ gbo,

² cɛ̃ Gèɖèpɔ́ɔ̀-wùɖùɔ̀. Ɔ cɛ̃ jè mɛ kpɔ̃ m̀ hwòɖǒ kɛbì ɔ mɛ mɔ̀ ti nɔ̀mɔ̀ dyíin, mɔɔ ɔ mɛ mɔ̀ ti se dyíin nɔ̀mɔ̀ kɛ. Wùɖù nyɔ ɓěɔ̀ gbo nɔ̀mɔ̀ dyíin, ɓɛ́ wa ké ɖɛɔ̀ jǎà po. Po wa ɓɔ́í. Po wa kpéí. M̀ mɛ ku hwòɖǒ cá, ɓɛ́ m̀ ké wa ɖɛ tɛ̀mɛ̀ìn.

³ Sepóɛɖé tiɔ̀ mu dyiìn, ké nyɔ ɓěɔ̀ se tɛ̀mɛ̀ìn-ɖɛ̀ nɔ̀mɔ̀ dyíinɔ̀ ti ɓéɖéɛ mu ɖe. Wa mu wa mìɔùn hwòɖǒɛ̀-mɔ́ɔ́-ɖɛ̀ kíɖíí síìn, ké wa mu ɖɛ-tɛ̀mɛ̀ìn-nyɔ̀ ɓě wa mìɔùn gbo dyí poìn tee. Ɔ mɔ̀ nyɔ ɓě mu wa ɖɛ ɓě ɓɛ́ wa ɖéè wa ɖùǔn wɛ̃ɛ tɛ̀mɛ̀ìn nyɛ.

⁴ Wa mu waà ɖùǔɔ̀ gbǎùn, ɓɛ́ wa ní kɔ̃̀ ɖà jǎà-ɖɛ̀ ɓěɔ̀ wɔ̃́, ké wa mu nɔ́ɔ́ ɓě ɖùǔ gbo tòùn.

⁵ Kɛɛ mɔ̀ùn mɛ ma mú kánáá pū. Kùìn gǎ-dyé-dyé hwòɖǒi. M̀ mɛ nyu bɔ̃̌ nɔ̀mɔ̀ dyíinɔ̀ kpa-kũ̀àɔ̀ ɖekè. Kũ̀à kɔ̃̀ nyu-nyɔ̀ m̀ jǔà kɛɛ, m̀ mɛ nyu wa séín.

⁶ Sepóɛɖé tiɔ̀ ɖǎ nyini, ɓɛ́ ḿ ké sáa-zàìn-ɖɛ̀ jǔ ɓó Gèɖèpɔ́ɔ̀ bìì. Tiɔ̀ ɖǎ dyi, ɓɛ́ ḿ kéá ɓóɖó-kpàà kɔ̃ sɔ̀.

⁷ Ḿ ɖǎ vɔ̃ ɖé kpɛɖɛ-kpa-kpa nɔ̀mɔ̀ dyíinɔ̀ mú. Ḿ ɖǎ kpɛɖɛɔ̀ kpaa hwɔ. Ḿ ɖǎ hwìɖǐǐ-taɓa-ɖɛ̀ɔ̀ jè dyi kpɔ̃ tee.

⁸ Kàǔn wɛ̃ɛ, ɖɛ kɔ̃̀ jè ḿ ɖǎ ma vɔ̃ɛɛ nì ḿ fòɛ̌n. Ɔ mɔ̀ dyí-sɛ́ɖɛ́ìn-sɛ́ɖɛ́ìnɛ̀ gbàǎ ɓɛ́ Bounɓo mɔ̀à ɖɛ-wɔ̃-po-nyɔ̀ dyí-sɛ́ɖɛ́ìn-kà kɛɛ muà ḿ nyíìn ɓó wéa ɓaɖaa. Ké ɔ se ḿ ɖòǔn, kɛɛ ɔ mɔ̀ ɓó nyɔǔn séín ɓě ɓɛ́ ɔ xwáɖáún wóɖó jè kpɔ̃ hwòɖǒ ɖekèɛ.

Náún-po-wùɖù ɓó Tímétè bìì

⁹ Vɔ̃ cá ɓɛ́ m̀ ké ḿ gbo dyiɛń fṹà.

¹⁰ Sepóɛɖé Dímà ɖǎ ɓóɖó-kpàà mú ɖɛ̀ɓɛ̀, ké ɔ ɖǎ ḿ kɔ̃ wã. Ɔ ɖǎ ɖé Tɛ̀sàɖònákà-hwɔ̀ɖɔ̀ɔ̀ mú mu. Kɛ́ɖɛ́sɛ̃̀ ɖǎ ɖé Gàɖézìà-ɓòɖòɔ̀ kɔ̃ mu, ké Tátɔ̀ ɖǎ ɖé Dàmésà-ɓòɖòɔ̀ kɔ̃ mu.

¹¹ Ɖúù ɖòùn nì nɔ̄ ḿ gbo. M̀ kè Máà mɛ dyi, sepóɛɖé ɔ ɓɛ́ìn ḿ gbo kpáa ɖé kũ̀àɔ̀ mú.

¹² Ḿ ɖoɓo ma Tíkíkà ɖé Ɛ́fɛ́sà-hwɔ̀ɖɔ̀ɔ̀ mú.

¹³ M̀ dyi dyiɛń nìǐn, m̀ mɛ dyà ɖɔ ɓɛ́ ḿ sè ma Káápà gbo ɖé Tóɖóà-hwɔ̀ɖɔ̀ɔ̀ múɛ. M̀ mɛ dyà céè-ɖɛ̀-kpò ɓěɔ̀ ɖekè. Ɔ nyɔ m̀ mɛ dyà jɛ́ɛ́ kɛɛ mɛ mɔ̀ ɔ nyɔ ɓě ɓɛ́ wa nyùìn pépà kuún-kuún wɛ̃.

¹⁴ Ɛ̀ɖìzánà mɔ̀à ɓé-nyɔ̀ɔ̀ kɛɛ nyu ma ḿ ɖɛ gbà bũ̌ mìɔ. Bounɓoɔ̀ mu ɔ mɔ̀ùn pɛ́ɛ̀ìn dyììn ɖé kà ɔ kũ̀à-sɔ̃̀ nyu nìɛ̀ kɛɛ mú.

¹⁵ M̀ mìɔùn mɛ màìn ɔ jè mú, sepóɛɖé ɔ vɔ̃ ma ɖɛ ɓě ɓɛ́ à cɛ̃ ma kɛɛ gbo mìɔ.

¹⁶ Ti ɓɛ́ ḿ zaìn ma ḿ mìɔùn jè kɔ̃in kĩ́ín nyɛɛ, nyɔ ɖò se ma ɓó ḿ gbo nì dyɛ mɔ̀ùn. Wa séín wã ma ḿ kɔ̃. Gèɖèpɔ́ɔ̀ mɛ ɓɔ́ wa dyi kpɔ̃ɔ ɓó ɔ jè.

¹⁷ Kɛɛ Bounɓoɔ̀ nì ma ɓó ḿ gbo, ké ɔ nyí ma ḿ kpé, ɓɛ́ ḿ ké ma bɔ̃̌ nɔ̀mɔ̀ dyíinɔ̀ jè zio po gàná, ɓɛ́ ɓóɖó-dù kà kò ɖò ɓěɛ̀ nyɔ séín ɓěɔ̀ kéɛ wɔ̃́. Ké ɔ hwɔìn, ḿ pó ma ganìǎɔ̀ xwaún.

¹⁸ Ké Bounɓoɔ̀ mu ḿ póìn ɖé ɖɛ gbà séín ɓěɔ̀ xwaún, ké ɔ mu ḿ ɔ kã́á-ɓòɖò nìà ɖé dyɔún wɛ̃ɛ mú kpaùn nɔ̀mɔ̀ dyíin. Ɔ mɛ ɓéɖé ɓàìn-ɓàìn ɓó sè-ná-sèɛ̀ tiín. Kǎà ɔ mɛ nì.

Cuò-wùɖù

¹⁹ Ḿ zà Píɖísà kè Àkúɖà ɔ kè Ònɛ́sífɔ̀ɖɔ̀ ɓíɖí-gbǒ-xwíníín-nyɔ̀ ɓěɔ̀ nyíɔún.

²⁰ Ìwáɖásɔ̀ sè ma ɖé Kɔ́ɖèìn-hwɔ̀ɖɔ̀ɔ̀ mú ɖe. Ḿ sè ma Tɔ́ɖɔ́fímà ɖé Màɖítà-hwɔ̀ɖɔ̀ɔ̀ mú, sepóɛɖé ɔ nì ma wɛ́iń.

²¹ Vɔ̃ cá ɓɛ́ m̀ ké dyi, hwɛ̀ ɓɛ́ sɔ̃̀ɔ̀-tìɔ̀ ké dyi. Dyúɓèɖè kè Púdɛ̃̀ kè Ɖánà kè Kɔ́ɖɔ́ɖìà ɔ kè à ɖíí séín ɓěɔ̀ zà m̀ nyíɔún.

²² Bounɓoɔ̀ mɛ nì m̀ gbo. Mana mɛ nì ɓě kɔ̃.