2 Píɖɛ̀ 3 - Ɓǎsɔ́ɔ̀ Báɓòɔ̀

Nyɛ́nɛ́ín-ɖáìn-ɖɛ̀ ɓá Bounɓoɔ̀ ɖe dyi jè dyíɛ

¹ Ní ɖɛ̀ɓɛ̀-nyɔ̀ ɓě, céè-ɖɛ̀ ɓɛ́ ḿ céèà ɓě gboɛɛ, ɔ sɔ̃́ nììnɔ̀ kɛà kɛ̀. Ɖé céè-ɖɛ̀ sɔ̃́ ɓě nìà kɛ múɛɛ, ḿ ɖǎ ɓě ɖɛ ɓě nìà kɛ hwìɖǐi dyà, ɓɛ́ ɔ kéɛ nyu ɓɛ́ ɓě ké hwòɖǒ wáɖáá ɓéɖé.

² Ḿ mɔ́ ɓɛ́ wuɖu ɓɛ́ kpáá-ɖɛ̀-cɛ̃-nyɔ̀ hwɛ̀ǐn-hwɛ̀ǐn ɓěɔ̀ cɛ̃ zɔ̃̌ɔ̀ kɛ kè ɖɛ ɓɛ́ Bounɓo mɔ̀à Nyɔ-póìn-nyɔ̀ɔ̀ kɛɛ cɛ̃̀ìn ma kà ɖé ɓě àpɔ́sò ɓěɔ̀ múɛɛ ké ɓě hwìɖǐi nì.

³ Kĩ́ín-kĩ́ín nyɛɛ, ɓě mɛ wɔ̃́ ɖɛ nìà kɛ múin. Ɖé wé hwɛ̀ìn-gbɔ ɓěɔ̀ múɛɛ, gàa ɖíɛ́ ɓě ɓɛ́ wa ɖɛ̀ɓɛ̀ waà hwòɖǒɛ̀-mɔ́ɔ́-ɖɛ̀ nyu-nyu múɛɛ mu dyiìn. Wa mu ɓě dyɔ́ ɓaɖaùn.

⁴ Wa mu níiń, “Ɔ dyi-dyi ɓɛ́ ɔ ɖá ma kà nyɛ́nɛ́ kɛɛ, xwɛ̌ ɔ jè nìɛ́? À ɓǎ nììn ɓǎ ɓěɔ̀ ɖǎ zɔ̃̌ɔ̀ mɛ́, kɛɛ kà ɓɛ́ ɖɛ ɓěɔ̀ nìǒ zɔ̃̌ɔ̀, ti ɓɛ́ Gèɖèpɔ́ɔ̀ mɛ ma ɓóɖó-kpàà kɛɛ, kǎà wa nìà keɛ̀.”

⁵ Ɖɛ ɓɛ́ wa hwòɖǒɔ̀ po gbɔ, ɓɛ́ wa ké se ɔ jè hwìɖǐi poìn nyɛɛ, ɔ kɛà kɛ̀. Ɔ mɔ̀, Gèɖèpɔ́ɔ̀ wùɖù zɔ̃̌ɔ̀ kĩ́ín, ké dyɔɔ̀ kè ɓóɖó-kpàà nì ma. Gèɖèpɔ́ɔ̀ nyu ma ɓóɖó-kpàɔ̀, ké ɔ nì ɖé níɔ̀ hwìɛ̀. Ɔ nyuɛ dyììn ɖé ní mú.

⁶ Ké ní mɔ̀ nyɔ gbɔɔ̀ ma ɓóɖó-kpà sùàɔ̀ mú. Ɔ mɔ̀ ma ní-tòɔ̀.

⁷ Kɛɛ ɓóɖó-kpàà kè dyɔɔ̀ nìà kàǔn wɛ̃ɛ, Gèɖèpɔ́ɔ̀ wuɖu dyúáɖòɔ̀ mɔ̀ nyɔ nì wa dyi dèɛ̌n, ɓɛ́ nyɛ-tòɔ̀ ké wa mú gbɔɔ̀. Wa dè dyi, ɓɛ́ ti ɓɛ́ wa muà nyɔ ɓě se Gèɖèpɔ́ɔ̀ kpeɖe nyuɛɛ zaa dúún wáɖáùn, ɓɛ́ wa kéà mú gbɔɔ̀ kɛɛ ké nyini.

⁸ Ní ɖɛ̀ɓɛ̀-nyɔ̀ ɓě, ɖɛ dyúáɖò nìà kɛ ní ɖá ɓɛ́ ɔ ké ɓě hwìɖǐi sɔ̀. Ɔ mɔ̀, ɖé Bounɓoɔ̀ gboɛɛ, wé dyúáɖò nì kà zɔ̃ táázĩ̀ìn ɖò nìà kɛ, ké zɔ̃ táázĩ̀ìn ɖò nì kà wé dyúáɖò nìà kɛ.

⁹ Bounɓoɔ̀ se mɛɛ̀ ɓɛ́ ɔ ké ɖɛ ɓɛ́ ɔ ɖáà nyɛ́nɛ́ kɛɛ nyu kà ɓɛ́ nyɔ ɖíɛ́ ɓě poàìn hwìɖǐiɛ. Kɛɛ ɔ ku ɓě jè hwòɖǒ, sepóɛɖé ɔ se mɔ́ ɓɛ́ nyɔ ɖò ké mú gbɔɔ̀, kɛɛ ɔ mɔ́ ɓɛ́ nyɔ séín ké waà nàmàǔn-kpèɖèɔ̀ dyi táà.

¹⁰ Kɛɛ Bounɓoɔ̀ wéɔ̀ mu dyiìn kà dyíɖíí-nyɔ̀ dyià kɛ. Ɓó wéa ɓaɖaa, dyɔɔ̀ mu dyi paùn, ké ɔ mu xwièìn mìɔ. Ké ɖɛ séín ɓě nìà dyɔɔ̀ dyíɛɛ mu sĩìn, ké wa mu ɖeɛ hwɛ̀ìn. Ké ɓóɖó-kpàà kè ɖɛ séín nìɛ̀ múɛɛ mu sĩìn nyɛ̀nɛ̀ɛ̀.

¹¹ Kà ɓɛ́ ɖɛ séín ɓě nìà kɛ muà mú gbɔɔ̀ùn wɛ̃ɛ, nyɛ́ mɔ̀ nyɔ ɓě ɓéɖé ɓě ké jǔɛ́? Ɓě ɓéɖé ɓě ké ɓěɛ̀ fɛ̀ɛ̀ɔ̀ Gèɖèpɔ́ɔ̀ xwáɖáún zàìn, ɓɛ́ ɓě ké ɔ kpeɖe nyu,

¹² kà ɓɛ́ ɓě nìà Gèɖèpɔ́ɔ̀ wéɔ̀ fòèɛ̌n nyɛ, ɔ kè kà ɓɛ́ ɓě nìà vɔ̃uń ɓɛ́ ɓě kéɛ nyu ɓɛ́ ɔ kéà dyiɛń fṹà kɛ. Ɔ mɔ̀ wé kɔ̃̀ xwíníín ɓɛ́ dyɔɔ̀ muà sĩìn, ɓɛ́ ɔ kéà ɖeɛ hwɛ̀ɛ̀, ké zùzùɔ̀ muɛ nyuùn ɓɛ́ ɖɛ séín nìà ɖé dyɔɔ̀ dyíɛɛ ké ɖeɛ hwɛ̀.

¹³ Kɛɛ Gèɖèpɔ́ɔ̀ ɖǎ à dyɔɔ̀ ɖìè ɖò kè ɓóɖó-kpà ɖìè ɖò dɛ̀ mɔ̀à dyí-sɛ́ɖɛ́ìn-sɛ́ɖɛ́ìn ɓíɖíɛɛ nyɛ́nɛ́ín ɖáìn, ké à nìɛ̀ fòèɛ̌n.

¹⁴ Ɔ jèɛɛ, ní ɖɛ̀ɓɛ̀-nyɔ̀ ɓě, kà ɓě nìà ɖɛ nìà kɛ fòèɛ̌n nyɛɛ, ɓě mɛ vɔ̃ ɓɛ́ bɛ̃̌ kè kɛɛ ɖò ké se ɓě mú nì ɖé Gèɖèpɔ́ɔ̀ dyéɖéín, ɓɛ́ gìɖìǐ ké ɓě kèɔ̀ kè pṹa nì.

¹⁵ Ɓě mɛ dyé à Bounɓoɔ̀ hwòɖǒ-ku-kuɔ̀, ɓɛ́ ɓě kéɛ pó-pó ɖáìn, kà ɓɛ́ Pɔ́ɔ̀ mɔ̀à à ɖɛ̀ɓɛ̀-ɖìǐɛɛ ɖú ma kà hwòɖǒ-fɔ̀nɔ̀-fɔ̀nɔ̀ ɓɛ́ Gèɖèpɔ́ɔ̀ nyí ma kà ɔ kɛɛ dyí, ké ɔ céè ma kà ɓě gboɛ.

¹⁶ Ké kà ɔ nyuɛ ɖé ɔ céè-ɖɛ̀ séín ɓěɔ̀ mú, ɔ jǔ ké ɔ dyi ɖɛ nìà kɛ jè céè ní. Ɖɛ ɖíɛ́ ɓě nì ɔ céè-ɖɛ̀ɔ̀ mú, ké wa kàmà múin wɔ̃́uń, ké nyɔ ɓě se ɖɛ dyuò wɛ kè nyɔ ɓě dyeàìn ɖɛ séín ɓěɔ̀ múin nyɛɛ zàìn wa dyí kà ɓɛ́ wa zàìn Gèɖèpɔ́ɔ̀-cèè-ɖɛ̀ tɔ̀ɔ̀ ɓěɔ̀ dyíɛ. Ké ɔ nyuɛ ké wa gbɔɔ̀ mú.

¹⁷ Kɛɛ ní ɖɛ̀ɓɛ̀-nyɔ̀ ɓě, ɓě dyuò ɖɛ nìà kɛ dyí kĩ́ín. Ɔ jèɛɛ, ɓě mɛ ma mú, ɓɛ́ nyɔ ɓě seà ɖɛ ɖò jè gbo-kɔ̃̀-nyɔ̀ kɛɛ, waà nyɔǔn-cá-wùɖù ɓěɔ̀ ní kɔ̃̀ ɖà ɓě hwìǐ zàìn, ɓɛ́ ɓě ní kɔ̃̀ ɖà ɓě mìɔùn nììn dà nɔ̀mɔ̀ dyíinɔ̀ sɔ̀.

¹⁸ Kɛɛ ɓě mɛ ɓúá ɖé à Bounɓo mɔ̀à à Póìn-nyɔ̀ Jízɛ̀ Kɛ́ɖɛ́ì kɛɛ kpeɖeɛ̀-dyíin-nɔ̀mɔ̀-nɔ̀mɔ̀ɔ̀ kè ɔ dyí-dyuò-dyuò mú. Ɔ mɛ ɓéɖé ɓàìn-ɓàìnɔ̀ ɓó kàǔn, ké ɔ mɛ ɓéɖéɛ kánáá pū. Kǎà ɔ mɛ nì.