2 Píɖɛ̀ 2 - Ɓǎsɔ́ɔ̀ Báɓòɔ̀

Nyɔ ɓě ɖáìn ma wa mìɔùn nyɔǔn-ɖɛ-tɛ̀mɛ̀ìn-nyɔ̀ ɓěɛ

¹ Nyɔ ɓě ɓɛ́ wa ɖáìn wa mìɔùn kpáá-ɖɛ̀-cɛ̃-nyɔ̀ ɓě, ké wa seɛ mɔ̀ kɛɛ dyi zɔ̃̌ɔ̀ ɖé nyɔ ɓěɔ̀ hwìɛ̀. Kà dyúáɖòɔ̀ kǎà nyɔ ɓě ɓɛ́ wa ɖáìn wa mìɔùn nyɔǔn-ɖɛ-tɛ̀mɛ̀ìn-nyɔ̀ ɓě kɛɛ mu ɖé ɓě hwìɛ̀ dyiìn. Ké wa mu nyɔǔn tɛ̀mɛ̀ìn-ɖɛ̀ se jǎà ɓě ɓɛ́ wa ɓɛ́ìn nyuɛ ɓɛ́ nyɔǔn ké mú gbɔɔ̀ kɛɛ dyàùn nyàà. Wa mu Bounɓo ɓɛ́ ɔ dɔ̃ ma kà wa kɛɛ jè mú doìn. Ké ɔ muɛ nyuùn ɓɛ́ wa ké mú gbɔɔ̀ wàɖà.

² Ké nyɔ pàɖǎ mu waà kpeɖe-gbà-nyu-nyu ɓěɔ̀ dyí ɖúùn. Ké ɓó ɖɛ ɓě ɓɛ́ wa nyuà kɛ jèɛɛ, nyɔǔn ɓě mu ɖɛ gbà cɛ̃ìn ɓá jǎà-hwìèɔ̀ dyí.

³ Sepóɛɖé wa kàmà wíɖí jè jèɛɛ, nyɔ ɓě ɓɛ́ wa ɖáìn wa mìɔùn nyɔǔn-ɖɛ-tɛ̀mɛ̀ìn-nyɔ̀ ɓěɛɛ, wa mu kpáná dyéìn dyììn ɖé wuɖu ɓě se jǎà kɛɛ cɛ̃-cɛ̃ mú. Zaa-wɔ̃-po-po nì zɔ̃̌ɔ̀ kà kĩ́ín nyɛɛ nì wa fòɛ̌n, ké mú-gbɔɔ̀-gbɔɔ̀ muà wa kɔ̃ dyiìn nyɛɛ ɖǎ ti dyé.

⁴ Sepóɛɖé Gèɖèpɔ́ɔ̀ se ma ínjà ɓě nyu ma kà nàmàǔn wɛ̃ɛ wìǐn dyé, kɛɛ ɔ po ma wa hɛ́ɛ̀. Ɔ po ma wa tíe-kpò-ɓì ɓěɔ̀ mú, ɓɛ́ wa ké wa dyí gmɔ̀, ɓɛ́ zaa-wɔ̃-po-tìɔ̀ kéà dyiɛ.

⁵ Gèɖèpɔ́ɔ̀ se ma ɓóɖó-kpàà nyɔ ɓě nì zɔ̃̌ɔ̀ kà kĩ́ín nyɛɛ wìǐn dyé, kɛɛ ɔ dyà ma ní-tòɔ̀ ɖé ɓóɖó-kpàà nyɔ ɓě se ma ɔ kpeɖe nyuɛɛ kɔ̃. Nyɔ ɓě ɓɛ́ ɔ póìn ma nyɛ̀nɛ̀ɛ̀ kɛɛ mɔ̀ ma Nóà mɔ̀ nyɔ cɛ̃à dyí sɛ́ɖɛ́ìn jèɛ kè nyɔ-kpò mɛ̀nɛ̌ìn-sɔ̃́ tɔ̀ɔ̀ ɓě.

⁶ Gèɖèpɔ́ɔ̀ wáɖá ma nyɔ ɓě nì ma Sáɖɔ̀ùn-hwɔ̀ɖɔ̀ɔ̀ kè Gòmɔ́ɖɔ̀-hwɔ̀ɖɔ̀ɔ̀ múɛɛ zaa dúún. Ɔ gbɔɔ̀ ma wa mú ɖé nyɛ-tò mú, ké ɔ nyuɛ ké wa mɔ̀à dyí-tɛ̀mɛ̀ìn-ɖɛ̀ ɓó nyɔ ɓě se ɔ kpeɖe nyuɛɛ bìì, ɓó ɖɛ ɓě mu wa gbo kpáùn ɖé dyúa kɛɛ jè.

⁷ Ɔ póìn ma Ɖáà. Ɔ mɔ̀ ma dyí-sɛ́ɖɛ́ìn-nyɔ̀, ké gma-wáɖá-nyɔ̀ ɓěɔ̀ kpeɖe gbà ɓěɔ̀ nyùìn ma ɔ fũ̀à-fṹá,

⁸ sepóɛɖé ɖɛ ɓě ɓɛ́ dyí-sɛ́ɖɛ́ìn-gàà nìà kɛ dyé ma, ké ɔ wɔ̃́ ma ti ɓɛ́ ɔ nì ma ɖé wa hwìɛ̀ cĩ́ɛń nyɛɛ nyuɛ ké ɔ dyí-sɛ́ɖɛ́ìn-hwòɖò-dyùàɔ̀ puà ma wé séín xwíníín ɓó waà ɖɛ gbà ɓěɔ̀ jè.

⁹ Ɖé ɖɛ ɓě nìà kɛ múɛɛ, à dyéɛ kà Bounɓoɔ̀ dyuò kà ɔ ké nyɔ ɓě nyu ɔ kpeɖeɛɛ mú-dɔ̃̌-dɔ̃̌ ɓě xwaún póìn, ké ɔ dyuò kà ɓɛ́ ɔ ké se-dyí-sɛ́ɖɛ́ìn-nyɔ̀ ɓěɔ̀ gǎ dyéɛ̀n sè, ɓɛ́ zaa-wɔ̃-po-wèɔ̀ ké nyiniɛ.

¹⁰ Nyɔ jɛ́ɛ́ ɓě ɓɛ́ ɔ sè gǎ dyéɛ̀n nyɛɛ, wa mɔ̀ nyɔ ɓě nyu ɖɛ ɓě kɔ̃̀ tó nyuà waa, ké ɔ nyìnìàìn waà kpóɖó-dyùàɔ̀ dyíin nyɛ. Wa se Gèɖèpɔ́ɔ̀ kpéɔ̀ ɖɛ ɖá. Nyɔ ɓě ɓɛ́ wa ɖáìn wa mìɔùn nyɔǔn-ɖɛ-tɛ̀mɛ̀ìn-nyɔ̀ ɓě nìà kɛ se fɛ̃̀ìn, ké wa nyu wa mìɔùn mɔ́ɔ́-ɖɛ̀. Wa se fɛ̃̀ìn ɓɛ́ wa ké dĩ́ín-dĩ̀ìn-nyɔ̀ ɓěɔ̀ ɖɛ gbà kɔ̃ún cɛ̃.

¹¹ Kɛɛ ínjà ɓě ɓɛ́ wa kuà dyi, ké wa ɓéɖéà kpé, ké wa zià ɖɛ se jǎà kɛɛ nyɔǔn-tɛ̀mɛ̀ìn-nyɔ̀ ɓěɔ̀ dyíɛɛ, wa dyiɛ Bounɓoɔ̀ dyúa cɛ̃iń nì kà wa ɖǎ ɖɛ gbà nyuɛɛ ní, nìí, wa ní ɖá wa nyɛ́nɛ́ gbà.

¹² Kɛɛ gàa ɓě nìà kɛ ní poìn ɖɛ hwìɖǐi ké wa nyuɛ. Wa nì kà xwáɖá-xwíɖíi-nìmìì nìà kɛ. Wa wóɖó, ɓɛ́ wa ké wa kpɔ̃, ɓɛ́ wa ké wa ɖáɓá. Wa cɛ̃ ɖɛ gbà ɓá ɖɛ ɓě wa se múin wɔ̃́ɛɛ dyí. Wa mu mú gbɔɔ̀ùn kà xwáɖá-xwíɖíi-nìmìì ɓě nìà kɛ.

¹³ Wa mu gǎ-ɖɛ̀ ɓě dyí dyéìn ɓó gǎ ɓě ɓɛ́ wa dyéìn kà nyɔǔn wɛ̃ɛ jè. Ɖɛ nɔ̀mɔ̀ wa hwìɖǐiɛɛ, ɔ mɔ̀ ɓɛ́ wa ké hwɔ pa dyóɖóaún-kà. Ɓě kè wa dyi ɖɛ ɖiɛń nìǐn, wa nyìnììn dyíin, ké wa nyu dɛ̃, sepóɛɖé wa ɖɛ̀ɓɛ̀ wa mìɔùn nììn nyɔǔn-cá-ɖɛ̀ mú.

¹⁴ Wa dyéɖé ɓěɔ̀ ní gmɔ̀ ɖɛ kà kò ɖò dya, kɛɛ ɔ sèìn gbàɖàùn-màà ɓě ɖòùn dya. Wa mɔ́ nàmàǔn-ɖɛ̀ dyi tee. Wa po nyɔ ɓě se dyi kuɛɛ pɛ́í, ké wa kpɔ̃ wa. Wa ɖǎ wíɖí jè kàmà-kàmà cɛ̃́, ké wa hwòɖǒ kàmà wíɖí jè. Gèɖèpɔ́ɔ̀ gboò-wùɖù nì wa kɔ̃.

¹⁵ Wa ɖǎ hwìè sɛ́ɖɛ́ìn dyíɔ̀ dyi táà, ké wa ɖǎ hwìǐ sɔ̀ìn. Wa ɖǎ hwìè ɓɛ́ Béɖàùn mɔ̀à Bɛ́òɛ̀ dyú-gààɔ̀ kɛɛ kpa ma kà kɛɛ kpa. Ɔ dyi ma ɖɛ gbà nyuín, ɔ ɖɛ̀ɓɛ̀ wíɖí ɓɛ́ ɔ dyé ma ɔ kɔ̃ún wɛ̃ɛ mú mìɔ,

¹⁶ kɛɛ wa cɛ̃ ɖɛ gbà ɓɛ́ ɔ ɖǎ nyuɛɛ jè. Jǎkasì se wùɖùɛ̀ ɓɛ́ìn nyɛɛ po ma nyɔǔn-dyù-wùɖù, ké ɔ po ma kpáá-ɖɛ̀-cɛ̃-nyɔ̀ ɓɛ́ ɔ nì ma kà sã̀à-kpèɖè nyuɛń nyɛɛ ɓɔ́í.

¹⁷ Gàa ɓě nìà kɛ nì kà ní-dù ɓɛ́ ɔ ní tòà ní kɛɛ nìà kɛ. Wa nì kà ní-kpò ɓɛ́ dììɔ̀ kpaà kɛɛ nìà kɛ. Gèɖèpɔ́ɔ̀ ɖǎ wa bìì pá ɖò dyi dè ɖé tíe-kpò kpɛ̃̀ɔ̀ mú.

¹⁸ Wa po wa mìɔùn dyí-ɓúáìn-wùɖù kè zuɖuu-wùɖù. Wa ɖú ɖɛ-gbà-nyu-tò nyuà nyɔǔn wɛ̃ɛ dyí, ké wa pòìn nyɔ ɓě ɓɛ́ wa nìɔ̌ kà nyɔ ɓě cĩ́ ɖé ɖɛ ɓě se dyí sɛ́ɖɛ́ìn múɛɛ hwìɛ̀ kɛɛ xwaún póɛń nyɛ̀nɛ̀ɛ̀ kɛɛ pɛ́í, ɓɛ́ wa ké kpeɖe gbà nyu.

¹⁹ Wa ɖáìn nyɔ ɓěɔ̀ nyɛ́nɛ́ín kà ɓɛ́ wa mu wa buɛ̀ìn nyɛ, kɛɛ wa mìɔùn mɔ̀ mú-gbɔɔ̀-gbɔɔ̀ gǐì ɓě, sepóɛɖé ɖɛ kɔ̃̀ nyɔ ɖò wuɖuíɛɛ nyuɛ ké nyɔɔ̀ mɔ̀ gǐì ɓó ɖɛɔ̀ gbo.

²⁰ Sepóɛɖé ɔ jǔ ké nyɔǔn dyi ma nyɔǔn-dyíin-nyìnììn-ɖɛ̀ ɓě nìà ɓóɖó-kpàà kɔ̃ɛɛ xwaún pó, dyììn ɖé à Wuɖuí-kɔ̃̀-nyɔ̀ kè à Póìn-nyɔ̀ Jízɛ̀ Kɛ́ɖɛ́ì dyí-dyuò-dyuò múín, ké ɖɛ ɓěɔ̀ dyi wa kpɔ̃, ké ɔ dyi wa wuɖuí kɔ̃̀ ɖeín, nìí, kà wa nyu nìɛ̀ ɖé mánáín nyɛɛ nyìnììn dyíin ké ɔ zi kà wa nyu ma nìɛ̀ kĩ́ín nyɛɛ dyí.

²¹ Ɔ jǔ ké wa se ma dyí-sɛ́ɖɛ́ìn-hwìèɔ̀ jè dyuò kĩ́ín ní, ɔ nɔ̀mɔ̀ dyíin ké ɔ zi ɓɛ́ wa kéɛ dyí dyuò hwɛ̀ ɓɛ́ wa ké Gèɖèpɔ́ɔ̀ gma ɓɛ́ ɔ nyíà wa kɛɛ kɔ̃ín poìn nyɛɛ dyí.

²² Ɖɛ kpá ma wa gboɛɛ tɛ̀mɛ̀ìn nyɔǔn dyí kà ɓɛ́ nɔ́ɔ̀ mɔ̀ jǎà kɛ. Nɔ́ɔ̀ kɛà kɛ̀. Nɔ́ɔ̀ ɖá, “Gbe mu ɖɛ ɓɛ́ ɔ ɖǎ hwaɖa kɛɛ gbo ɖe,” ɔ kè “Ɓeé ɓɛ́ wa ɖǎ dèɖèɛɛ kpá pɔ̃ ɖe.”