1 Píɖɛ̀ 5 - Ɓǎsɔ́ɔ̀ Báɓòɔ̀

Gmɔ̀ Gèɖèpɔ́ɔ̀ ɓáɖáá ɓěɔ̀ dyí

¹ Mɔ̄ mɔ̀à cɔ́cìɔ̀ nyɔ vɛ̀nɛ̀ ɖòɛɛ, ḿ ɓaà cɔ́cì-nyɔ̀ vɛ̀nɛ̀ ɓě nìà ɖé ɓě hwìɛ̀ kɛ. Ḿ dyé ma kà ɓɛ́ Kɛ́ɖɛ́ì nyu ma gǎ dyéɛ kɛ, ké ḿ ɓéɖé dĩ́ín-dĩ̀ìn ɓɛ́ ɔ muà xwáɖáún wóɖóùn wɛ̃ɛ ɖò. Ní ɓaà ɓě ní,

² ɓě mɛ gmɔ̀ Gèɖèpɔ́ɔ̀ ɓáɖáá kúɖúú ɓě nìà ɓě xwaún wɛ̃ɛ dyí. Ké ɓě mɛ nyuɛ ɖéɛ hwòɖǒɛ̀-wɔ̃́-wɔ̃́ mú kà ɓɛ́ Gèɖèpɔ́ɔ̀ mɔ́ ɓɛ́ ɓě kéà nyuɛ. Ɓěǐn ɖá ɓɛ́ ɓě kéɛ nyu ɖé hwòɖǒ se wɔ̃́ mú. Ɓě hwòɖǒ mɛ fṹà ɓó ɔ nyu jè. Ɓěǐn ɖá ɓɛ́ ɓě kéɛ nyu ɓó wíɖí dyé jè.

³ Nyɔ ɓě nìà ɓě xwaún wɛ̃ɛ, ɓěǐn ɖá ɓɛ́ ɓě ké wa kɔ̃in ɓáìn. Kɛɛ ɓě mɛ jǔ dyí-tɛ̀mɛ̀ìn-ɖɛ̀ ɖé wa mɔ̀à ɓáɖáá ɓěɔ̀ kɛɛ gbo.

⁴ Ké Ɓáɖáá-dyí-gmɔ̀-nyɔ̀ vɛ̀nɛ̀ɔ̀ dyi xwáɖáún wóɖóín, nìí, ɓě mu gbàǎ fã-fã ɓɛ́ ɔ fã-fãɔ̀ seà mú sɔ̀ɔ̀ ɓɛ́ìn nyɛɛ dyéìn.

⁵ Kà dyúáɖòɔ̀ kǎà ɓě mɔ̀ nyɔ gmɔ̀ ɓě kɛɛ, ɓě mɛ nì nyɔ vɛ̀nɛ̀ ɓěɔ̀ xwíɖíi. Ɖɛ ɓě séín mɛ po mú kà nyɔǔn-dyù poà ɖɔún wɛ̃ɛ, ɔ mɛ mɔ̀ ɓě mìɔùn ɓíɖíi-dyà-dyà ɓó nyɔ tɔ̀ɔ̀ ɓěɔ̀ gbo, sepóɛɖé Gèɖèpɔ́ɔ̀-cèè-ɖɛ̀ɔ̀ ɖá, “Gèɖèpɔ́ɔ̀ vɔ̃ nyɔ ɓě ɓɛ́ wa ɓúáìn wa mìɔùn dyíɛɛ gbo, kɛɛ ɔ hwòɖǒ dèìn nyɔ ɓě ɓɛ́ wa dyà wa mìɔùn ɓíɖíiɛɛ múin.”

⁶ Ɔ jèɛɛ, ɓě mɛ dyà ɓě mìɔùn ɓíɖíi, ɓɛ́ ɓě ké kpé-ɓéɖé-Gèɖèpɔ́ɔ̀ sɔ̃ɔ̀ xwíɖíi nì, ɓɛ́ ɔ ké ɓě dyií ɖú ti ɔ mu ti dyéìn nyɛ.

⁷ Ɓě nyí ɓěɛ̀ hwòɖǒ-dyií-gbǎìn-ɖɛ̀ séín ɓěɔ̀ Gèɖèpɔ́ɔ̀ xwa, sepóɛɖé ɔ kɔ̃̀ ɖé ɓě jè gbo.

⁸ Ɓě kpɔ̃ ɓěɛ̀ hwòɖǒ-dyùàɔ̀ dyí. Ɓě mɛ nì ɓɛ́ɖɛ́ kɔ̃, sepóɛɖé nyɔ mɔ̀à ɓě gbo-vɔ̃-nyɔ̀, mɔ̀à Nɔɔ́-nàmàǔn wɛ̃ɛ nì dyi téɛń kà ganìǎ nì kuɖuɛń téà dyiɛ. Ɔ nì nyɔ ɓɛ́ ɔ ké tà kɛɛ dyi mɔ́uń.

⁹ Ɓě mɛ ku dyi ɖé hwìɖǐǐ-taɓa-taɓa mú, ɓɛ́ ɓě ké ɔ gbo vɔ̃, sepóɛɖé ɓě dyuòɛ̀ kà ɓɛ́ ɓěɛ̀ ɖíí Kɛ́ɖɛ́ì ɖeín-sí-nyɔ̀ ɓě nìà ɓóɖó-kpàà dà séín nyɛɛ nì gǎ-dyé-dyé dyúáɖòɔ̀ mú mùɛ̌n nyɛ.

¹⁰ Kɛɛ ɓě ɖǎ gǎ dyé ɓó ti wè múín, nìí, Gèɖèpɔ́ɔ̀ mɔ̀ nyɔ kɔ̃̀à kpeɖeɛ̀-dyíin-nɔ̀mɔ̀-nɔ̀mɔ̀ séín, ɓɛ́ ɔ ɖáà ɓě, ɓɛ́ ɓě kèɔ̀ kè kéà ɔ sè-ná-sèɛ̀ dĩ́ín-dĩ̀ìnɔ̀ mú peɖeìn ɖé Kɛ́ɖɛ́ì múɛɛ, ɔ mìɔùn muɛ nyuùn ɓɛ́ ɓě ké gbɔ hwɛ̀. Ɔ mu ɓě dyi kùìn, ké ɔ mu ɓě kpé nyíìn, ké ɔ mu ɓě hìɖì-kpà nɔ̀mɔ̀ dyíin kɔ̃ poùn.

¹¹ Ɔ mɛ ɓéɖé kpéɔ̀ ɓó sè-ná-sèɛ̀ tiín. Kǎà ɔ mɛ nì.

Cuò-wùɖù

¹² Sɔ̀vénà mɔ̀ nyɔ ḿ ɖáìn hwòɖǒ-kɔ̃-dè-ɖìǐ kɛɛ kpá ḿ gbo, ké ḿ céè céè-ɖɛ̀ nìà kɛ ɓě gbo. Ní mɔ́ ḿ ké ɓě kpéí po, ɓɛ́ ḿ ké zàse nyu kà ɓɛ́ ɖɛ nìà kɛ mɔ̀ Gèɖèpɔ́ɔ̀ kpeɖeɛ̀-dyíin-nɔ̀mɔ̀-nɔ̀mɔ̀ mɔ̀à jǎà kɛ. Ɓě mɛ nyànà dyi gãun-gãun ɖé ɔ mú.

¹³ Cɔ́cì-nyɔ̀ ɓě nìà ɖé Báɓèɖɔ́ùn-hwɔ̀ɖɔ̀ɔ̀ mú, ɓɛ́ Gèɖèpɔ́ɔ̀ ɖǎà wa gã ɖekèɛɛ zà ɓě nyíɔún. Ní dyú-gàà Máà zà ɓě nyíɔún ɖekè.

¹⁴ Ɓě zaìn zàìn nyíɔún ɖé ɖɛ̀ɓɛ̀ǐn-ɖɛ̀ɓɛ̀ǐnɛ̀ wɔ̃-nyá-nyá mú. Ɓě séín mɔ̀à Kɛ́ɖɛ́ìɛ̀ nyɔ ɓěɛɛ, gìɖìǐ mɛ nì ɓě kɔ̃.