1 Jɔ̃́ɔ́ 5 - Ɓǎsɔ́ɔ̀ Báɓòɔ̀

Hwìɖǐǐ-taɓa-taɓa ɖu ɓóɖó-kpàà toún

¹ Nyɔ séín ɓě ɓɛ́ wa poɛ jǎà kà ɓɛ́ Jízɛ̀ mɔ̀ Kɛ́ɖɛ́ìɔ̀ kɛɛ mɔ̀ Gèɖèpɔ́ɔ̀ dyú. Nyɔ ɖɛ̀ɓɛ̀ ɓǎ múɛɛ, ɔ ɖɛ̀ɓɛ̀ ɔ dyú mú ɖekè.

² Kà à nyuɛ dyí dyuòɛ̀ kà à ɖɛ̀ɓɛ̀ Gèɖèpɔ́ɔ̀ dyú ɓě múɛɛ, ɔ kɛ̀. Ɔ mɔ̀, ɔ jǔ ké à dyi Gèɖèpɔ́ɔ̀ mú ɖɛ̀ɓɛ̀, ké à dyi ɖɛ ɓě ɔ cɛ̃ɛ nyuín.

³ Sepóɛɖé ɖɛ mɔ̀ ɖɛ̀ɓɛ̀ǐn-ɖɛ̀ɓɛ̀ǐn ɓɛ́ nyɔ ɓéɖé ɓó Gèɖèpɔ́ɔ̀ bììɛɛ xwíníín nyɛɛ, ɔ kɛ̀. Ɔ mɔ̀, à nyu ɖɛ ɓě ɓɛ́ ɔ cɛ̃ɛ. Ké ɖɛ ɓě ɓɛ́ ɔ cɛ̃ɛ, wa se à bìì xwa kuɛń zi,

⁴ sepóɛɖé Gèɖèpɔ́ɔ̀ wóɖóìn-dyù ɓě ɖu ɓóɖó-kpàà toún. Kà à nyu ɓóɖó-kpàà toún ɖuɛɛ, ɔ kɛ̀. À hwìɖǐǐ-taɓa-taɓaɔ̀ mɔ̀ ɖɛ à ɖùìn ɓóɖó-kpàà toún.

⁵ Nyɛ́ ɓɛ́ìn ɓóɖó-kpàà toún ɖuɛ kɛ́? Ɔ mɔ̀ nyɔ ɓɛ́ ɔ poɛ jǎà kà ɓɛ́ Jízɛ̀ mɔ̀ Gèɖèpɔ́ɔ̀ Dyúɔ̀ kɛɛ ɖòùn.

Zàse ɓá Jízɛ̀ Kɛ́ɖɛ́ì dyíɛ

⁶ Jízɛ̀ Kɛ́ɖɛ́ì mɔ̀ nyɔ dyi ma. Ɔ dyììn ma ɖé ní kè nyɔmɔɔ mú. Ɔ se ma ní ɖòùn mú dyììn, kɛɛ ɔ dyììn ma ní kè nyɔmɔɔ mú. Zùùɔ̀ mɔ̀ nyɔ nyuà ɔ zàseɛ̀, sepóɛɖé Zùùɔ̀ mɔ̀ jǎàɔ̀.

⁷ Zàse-dù tã nì ɓó.

⁸ Wa mɔ̀ Zùùɔ̀ kè níɔ̀ ɔ kè nyɔmɔɔ̀. Ké wa tãɔ̀ wɔ̃́ìn ɖɛ dyúáɖòɔ̀ gbo.

⁹ À kpɔ̃ nyɔǔn-dyù ɓěɛ̀ zàseɔ̀ dyi. Zàse ɓɛ́ Gèɖèpɔ́ɔ̀ nyuɛɛ kpa ɖɛ mìɔ ké ɔ zi nyɔǔn-dyù nììn dyí. Ké zàse ɓɛ́ Gèɖèpɔ́ɔ̀ ɖǎ nyu ɓá ɔ Dyúɔ̀ dyíɛɛ, ɔ nìàǒ wɛ̀.

¹⁰ Nyɔ ɓɛ́ ɔ taɓa Gèɖèpɔ́ɔ̀ Dyú-gààɔ̀ hwìɖǐǐɛɛ ɓéɖé zàse nìà kɛ ɖé ɔ mìɔùn mú. Kɛɛ nyɔ ɓɛ́ ɔ se Gèɖèpɔ́ɔ̀ hwìɖǐǐ taɓaa, ɔ ɖǎ ɔ se-nyɔ̀ mú nyu, sepóɛɖé ɔ se zàse ɓɛ́ Gèɖèpɔ́ɔ̀ ɖǎà nyu ɓá ɔ Dyúɔ̀ dyíɛɛ jǎà po.

¹¹ Zàseɔ̀ kɛà kɛ̀. Gèɖèpɔ́ɔ̀ ɖǎ à sè-ná-sèɛ̀ fɛ̀ɛ̀ nyí. Fɛ̀ɛ̀ nìà kɛ nì ɖé ɔ Dyúɔ̀ mú.

¹² Nyɔ ɓéɖé Dyúɔ̀ kɛɛ ɓéɖé fɛ̀ɛ̀. Nyɔ se Gèɖèpɔ́ɔ̀ Dyú-gààɔ̀ ɓéɖéɛɛ se fɛ̀ɛ̀ ɓéɖé.

Sè-ná-sèɛ̀ fɛ̀ɛ̀

¹³ Ḿ céè ɖɛ nìà kɛ ɖé ɓě mɔ̀ nyɔ taɓaà Gèɖèpɔ́ɔ̀ Dyú-gààɔ̀ nyɛ́nɛ́ɔ̀ hwìɖǐǐɛɛ gbo, ɓɛ́ ɓě kéɛ dyí dyuò kà ɓě ɓéɖé sè-ná-sèɛ̀ fɛ̀ɛ̀ kɛ.

¹⁴ Ké ɖɛ kɔ̃̀ jè à se fɛ̃̀ìn ɓó Gèɖèpɔ́ɔ̀ dyúa kɛɛ, ɔ kɛ̀. À dyi ɔ ɖɛ ɖò zɔ̀ìn, ké ɔ dyi ɔ mɔ́ɔ́-ɖɛ̀ jǔǐn, nìí, ɔ mu à wuɖu wɔ̃́ùn.

¹⁵ Ɖɛ séín ɓɛ́ à zɔ̀ìn ɔ kɛɛ, ɔ wɔ̃́ à wuɖuɔ̀ ní. Kà à dyuòà dyí kà ɔ nìà ná kɛɛ, à dyuòɛ̀ kà ɔ nyí à ɖɛ ɓɛ́ à zɔ̀ìn ɔ kɛ.

¹⁶ Ɔ jǔ ké nyɔ ɖò dyi ɔ ɖíí-gàà ɖò nàmàǔn ɓɛ́ ɔ ní dyà mɛ́-mɛ́ ɖé mánáín nyɛɛ nyuɛ dyéín, ɔ mɛ ɓaà, ké Gèɖèpɔ́ɔ̀ mu ɔ fɛ̀ɛ̀ nyíìn. Wuɖu nìà kɛ ɓá nyɔ ɓě ɓɛ́ wa nyuà nàmàǔn, ké ɔ ní dyà mɛ́-mɛ́ɛ dyí. Kɛɛ nàmàǔn ɖò nì ɓó, ké ɖé ɔ mánáín nyɛɛ ɔ dyà mɛ́-mɛ́. Ḿ se níiń, nyɔ ɖò mɛ ɓaà ɓó nyɔa jè.

¹⁷ Ɖɛ séín se dyí sɛ́ɖɛ́ìn nyɛɛ nyu-nyu mɔ̀ nàmàǔn, kɛɛ nàmàǔn séín ní dyà mɛ́-mɛ́ ɖé ɔ mánáín.

¹⁸ À dyuòɛ̀ dyí kà ɓɛ́ Gèɖèpɔ́ɔ̀ wóɖóìn-dyù ɓěɔ̀ ɖò ní nyu nàmàǔn kánáá pūɛ. Gèɖèpɔ́ɔ̀ Dyúɔ̀ gmɔ̀ ɔ gbo, ké Ɖɛ-gbà-nyu-nyɔ̀ɔ̀ se ɔ ɖɛ ɖò bũ̌ nyuɛ ɓɛ́ìn.

¹⁹ À dyuòɛ̀ dyí kà ɓɛ́ à mɔ̀ Gèɖèpɔ́ɔ̀ nyɔ ɓěɛ, ké kà Ɖɛ-gbà-nyu-nyɔ̀ɔ̀ kɔ̃̀ ɓóɖó-kpà gànáà kpé kɔ̃ún wɛ̃.

²⁰ À dyuòɛ̀ dyí kà ɓɛ́ Gèɖèpɔ́ɔ̀ Dyú-gààɔ̀ ɖǎ dyi, ké ɔ ɖǎ à fɔ̀nɔ̀-hwòɖǒ nyí, ɓɛ́ à ké jǎà Gèɖèpɔ́ɔ̀ dyí dyuò wɛ. À nì ɖé jǎà Gèɖèpɔ́ɔ̀ mú. À nì ɖé ɔ Dyú Jízɛ̀ Kɛ́ɖɛ́ì mú. Jǎà Gèɖèpɔ́ɔ̀ kɛ̀, ké sè-ná-sèɛ̀ fɛ̀ɛ̀ɔ̀ kɛ̀.

²¹ Ní dyú ɓě, ɓě mɛ gmɔ̀ ɓě mìɔùn dyí, ɓɛ́ ɓě ní kɔ̃̀ ɖà kũùn-kpò gbo mu.